1-2. Ki miinelo mañi yetaata yebakopana ni yona batanga ba Jehova babañata, mi miinelo yeo itahisanga kuli baikutwe cwañi?

HALUNYAKISISEÑI miinelo yemilaalu yelatelela: Muzwale yomuñwi wa mukulwani ufumanwi kuli unani butuku bobumaswe bobutahisa kuli afelelwe ki maata hanyinyani-hanyinyani. Muzwale yanani lilimo zefitelela 50, ili yabeleka ka taata, uzwisizwe fa musebezi, mi upalelwa kufumana musebezi usili nihaike kuli uezize mwakonela kaufela kubata musebezi. Kaizeli wa musupali yasepahala haasakona kueza zeñata mwa sebelezo yahae ku Jehova sina mwanaaezezanga sapili.

² Haiba ni mina mutalimana ni miinelo yeswana ni yeo, mukana mwaikutwa kuli hamusali ba butokwa. Miinelo yecwalo ikona kutahisa kuli musike mwaba ni tabo, kuikutwa kuli hamuna tuso, ni kutahisa kuli musike mwaswalisana hande ni babañwi.

3. Satani ni batu babakukuelizwe ki yena baanga cwañi bupilo bwa batu?

³ Batu babañata mwa lifasi banani mubonelo oswana ni wa Satani ka mobaangela bupilo. Kuzwa feela kwamulaho, Satani haangi batu kuba ba butokwa. Satani ka lunya naakwashekile Eva kuli naakaba ni tukuluho hanaaka tula mulao wanaa mufile Mulimu kono inze aziba hande kuli Eva hanaaka eza cwalo, naakashwa. Satani ki yena yasweli kuzamaisa likopano za lipisinisi, za lipolitiki, ni za bulapeli mwa lifasi kaufela. Kacwalo, hakukomokisi kuli batu babañata ba lipisinisi, ba lipolitiki, ni baeteleli ba bulapeli ni bona habaangi batu kuba ba butokwa mi habana taba ni mobaikutwela.

4. Lukanyakisisañi mwa taba ye?

 ⁴ Ka kushutana ni Satani, Jehova yena ubata kuli luzibe kuli lu ba butokwa mi walutusanga halukopana ni miinelo yetaata yekona kutahisa kuli luikutwe kuli haluna tuso. (Samu 136:23; Maro. 12:3) Mwa taba ye, lukanyakisisa mwakona kulutuseza Jehova haluipumana mwa miinelo yelatelela: (1) Halukula, (2) halusina hande masheleñi, ni (3) haiba seluli basupali mi luikutwa kuli halu sesiñwi kakuli halusa eza zeñata mwa sebelezo yaluna ku Jehova. Kono cwale halukaleñi ka kunyakisisa libaka halukona kuba ni buikolwiso bwa kuli Jehova uunga mañi ni mañi waluna kuba wa butokwa.

5. Ki nto mañi yemikolwisa kuli Jehova uunga batu kuba ba butokwa?

⁵ Nihaike kuli lubupilwe ka liluli la lifasi, lu ba butokwa hahulu kufita liluli. (Gen. 2:7) Halunyakisiseñi mabaka asikai abonisa kuli Jehova uluunga kuba ba butokwa. Naabupile batu ni buikoneli bwa kulikanyisa tulemeno twahae. (Gen. 1:27) Ka kueza cwalo, ulubupile ka mukwa oshutana ni lika kaufela zabupile fa lifasi, mi mane ulufile maata fahalimwaa lifasi ni lifolofolo.—Samu 8:4-8.

6. Ki lifi libaka leliñwi lelibonisa kuli Jehova uluunga kuba ba butokwa niha lusika petahala?

⁶ Adama niha saezize sibi, Jehova uzwezipili kuunga batu kuba ba butokwa. Uluunga kuba ba butokwa hahulu kuli mane naafile Mwanaa hae yalatwa, Jesu, kuli aluliulule kwa sibi. (1 Joa. 4:9, 10) Bakeñisa sitabelo sa tiululo, Jehova ukazusa batu babashwile kabakala sibi sa Adama, ili “babalukile ni babasika luka.” (Lik. 24:15) Linzwi lahae libonisa kuli Jehova uluunga kuba ba butokwa kusina taba kuli lwakula, haluna masheleñi, kamba lusupezi.—Lik. 10:34, 35.

