BAKRESTE ba mwa linako za baa-positola nebaezize ka mone bakonela kaufela kuli bakutaze ‘taba yende ya Mubuso’ kwa batu babañata. (Mat. 24:14) Babañwi ku bona mane nebaizo kutaleza kwa linaha lisili. Ka mutala, ka nako ya misipili yahae ya bulumiwa, muapositola Paulusi naaile kwa naha yesebizwa kacenu kuli Turkey, mi ayo kutaza taba yende mwa libaka zeñata. * Hape ka silimo sa 2014, ili lilimo zebato ba 2,000 kuzwa nako yeo, nekuezizwe tukiso yeipitezi ya kueza musebezi wa kukutaza mwa Turkey. Ki kabakalañi hane kuezizwe tukiso yeo? Ki bo mañi bane baabani mwa musebezi wo?

Kunani bahasanyi babafitelela 2,800 mwa Turkey, kono naha yeo inani batu ba 79 milioni. Taba yeo italusa kuli muhasanyi ni muhasanyi unani kukutaza kwa batu bababato eza 28,000 mwa Turkey. Sina momukona kunahanela, bahasanyi ba mwa naha yeo bakonile feela kukutaza kwa batu basikai. Mulelo wa tukiso yeipitezi yeo, neli kuli bahasanyi bakutaze kwa batu babañata mwa nako yekuswani. Mizwale ni likaizeli ba mwa linaha lisili bababato eza 550, ili babaziba puo ya kwa Turkey, nebaile kwa Turkey kuyo kutaza hamoho ni bahasanyi ba mwa naha yeo ka nako ya tukiso yeipitezi. Ki lika mañi zene bapetile?

Taba yende neikutalizwe kwa batu babañata. Puteho yeñwi ya mwa Istanbul neiñozi kuli: “Batu hane baluboni, nebabuzize kuli: ‘Munani mukopano omutuna oipitezi kwanu? Lubona Lipaki za Jehova koluya kaufela!’” Puteho ya mwa muleneñi wa Izmir neiñozi kuli: “Muuna yasebeza fa sitishini sa matakisi naaatumezi muuna-muhulu wa mwa puteho yeo ni kumubuza kuli, ‘Kuezahalañi? Mubonahala kupateha hahulu mazazi a!’” Kaniti, musebezi oipitezi wa kukutaza wo, neulemuhilwe ki batu.

Mizwale ni likaizeli bane bazwa kwa linaha lisili nebaikozi hahulu musebezi wa kukutaza. Bo Steffen, ba kwa Denmark, nebaize: “Zazi ni zazi hane nikutaza, nenikopananga ni batu bane basika utwa kale za Jehova. Neniikutwile kuli nenizibahaza luli libizo la Jehova.” Bo Jean-David ba kwa France nebañozi kuli: “Nelukutalelize mwa likululu lililiñwi feela ka lihora zeñata. Neli nto yende luli! Batu babañata nebasa zibi Lipaki za Jehova. Neluikambota ni batu ibato ba fa ndu ni ndu, kubabuhisa yeñwi ya mavidio aluna, ni kubasiyela lihatiso.”

Bahasanyi ba 550 nebafile lihatiso ze 60,000 mwa  lisunda feela zepeli! Kaniti, musebezi oipitezi wo, neutusize kuli taba yende ikutazwe kwa batu babañata.

Batu nebakalile kutukufalelwa hahulu mwa bukombwa. Musebezi oipitezi wo neususuelize hahulu mizwale ba mwa naha yeo. Batu babañata nebakalile kunahana za kueza sebelezo ya nako kaufela. Mwahalaa likweli ze 12 kuzwa fokupetelwa musebezi wo, palo ya mapaina ba kamita mwa Turkey neiekezehile; nekubile ni mapaina babanca ba 82.

