1-2. (a) Jehova ulemuhangañi habona batu babañata-ñata babafumanehile kwa Mulalelo wa Mulena? (Mubone siswaniso sesi fa likepe la fahalimu.) (b) Lukanyakisisañi mwa taba ye?

MUNAHANE zabonanga Jehova batu babañata mwa lifasi kaufela habakopananga hamoho kueza Mulalelo wa Mulena. Haaisezangi feela pilu kwa sikwata sa batu babañata babakopani, kono ulemuhanga mañi ni mañi yaliteñi. Ka mutala, waziba batu babafumanehanga fa Kupuzo silimo ni silimo. Mi babañwi ku bona bafumanehanga kwa Kupuzo kusina taba ni nyandiso yetuna yebakopana ni yona. Babañwi habafumanehangi kamita kwa mikopano yemiñwi ya puteho, kono bafumanehanga kwa Kupuzo kabakala kuli baziba kuli kueza cwalo ki kwa butokwa. Hape, Jehova walemuhanga batu babatahanga kwa Kupuzo lwapili, mwendi kuli bato bona feela zeezahalanga.

² Kusina kukakanya, Jehova watabanga kubona batu babañata-ñata habafumaneha kwa Kupuzo. (Luka 22:19) Nihakulicwalo, Jehova haaisangi hahulu pilu kwa palo ya batu babafumanehanga kwa Kupuzo. Sa butokwa hahulu ku yena ki libaka batu habafumanehanga kwa Kupuzo. Mwa taba ye, lukanyakisisa puzo ya butokwa ye: Ki kabakalañi halufumanehanga kwa Kupuzo ni kwa mikopano ya puteho ya ka sunda yalukisezanga Jehova batu baba mulata?

3-4. (a) Ki kabakalañi halufumanehanga kwa mikopano? (b) Halufumaneha kwa mikopano, lubonisañi? (c) Ka kuya ka liñolo la 1 Makorinte 11:23-26, ki kabakalañi halusa swaneli kushuta Kupuzo?

³ Libaka lelituna halufumanehanga kwa mikopano kikuli kukopana ki kalulo ya bulapeli bwaluna. Hape, lufumanehanga  kwa mikopano bakeñisa kuli lubata kulutiwa ki Jehova. Batu babaikuhumusa habalati kulutiwa sesiñwi. (3 Joa. 9) Kono luna lutabela kulutiwa ki Jehova ni kopano yahae.—Isa. 30:20; Joa. 6:45.

⁴ Halufumaneha kwa mikopano, lubonisa kuli lunani buikokobezo, mi lutabela kulutiwa ki Mulimu. Lufumanehanga kwa Kupuzo ya lifu la Jesu kakuli lwaziba kuli mukopano wo ki wa butokwa hahulu, mi halueza cwalo, lubonisa kuli lwaikokobeza, mi lumamela taelo ya Jesu, yeli: “Muezange cwalo kuli munihupule.” (Mubale 1 Makorinte 11:23-26.) Mukopano wo utiisanga sepo yaluna ya za kwapili mi uluhupulisanga kuli Jehova ululata hahulu. Niteñi, Jehova waziba kuli lutokwa kususuezwa ni kutiiswa isiñi feela hañwi mwa silimo, kono hañata-ñata. Kabakaleo, ulukisize kuli kubange ni mikopano sunda ni sunda, mi ubata kuli lufumanehange teñi. Buikokobezo bulususueza kumamela taelo yeo. Sunda ni sunda lutandanga nako yeñata kuitukiseza mikopano ni kufumaneha ku yona.

5. Ki kabakalañi batu babaikokobeza habaamuhelanga memo ya Jehova?

⁵ Silimo ni silimo, batu babañata babaikokobeza baamuhelanga memo ya Jehova ya kuli balutiwe ki yena. (Isa. 50:4) Hañata, bakalanga ka kufumaneha kwa Kupuzo, mi hasamulaho bakalanga kufumaneha ni kwa mikopano ya puteho yemiñwi. (Zak. 8:20-23) Ka kuswana ni luna, batabela kulutiwa ni kuetelelwa ki Jehova, yena ‘yalutusa ni kululamulela.’ (Samu 40:17) Kaniti luli, hakuna nto yetabisa kamba ya butokwa hahulu yefita kuamuhela memo ya kulutiwa ki Jehova ni Jesu, yena Mwanaa hae yalata hahulu.—Mat. 17:5; 18:20; 28:20.

