Bupaki bubonisa kuli Jesu naabile Muprisita Yapahami ka nako yanaakolobezwa ka 29 C.E. Luziba cwañi cwalo? Jesu hanaakolobezwa, naabonisize kuli naatabela kufa bupilo bwahae fa aletare ya swanisezo yeyemela “tato” ya Mulimu. (Magal. 1:4; Maheb. 10:5-10) Bakeñisa kuli aletare ya swanisezo neikalile kubateñi kuzwa feela fakolobelezwa Jesu, kubonahala kuli tempele yetuna ya kwa moya, yona yeyemela tukiso ya kulapela Jehova ka nzila yeswanela, ili yekonahaliswa ki sitabelo sa Jesu sa tiululo, ni yona neikalile kubateñi ka nako yeswana yeo. Aletare ki kalulo ya butokwa ya tempele ya kwa moya yeo.—Mat. 3:16, 17; Maheb. 5:4-6.

Tempele yetuna ya kwa moya hase itomilwe, nekutokwahala Muprisita Yapahami kuli aeze sebelezo yahae. Kacwalo, Jehova naatozize Jesu ka “moya okenile ni ka maata” kuli abe Muprisita Yapahami. (Lik. 10:37, 38; Mare. 1:9-11) Kono lukona kuziba cwañi kuli Jesu naaketilwe kuba Muprisita Yapahami pili asika shwa kale ni kuzuha kwa bafu? Kuli lufumane kalabo kwa puzo yeo, halunyakisiseñi mutala wa Aruni ni babañwi bane baketilwe mwamulaho wahae kuli basebeze sina baprisita babapahami.

Mulao wanaafile Jehova ku Mushe neubonisa kuli ki muprisita yapahami feela yanaalumelelizwe kukena mwa Sibaka Sesikenile Hahulu. Nekunani lisila lene likauhanya Sibaka Sesikenile kwa Sibaka Sesikenile Hahulu. Muprisita yapahami naapunyanga feela kwabuse bwa lisila fa Lizazi la Sebelezo ya Kukwahela Libi. (Maheb. 9:1-3, 6, 7) Sina feela Aruni ni babañwi bane batozizwe kuba baprisita babapahami hasamulaho hane batozizwe pili basika punya kale “kwabuse bwa lisila” la tabernakele, Jesu ni yena naaketilwe kuba Muprisita Yapahami wa tempele yetuna ya Jehova ya kwa moya pili asika shwa kale, mi hasamulaho naaizo “punya kwabuse bwa lisila, fo kikuli, nama yahae” ni kuyo pila kwa lihalimu. (Maheb. 10:20) Kabakaleo, muapositola Paulusi naabulezi kuli Jesu naatile “sina muprisita yapahami,” mi hasamulaho naakeni “mwa tende yetuna hahulu ni yepetehile hahulu yesika ezwa ka mazoho,” ni “mwa lihalimu luli.”—Maheb. 9:11, 24.

Hakuna shutano yeliteñi mwahalaa nako ya fone iezelizwe tumelelano yenca ni fone itiiselizwe. Ki kabakalañi halubulela cwalo? Jesu hasaakambamezi kwa lihalimu ni kufa teko ya bupilo bwahae bobupetehile ilikuli aluliulule kwa sibi, naangile mihato yemibeli kwa mihato yemilaalu yenetiisize tumelelano yenca. Mihato yeo hape neitahisize kuli tumelelano yeo ikale kusebeza kamba kubateñi. Ki mihato mañi ona yeo?

Sapili, Jesu naayemi fapilaa Jehova; sabubeli, Jesu naafile teko ya sitabelo sahae ku Jehova; mi sabulaalu, Jehova naaamuhezi teko ya mali a Jesu anaasuluzwi. Tumelelano neisika kala kale kusebeza kufitela mihato yeo iingiwa.

Bibele haisika bulela nako luli yeo Jehova naaamuhezi teko ya sitabelo sa Jesu sa tiululo. Kacwalo, halukoni kubulela ka kunonga nako luli fone itiiselizwe tumelelano yenca kamba fone ikalezi kubateñi. Nihakulicwalo, seluziba kikuli Jesu naakambamezi kwa lihalimu mazazi alishumi pili lizazi la Pentekota lisika fita kale. (Lik. 1:3) Mwahalaa nako yekuswani yeo, Jesu naafile teko ya sitabelo sahae sa tiululo ku Jehova, mi Jehova naasiamuhezi. (Maheb. 9:12) Bupaki bwa taba yeo nebubonahezi fa lizazi la Pentekota ya 33 C.E. (Lik. 2:1-4, 32, 33) Ka nako yeo, tumelelano yenca neikalile kubateñi.

Ka bukuswani lukona kubulela kuli tumelelano yenca neiezizwe ni kutiiswa Jehova hasaamuhezi teko ya mali a Jesu anaasuluzwi. Kacwalo, ka yona nako yeo, tumelelano yenca neikalile kusebeza, mi Jesu yena Muyemeli wayona ki yena yanaali Muprisita Yapahami.—Maheb. 7:25; 8:1-3, 6; 9:13-15.