Bahasanyi bane bazwile kwa linaha lisili nebabulezi ka za mo tukiso yeipitezi yeo neiamezi bukombwa bwabona niha sebakutezi kwa linaha zahabo bona. Kaizeli wa kwa Germany yabizwa Şirin, naañozi kuli: “Mizwale ba kwa Turkey habafumani taata kukutaza ka kutandalelwa. Niikutwanga hahulu boi kukutaza ka kutandalelwa. Kono tukiso yeipitezi yeo, ni mutala wa mizwale ba mwa naha yeo, ni litapelo zeñata, neli nitusize kuli nikone kueza nto yene nisakoni kueza sapili. Mane nenikutalize ni kuabela matrakiti mwa njanji ya sitima ya kwatasi! Cwale fa hanisana boi inge bone ninani sapili.”

Bo Johannes ba kwa Germany nebaize: “Neniitutile lituto zene nitusize mwa bukombwa bwaka. Kaniti, mizwale mwa Turkey batabela hahulu kuzibahaza niti kwa batu babañata. Baitusisanga kolo yebanani yona kaufela kwa kukutaza. Ni na nenikalile kuezanga cwalo hane nikutezi kwa Germany. Mi ka nako ya cwale, nikutazanga kwa batu babañata kufita mone niezezanga sapili.”

Bo Zeynep ba kwa France nebabulezi kuli: “Tukiso yeipitezi ye, initusize hahulu mwa bukombwa bwaka. Initusize kuba ni bundume bobutuna ni kusepa hahulu Jehova.”

Bahasanyi nebaswalisani hahulu. Mizwale bane bazwa kwa linaha zeshutana-shutana habana kulibala lilato ni swalisano zene babonisani. Bo Jean-David bolubulezi kale zabona mwa taba ye, nebaize: “Neluamuhezwi hande ki mizwale.” Mi nebazwezipili kubulela kuli: “Mizwale bao nebaluungile sina balikani babona ni mabasi abona. Neba luamuhezi mwa mandu abona. Neniziba kuli kopano yaluna ifumaneha mwa lifasi kaufela mi iswalisani; nese nibalile za taba yeo hañata mwa lihatiso zaluna. Kono cwale niiponezi buniti bwa taba yeo. Mane nitabile hahulu kuba yomuñwi wa batanga ba Jehova, mi niitumela kuli unifile tohonolo yetuna ye.”

 Bo Claire ba kwa France nebabulezi kuli: “Kaufelaa luna neluli lubasi lululuñwi, kusina taba ni kuli neluzwa kwa Denmark, kwa France, kwa Germany, kamba kwa Turkey. Nekubonahala inge kuli Mulimu naafelisize miseto ya linaha.”

Bo Stéphanie ba kwa France nebazwezipili kubulela kuli: “Tukiso yeipitezi yeo nei lulutile kuli lilato lelunani lona ku Jehova kaufelaa luna ki lona leli luswalisanisa, isiñi sizo kamba puo.”

Mizwale ni likaizeli babañata bane bazwa kwa linaha lisili nebakalile kunahana za kututela kwa Turkey kuli bayo tusa kwa musebezi omutuna one usali teñi. Mane bahasanyi basikai sebatutezi kwateñi. Luitumela hahulu kwa bahasanyi bao babaizo tusa kokutokwahala hahulu bakutazi.

Ka mutala, kunani sikwata sesinyinyani sa bahasanyi ba 25 mwa sibaka sesiñwi, sesi kwahule ni puteho. Ka lilimo zeñata, nekunani feela muuna-muhulu alimuñwi mwa sikwata seo. Munahane feela tabo yetuna yene babile ni yona bahasanyi mwa 2015, muta bahasanyi ba 6 babazwa kwa Germany ni kwa Netherlands nebaile kuyo sebeleza kwa sibaka seo kone kutokwahala hahulu bakutazi!

