1-2. Mutala wa bo Angelito ususueza mañi ni mañi waluna kuezañi?

KANA bashemi bamina ki Lipaki za Jehova? Haiba ki cwalo, muhupule kuli taba yeo haitalusi kuli ni mina mu balikani bahae kabakala bashemi bamina. Ibe kuli bashemi baluna balapela Mulimu kamba kutokwa, mañi ni mañi waluna uswanela kutiisa silikani sahae ni Jehova.

² Halunyakisiseñi mutala wa muzwale yabizwa Angelito. Lubasi lwahae kaufela ki Lipaki. Nihakulicwalo, muzwale yo hanaasali mwanana, naasaikutwangi kuli naanani silikani sesitiile ni Mulimu. Utalusa kuli: “Nenisebeleza Jehova ka libaka feela la kuli nenibata kulikanyisa lubasi lwaka.” Niteñi, bo Angelito baikatulela kutanda nako yeñata kubala Linzwi la Mulimu, kunahanisisa zebabala, ni kulapelanga ku Jehova kamita. Kueza cwalo neku batusize cwañi? Bo Angelito batalusa kuli: “Nenilemuhile kuli nzila feela yenekona kunitusa kuba bukaufi ni Jehova, yena Ndate yalilato, ki hane nika muziba na muñi.” Mutala wa bo Angelito utahisa kuli luipuze lipuzo za butokwa ze: Kana kuziba litaba zeñwi ka za Jehova kutalusa kuli lwamuziba luli? Mi luswanela kuezañi kuli luzibe hande Jehova?

3. Kana kuziba litaba zeñwi ka za Jehova kutalusa kuli lwamuziba luli?

³ Lukana lwanahana kuli lwaziba Jehova bakeñisa kuli lwaziba libizo lahae mi lwaziba litaba zeñwi zabulezi kamba zaezize. Kono kuziba Jehova kuama lika zeñwi. Lutokwa kutanda  nako yeñata kuituta ka za Jehova ni tulemeno twahae totunde. Kueza cwalo kuka lutusa kuutwisisa libaka lelitahisanga kuli Jehova abulele ni kueza lika zeñwi. Kuziba mwanahanela Jehova, kuka lutusa kuziba haiba watabela lika zelunahana, likatulo zaluna, ni likezo zaluna. Hase luzibile lika zabata Jehova kuli lueze, luswanela kulieza.

4. Kunyakisisa mutala wa baana bababulezwi mwa Bibele kukona kulutusa cwañi?

⁴ Batu babañwi bakona kulusheununa bakeñisa kuli lubata kusebeleza Jehova mi bakona kululwanisa hahulu sihulu haiba lubata kukala kuswalisana ni batu bahae. Kono haiba lusepa Jehova, haana kuluyubeka. Kueza cwalo kukatahisa kuli lube ni silikani sesitiile ni Mulimu, sesika ina kuya kuile. Kana luli lwakona kuziba Jehova ka nzila yecwalo? Eni lwakona! Mutala oba lutomezi baana babasika petahala babacwale ka Mushe ni Mulena Davida ubonisa kuli kwakonahala. Halunze lunyakisisa lika zene baezize, lukaalaba lipuzo zepeli ze: Ki lika mañi zene batusize kuziba Jehova? Mi lukona kuitutañi kwa mutala wabona?

5. Ki lika mañi zanaaketile kueza Mushe?

⁵ Mushe naaikatulezi kusebeleza Mulimu. Mushe hanaakwanisize lilimo zebato ba ze 40, naaketile kuswalisana ni batu ba Mulimu, bona Maheberu, kufita kuzibahala sina “mwanaa mukwae, mwanaa Faro.” (Maheb. 11:24) Mushe naasiile situlo sesipahami sanaanani sona. Hanaaikatulezi kuswalisana ni Maheberu, bona bane bali batanga mwa Egepita, naaziba kuli naakanyemisa Faro, yena mubusi yamaata wa Egepita, yanaangiwa sina mulimu. Kaniti luli, Mushe naanani tumelo yetuna! Mushe naasepile Jehova. Kusepa Jehova neku mutusize kuba ni silikani sesinde ni yena mwa bupilo bwahae kaufela.—Liprov. 3:5.

