TABA YA KUITUTA 7
PINA 15 Hamulumbe Mweli wa Jehova!
Kuswalelwa ki Jehova Kukona Kumitusa Cwañi?
“Kakuli wena uswalela libi habuniti.”—SAMU 130:4.
ZEKAITUTIWA
Kunyakisisa lipulelo za swanisezo zeitusisizwe mwa Bibele, kuka lutusa kuitebuha hahulu kuli Jehova uswalelanga habuniti libi za mañi ni mañi waluna.
1. Ki kabakalañi hakukona kuba taata kuziba zatalusa mutu habulela kuli umiswalezi?
“NIMISWALEZI.” Manzwi ao akona kuluomba-omba, sihulu haiba lwaziba kuli neluutwisize mutu yomuñwi butuku ka manzwi kamba ka likezo! Kono pulelo yeli, “nimiswalezi,” italusañi? Kana yemufoselize utalusa kuli silikani samina ni yena sisatiile? Kamba kana utalusa feela kuli hatabeli kuzwelapili kuambola ka za taba yeo? Batu bakona kutalusa lika zeshutana-shutana hababulela kuli bamiswalezi.
2. Nzila yaswalelanga ka yona Jehova italusizwe cwañi mwa Mañolo? (Mubone ni litaluso ze kwatasi.)
2 Jehova uluswalelanga ka nzila yeshutanela kwahule ni yebaswalelanga ka yona batu. Jehova uluswalelanga ka nzila yeipitezi. Muñoli yomuñwi wa lisamu naabulezi cwana ka za Jehova: “Kakuli wena uswalela libi habuniti, kuli usabiwe.” a (Samu 130:4) Kaniti luli, Jehova ‘uswalelanga libi habuniti.’ Ulutomezi mutala omunde hahulu obonisa sekutalusa kuswalela. Mwa litimana zeñwi za Mañolo A Siheberu, bañoli ba Bibele batalusa nzila yaswalelanga ka yona Jehova ka kuitusisa linzwi lelisa itusiswangi hakutaluswa nzila yebaswalelanga ka yona batu.
3. Nzila yaswalelanga ka yona Jehova ishutana cwañi ni yeluswalelanga ka yona? (Isaya 55:6, 7)
3 Jehova haswalela mutu, wazwisanga libi za mutu yo ka kutala. Mi mutu yo wakona kuba ni silikani sesitiile hape ni Jehova. Lwaitumela kuli Jehova uzwelangapili kuluswalela ka kutala.—Mubale Isaya 55:6, 7.
4. Jehova ulutusanga cwañi kuutwisisa sekutalusa kuswalela habuniti?
4 Haiba nzila yaswalelanga ka yona Jehova yashutana ni nzila yeluswalelanga ka yona, lukona kuutwisisa cwañi sekutalusa kuswalela habuniti ka kuba batu babasika petahala? Jehova ulubonisa nzila yaluswalelanga ka yona ka kuitusisa lipulelo zaswanisezo. Mwa taba ye, lukanyakisisa zeñwi za lipulelo zeo. Lipulelo zeo lika lutusa kulemuha mo Jehova azwisezanga sibi ni mwalutusezanga kuba ni silikani sesinde ni yena hape. Halunze lunyakisisa liswanisezo zeo, lukaitebuha hahulu Ndataa luna yasishemo, ili yaluswalelanga mwa linzila zeñata.
JEHOVA WAZWISANGA LIBI ZALUNA
5. Ki lika mañi zeezahalanga Jehova haswalela libi zaluna?
5 Mwa Bibele, libi hañata liswanisezwanga kwa mishimbo yebukiti. Mulena Davida naatalusize libi zahae cwana: “Lifoso zaka linizengelezi fa toho; liniimezi hahulu inge mushimbo obukiti.” (Samu 38:4) Kono Jehova waswalelanga libi za baezalibi bababakile. (Samu 25:18; 32:5) Linzwi la Siheberu lelitolokilwe kuli ‘kuswalela’ litalusa “kunanula” kamba “kushimba.” Kacwalo, Jehova haswalela libi zaluna, kuswana feela inge kuli unanuzi mushimbo obukiti one lukulekile fa maheta aluna.