Bahasanyi bane baizo sebeleza kokutokwahala hahulu bakutazi mwa Turkey baikutwa cwañi ka za mone kuinezi kupila mwa naha yeo? Ki niti kuli fokuñwi nebakopananga ni matata, kono kusebeleza kokutokwahala bakutazi kukona kutahiseza mutu limbuyoti zeñata. Haluboneñi zebabulezi babañwi ka za teñi:

Muzwale yanyezi yabizwa Federico wa kwa Spain, ili yasazo kwanisa lilimo za ma 40, ubulela kuli: “Kusaba ni lika zeñata za kwa mubili kunitusa kuba yalukuluhile, ni kuisa pilu kwa lika za butokwa hahulu.” Muzwale yo naabulezi cwañi hanaabuzizwe nji wakona kususueza babañwi kueza musebezi wo? Naaize: “Eni, nakona! Hamuya kwa naha isili ka mulelo wa kuyo tusa batu kuziba Jehova, fo mubonisa luli kuli muitingile ku yena. Mukaikutwa hahulu kuli Jehova wamibabalela luli kufita sapili.”

 Muzwale yanyezi yabizwa Rudy wa kwa Netherlands, ili yasatuha akwanisa lilimo ze 60, uli: “Kusebeleza kwa sibaka kokutokwahala hahulu bakutazi ba Mubuso, ni kuzibahaza niti kwa batu babañata babasika iutwa kale, kulufa tabo yetuna hahulu. Kubona batu hababa ni tabo hamulaho wa kuamuhela niti kwalutabisanga hahulu.”

Muzwale yanyezi yabizwa Sascha wa kwa Germany, ili yasazo kwanisa lilimo za ma 40, uli: “Nako kaufela hanili mwa bukombwa, nikopananga ni batu babasika utwa kale niti. Kutusa batu bao kuziba za Jehova kunifanga tabo yetuna.”

Kaizeli yanyezwi yabizwa Atsuko wa kwa Japan, ili yanani lilimo ze fahalaa 30, uli: “Kale nenibatanga kuli Armagedoni itahe kapili. Kono hamulaho wa kututela kwa Turkey, niitumelanga ku Jehova kabakala kuli usabonisa pilu-telele. Hanibona Jehova mwazamaiseza musebezi wa kukutaza mwa lifasi kaufela, nibanga ni takazo ya kusutelela hahulu ku yena.”

Kaizeli yabizwa Alisa wa kwa Russia, ili yasazo kwanisa lilimo za ma 30, uli: “Kusebeleza Jehova kwa sibaka kokutokwahala hahulu bakutazi, kunitusize kubona bunde bwahae kaufela.” (Samu 34:8) Kaizeli yo uzwelapili kubulela kuli: “Jehova ki Ndate mi ki Mulikani yomutuna, mi nifitanga fa kumuziba hande hanikopana ni miinelo yeshutana-shutana. Niikozi lika zeñata zetabisa mwa bupilo bwaka, mi nibile ni limbuyoti zeñata!”

Taba yende neikutalizwe kwa batu babañata ka nako yene kuezizwe tukiso yeipitezi ya kukutaza mwa Turkey. Nihakulicwalo, kusanani sibaka sesituna mokusika kutalezwa kale. Zazi ni zazi, bahasanyi babaizo kutaleza kwa sibaka kokutokwahala hahulu bakutazi mwa Turkey, bakopananga ni batu babasika utwa kale za Jehova. Kana mwatabela kusebeleza kwa sibaka sesicwalo? Haiba mwatabela, lumisusueza kuli: “Muinule meeto amina, mi mubone masimu, kuli sealibelezi kukutulwa.” (Joa. 4:35) Kana mwatabela kuyo tusa kwa sibaka ili ko masimu “sealibelezi kukutulwa”? Haiba ki cwalo, mukalise kulukisa miinelo yamina kuli mukone kupeta sikonkwani seo. Taba ya niti ki ya kuli: Haiba muekeza kwa nako yemutanda mwakuhasanya taba yende “kuyo fita kwa libaka za kwahule hahulu za lifasi” mukaba ni limbuyoti zetuna!—Lik. 1:8.