1. Sina mokuboniselizwe kwa liñolo la 3 Joani 3, 4, ki nto mañi yelutahisezanga tabo?

MUAPOSITOLA JOANI ulukela kuba yanaatabile hahulu kuutwa kuli batu banaatusize kuziba niti nebazwelapili kusebeleza Jehova ka busepahali. Nebakopani ni miinelo yetaata yemiñata, mi Joani naaezize mwanaakonela kaufela kutiisa tumelo ya Bakreste babasepahala bao banaaanga kuba bana bahae ba kwa moya. Ka mukwa oswana, ni luna lubanga ni tabo bana baluna bakuipepela kamba bana ba kwa moya habaineela ku Jehova ni kuzwelapili kumusebeleza.—Mubale 3 Joani 3, 4.

2. Ki kabakalañi Joani hanaañozi mañolo amalaalu?

² Ka 98 C.E., Joani mwendi naapila mwa muleneñi wa Efese kamba bukaufi ni muleneñi wo. Kubonahala kuli naatutezi mwa muleneñi wo hamulaho wa kulukulwa mwa tolongo kwa sioli sa Patmosi. Ibato ba ka nako yeswana yeo, moya wa Jehova okenile neususumelize Joani kuñola mañolo amalaalu. Joani naañozi mañolo ao kuli atuse Bakreste babasepahala kutiisa tumelo yabona ku Jesu ni kuzwelapili kuzamaya mwa niti.

3. Ki lipuzo mañi zeluka nyakisisa?

³ Ka nako yeo, Joani neli yena feela muapositola yanaasa pila, mi naaikalezwi kuli liputeho nelika keluswa ki batu bane baluta lituto za buhata. * (1 Joa. 2:18, 19, 26) Bakwenuheli bao nebaipapata kuli nebaziba Mulimu kono nebasa mameli litaelo za Jehova. Halunyakisiseñi kelezo yanaañozi Joani ka kususumezwa ki moya okenile. Hape lukanyakisisa lipuzo zetaalu ze: Kuzamaya mwa niti kutalusañi? Ki lika mañi zekona kulupaleliswa kuzwelapili kuzamaya mwa niti? Mi lukona kutusana cwañi kuzwelapili kuzamaya mwa niti?

4. Ka kuya ka liñolo la 1 Joani 2:3-6 ni 2 Joani 4, 6, ki lika mañi zeluswanela kueza kuli luzwelepili kuzamaya mwa niti?

⁴ Kuli luzwelepili kuzamaya mwa niti, lutokwa kuziba niti yefumaneha mwa Linzwi la Mulimu, yona Bibele. Hape luswanela “kumamela milao ya [Jehova,]” kutalusa kuli luswanela kumuutwa. (Mubale 1 Joani 2:3-6; 2 Joani 4, 6.) Jesu ulutomezi mutala omunde wa kuutwa Jehova ka kutala. Kacwalo, nzila yeñwi yelukona kubonisa ka yona kuli lwautwa Jehova, ki ka kueza molukonela kaufela kuhata ka busepahali mwanaahatile Jesu.—Joa. 8:29; 1 Pit. 2:21.

5. Ki nto mañi yeluswanela kuikolwisisa?

⁵ Kuli luzwelepili kuzamaya mwa niti, luswanela kuikolwisisa kuli Jehova kamita ubulelanga niti, mi lika kaufela zalubulelela mwa Linzwi lahae yona Bibele, ki za niti. Hape luswanela kuikolwisisa kuli Jesu ki yena Mesia yanaasepisizwe. Batu babañata kacenu habalumeli kuli Jesu uketilwe kuba Mulena wa Mubuso wa Mulimu. Joani naafile temuso ya kuli nekukaba ni “bapumi babañata” bane bakakelusa batu bane basina tumelo yetiile ku Jehova ni Jesu. (2 Joa. 7-11) Joani naañozi kuli: “Ki mañi lihata kwandaa yalatula kuli Jesu haki yena Kreste?” (1 Joa. 2:22) Kuituta Linzwi la Mulimu ki yona feela nzila inosi yekona kulutusa kusapumiwa. Haiba lueza cwalo, lukafita fa kuziba Jehova ni Jesu. (Joa. 17:3) Mi lukaikolwisisa kuli lufumani niti.