‘Kuswalelwa’ (Samu 32:5)
6. Jehova uisanga libi zaluna kwahule cwañi ni luna?
6 Bibele iitusisa pulelo yeñwi ya swanisezo yebonisa kuli Jehova ushimbanga libi zaluna ni kuliisa kwahule hahulu ni luna. Samu 103:12, ilubulelela kuli: “Sina mapazulelo haainzi kwahule ni malikelelo, ubeile cwalo lifoso zaluna kwahule ni luna.” Upa ikwahule hahulu ni wiko. Libaka zepeli zeo halikoni feela kukopana. Ka mubulelelo omuñwi, Jehova uisanga libi zaluna kwahule hahulu ni luna. Taba yeo ilukolwisa kuli Jehova waluswalelanga ka kutala!
“Sina mapazulelo haainzi kwahule ni malikelelo” (Samu 103:12)
7. Bibele italusa cwañi mwaezezanga libi zaluna Jehova? (Mika 7:18, 19)
7 Nihaike kuli Jehova uisanga libi zaluna kwahule hahulu ka swanisezo, kana uzwelangapili kulibuluka? Batili. Mulena Ezekiasi naañozi cwana ka za Jehova: “Unepezi libi zaka kaufela kwamulaho wahao.” Kamba sina mokuboniselizwe mwa litaluso ze kwatasi kuli, “neuzwisize libi zaka kaufela fapilaa hao.” (Isa. 38:9, 17; litaluso ze kwatasi) Pulelo ya swanisezo ye ibonisa kuli Jehova unepelanga kwahule libi za batu bababakile mi hatalimangi kwateñi. Pulelo yeo hape ikona kutolokiwa kuli: “Uezize inge kuli nalikuba nikufoseze.” Bibele izwelapili kukoñomeka sisupo seo ka kuitusisa pulelo yeñwi ya swanisezo yeñozwi kwa Mika 7:18, 19. (Mubale.) Litimana zeo libulela kuli Jehova unepelanga libi zaluna mwa buliba bwa liwate. Kwaikale, nekuli hahulu taata kuli mutu afumane nto yeñwi yenepezwi mwa buliba bwa liwate.
“Unepezi libi zaka kaufela kwamulaho wahao” (Isa. 38:17)
“Ukanepela libi zabona kaufela mwa buliba bwa liwate” (Mika 7:19)
8. Ki lika mañi zese luitutile?
8 Lipulelo za swanisezo zeo, lilulutile kuli Jehova haswalela libi zaluna, uezanga cwalo ka kutala mi halutokwi kuzwelapili kuikutwa mulatu. Sina feela mwanaabulelezi Davida, “tabo ki ya babaswalezwi likezo zabona zemaswe ni babakwahelezwi libi zabona; tabo ki ya mutu yo Jehova haana kuhupula sibi sahae.” (Maro. 4:7, 8) Seo ki sona sekutalusa kuswalelwa habuniti!
JEHOVA WATAKULANGA LIBI ZALUNA
9. Ki lipulelo mañi za swanisezo zaitusisize Jehova kuli alutuse kulemuha kuli uluswalelanga ka kutala?
9 Jehova uitusisa pulelo yeñwi ya swanisezo kuli alutuse kuitebuha mwatakulelanga libi za batu bababakile, ka kuitusisa sitabelo sa tiululo. Kuswana feela inge kuli Jehova utapisa muezalibi ni kumukenisa kwa libi. Taba yeo itahisa kuli muezalibi yo akeniswe. (Samu 51:7; Isa. 4:4; Jer. 33:8) Jehova yena kasibili ulutaluseza zezwanga mwakueza cwalo, uli: “Libi zamina niha likaba za bufubelu bobutona, likafetuha zesweu sina litwa; niha likaba zefubelu sina lisila la bufubelu bobutibile, likafetuha sina boya bwa ngu.” (Isa. 1:18) Kutaata hahulu kuzwisa sitampa sa bufubelu bobutona kamba bobutibile fa lisila. Kacwalo, ka kuitusisa pulelo ya swanisezo yeo, Jehova ulukolwisa kuli wakona kulutapisa ni kulukenisa kwa libi ka kutala kuli lisike zazwelapili kubateñi.
“Libi zamina niha likaba za bufubelu bobutona, likafetuha zesweu sina litwa” (Isa. 1:18)
10. Ki pulelo ifi yeñwi ya swanisezo yaitusisa Jehova kuli ataluse nzila yaluswalelanga ka yona?
10 Sina molunyakisiselize mwa taba yefelile, libi hape liswanisezwa kwa likoloti. (Mat. 6:12; Luka 11:4) Nako kaufela halufoseza Jehova, kuswana feela inge kuli sikoloti saluna saekezeha. Luba ni sikoloti sesituna ku yena! Kono Jehova haluswalela, kuswana feela inge kuli waswalela sikoloti saluna mi halusa tokwa kulifa sikoloti seo. Hatokwi kuli lulifele libi zaluna zaluswalezi. Sina feela mutu habanga ni tabo haswalezwi sikoloti sahae, ni luna lubanga ni tabo Jehova haluswalela!
