LABULAALU kakusasana, la January 24, 2018, fa mutai wa kwa United States ni wa kwa Canada, nekuzibisizwe kuli Muzwale Kenneth Cook, uketilwe kuba mwa Sitopa Sesietelela sa Lipaki za Jehova.

Muzwale Cook naapepezwi ni kuhulisezwa kwa Pennsylvania, U.S.A. Naaitutile niti ku mulikanaa hae yanaakena ni yena sikolo ili ka nako yanaatuha afeza sikolo sa sekondari, mi akolobezwa la June 7, 1980. La September 1, 1982 akalisa kueza bupaina bwa kamita. Hasaasebelize sina paina ka lilimo zepeli, amemiwa kuyo sebeleza fa ofisi ya mutai wa mwa Wallkill, kwa New York, ili la October 12, 1984.

Hamulaho wa lilimo ze 25 kuzwa fo, Muzwale Cook naaezize misebezi yeshutana-shutana mwa Liluko Lelitalima za Kuhatisa Libuka ni mwa Liluko Lelitalima za Lihae la Betele. Mwa silimo sa 1996, anyalana ni bo Jamie, mi ni bona bakala kusebeleza fa mutai wa Wallkill. Mwa December ka silimo sa 2009, Muzwale ni Kaizeli Cook nebalumilwe kuyo sebeleza kwa Sibaka sa Tuto sa Watchtower mwa Patterson, kwa New York, ili ko Muzwale Cook naakupilwe kusebeleza mwa Liluko Lelitalima za Kuñolelana Mañolo. Mwa April ka silimo sa 2016, Muzwale ni Kaizeli Cook nebakupilwe kukutela kwa mutai wa Wallkill, mi hamulaho wa nakonyana, balumiwa kuyo sebeleza mwa Brooklyn, kwa New York. Hamulaho wa likweli zeketalizoho, batutisezwa kwa ofisi yetuna yezamaisa musebezi waluna mwa lifasi kaufela, ili yefumaneha mwa Warwick, kwa New York. Mwa January ka silimo sa 2017, Muzwale Cook naaketilwe kuba mutusi wa Katengo ka Bañoli ka Sitopa Sesietelela.