6. Ki muinelo mañi okona kupaleliswa Bakreste babanca kuzwelapili kuzamaya mwa niti?

⁶ Bakreste kaufela baswanela kutokomela kuli habakeluswi ki lituto za butali bwa batu. (1 Joa. 2:26) Bakreste babanca sihulu baswanela kutokomela kuli habakeluswi ki lituto zeo. Kaizeli wa kwa France yabizwa Alexia, * yanani lilimo ze 25, utalusa kuli: “Kwa sikolo, nelulutilwe za kuli lika nelitile ka kuipilaula ni lituto zeñwi za butali bwa batu, mi lituto zeo nelitahisize kuli nikale kukakanya niti. Fokuñwi, nenilumelanga lituto zeo. Kono neniikutwa kuli nekusika luka kulumela litaba kaufela zene lulutiwa kwa sikolo, nisabatisisi zeibulela Bibele kuli nizibe mubonelo wa Jehova.” Bo Alexia nebaitutile buka yebulela za pupo ya Life—How Did It Get Here? By Evolution or by Creation? Hamulaho feela wa lisunda lisikai kuzwa fo, batuhela kukakanya. Bo Alexia  baekeza kubulela kuli: “Neniikolwisisize kuli litaba za mwa Bibele ki za niti. Mi nenilemuhile kuli kupila ka kulatelela likuka za mwa Bibele nekuka nitahiseza tabo ni kozo.”

7. Ki nto mañi yelusa swaneli kueza, mi ki kabakalañi?

⁷ Bakreste kaufela, ibe kuli ki babahulu kamba ki babanca, habaswaneli kuipumisa kusebeleza Jehova kono hape ka nako yeswana inze baeza lika zesa mutabisi. Joani naabulezi kuli haluswaneli kuzamaya mwa niti ka nako yeswana inze lupila ka muzamao wa buhule. (1 Joa. 1:6) Haiba lubata kutabisa Jehova, kamita luswanela kuhupulanga kuli hakuna nto yeipatile fapilaa hae. Nihaike kuli batu habakoni kubona zelueza kwa mukunda, Jehova yena ubona lika kaufela zelueza.—Maheb. 4:13.

8. Ki nto mañi yeluswanela kuambuka?

⁸ Luswanela kuambuka mubonelo wa lifasi ka za sibi. Muapositola Joani naañozi kuli: “Haiba lubulela kuli: ‘Haluna sibi,’ fo lwaipuma ili luna mi niti haiyo ku luna.” (1 Joa. 1:8) Mwa linako za Joani, bakwenuheli nebalumela kuli mutu wakona kuzwelapili kueza lika zemaswe ni kuba mulikanaa Mulimu ka nako yeswana. Ni luna kacenu lupila mwahalaa batu babanani mubonelo ocwalo. Batu babañata baipapata kuli baziba Mulimu, kono habakuteki mubonelo wahae ka za sibi, sihulu mwa taba ya somano. Kunani muzamao omuñwi waanga Jehova kuli ufosahalile, kono bona balumela kuli muzamao ocwalo ulukile, mi mutu ni mutu ulukuluhile kuiketela kueza mwalatela.

9. Bakreste babanca bakona kutusiwa cwañi haiba balatelela likuka za mwa Bibele?

⁹ Bakreste babanca sihulu kukona kubabela taata kuba ni mubonelo oswanela ka za somano bakeñisa kuli batu babakena ni bona sikolo kamba bobasebeza ni bona bakona kulika kubakukueza kuba ni mubonelo ofosahalile. Ki zona zeneezahezi ku muzwale yabizwa Aleksandar. Muzwale yo utalusa kuli: “Basizana  babañwi kwa sikolo nebalikanga kunikukueza kuli nilobale ni bona. Bakeñisa kuli nenihanile kueza cwalo mi nenisina nyazi, babulela kuli mwendi nenili wa kalombe.” Haiba ni mina muipumana mwa muinelo oswana, muhupule kuli kulatelela likuka za mwa Bibele kuka mitusa kuba ni lizwalo lelinde, mukaisileleza kwa mubili, mwa munahano, mi mukazwelapili kuba ni silikani sesinde ni Jehova. Nako kaufela hamutula muliko, kuka mibela bunolo kueza zelukile. Hape muhupule kuli mubonelo omaswe obanani ona batu mwa lifasi ka za somano usimuluha ku Satani. Kacwalo, hamuhanyeza moya wa lifasi, ‘mutula yamaswe.’—1 Joa. 2:14.

