Ndatahe Roboami neli Salumoni, yanaabusize Isilaele ka lilimo ze 40. (1 Mal. 11:42) Salumoni naashwile ka silimo sa 997 B.C.E. Kacwalo, Roboami azwa mwa Jerusalema kuya kwa mutulo kwa Sikemi kuli ayo yoliswa fa bulena. (2 Makol. 10:1) Kana munahana kuli naaikalezwi kuli naasike akona kulikanyisa Salumoni, yanaazibahala ka butali bobutuna? Roboami naasika libelela kuli asaba feela mulena, naakatokwa kutatulula litaba zetaata.

Roboami hasaabile mulena, alemuha kuli naatokwa kutatulula butata bobuñwi bobutuna mwa naha ya Isilaele. Kusika fita nako, batu bane bayemela sicaba bataha ku yena, mi bato fitisa pilaelo yabona kuli: “Ndataho naalulwalisize coko yetaata. Kono haiba wena ufukuza kwa sebelezo yetaata yanaa lusebelisa ka yona ndataho, mi uluimulula kwa coko yebukiti yanaa lulwalisize, luka kusebeleza.”—2 Makol. 10:3, 4.

Roboami naasazibi za kueza. Hanaaka eza zene sikupa sicaba, naakatokwa kuitoboha lika zeñwi zeneikoliwa ki yena, lubasi lwahae, ni bane bali mwa kuta yahae, ni kufukuza kwa misebezi yanaafile batu. Kono hanaaka hana kueza zanaakupiwa, sicaba nesika mukwenuhela. Cwale naakaeza cwañi? Mulena yomunca yo pili naakupile tuso kwa baana babahulile bane bali baelezi ba Salumoni. Kono hasamulaho, Roboami akupa kelezo kwa mitangana bane bali litaka zahae. Roboami autwa kelezo ya mitangana bao, mi anyandisa hahulu batu. Abaalaba kuli: “Nika milwalisa coko yebukiti, mi nikaekeza kwa bukiti bwayona. Ndate naamishapa ka lipafa, kono na nika mishapa ka lipafa za miutwa.”—2 Makol. 10:6-14.

Luitutañi kwa taba yeo? Luituta kuli ki kwa butokwa hahulu kuutwa kelezo yeba lufa baana babahulile, babatiile kwa moya. Bakeñisa kuli banani yeloseli, bakona kuziba zekona kuzwa mwa katulo yelubata kueza, mi bakona kulufa kelezo yende.—Jobo 12:12.

Roboami halemuha kuli masika amañwi amukwenuhezi, akubukanya mpi yahae kuli ayo alwanisa. Kono Jehova akauleza muhupulo wahae wo ka kuluma mupolofita Shemaya kuli ayo mutaluseza kuli: “Musike mwakambama kuyo lwanisa banabahabo mina ba Maisilaele. Yomuñwi ni yomuñwi wamina akutele kwa ndu yahae, kakuli ki na yatahisize kuli kuezahale cwalo.”—1 Mal. 12:21-24. *

Mulena yo naataluselizwe kuli asike ayo lwanisa masika anaa mukwenuhezi. Taba yeo iswanela kuba yenekatalize hahulu Roboami! Batu nebaka nga cwañi mulena yo, yanaabembile sicaba kuli naaka bashapa ka “lipafa za miutwa,” kono hasamulaho sicaba hase simukwenuhezi wapalelwa kueza sesiñwi? (Mubapanye 2 Makolonika 13:7.) Kusina taba ni zeo, mulena ni mpi yahae “bamamela linzwi la Jehova mi bakutela kwa mandu abona, sina mwanaa babulelezi Jehova.”

Taba yeo ilulutañi? Iluluta kuli luswanela kuutwa Mulimu nihaikaba kuli kueza cwalo kukatahisa kuli batu balusheunune. Haiba lumamela zalubulelela Mulimu, uka lushemuba ni kulufuyaula.—Deut. 28:2.

Ki lika mañi zeneezahezi ku Roboami? Autwa manzwi a Mulimu ka kutuhela muhupulo wahae wa kulwanisa masika anaa mukwenuhezi, mi akalisa kuyaha mileneñi mwa naha ya masika a Juda ni Benjamine, ili yenebusiwa ki yena. “Atiisa hahulu-hulu mileneñi” yemiñata. (2 Makol. 11:5-12) Mi sa butokwa nikufita kikuli, naamamezi milao ya Jehova ka nakonyana. Kusina taba kuli masika alishumi a mubuso wa Isilaele anaazamaiswa ki Jeroboami naalapela milimu ya maswaniso, babañata bane bapila mwa mubuso wahae ‘bayemela Roboami’ mi baya kwa Jerusalema kuyo lapela Mulimu wa niti. (2 Makol. 11:16, 17) Kacwalo, bakeñisa kuli Roboami naaipeile kuutwa, puso yahae yatiya.