7. Ki afi mabaka amañwi abonisa kuli Jehova uluunga kuba ba butokwa?

⁷ Kunani mabaka amañwi alutusa kukolwa kuli Jehova uluunga kuba ba butokwa. Naaluhohezi ku yena mi naalemuhile mone luamuhelezi taba yende. (Joa. 6:44) Hane lukalile kusutelela ku Jehova, ni yena naasutelezi ku luna. (Jak. 4:8) Jehova hape ulufile kolo ya kuituta ka za hae, mi walutusanga kueza cwalo, ili kubonisa kuli lu ba butokwa ku yena. Waziba kuli lu batu babacwañi, mi waziba kuli lwakona kucinca kuba batu babande. Mi walukalimelanga kakuli walulata. (Liprov. 3:11, 12) Kaniti, bo ki bupaki bobubonisa kuli Jehova uluunga kuba ba butokwa luli!

8. Manzwi afumaneha kwa Samu 18:27-29 akona kulutusa cwañi kuba ni mubonelo oswanela halukopana ni miliko?

⁸ Nihaike kuli batu babañwi nebaanga Mulena Davida kuba mutu yasina tuso, Davida naaziba kuli Jehova naamulata mi naamutusanga. Kuziba taba yeo neku mutusize kutiyela muinelo otaata wanaali ku ona. (2 Sam. 16:5-7) Haluikutwa kuzwafa kamba halutalimana ni miinelo yetaata, Jehova wakona kulutusa kuba ni mubonelo oswanela ni kulutusa kutula muliko ufi kamba ufi olukona kukopana ni ona. (Mubale Samu 18:27-29.) Haiba lutusiwa ki Jehova, hakuna nto ni yekana yeka lupaleliswa kumusebeleza ka tabo. (Maro. 8:31) Cwale halunyakisiseñi miinelo yemilaalu yeo yelukona kukopana ni yona, mi halukopana ni yona, luswanela kuhupula kuli Jehova walulata ni kuli uluunga kuba ba butokwa.

9. Makulanu akona kutahisa kuli luikutwe cwañi?

⁹ Makulanu akona kutahisa kuli luzwafe ni kuikutwa kuli halusana tuso. Lukana lwaikutwa bumaswe batu babañwi habalemuha kuli halusa kona kueza lika zeñwi kamba kuli lutokwa babañwi kulutusa kueza lika  zeñwi. Nihaike kuli batu babañwi habazibi kuli lwakula, mwendi lukona kuikutwa hahulu bumaswe bakeñisa kuli halusa kona kueza lika zeñwi zene luezanga. Halukopana ni miinelo yetaata yeo, Jehova walutiisanga. Ka mukwa ufi?

10. Ka kuya ka Liproverbia 12:25, ki nto mañi yeka lutusa kuitiisa halukula?

¹⁰ Halukula, “manzwi amande” akona kulutiisa. (Mubale Liproverbia 12:25.) Mwa Bibele, Jehova ulukisize kuli kuñolwe manzwi amande aluhupulisa kuli luba butokwa ku yena kusina taba ni makulanu aluna. (Samu 31:19; 41:3) Haiba lubala kamba mane kukuta-kutela kubala manzwi ao añozwi ka kususumezwa ki moya wahae, Jehova uka lutusa kusazwafa halukula.

