1, 2. Ki kabakalañi halutokwa kunyakisisa taba ya molukona kuomba-ombela batu babashwezwi ki balatiwa babona? (Mubone siswaniso sesi fahalimu.)

BO SUSI babulela kuli: “Hamulaho wa kushwelwa ki mwanaa luna wamushimani, nekufitile nako yebato kwana silimo inze lusaikutwa butuku bobutuna hahulu.” Mukreste yomuñwi naabulezi kuli musalaa hae hanaatimezi ka sipundumukela, naautwile “butuku bobutuna hahulu kwa pilu.” Ka bumai, batu babañata-ñata sebaipumani mwa muinelo ocwalo otomohisa pilu. Batu babañata mwa puteho ya Sikreste mwendi nebasika libelela kuli bakona kushwelwa ki mutu yebalata hahulu pili Armagedoni isika taha kale. Ibe kuli mushwezwi ki mutu yomuñwi yemulata, kamba mutu yomuñwi yemuziba ushwezwi ki mulatiwa wahae, mukana mwaipuza kuli: ‘Mutu ya mwa maswabi ukona kutusiwa cwañi kutiyela muinelo wali ku ona?’

² Mwendi mukile mwautwa batu babañwi hababulela kuli hase kufitile nako, mutu yashwezwi ukaikutwa hande. Kono kana ki niti luli kuli mutu yashwezwi wakona kuikutwa kuomba-ombiwa bakeñisa nako yetelele yesefitile? Mbelwa yomuñwi naabulezi kuli, “Na nilemuhile kuli lika zaeza mutu ka nako yali mwa  maswabi, ki zona zekona kumutusa kuikutwa kuomba-ombiwa.” Ki niti, sina feela sitombo sa fa mubili hasikona kufola haiba sibabalelwa, mutu yatomohile pilu wakona kuikutwa kuomba-ombiwa hanyinyani-hanyinyani haiba afiwa pabalelo yende. Ki sika mañi luli sesikona kuomba-omba baba lobehile lipilu bakeñisa kushwelwa ki balatiwa babona?

3, 4. Ki kabakalañi halukona kukolwa kuli Jehova wautwisisa kuli mutu ya mwa maswabi utokwa kuomba-ombiwa?

³ Kusina kukakanya, muomba-ombi yomutuna ki Ndataa luna ya kwa lihalimu, ili yanani makeke, yena Jehova. (Mubale 2 Makorinte 1:3, 4.) Jehova, yena yanani makeke hahulu, naataluselize batu bahae kuli: “Ki na ya kuomba-omba.”—Isa. 51:12; Samu 119:50, 52, 76.

⁴ Ndataa luna, yena Ndate sishemo, ni yena akile ashwelwa ki balatiwa bahae babacwale ka Abrahama, Isaka, Jakobo, Mushe, ni Mulena Davida. (Num. 12:6-8; Mat. 22:31, 32; Lik. 13:22) Linzwi la Mulimu lilusepisa kuli Jehova unyolezwi hahulu nako yakazusa batu bao kwa bafu. (Jobo 14:14, 15) Batu bao bakaba ni tabo mi bakaba ni mibili yeiketile. Hape muhupule kuli, Mwanaa Mulimu wa libanda—“yanaalatwa hahulu ki yena”—naashwile lifu lelibutuku. (Liprov. 8:22, 30) Kutaata hahulu kutalusa butuku bwanaautwile Jehova.—Joa. 5:20; 10:17.

5, 6. Jehova uluomba-ombanga cwañi?

⁵ Lunani buikolwiso bobutuna bwa kuli Jehova uka lutusa. Kacwalo, lusike lwazina-zina kutaluseza Jehova ka tapelo lika kaufela zeeluutwisa butuku kwa pilu. Kwaomba-omba luli kuziba kuli Jehova wautwisisa butuku boluutwanga mi ulufanga kuomba-ombiwa kolutokwa hahulu! Kono uezanga cwañi cwalo?

⁶ Nzila yeñwi yalutusanga ka yona Mulimu ki ka ‘kuluomba-omba ka moya okenile.’ (Lik. 9:31) Moya wa Mulimu unani maata amatuna a kuluomba-omba. Jesu naasepisize kuli Ndataa luna ya kwa lihalimu utabela hahulu ‘kufa moya okenile ku babamukupa.’ (Luka 11:13) Bo Susi, babatalusizwe kwa makalelo, babulela kuli: “Hañata nelukubamanga fafasi ni kukupa Jehova kuli aluomba-ombe. Fone luezeza cwalo kaufela, kozo ya Mulimu neisilelezanga lipilu zaluna ni minahano yaluna luli.”—Mubale Mafilipi 4:6, 7.