6. Kuba ni buikokobezo nekutusize cwañi muuna yomuñwi kufumaneha kwa Kupuzo?

⁶ Silimo ni silimo, luezanga molukonela kaufela kumema batu babañata kuli bato fumaneha kwa Kupuzo ya lifu la Jesu. Batu babañata babaikokobeza batusizwe kabakala kuamuhela memo yaluna. Halunyakisiseñi mutala wo. Lilimo zeñata kwamulaho, muuna yomuñwi naafilwe memo ya kuyo fumaneha kwa Kupuzo, kono abulelela muzwale yanaa mufile memo yeo kuli naasike akona kufumaneha teñi. Kono fa lizazi la Kupuzo, muzwale yo naakomokile hanaaboni muuna yaswana yo hakena mwa Ndu ya Mubuso. Muuna yo naatabisizwe hahulu ki mone bamuamuhelezi mizwale ni likaizeli kuli mane akala kufumanehanga kwa mikopano ya sunda ni sunda. Mane naashutile feela mikopano halaalu mwahalaa silimo sene sitatami. Ki kabakalañi hanaaikatulezi kufumanehanga kwa mikopano kaufela? Kabakala kuli naaikokobeza. Hamulaho wa nako, muzwale yanaa mumemile naabulezi kuli: “Ki muuna yaikokobeza luli.” Kusina kukakanya, Jehova ki yena yanaahohezi muuna yo mwa kopano yahae, mi cwale seli muzwale yakolobelizwe.—2 Sam. 22:28; Joa. 6:44.

7. Litaba zeluitutanga kwa mikopano ni zelubalanga mwa Bibele likona kulutusa cwañi kuba ni buikokobezo?

⁷ Litaba zeluitutanga kwa mikopano ni zelubalanga mwa Bibele lilutusa kuba ni buikokobezo. Lisunda lisikai pili lizazi la Kupuzo lisika fita kale, mikopano yaluna italusanga hahulu za mutala wa Jesu ni buikokobezo bwanaabonisize hanaafile bupilo bwahae sina tiululo. Mi mazazi asikai pili lizazi la Kupuzo lisika fita kale, lususuezwangwa kubala litaba za mwa Bibele zebonisa lika zeneezahalile pili Jesu asika bulaiwa kale ni za zuho yahae. Zeluitutanga kwa mikopano yeo ni litaba zelubalanga mwa Bibele ka nako yeo, lilutusanga kuitebuha hahulu sitabelo sa Jesu sa tiululo. Litaba zeo lilususuezanga kulikanyisa buikokobezo bwa Jesu ni kuzwelapili kueza tato ya Jehova, nihaike kuli kueza cwalo kukona kulubela taata.—Luka 22:41, 42.

8. Jesu naabonisize cwañi kuli unani bundume?

⁸ Hape, lulikanyisa mutala wa Jesu ka kubonisa bundume. Jesu naabonisize kuli unani bundume mazazi asikai pili asika bulaiwa kale. Naaziba kuli lila zahae nelituha limushubula, kumunyandisa, ni kumubulaya. (Mat. 20:17-19) Nihakulicwalo, naaitatezi kushwa. Nako ya lifu lahae hane ifitile, naabulelezi baapositola bahae babasepahala, ili bane bali ni yena mwa simu ya Getsemani kuli: “Hamuyeme, luzamaye. Hamubone! Yanibeteka u fakaufi.” (Mat. 26:36, 46) Mi batu babañata bane basweli lilwaniso hane batile kuto mutama, naasutelezi ku bona ni kuitibahaza, mi ataluseza masole kuli batuhele baapositola bahae baikele. (Joa. 18:3-8) Kaniti luli, Jesu naabonisize bundume bobutuna! Kacenu, Bakreste babatozizwe ni ba lingu zeñwi balika ka mobakonela kaufela kulikanyisa Jesu ka kubonisa bundume. Baeza cwañi cwalo?