6. Luitutañi kwa mutala wa Mushe?

⁶ Ki tuto mañi yeluituta? Ka kuswana ni Mushe, kaufelaa luna lutokwa kuikatulela kuli lukasebeleza Mulimu ni kuswalisana ni batu bahae kamba kutokwa. Mwendi lukatokwa kuitoboha lika zeñwi kuli lusebeleze Mulimu, mi kueza cwalo kukona kutahisa kuli batu babasa zibi Jehova balulwanise. Kono haiba lusepa Ndataa luna wa kwa lihalimu, lwakona kukolwa kuli uka lutusa.

7-8. Ki lika mañi zanaazwezipili kuituta Mushe?

⁷ Mushe naazwezipili kuituta ka za tulemeno twa Jehova ni kueza tato yahae. Ka mutala, Mulimu hanaa mulaezi kuli aetelele sicaba sa Isilaele kubazwisa mwa Egepita mone bali batanga, Mushe naasika isepa mi naakuta-kutezi kubulelela Jehova kuli naasike akona kupeta buikalabelo bo. Mulimu naamuezize ka mukekecima mi naamutusize. (Exo. 4:10-16) Kabakaleo, Mushe naakonile kubulelela Faro likatulo za Mulimu. Hasamulaho, Mushe naaiponezi maata a Jehova, muta Jehova naalamulezi Maisilaele ni kuyundisa Faro ni mpi yahae mwa Liwate Lelifubelu.—Exo. 14:26-31; Samu 136:15.

⁸ Mushe haasaetelezi Maisilaele kuzwa mwa Egepita, Maisilaele nebakalile kuba ni litongoko. Nihakulicwalo, Mushe naalemuhile mo Jehova naaboniselize pilu-telele hanaasebelisana ni batu banaalukuluzi mwa butanga. (Samu 78:40-43) Mushe hape naaiponezi kuli Jehova unani buikokobezo hanaa muutwezi ni kucinca muhupulo wahae.—Exo. 32:9-14.

9. Ka kuya ka liñolo la Maheberu 11:27, silikani sa Mushe ni Jehova nesili cwañi?

 ⁹ Mushe haasaetelezi Maisilaele kubazwisa mwa butanga, silikani sahae ni Jehova satiya hahulu kuli mane nekuswana feela inge kuli naakona kubona Ndatahe wa kwa lihalimu. (Mubale Maheberu 11:27.) Bibele ibonisa kuli silikani sabona nesitiile haibulela kuli: “Jehova naabulela ni Mushe pata ka pata, sina mutu mwakona kuambolela ni mutu yomuñwi.”—Exo. 33:11.

10. Ki lika mañi zeluswanela kueza kuli luzibe hande Jehova?

¹⁰ Ki tuto mañi yeluituta? Kuli luzibe hande Jehova, halutokwi feela kuziba tulemeno twahae, kono hape luswanela kueza tato yahae. Kacenu, Jehova ubata kuli “batu ba mufuta kaufela bapiliswe mi babe ni zibo yenepahezi ya kuziba niti.” (1 Tim. 2:3, 4) Nzila yeñwi yelukona kueza ka yona tato ya Mulimu ki kutusa batu kuziba Jehova.

11. Kuluta babañwi ka za Jehova kulutusa cwañi kumuziba hande?

¹¹ Hañata, halutusa batu kuziba Jehova, lufitanga fa kumuziba hande. Ka mutala, luiponelanga kuli Jehova unani mukekecima haalutusa kufumana batu babanani lipilu zende. (Joa. 6:44; Lik. 13:48) Luiponelanga kuli Linzwi la Mulimu linani maata halubona batu boluituta ni bona Bibele habacinca mikwa yabona ni kuapala butu bobunca. (Makolo. 3:9, 10) Hape luiponelanga pilu-tele ya Mulimu hazwelapili kufa batu babañata ba mwa kalulo yaluna ya simu kolo ya kuituta ka za hae kuli bapunyuhe.—Maro. 10:13-15.

12. Ka kuya ka liñolo la Exoda 33:13, ki nto mañi yanaakupile Mushe, mi ki kabakalañi?

¹² Mushe naasika keshebisa silikani sahae ni Jehova. Mulimu niha naatusize Mushe kueza limakazo, Mushe naakupile Jehova kuli amutuse kumuziba hande. (Mubale Exoda 33:13.) Nihaike kuli Mushe naali mwa lilimo za ma 80 hanaafitisize kupo yeo, naaziba kuli naatokwa kuituta zeñata ka za Ndatahe yalilato wa kwa lihalimu.