7, 8. Ki kabakalañi halukona kukolwa kuli Jesu uka luomba-omba?

⁷ Zanaabulezi ni kueza Jesu, yena Mwanaa Mulimu yanani makeke hanaasali fa lifasi, nelibonisize hande kuli Jehova unani hahulu makeke. (Joa. 5:19) Jesu naalumilwe kuto omba-omba “babalobehile lipilu” ni “babalila kaufela.” (Isa. 61:1, 2; Luka 4:17-21) Kacwalo, naazibahala kuba ni makeke amatuna hahulu—ili kubonisa kuli naautwela butuku batu bane banyanda mi naabata hahulu kubatusa.—Maheb. 2:17.

⁸ Kusina kukakanya, Jesu hanaasali mwanana, naaiponezi ba lubasi lwahae kamba batu babañwi banaaziba habashwa. Kubonahala kuli Josefa, yena ndatahe yanaa muañuzi naashwile, Jesu inze asali mutangana. * Munahane feela mone kuinezi ku Jesu, yanaanani makeke, ili yo mwendi naali mwa lilimo za kunonoboka kamba lilimo za kwa makalelo a ma 20, kutiyela masitapilu anaali ku ona, ni masitapilu ane bali ku ona bo mahe, banyani bahae, ni likaizeli zahae.

9. Jesu naabonisize cwañi makeke Lazaro hanaashwile?

 ⁹ Jesu hanaakalisize bukombwa bwahae, naabonisize butali bobutuna ni makeke kwa batu. Hamuunge ka mutala, ka nako yanaashwile mulikanaa hae yomutuna, yena Lazaro. Jesu niha naaziba kuli naakazusa Lazaro kwa bafu, naatomohile hahulu pilu haabona Maria ni Mareta inze bali mwa maswabi amatuna. Naabautwezi hahulu makeke kuli mane alotisa miyoko.—Joa. 11:33-36.

10. Ki kabakalañi halukona kukolwa kuli Jesu wautwisisa mobaikutwela batu baba mwa maswabi kacenu?

¹⁰ Lukona kutusiwa cwañi kacenu ki manzwi aomba-omba anaabulezi Jesu ni makeke anaabonisize? Mañolo abonisa kuli “Jesu Kreste ki yaswana, mabani, ni kacenu, ni kuya kuile.” (Maheb. 13:8) Bakeñisa kuli “Muyemeli Yomutuna wa bupilo” yo wautwisisa mokuutwahalela kuipumana mwa maswabi, “wakona kutusa babalikiwa.” (Lik. 3:15; Maheb. 2:10, 18) Kacwalo, lwakona kuba ni buikolwiso bwa kuli Kreste ukazwelapili kushwela makeke batu baba mwa maswabi, kuutwisisa butuku bobautwa, mi uka baomba-omba “ka nako yeswanela.”—Mubale Maheberu 4:15, 16.

11. Ki mañolo afi emuikutwa kuli amiomba-ombanga?

¹¹ Likande lelibulela za Jesu hanaabonisize makeke amatuna fa lifu la Lazaro, ki leliñwi feela la litaba ze mwa mañolo amañata aomba-omba, afumaneha mwa Linzwi la Mulimu. Taba yeo haikomokisi, “kakuli lika kaufela zeneñozwi kwamulaho neliñolezwi kululuta, kuli ka buitiiso bwaluna ni ka kuomba-ombiwa ki Mañolo lukone kuba ni sepo.” (Maro. 15:4) Haiba mu mwa maswabi, ni mina mwakona kuomba-ombiwa ki mañolo alatelela:

• “Jehova ufakaufi ni babalobehile lipilu; upilisa babaswabile.”—Samu 34:18, 19.

• “Hane niimezwi ki lipilaelo, [wena Jehova] neu niomba-ombile ni kunikatulusa.”—Samu 94:19.