11. Muzwale yomuñwi naatusizwe cwañi ki Jehova?

¹¹ Halunyakisiseñi zeneezahezi ku muzwale yabizwa Jorge. Bo Jorge hane basali banana, nebafumanwi kuli banani butuku bobuñwi bobumaswe, mi butuku bo nebutotobezi ka nako yekuswani ili kutahisa kuli baikutwe kuli habana tuso. Bo Jorge batalusa kuli: “Nenisika libelela kuli butuku bwaka nebuka tahisa kuli niikutwe hahulu bumaswe bakeñisa kuli nebuhohile mamelelo ya batu. Butuku bwaka hane butotobezi, neninahanile za mone nikapilela. Nenilembwalile hahulu, mi nakupa Jehova kuli anituse.” Jehova naatusize cwañi muzwale yo? Bo Jorge batalusa kuli: “Bakeñisa kuli neku nibelanga taata kuisa mamelelo kwa litaba zene nibala, nenisusuelizwe kubala litaba zekuswani za mwa buka ya Lisamu zebonisa kuli Jehova waisa pilu batanga bahae. Nenikuta-kutezi kubala litaba zekuswani za mwa Mañolo zeo zazi ni zazi, mi neli niomba-ombile ni kunitiisa. Hamulaho wa nako, batu babañwi bakala kulemuha kuli neninani tabo. Mi mane nebabulezi kuli nebatiisizwe kubona kuli neninani tabo kusina taba ni muinelo one nili ku ona. Nenilemuhile kuli Jehova  naaalabile litapelo zaka! Jehova naanitusize kucinca mone niikungela. Nakala kuisa hahulu pilu kwa litaba zebulezwi mwa Linzwi lahae zebonisa mwaniingela kusina taba kuli nakula.”

12. Mutokwa kuezañi kuli Jehova amituse kutiyela makulanu amina?

¹² Haiba munani makulanu, mube ni buikolwiso bwa kuli Jehova waziba muinelo omuli ku ona. Mumukupe kuli amituse kuba ni mubonelo oswanela ka za muinelo wamina. Mi mubale Bibele kuli muzibe litaba zeomba-omba zamilukiselize Jehova. Muise mamelelo kwa litimana zebonisa kuli Jehova uunga batanga bahae kuba ba butokwa. Hamuka eza cwalo, mukalemuha kuli Jehova washemubanga batu kaufela baba musebeleza ka busepahali.—Samu 84:11.

13. Toho ya lubasi ukona kuikutwa cwañi haiba azwiswa musebezi?

¹³ Litoho za mabasi kaufela babatanga kufumanela mabasi abona lika zebatokwa. Kono luungeñi kuli muzwale yomuñwi uzwiswa musebezi nihaike kuli hakuna zafosize. Ueza ka taata kuli afumane musebezi usili kono kwapala. Miinelo yeo ikona kutahisa kuli aikutwe kuli haana tuso. Kuisa pilu kwa lisepiso za Jehova kukona kumutusa cwañi?

14. Ki kabakalañi Jehova hatalelezanga lisepiso zahae?

¹⁴ Jehova kamita watalelezanga lisepiso zahae. (Josh. 21:45; 23:14) Kunani mabaka atahisanga kuli aeze cwalo. Libaka lapili kikuli haiba asaezi cwalo, libizo lahae likasinyeha. Jehova usepisize kuli ukababalela batanga bahae babasepahala, mi uikutwa kuli unani kutaleleza sepiso yeo. (Samu 31:1-3) Hape Jehova waziba kuli neluka zwafa hahulu hanaaka palelwa kubabalela lubasi lwahae. Usepisa kuli uka lufumanela lika zelutokwa kwa mubili ni kwa moya, mi hakuna nto ifi kamba ifi  yeka mupaleliswa kutaleleza sepiso yeo!—Mat. 6:30-33; 24:45.

15. (a) Ki muinelo mañi otaata one bakopani ni ona Bakreste ba mwa linako za baapositola? (b) Liñolo la Samu 37:18, 19 lilutusa kuba ni buikolwiso mañi?

¹⁵ Haiba luhupula libaka Jehova hatalelezanga lisepiso zahae, lukaba ni buikolwiso bwa kuli uka lutusa ka nako yekuli taata kufumana masheleñi. Halunyakisiseñi mutala wa Bakreste bane bapila mwa linako za baapositola. Puteho yeneli mwa Jerusalema hane inyandisizwe maswe, ‘balutiwa kaufela bahasanyezwa mwa libaka kamukana, kwandaa baapositola banosi.’ (Lik. 8:1) Munahane feela zene bakopani ni zona. Nebatalimani ni butata bwa kutokwa masheleñi. Kubonahala kuli Bakreste bao nebasiile mandu abona ni lipisinisi zabona. Kono Jehova naasika bayubeka mi ni bona nebasika felelwa ki tabo. (Lik. 8:4; Maheb. 13:5, 6; Jak. 1:2, 3) Jehova naatusize Bakreste babasepahala bao mi ni luna uka lutusa.—Mubale Samu 37:18, 19.