9. (a) Ki kabakalañi halutokwa kuba ni bundume kuli lufumanehange kwa mikopano kamita? (b) Mutala waluna ukona kutusa cwañi mizwale baluna babatamezwi tumelo yabona?

⁹ Lutokwa kuba ni bundume kuli lukone kufumaneha kwa mikopano kamita niha lukopana ni miinelo yetaata. Mizwale ni likaizeli baluna babañwi bafumanehanga kwa mikopano kusina taba kuli bakopana ni miinelo yecwale ka kushwelwa ki mutu yebalata, kuzwafa, ni mapongo. Babañwi babonisize bundume ka kufumanehanga kwa mikopano niha balwaniswa hahulu ki ba lubasi lwabona kamba ba muuso. Mutala waluna wakona kutusa mizwale baluna babalengilwe mwa tolongo kabakala tumelo yabona. (Maheb. 13:3) Habautwa kuli luzwelapili kusebeleza Jehova kusina taba ni miliko yelukopana ni yona, bakasusuezwa kuzwelapili kuba ni tumelo, bundume, ni kusepahala ku Jehova. Muapositola Paulusi naaipumani mwa muinelo oswana. Hanaatamilwe mwa Roma, naanyakalalanga hanaautwanga kuli mizwale bahae nebazwelapili kusebeleza Mulimu ka busepahali. (Mafil. 1:3-5, 12-14) Nakonyana pili Paulusi asika lukululwa kale mwa tolongo, kamba hamulaho feela wa kulukululwa, naañolezi Bakreste ba Maheberu liñolo. Mwa liñolo leo, Paulusi naasusuelize Bakreste babasepahala bao kuli bazwelepili kubonisa ‘lilato kwa mizwale’ babona ni kuli basike bakeshebisa kukopana hamoho.—Maheb. 10:24, 25; 13:1.

10-11. (a) Ki bo mañi boluswanela kumemela kwa Kupuzo? (b) Ka kuya ka liñolo la Maefese 1:7, ki kabakalañi haluswanela kumemela batu kwa Kupuzo?

¹⁰ Lubonisa kuli lunani bundume halumemela bahabo luna, bolubeleka ni bona, ni boluyahile ni bona kwa Kupuzo. Ki kabakalañi halumemanga batu bao? Libaka kikuli luitebuha hahulu zaluezelize Jehova ni Jesu kuli mane lubatanga kuli batu babañwi ni bona bato fumaneha kwa Kupuzo. Lubata kuli ni bona bazibe mobatusezwa ki “butuna bwa sishemo” sa Jehova salubonisize ka kulufa tiululo.—Mubale Maefese 1:7; Sin. 22:17.

¹¹ Hape, halufumaneha kwa mikopano, lubonisa kalemeno kakañwi kakande kanani kona  Mulimu ni Mwanaa hae, ili kebabonisa mwa linzila zeñata.

12. (a) Mikopano yaluna ilutusa cwañi kulata hahulu Jehova ni Jesu? (b) Liñolo la 2 Makorinte 5:14, 15, lilususueza kuezañi kuli lulikanyise Jesu?

¹² Kulata Jehova ni Jesu kulususueza kufumaneha kwa mikopano. Mi litaba zeluituta kwa mikopano lilutusa kuli ni luna lulate hahulu Jehova ni Mwanaa hae. Haluli kwa mikopano luhupuliswangwa lika zeba luezelize. (Maro. 5:8) Kupuzo sihulu iluhupulisanga lilato lanani lona Jehova ni Mwanaa hae ku luna hamohocwalo ni kwa batu babasa itebuhi tiululo. Bakeñisa kuli lwaitebuha lilato leo, lubata kulikanyisa Jesu mwa bupilo bwaluna bwa ka zazi ni zazi. (Mubale 2 Makorinte 5:14, 15.) Hape lipilu zaluna lilususuezanga kulumbeka Jehova kabakala kulufa tiululo. Nzila yeñwi yelukona kulumbeka ka yona Jehova haluli kwa mikopano ki ka kufa likalabo zezwelela kwa pilu.