• “Haike Mulenaa luna Jesu Kreste ni Mulimu Ndataa luna, yalulatile ni kulufa kuomba-ombiwa kokusa feli ni sepo yende ka sishemo sahae, baomba-ombe lipilu zamina ni kumitiisa.”—2 Mates. 2:16, 17. *

12. Ki ifi nzila yeñwi yende yelukona kuomba-omba ka yona babañwi?

¹² Nto yeñwi yekona kuomba-omba baba mwa maswabi ki puteho ya Sikreste. (Mubale 1 Matesalonika 5:11.) Mukona kutiisa cwañi ni kuomba-omba batu babanani “pilu yelobehile”? (Liprov. 17:22) Muhupule kuli kunani “nako ya kukuza ni nako ya kubulela.” (Muek. 3:7) Mbelwa yomuñwi wa libizo la Dalene utalusa kuli: “Batu baba mwa maswabi babatanga kutalusa zebanahana ni mobaikutwela. Kacwalo, nzila yende hahulu yemukona kutusa ka yona mutu ya mwa maswabi ki kuteeleza ku yena—kusina kumukauleza.” Bo Junia, ili bao kaizelaa bona naaipulaile, bali: “Nihaike kuli hamukoni kuziba luli butuku bobautwanga batu baba mwa maswabi, sa butokwa semuswanela kueza ki kuutwisisa mobaikutwela.”

13. Ki sika mañi seluswanela kuhupula ka za batu baba mwa maswabi?

¹³ Hape, muhupule kuli batu baba mwa maswabi hababonisangi kulobeha pilu kwabona ka nzila yeswana. Ka linako zeñwi, mutu yatahezwi ki maswabi ki yena feela yautwisisanga butuku bobutuna bwautwa kwa pilu, kono kukona kuba taata ku yena kutalusa luli mwaikutwela. Linzwi la Mulimu libulela kuli: “Pilu yaziba butuku bwayona, mi hakuna mutu usili yakona kutaba ni yona.” (Liprov. 14:10) Fokuñwi mutu nihaka talusa mwaikutwela, batu babañwi habakoni kuutwisisa luli satalusa.

14. Lukona kuomba-omba cwañi baba mwa maswabi ka manzwi aluna?

 ¹⁴ Kacwalo, kwautwahala hakukona kuba taata kuziba za kubulelela mutu yomuñwi ya mwa maswabi amatuna. Nihakulicwalo, Bibele ibulela kuli “lilimi la bababutali lafolisa.” (Liprov. 12:18) Batu babañata bafumani litaba zeomba-omba mwa broshuwa ya Muta Mutu Yo Mu Lata H’a Timela. * Kono hañata, nto yemuswanela kueza yetusa hahulu ki ‘kulila ni babalila.’ (Maro. 12:15) Bo Gaby babashwezwi ki bo muunaa bona babulela kuli: “Fokuñwi hanikonangi kutalusa ze mwa pilu yaka konji ka kulila feela. Ki lona libaka haniikutwanga kuomba-ombiwa hanibona balikani baka habalila ni na. Ka yona nako yeo, niikutwanga kuli hakina feela ninosi yali mwa maswabi.”

15. Lukona kuomba-omba cwañi babañwi haiba kulubela taata kueza cwalo pata ka pata? (Mubone ni mbokisi yeli “ Manzwi Amande Aomba-Omba.”)

¹⁵ Haiba kumibela taata kuomba-omba mutu ya mwa maswabi pata ka pata, mwendi kukona kumibela bunolo kuñola manzwi aomba-omba fa kadi, kuñola lushango lwa fa Intaneti, lushango lwa fa foni, kamba kuñola liñolo. Mwendi mwakona kuñola manzwi a mwa Bibele aomba-omba, kubulela taba kamba kalemeno kakañwi komuhupula ka za mufu, kamba kutalusa nto yeñwi yetabisa ka za hae. Bo Junia babulela kuli: “Haniamuhelanga kañusa ka kunisusueza kamba ka kunimema kuli niyo tona ni Bakreste ka na, niikutwanga kuomba-ombiwa luli. Manzwi acwalo atahisanga kuli niikutwe kuli nalatiwa ni kubabalelwa.”