Kono bulena bwahae hase butiile, Roboami naaezize nto yenesika libelelwa. Atuhela kumamela mulao wa Jehova mi akala kulapela milimu ya macaba asili. Ki kabakalañi hanaaezize cwalo? Esi mwendi naakukuelizwe ki mahe yanaali Muamoni? (1 Mal. 14:21) Ibe kuli kucwalo kamba kutokwa, batu ba mwa naha kaufela bamulatelela. Kacwalo, Jehova alumeleza Mulena Shishaki wa Egepita kuli ahape mileneñi ya Juda yemiñata, nihaike kuli Roboami naatiisize mileneñi yeo.—1 Mal. 14:22-24; 2 Makol. 12:1-4.

Miinelo neitatafalile hahulu muta Shishaki naaizo lwanisa Jerusalema, mona mwanaabuseza Roboami. Ka yona nako yeo, mupolofita Shemaya ataluseza Roboami ni manduna bahae lushango lone luzwa ku Mulimu, loluli: “Munituhezi, mi ni na nimituhelezi mwa mazoho a Shishaki.” Roboami naaezize cwañi hautwa lushango lo, lwa kumukalimela? Naacincize! Bibele ili: “Manduna ba Isilaele ni mulena baikokobeza mi bali: ‘Jehova ki yalukile.’” Kabakaleo, Jehova alamulela Roboami, mi muleneñi wa Jerusalema neusika sinyiwa.—2 Makol. 12:5-7, 12.

Hasamulaho, Roboami azwelapili kubusa mubuso wa kwa mboela. Asika shwa kale, naakapwekile bana bahae babañata limpo zeñata, ilikuli basike bakwenuhela Abija mwanahabo bona, yena yanaaka muyola fa bulena. (2 Makol. 11:21-23) Ka kueza cwalo, Roboami naabonisize kutwisiso yanaasina kwa makalelo.

Kusina taba kuli Roboami naaezize hande mwa miinelo yemiñwi, naasika shemubiwa ki Mulimu. Bibele italusa zanaaezize mwahalaa puso yahae kaufela ka kubulela kuli: “Aeza zemaswe.” Ki kabakalañi hai mutalusa cwalo? Kabakala kuli “naasika ikatulela mwa pilu yahae kubata Jehova.”—2 Makol. 12:14.

Halunyakisiseñi taba yahae: Roboami naamamelanga milao ya Mulimu ka linako zeñwi. Mi naaezezanga sicaba sa Jehova lika zende. Kono naasika tiisa silikani sahae ni Jehova kamba kuzwelapili kumutabisa. Kabakaleo, aeza sibi ni kuikenya mwa bulapeli bwa buhata. Mwendi mukona kuipuza kuli: ‘Kana Roboami hanaautwile kalimelo ya Mulimu  naaezize cwalo kabakala kuli naaelelizwe ki babañwi kamba naabakile luli mi naabata kutabisa Mulimu?’ (2 Makol. 11:3, 4; 12:6) Hamulaho wa nako, akalisa kueza lika zemaswe hape. Kaniti, naashutanela kwahule ni Mulena Davida, kuku wahae! Ki niti kuli Davida naaezize mafosisa, kono lika zanaaezize mwa bupilo bwahae kaufela libonisa kuli naalata Jehova, naalata bulapeli bwa niti, mi naabakile habuniti.—1 Mal. 14:8; Samu 51:1, 17; 63:1.

Kaniti luli, lwakona kuituta sesiñwi kwa likande la Roboami. Hakusika fosahala haiba batu basebeza ka taata kuli bafepe mabasi abona ni kueza misebezi yemiñwi ya kutusa batu. Kono kuli lushemubiwe ki Mulimu, luswanela kueza pili misebezi yezwisezapili bulapeli bwa niti ni kuzwelapili kuba mwateñi.

Kuba ni lilato lelituna ku Jehova kuka lutusa kuzwelapili kueza cwalo. Sina feela mulilo hautokwa kukotezwa kuli uzwelepili kutuka, lilato laluna ku Mulimu likazwelapili kutuka haiba lubala Linzwi lahae kamita, kunahanisisa litaba zelubala, ni kuzwelapili kulapela. (Samu 1:2; Maro. 12:12) Lilato laluna ku Jehova lika lususueza kumutabisa mwa lika kaufela zelueza. Mi haiba lueza sibi, lilato leo lika lususueza kubaka ka pilu kaufela. Ka kushutana ni Roboami, lukazwelapili kuba mwa bulapeli bwa niti.—Juda 20, 21.