“Uluswalele lifoso zaluna” (Mat. 6:12)
11. Bibele italusañi haibulela kuli libi zaluna ‘litakuzwi’? (Likezo 3:19)
11 Jehova haswalelangi feela likoloti kamba libi zaluna, kono hape walitakulanga. (Mubale Likezo 3:19.) Ka mutala, muunge kuli mutu uswaya palo ya masheleñi emukolotile. Nihakulicwalo, palo ya masheleñi ao isabonahala. Kono kutakula kona kwashutana. Kuli luutwisise hande pulelo ya swanisezo yeo, luswanela kuhupula kuli mwa linako za kwamulaho inki yeneitusiswanga neli yeezizwe ka kukopanya musili, njilela, ni mezi. Mutu naakona kuitusisa siponji sesikolobile kuli atakule zeñozwi. Kacwalo, sikoloti hase ‘sitakuzwi,’ nesisa koni kubonahala hape nikamuta. Zeneñozwi nelisa koni kubonwa nikamuta. Nekuswana feela inge kuli nekusina sikoloti. Kwatabisa luli kuziba kuli Jehova haswalelangi feela libi zaluna kono hape walitakulanga ka kutala!—Samu 51:9.
“Ilikuli libi zamina litakulwe” (Lik. 3:19)
12. Luitutañi kwa pulelo ya swanisezo ya lilu lelinani mukita?
12 Jehova uitusisa pulelo yeñwi ya swanisezo kuli alutuse kuziba mwatakulelanga libi. Ubulela kuli: “Nikafelisa lifoso zahao sina yalikwahela ka lilu, ni libi zahao sina yalikwahela ka lilu lelinani mukita.” (Isa. 44:22) Jehova haswalela libi zaluna, kuswana feela inge kuli uitusisa lilu lelinani mukita kukwahela libi zaluna mi halisana kubonahala hape.
“Nikafelisa lifoso zahao sina yalikwahela ka lilu” (Isa. 44:22)
13. Luikutwanga cwañi Jehova haswalela libi zaluna?
13 Luitutañi kwa lipulelo za swanisezo zeo? Jehova haswalela libi zaluna, haluswaneli kuzwelapili kuikutwa mulatu mwa bupilo bwaluna kaufela inge kuli lusanani sitampa sa libi zeo. Ka mali a Jesu Kreste, libi zaluna liswalezwi ka kutala. Jehova haswalela sibi saluna, kuswana feela inge kuli nelusika eza sibi seo. Taba yeo ibonisa kuli Jehova uluswalelanga habuniti halubakela libi zaluna.
JEHOVA WALUTUSANGA KUBA NI SILIKANI SESINDE NI YENA HAPE
Ndataa luna wa kwa lihalimu haluswalela, ulutusanga kuba ni silikani sesinde ni yena (Mubone paragilafu 14)
14. Ki kabakalañi halukona kukolwa kuli Jehova uka luswalela ka kutala? (Mubone ni maswaniso.)
14 Jehova haluswalela habuniti, ulutusanga kuba ni silikani sesitiile ni yena hape. Taba yeo ilutusa kuli lusike lwazwelapili kuikutwa mulatu. Haluswaneli kunahana kuli Jehova usazwelapili kuhupula mafosisa ene luezize, ni kuli uka lufa koto ka nzila yeñwi. Taba yeo haikoni feela kuezahala. Ki kabakalañi halukona kusepa Jehova halubulelela kuli uluswalezi? Jehova naataluselize mupolofita Jeremia kuli: “Nikaswalela bufosi bwabona, mi hanisana kuhupula sibi sabona.” (Jer. 31:34) Muapositola Paulusi naaama kwa manzwi aswana ao, hanaañozi kuli: “Hanisana kuhupula libi zabona.” (Maheb. 8:12) Kono taba yeo italusañi luli?
“Hanisana kuhupula sibi sabona” (Jer. 31:34)
15. Taba ya kuli Jehova hasaahupula libi zaluna italusañi?
15 Bibele haiitusisa pulelo ya “kuhupula,” kamita haitalusi kuli mutu uswanela kuhupula nto yeñwi kamba kuinahanisisa. Kono hape ikona kutalusa kuli mutu uswanela kuunga muhato. Sikebenga sene sikokotezwi kwatuko ni Jesu nesibulezi kuli: “Jesu, unihupule hauka kena mwa Mubuso wahao.” (Luka 23:42, 43) Sikebenga seo nesikupa Jesu kuli asiezeze nto yeñwi. Kalabo ya Jesu neibonisa kuli ukaanga muhato wa kuzusa sikebenga seo. Kacwalo, Jehova haabulela kuli haasahupula libi zaluna, utalusa kuli uluswalezi mi haana kuunga muhato kwapili kuli alufe koto kabakala libi zaluna.