13. Lukona kubonisa cwañi kuli lulata hahulu Jehova ni Mwanaa hae? Mutaluse.

¹³ Lwakona kubonisa kuli lulata hahulu Jehova ni Mwanaa hae ka kuitoboha lika zeñwi. Hañata, lutokwanga kuitoboha lika zeñwi kuli lukone kufumaneha kwa mikopano ya puteho. Liputeho zeñata liezanga mukopano wa mwahalaa sunda manzibwana, ili nako yeo mwendi buñata bwa batu baikutwanga kukatala. Mi mukopano omuñwi ubanga kwa mafelelezo a sunda, ili mazazi ebapumulanga batu. Kusina kukakanya, Jehova walemuhanga buikatazo boluezanga bwa kufumaneha kwa mikopano niha lukatezi. Mane Jehova uitebuhanga hahulu haiba lueza ka molukonela kaufela kuli lufumanehe kwa mikopano.—Mare. 12:41-44.

14. Jesu ulutomezi cwañi mutala wa kulata babañwi ka kuitoboha lika zeñwi?

¹⁴ Jesu ulutomezi mutala omunde wa kubonisa lilato ka kuitoboha lika zeñwi kuli atuse batu babañwi. Naaezize cwalo ka kuitombola kushwela balutiwa bahae, mi zazi ni zazi naabeyanga lika zene batokwa balutiwa bahae mwa sibaka sapili. Ka mutala, fa busihu bwahae bwa mafelelezo pili asika bulaiwa kale, naakopani ni balateleli bahae ni kubaluta tuto ya butokwa kusina taba kuli naakatezi ni kuikalelwa. (Luka 22:39-46) Mi naatabela kusebeleza babañwi, isiñi kuli bamusebeleze. (Mat. 20:28) Ni luna haiba lulata hahulu Jehova ni mizwale  baluna sina Jesu, lukaeza molukonela kaufela kuli lufumanehe kwa Mulalelo wa Mulena hamohocwalo ni mikopano kaufela ya puteho.

15. Ki bo mañi sihulu bolutabela kutusa?

¹⁵ Lu mwa bulapeli bunosi bwa niti, mi luezanga molukonela kaufela kumema batu kuli baswalisane ni luna. Kono sihulu lutabela kutusa “banabahabo luna mwa tumelo” babafokozi. (Magal. 6:10) Lubonisanga kuli lwabalata ka kubasusueza kuli bafumanehange kwa mikopano ya puteho, sihulu kwa Kupuzo. Ka kuswana ni Jehova ni Jesu, lutabanga hahulu kubona batu babafokozi habakutela ku Jehova, yena Ndataa luna yalilato ni Mulisanaa luna.—Mat. 18:14.

16. (a) Lukona kususuezana cwañi, mi mikopano ikona kulutusa cwañi? (b) Ki kabakalañi ye haili yona nako yeswanela ya kuhupula manzwi a Jesu afumaneha kwa Joani 3:16?

¹⁶ Mwa lisunda zetaha, mueze momukonela kaufela kumemela batu kwa Kupuzo yekaba la Butanu manzibwana, ili la April 19, 2019. (Mubone mbokisi yeli, “ Kana Mukamema Babañwi?”) Luzweleñipili kususuezana ka kufumanehanga kamita kwa mikopano kaufela yalulukisezanga Jehova. Mwa mazazi a mafelelezo a, lutokwa kufumanehanga kwa mikopano kuli luzwelepili kuba ni buikokobezo, bundume, ni lilato. (1 Mates. 5:8-11) Haike luzweleñipili kubonisa kuli lwalata Jehova ni Mwanaa hae ka pilu yaluna kaufela, kabakala lilato lelituna leba lubonisize!—Mubale Joani 3:16.