13. Ki ifi nzila yeñwi yelukona kubonisa ka yona kuli lwaitebuha silikani saluna ni Mulimu?

¹³ Ki tuto mañi yeluituta? Kusina taba kuli selusebelelize Jehova ka nako yekuma kai, haluswaneli kukeshebisa silikani saluna ni yena. Nzila yeñwi yende hahulu yelukona kubonisa ka yona kuli lwaitebuha silikani saluna ni Mulimu ki ka kuambolanga ni yena ka tapelo.

14. Ki kabakalañi kulapela hakukona kulutusa kuziba hande Jehova?

¹⁴ Silikani satiyanga haiba batu balukuluha kuambolisana. Kacwalo, kuli musutelele ku Mulimu, mulapelange ku yena kamita, mi mumutalusezange lika kaufela zemunahana ni momuikutwela. (Maef. 6:18) Bo Krista babapila kwa Turkey batalusa kuli: “Nako kaufela hane nitalusezanga Jehova maikuto aka ka tapelo ni kubona mwanaa nituselize, lilato laka ku yena nelitiyanga mi neni musepanga hahulu. Kubona mo Jehova naaalabelanga litapelo zaka neku nitusize kumuunga sina Ndate ni Mulikani.”

15. Jehova naatalusize cwañi Mulena Davida?

¹⁵ Mulena Davida naapepezwi mwa sicaba sene silapela Jehova Mulimu. Kono Davida naasalapeli Mulimu ka kubata feela kulikanyisa lubasi lwahae. Yena muñi naaikezelize silikani ni Mulimu, mi Jehova naamulatile hahulu. Jehova yena ka sibili naatalusize kuli Davida naali “muuna yatabisa pilu [yahae].” (Lik. 13:22) Ki lika mañi zanaaezize Davida kuli abe ni silikani sesitiile cwalo ni Jehova?

16. Davida naaitutileñi ka za Jehova kwa lika zebupilwe?

 ¹⁶ Davida naaitutile za Jehova kwa lika zebupilwe. Davida hanaasali mwanana naatandanga nako yeñata mwa naheñi, inzaa lisa lingu za ndatahe. Kubonahala kuli Davida naakalile kunahanisisa za pupo ya Jehova ka nako yeo. Ka mutala, Davida hanaatalimanga kwahalimu busihu, naasabonangi feela linaleli zeñata-ñata kono hape naalemuhanga ni tulemeno twa Mubupi wazona. Davida naasusumelizwe kuñola kuli: “Mahalimu abulela kanya ya Mulimu; mbyumbyulu izibahaza misebezi ya mazoho ahae. Zabulela, lizazi ni lizazi, mi lipatulula zibo, busihu ni busihu.” (Samu 19:1, 2) Davida hanaanahanisisize mo batu babupezwi ka nzila yekomokisa, naalemuhile butali bobutuna bwanani bona Jehova. (Samu 139:14) Davida hanaanahanisisize lika kaufela zaezize Jehova, naaikutwile kuli Jehova upahami hahulu kumufita.—Samu 139:6.

17. Kubuha lika zebupilwe kukona kulutusa cwañi?

¹⁷ Ki tuto mañi yeluituta? Mutabele kubuha pupo. Mubange ni nako ya kubuha lika zende zabupile Jehova mwa lifasi; muitebuhe pupo! Zazi ni zazi munahanisisange zemukona kuituta ka za Jehova kwa lika zebupilwe zecwale ka licalo, limunanu, ni batu. Haiba mueza cwalo, zazi ni zazi mukaituta zeñata ka za Ndataa mina yalilato. (Maro. 1:20) Mi mukalemuha kuli lilato lamina ku yena likazwelapili kuhula zazi ni zazi.