10. Ka kuya ka liñolo la 1 Joani 1:9, ki kabakalañi halukona kusebeleza Jehova inze lunani lizwalo lelikenile?

¹⁰ Lwalumela kuli Jehova ki yena feela yanani tukelo ya kulutaluseza muzamao olukile ni osika luka. Mi luezanga molukonela kaufela kuli lusike lwaeza sibi. Kono haiba lueza sibi, luipulelanga libi zaluna ku Jehova ka tapelo. (Mubale 1 Joani 1:9.) Mi haiba lueza sibi sesituna, lukupanga tuso kwa baana-bahulu, bona baketile Jehova kuli balulise. (Jak. 5:14-16) Kono haluswaneli kuzwelapili kuikutwa bumaswe bakeñisa mafosisa ane luezize kwamulaho. Kabakalañi? Kabakala kuli Ndataa luna yalilato naalukisize sitabelo sa tiululo sa Mwanaa hae ilikuli libi zaluna liswalelwe. Jehova usepisize kuli ukaswalela libi za batu bababakile habuniti, mi uezanga cwalo luli. Kacwalo, hakuna nto yeswanela kulupaleliswa kusebeleza Jehova inze lunani lizwalo lelikenile.—1 Joa. 2:1, 2, 12; 3:19, 20.

11. Lukona kusileleza cwañi munahano waluna kwa lituto zekona kufokolisa tumelo yaluna?

¹¹ Luswanela kuhana lituto za bakwenuheli. Kuzwa feela foitomelwa puteho ya Sikreste, Diabulosi uzwezipili kubata nzila ya kufokolisa ka yona tumelo ya batanga ba Mulimu babasepahala. Kabakaleo, luswanela  kuziba molukona kutaluhanyeza litaba za niti ku za buhata. * Lila zaluna likona kuitusisa Intaneti kutahisa kuli lusike lwasepa Jehova ni kulata mizwale baluna. Nikamuta, musike mwalumela litaba za buhata zeo kakuli lizwa ku Satani.—1 Joa. 4:1, 6; Sin. 12:9.

12. Ki kabakalañi haluswanela kutiisa tumelo yaluna?

¹² Kuli lutiyele twaniso ya Satani, luswanela kusepa hahulu Jesu ni kuitebuha musebezi waeza kuli apete mulelo wa Mulimu. Hape luswanela kusepa kuli Jehova uitusisa feela mutanga yasepahala yanani kutwisiso kuetelela kopano yahae. (Mat. 24:45-47) Haiba luituta Linzwi la Mulimu kamita, lukafita fa kusepa hahulu Mulimu. Kueza cwalo kukatahisa kuli tumelo yaluna itiye sina kota yetomile mibisi mwa mubu. Paulusi naabulezi taba yeswana hanaañolela puteho ya Kolose. Naabulezi kuli: “Sina hamuamuhezi Kreste Jesu Mulena, muzwelepili kuzamaya ka kuswalisana ni yena, inze mutomile mibisi ni kutiyela ku yena ni kutiya mwa tumelo.” (Makolo. 2:6, 7) Haiba lutiisa tumelo yaluna, Satani kamba batu babakukuelizwe ki yena, habana kukona kulufokolisa.—2 Joa. 8, 9.

13. Ki lika mañi zeluziba, mi ki kabakalañi?

¹³ Lwaziba kuli lukatoiwa mwa lifasi. (1 Joa. 3:13) Muapositola Joani naañozi kuli: “Lifasi kaufela li mwa maata a yamaswe.” (1 Joa. 5:19) Lifasi le halinze lifita kwa mafelelezo, Satani ukahalifa hahulu. (Sin. 12:12) Ululwanisa ka kuitusisa linzila zesalemusehi zecwale ka muzamao wa buhule kamba lituto za bakwenuheli. Hape ululwanisa ka kulunyandisa maswe. Satani waziba kuli usiyalezwi feela ki nako yenyinyani mi usweli kueza mwakonela kaufela kutuhelisa musebezi wa kukutaza ni kufokolisa tumelo yaluna. Kacwalo, hakukomokisi kuli musebezi waluna ukwalezwi mwa linaha zeñata, mi mwa linaha zeñwi, lika zeñwi zeama musebezi wo halilumelezwi. Nihakulicwalo, mizwale ni likaizeli baluna babapila mwa linaha zeo, basweli baitiisa. Kacwalo, kusina taba ni zasweli kueza Satani kwa batanga ba Mulimu, lukazwelapili kusepahala.