16. Bibele italusa cwañi moluikutwelanga Jehova haluswalela habuniti?
16 Bibele iitusisa pulelo yeñwi ya swanisezo kuli ilutuse kuutwisisa kuli Jehova haluswalela habuniti luikutwanga kulukuluha. Bakeñisa kuli halusika petahala, luswana sina “batanga ba sibi.” Kono bakeñisa kuli Jehova uluswalezi, luswana sina batanga ‘babalukuluzwi kwa sibi.’ (Maro. 6:17, 18; Sin. 1:5) Kaniti luli, kuziba kuli Jehova uluswalezi, kutahisa kuli lube ni tabo sina feela mutanga mwaikutwelanga halukuluzwi.
“Nemulukuluzwi kwa sibi” (Maro. 6:18)
17. Kuswalelwa kutahisanga cwañi kuli lufoliswe? (Isaya 53:5)
17 Mubale Isaya 53:5. Pulelo ya swanisezo ya mafelelezo yeluka nyakisisa ilubapanya kwa batu babakula butuku bobubulaya. Kabakala sitabelo sa tiululo sanaalukisize Jehova ka kulufa Mwanaa hae, kuswana feela inge kuli lufolisizwe. (1 Pit. 2:24) Tiululo ikonahalisa kuli lube ni silikani sesinde ni Jehova hape, ili sene sisinyizwe kabakala kukula kwa moya. Sina feela mutu yafolisizwe kwa butuku bobutuna habanga ni tabo yetuna, ni luna lubanga ni tabo halufoliswa kwa moya ni kuba ni silikani sesinde ni Jehova hape, kabakala kuli uluswalezi.
“Kabakala mañiba ahae, lwafoliswa” (Isa. 53:5)
MOLUTUSEZWA KABAKALA KULI JEHOVA ULUSWALEZI
18. Luitutileñi kwa lipulelo za swanisezo za mwa Bibele zelunyakisisize, ili zebonisa nzila yaswalelanga ka yona Jehova? (Mubone ni mbokisi yeli, “Nzila Yaluswalelanga ka Yona Jehova.”)
18 Luitutileñi kwa lipulelo za swanisezo za mwa Bibele zelunyakisisize, ili zebonisa nzila yaswalelanga ka yona Jehova? Jehova haswalela libi zaluna, uezanga cwalo ka kutala mi hazwelangipili kulihupula. Kacwalo, lwakona kuba ni silikani sesinde ni Ndataa luna wa kwa lihalimu. Ka nako yeswana, lwaziba kuli kuswalelwa habuniti ki mpo. Jehova ulufile mpo yeo kabakala lilato ni sishemo sahae kwa batu babasika petahala. Haki tukelo yelunani yona.—Maro. 3:24.
19. (a) Ki nto mañi yeluswanela kuitumela? (Maroma 4:8) (b) Lukanyakisisañi mwa taba yetatama?
19 Mubale Maroma 4:8. Mañi ni mañi waluna uswanela kuitumela kuli Jehova ki Mulimu ‘yaswalela libi habuniti’! (Samu 130:4) Nihakulicwalo, haiba lubata kuswalelwa ki Jehova, luswanela kueza nto yeñwi ya butokwa. Jesu naabulezi kuli: “Haiba musaswaleli batu lifoso zabona, Ndataa mina ni yena hana kumiswalela lifoso zamina.” (Mat. 6:14, 15) Kacwalo, luswanela kulikanyisa Jehova ka kuswalela babañwi. Kono lukona kueza cwañi cwalo? Mwa taba yetatama, lukanyakisisa molukona kuezeza cwalo.
PINA 46 Lwaitumela ku Wena, Jehova
a Pulelo ya Siheberu yetolokilwe kuli “kuswalela,” ifa muhupulo wa kuli ki yona feela nzila inosi ya kuswalela habuniti nihaike kuli kunani linzila zeñwi za kuswalela ka zona. Mwa litoloko zeñata za Bibele taba ye haisika taluswa hande, kono Bibele ya Toloko ya Lifasi Lelinca yona italusize hande taba yeo kwa Samu 130:4.