18. Ka kuya ka Samu 18, Davida naalemuhile nto mañi?

¹⁸ Davida naalemuhile kuli Jehova ki yena yanaa mutusanga. Ka mutala, Davida hanaasilelelize lingu za ndatahe kwa tau ni bere naalemuhile kuli Jehova neli yena yanaa mutusize kubulaya libatana zesabisa zeo. Davida hanaatuzi singangalume sesibizwa Goliati, naaiponezi hande kuli Jehova naamuetelela. (1 Sam. 17:37) Mi Davida hanaabalehile ku Mulena Saule yanaabata kumubulaya bakeñisa kuli naamushwela muna, naalemuhile kuli Jehova ki yena yanaa mutusize kueza cwalo. (Samu 18, manzwi a fahalimu) Kambe Davida naanani buikuhumuso naakanahana kuli naakonile kupeta zeo kaufela ka butali bwahae. Kono Davida naaikokobeza; kacwalo, naalemuhile kuli Jehova ki yena yanaa mutusanga.—Samu 138:6.

19. Luitutañi kwa mutala wa Davida?

¹⁹ Ki tuto mañi yeluituta? Kunani lika zeñwi zelutokwa kueza kwandaa kukupa feela tuso ya Jehova. Hape luswanela kulemuha haalutusa ni mwalutusezanga. Haiba luikokobeza, lukalemuha kuli kunani lika zeñwi zelusa koni kueza mi Jehova wakona kulutusa kueza lika zeo. Mi nako kaufela halubona mwalutuseza Jehova, silikani saluna ni yena sikatiya. Muzwale Isaac yapila kwa Fiji, yasaasebelelize Jehova ka lilimo zeñata, uiponezi buniti bwa taba yeo. Muzwale yo utalusa kuli: “Haniiheta kwamulaho, nilemuha kuli Jehova uzwezipili kunitusa kuzwa feela nako yenikalisa kuituta Bibele kuto fita ni kacenu. Taba yeo itahisize kuli niinge Jehova kuba wa luli ku na.”

20. Luitutañi ka za silikani sa Davida ni Mulimu?

²⁰ Davida naalikanyisize tulemeno twa Jehova. Jehova naalubupile ni buikoneli bwa kulikanyisa tulemeno twahae. (Gen. 1:26) Haiba luituta za tulemeno twanani tona Jehova, lukakona kumulikanyisa. Davida naazibile hande Ndatahe wa kwa lihalimu; kacwalo, naalikanyisize tulemeno twahae hanaasebelisana ni babañwi. Halunyakisiseñi mutala omuñwi. Davida naafoselize Jehova  hanaabukile ni Bati-sheba ni kubulaisisa muunaa hae kono Jehova naamuswalezi. (2 Sam. 11:1-4, 15) Jehova naamushemubile bakeñisa kuli Davida naamulikanyisize mi naashemubanga babañwi. Bakeñisa kuli Davida naanani silikani sesinde ni Jehova, Maisilaele neba mulata hahulu mi Jehova naaitusisize yena sina mutala one baswanela kulikanyisa malena ba Isilaele.—1 Mal. 15:11; 2 Mal. 14:1-3.

21. Ka kuya ka liñolo la Maefese 4:24 ni Maefese 5:1, ki kabakalañi ‘kulikanyisa Mulimu’ hakuli kwa butokwa?

²¹ Ki tuto mañi yeluituta? Lutokwa ‘kulikanyisa Mulimu.’ Halulikanyisa Mulimu, lukafumana tuso mi lukafita fa kumuziba hande. Mi haiba lulikanyisa tulemeno twahae, lukabonisa kuli lu bana bahae.—Mubale Maefese 4:24; 5:1.

22-23. Kusebelisa zeluituta ka za Jehova kuka lutusa cwañi?

²² Sina mose lunyakisiselize, lwakona kuituta ka za Jehova ka kunahanisisa lika zabupile ni kubala Linzwi lahae, yona Bibele. Mwa buka yeipitezi yeo kunani mitala ya batanga ba Mulimu babasepahala babañata bolukona kulikanyisa, babacwale ka Mushe ni Davida. Jehova upetile kalulo yahae. Ni luna lutokwa kueza molukonela kaufela kuituta ka za hae.

²³ Lukazwelapili kuituta ka za Jehova. (Muek. 3:11) Sa butokwa nikufita ki kusebelisa zeluituta isiñi kuziba feela litaba ka za hae. Haiba lusebelisa zeluituta ni kulikanyisa Ndataa luna yalilato, ukazwelapili kusutelela ku luna. (Jak. 4:8) Jehova, ka kuitusisa Linzwi lahae, ulusepisa kuli haana kuyubeka batu bababata kumuziba.