14. Ki ifi nzila yeñwi yelukona kutusa ka yona mizwale ni likaizeli baluna kuzwelapili kuba mwa niti?

¹⁴ Kuli lutuse mizwale ni likaizeli baluna kuzwelapili kuzamaya mwa niti, luswanela kubabonisa mukekecima. (1 Joa. 3:10, 11, 16-18) Haluswaneli feela kulatana, lika halizamaya hande kono hape luswanela kueza cwalo niha kuzuhile butata. Ka mutala, kana kunani mutu yomuñwi yomuziba yashwezwi ki mulatiwa wahae mi utokwa kuomba-ombiwa kamba kutusiwa ka linzila zeñwi? Kamba kana kunani Bakreste babawezwi ki kozi ya ka taho mi batokwa kutusiwa kuyaha sinca Mandu A Mubuso kamba mandu abona? Luswanela kubonisa lilato ni mukekecima kwa mizwale ni likaizeli baluna isiñi feela ka manzwi kono sihulu ka likezo zaluna.

15. Sina mokuboniselizwe kwa liñolo la 1 Joani 4:7, 8, ki nto mañi yeluswanela kueza?

¹⁵ Halubonisa lilato mwahalaa luna, lulikanyisa Ndataa luna wa kwa lihalimu yalilato. (Mubale 1 Joani 4:7, 8.) Nzila yeñwi ya butokwa hahulu yelukona kubonisa ka yona kuli lwalatana, ki ka kuswalelana. Ka mutala, mwendi mutu yomuñwi ukona kulufoseza mi hasamulaho ukona kulukupa kuli lumuswalele. Lukabonisa kuli lwamulata ka kumuswalela ni kusabuluka ndimbelela. (Makolo. 3:13) Muzwale yabizwa Aldo naakopani ni muliko oswana hanaautwile muzwale yomuñwi yanaakuteka hahulu habulela litaba zemaswe ka za mushobo wahae. Bo Aldo bali: “Nako kaufela  nenilapelanga ku Jehova kuli anituse kusanahana lika zemaswe ka za muzwale yo.” Kono kunani zeñwi zene baezize bo Aldo. Nebakupile kusebeza ni muzwale yo mwa bukombwa. Hane banze basebeza hamoho, bo Aldo bataluseza muzwale yo mone baikutwezi ka za litaba zanaabulezi. Bo Aldo bali: “Muzwale yo hanaautwile kuli manzwi ahae naaniutwisize butuku kwa pilu, akupa swalelo. Nenilemuhile kuli muzwale yo naabakile luli bakeñisa mone liutwahalela linzwi lahae hanaaikupela swalelo. Hamulaho wa kuikambota ni yena, lwaba balikani hape.”

16-17. Luswanela kuikatulela kuezañi?

¹⁶ Muapositola Joani naalata hahulu mizwale bahae mi naabata kubatusa kuba ni tumelo yetiile. Taba yeo yaiponahalela hande mwa mañolo ahae amalaalu anaañozi ka kususumezwa ki moya wa Mulimu. Kwasusueza luli kuziba kuli baana ni basali babaswana sina yena baketilwe kuyo busa ni Kreste!—1 Joa. 2:27.

¹⁷ Haike lusebelise kelezo yelunyakisisize mwa taba ye. Luikatulele kuzwelapili kuzamaya mwa niti, ili kuutwa Jehova mwa bupilo bwaluna kaufela. Luitutange Linzwi lahae ni kusepa litaba zeñozwi mwateñi. Mube ni tumelo yetiile ku Jesu. Muhane lituto za butali bwa batu ni lituto za bakwenuheli. Musike mwaipumisa kusebeleza Mulimu kono hape ka nako yeswana inze mueza lika zemaswe, mi muhane kukukuezwa ki batu bababata kuli mueze lika zemaswe. Mupile ka kulatelela likuka za Jehova zepahami za muzamao. Mi haike lutuse mizwale baluna kuzwelapili kuba ni tumelo yetiile ka kubaswalela haba lufoseza ni kubatusa habakopana ni miinelo yetaata. Haiba lueza cwalo, lukazwelapili kuzamaya mwa niti kusina taba ni miinelo yetaata yelukopana ni yona.