16. Ki muinelo mañi okona kutahisa kuli lunahane kuli Jehova haitebuhi sebelezo yaluna?

¹⁶ Halunze lusupala, lukona kuikutwa kuli halukoni kueza zeñata mwa sebelezo yaluna ku Jehova. Mulena Davida mwendi naaikutwile cwalo hanaanzaa supala. (Samu 71:9) Jehova ukona kulutusa cwañi?

17. Luitutañi ku zanaaipumani ku zona kaizeli yabizwa Jheri?

¹⁷ Halunyakisiseñi zanaaipumani ku zona kaizeli yabizwa Jheri. Naakupilwe kuyo fumaneha kwa mukopano one ukabela kwa Ndu ya Mubuso one uambola za kulukisa libaka za kulapelela, kono naasalati kuya. Kaizeli yo utalusa kuli: “Nisupezi, ni mbelwa, mi hakuna seniziba ka za kulukisa libaka za kulapelela.  Hakuna senikona kueza.” Busihu pili asikayo fumaneha kale kwa mukopano one ukaba teñi habusa, naalapezi ku Jehova ni kumutaluseza maikuto ahae kaufela. Lizazi lene litatami hanaafitile kwa Ndu ya Mubuso, naasaikutwa kuli naasaswaneli kufumaneha kwa mukopano wo. Ka nako ya mukopano, yomuñwi wa mizwale bane bafa lingambolo naakoñomekile kuli nto ya butokwa hahulu yene batokwa kueza ki kulata kulutiwa ki Jehova. Bo Jheri habahupula taba yeo, bali: “Naipulelisa nali, ‘Nalata kulutiwa ki Jehova!’ Nakala kulila kakuli nenilemuhile kuli Jehova ualabile tapelo yaka. Naanitusa kulemuha kuli kunani nto yeñwi ya butokwa yenikona kumuezeza mi watabela kuniluta!” Bo Jheri baekeza kubulela kuli: “Hane niya kwa mukopano wo, neniikalezwi, mi nenizwafile. Kono hasamulaho, neniikutwile kutiiswa, kususuezwa, ni kuikutwa kuli ni wa butokwa!”

18. Bibele ibonisa cwañi kuli Jehova waitebuha zelu muezeza halunze lusupala?

¹⁸ Halunze lusupala, lwakona kuba ni buikolwiso bwa kuli kunani musebezi olukona kueza mwa sebelezo yaluna ku Jehova. (Samu 92:12-15) Jesu naabonisize kuli Jehova waitebuha zelu muezeza kaufela mwa sebelezo yaluna ku yena, kusina taba kuli halukoni kueza lika zeñwi kamba mwendi lukona feela kueza lika zenyinyani. (Luka 21:2-4) Kacwalo, mueze zemukona kaufela. Ka mutala, mwakona kukutaza ku babañwi ka za Jehova, kulapelela mizwale bamina, ni kususueza babañwi kuli bazwelepili kusepahala. Jehova umiinga kuli musebeza hamoho ni yena, isiñi kabakala lika zemukona kueza, kono kabakala kuli mwalata kumuutwa.—1 Makor. 3:5-9.

19. Ki sepiso mañi yelufumana kwa liñolo la Maroma 8:38, 39?

¹⁹ Kaniti, lunani tohonolo yetuna ya kulapela Jehova, yena Mulimu yaanga batu baba musebeleza kuba ba butokwa hahulu ku yena! Naalubupile kuli lueze tato yahae, mi halu musebeleza, lubanga ni tabo. (Sin. 4:11) Batu mwa lifasi bakona kuluunga kuli halu ba butokwa, kono Jehova yena haki mona mwaluungela cwalo. (Maheb. 11:16, 38) Haiba luikutwa kuzwafa bakeñisa makulanu, kutokwa masheleñi, kamba busupali, luhupuleñi kuli hakuna nto ifi kamba ifi yekona kulukauhanya kwa lilato la Ndataa luna ya kwa lihalimu.—Mubale Maroma 8:38, 39.