16. Ki ifi nzila yende hahulu yelukona kuomba-omba ka yona babañwi?

¹⁶ Musike mwalibala kuli kulapela hamoho ni Mukreste ka mina yashwezwi kamba kumulapelela kwakona kutusa. Nihaikaba kuli  mufumana taata kutalusa maikuto amina mwa tapelo ka nako yetomohisa pilu yeo, tapelo yamina ya kumulapelela, ili yezwelela kwa pilu, inze mucipita miyoko ni kusikoka, yakona kubaomba-omba luli. Bo Dalene babulela kuli: “Fokuñwi likaizeli habatile kuto niomba-omba, nabakupanga kulapela ni na. Habakalisa kulapela, bakatazehanga kwa kubulela, kono hamulaho a kubulela manzwi asikai, linzwi labona latiyanga mi balapelanga tapelo yezwelela kwatasaa pilu luli. Tumelo yabona yetiile, lilato labona, ni kuniisa pilu kwabona kutiisize hahulu tumelo yaka.”

17-19. Ki kabakalañi hakuli kwa butokwa kuzwelapili kuomba-omba babañwi?

¹⁷ Butelele bwa nako yebabanga batu mwa maswabi bwashutana. Kacwalo, mubapotelange, isiñi feela mazazi asikai kuzwa fa maswabi, hakusanani balikani ni bahabo bona, kono muzwelepili kueza cwalo ni mwa likweli zelatelela, batu babañwi habase bakutezi kwa misebezi yabona. “Mulikani wa niti ubonisa lilato ka nako kaufela, mi upepezwi kuli abe mwanahabo mutu mwa linako za ziyezi.” (Liprov. 17:17) Bakreste baswanela kuomba-omba hahulu Mukreste ka bona ka nako kaufela yali mwa maswabi.—Mubale 1 Matesalonika 3:7.

¹⁸ Muhupule kuli batu babashwezwi bakona kutomoha pilu habafitile fa lizazi lanaashwile mutu yo, habateeleza kwa mufuta omuñwi wa lipina, hababona maswaniso ahae, habaeza lika zeñwi, kuutwa munko omuñwi kamba ka nako yeñwi mwa silimo. Lika zeñata zakalisanga kueza anosi mutu yashwezwi ki mutu yanaanyalani ni yena, zecwale ka kufumaneha kwa mukopano wa mupotoloho kamba kwa Kupuzo, likona kumutahiseza kuikutwa hahulu butuku. Muzwale yomuñwi utalusa kuli: “Nenilibelela kuli nako ya kuhupula lizazi lene lunyalani ni musalaaka neikaba yetaata hahulu, mi luli nesi nto yebunolo. Kono mizwale ni likaizeli basikai balukisa kuli kube ni kakitinyana ni balikani baka babatuna ilikuli nisike naikutwa buinosi.”

¹⁹ Kono muhupule kuli batu babashwezwi batokwa kususuezwanga ka nako kaufela isiñi feela hakulukisizwe litukiso zeñwi zeipitezi. Bo Junia batalusa kuli: “Hañata tuso yakona kufiwa mutu yashwezwi ni siango saikola ni batu babañwi isiñi feela ka linako za kuhupula lika zeñwi, likona kuba za butokwa hahulu. Kuba ni linako zende zecwalo zesika libelelwa ki kwa butokwa hahulu mi kwaomba-omba luli.” Ki niti kuli halukoni kufeza maswabi kaufela kamba kufeza buinosi bwaikutwa mutu yashwezwi ki mulatiwa wahae, kono lwakona kuomba-omba mutu yacwalo ka kumuezeza lika zeñwi zekona kumutusa. (1 Joa. 3:18) Bo Gaby babulela kuli: “Niitumela hahulu ku Jehova kabakala kunifa baana-bahulu babalilato, baba nitusize kutiyela miinelo yetaata yenitalimani ni yona. Kaniti banitusize kuikutwa kuli Jehova wanilata luli.”

20. Ki kabakalañi lisepiso za Jehova halikona kuluomba-omba hahulu?

²⁰ Kwaomba-omba luli kuziba kuli Jehova, yena Mulimu yaomba-omba, ukafelisa maswabi kaufela ni kuluomba-omba kuya kuile muta “batu kaufela babali mwa mabita a kupulo bakautwa linzwi [la Kreste] ni kuzwa mwateñi”! (Joa. 5:28, 29) Mulimu usepisa kuli “ukafelisa lifu kuya kuile, mi Mulena Yapahami ka Kufitisisa, yena Jehova, ukatakula miyoko kwa lipata zabona kaufela.” (Isa. 25:8, litaluso ze kwatasi) Ka nako yeo, batu kaufela baba mwa lifasi habana ‘kulila ni babalila,’ kono ‘bakataba ni babatabile.’—Maro. 12:15.