MAISILAELE ba kwaikale hane baitukiseza kusila Nuka ya Jordani ni kukena mwa naha yanaa basepisize Mulimu, kwataha baenyi babañwi. Baenyi bao neli basali ba macaba asili mi nebatilo mema baana ba Isilaele kwa mukiti. Taba yeo neikona kubonahala inge kuli ki tohonolo yesaipumanelwi feela. Hane bakaya nebakaba ni balikani babanca, kuyo bina, ni kuyo ikola lico zende. Nihaike kuli lizo ni muzamao wa basali bao nelisa lumelelani ni Mulao wanaafile Mulimu Maisilaele, baana ba Isilaele mwendi nebanahanile kuli: ‘Haluna kukukuezwa ki muzamao wabona. Lukatokomela.’

 Ki lika mañi zeneezahezi Maisilaele hane baile kwateñi? Bibele ilutaluseza kuli: “Sicaba sakala kueza buhule ni bana ba Moabi babasizana.” Mane basali bao nebabata kuli baana ba Isilaele balapele milimu ya buhata. Mi nebaezize cwalo luli! Kuswanezi ‘buhali bwa Jehova hane butukezi Isilaele.’—Num. 25:1-3.

Maisilaele bao nebalobile Mulao wa Mulimu ka kukubamela milimu ya maswaniso ni kueza buhule. Batu babañata-ñata nebashwile bakeñisa kuli nebasika utwa Mulimu. (Exo. 20:4, 5, 14; Deut. 13:6-9) Ki kabakalañi zene baezize haliutwisa hahulu butuku? Libaka kikuli nekusiyezi feela nako yenyinyani kuli bakene mwa Naha ya Sepiso. Kambe baana ba Isilaele nebasika loba Mulao wa Mulimu, Maisilaele babañata-ñata bane bashwile nebakabe basilile Nuka ya Jordani ni kukena mwa Naha ya Sepiso.—Num. 25:5, 9.

Muapositola Paulusi naañozi cwana ka za taba yeo: “Lika zeo neliezahezi ku bona sina mitala, mi neliñolezwi kulemusa luna babatahezwi ki linako za maungulo.” (1 Makor. 10:7-11) Kusina kukakanya, Satani naatabile hahulu Maisilaele babañwi hane baezize sibi sesituna ni kupalelwa kukena mwa Naha ya Sepiso. Kacwalo, ki kwa butokwa hahulu kumamela temuso yeo kakuli Satani ubata kuli ni luna lupalelwe kukena mwa lifasi lelinca lalusepisize Mulimu!

Satani ubata kuswasa Bakreste mi uitusisanga tutwa totukonile kuswasa batu babañata. Sina mose lunyakisiselize, Satani naaswasize Maisilaele ka kubakukueza kueza buhule. Ni kacenu, batu babañata basweli kuswasiwa ki katwa kakamaswe hahulu kao. Nzila yeñwi yekona kutahisa kuli luswasiwe ka bunolo ki katwa kao ki ka kubuha maswaniso a mapunu.

Kacenu, mutu wakona kubuha maswaniso a mapunu batu babañwi basazibi. Lilimo-limo kwamulaho, mutu yanaabata kubuha maswaniso a mapunu naatokwa kuya kwa libaka kokubuhiswa mafilimu acwalo kamba kuya kwa lintolo kokulekiswa libuka zecwalo. Batu babañata nebasa yangi kwa libaka zeo mwendi kabakala kuli nebasa lati kuli babonwe ki batu babañwi. Kono kacenu, mutu wakona kubuha maswaniso a mapunu fa Intaneti haali kwa musebezi kamba mane haali mwa mota. Mi mwa linaha zeñata, muuna kamba musali wakona kubuha maswaniso a mapunu inzaa li mwa ndu yahae.

Kono haki zeo feela. Mawaile ni lipangaliko za kufumbata litahisize kuli kube bunolo kubuha maswaniso a mapunu. Batu babonanga maswaniso a mapunu fa sipangaliko sa mutu yomuñwi habazamaya mwa mukwakwa kamba habali mwa mbasi kamba mwa sitima.

Bakeñisa kuli kacenu kubunolo kubuha maswaniso a mapunu ni kueza cwalo mutu asalemuhiwi ki babañwi, batu babañata sebaipumani mwa butata bobutuna kufita lili kaufela. Batu babañata-ñata bababuhanga maswaniso a mapunu basinyize manyalo abona, baikapuzi likute, mi mazwalo abona acinezi. Mi nto yemaswe nikufita kikuli haiba basacinci, silikani sabona ni Mulimu sikasinyeha. Kaniti luli, kubuha maswaniso a mapunu kukenyize batu mwa butata. Mi mwa miinelo yemiñata, kubuha maswaniso a mapunu kutahisanga kuli mutu akatazwe ki minahano yemaswe. Hanyinyani-hanyinyani, mutu yo wakona kuzwisa pilu kwa minahano yeo, kono fokuñwi uzwelangapili kukatazeha ka nako yetelele.

Kono luswanela kuziba kuli Jehova wakona kulusileleza kwa katwa ka Satani kao. Haiba lubata kuli Jehova alusileleze, luswanela kueza zene bapalezwi kueza baana ba Isilaele, ili ‘kumamela linzwi lahae ka tokomelo.’ (Exo. 19:5) Luswanela kulemuha kuli Jehova utoile hahulu mukwa wa kubuha maswaniso a mapunu. Ki kabakalañi halubulela cwalo?

Muhupule kuli milao yanaafile Mulimu kwa sicaba sa Isilaele neishutanela kwahule ni milao yenelatelelwa ki macaba asili. Milao yeo neitusa Maisilaele kuli basike bakukuezwa ki macaba asili anaaeza lika zemaswe. (Deut. 4:6-8) Milao yeo neibonisa hande kuli Jehova utoile muzamao wa buhule.

 Jehova naabulezi lika zeñata zemaswe zanaaeza macaba asili, mi naabulelezi Maisilaele kuli: “Musike mwalatelela mobaezeza batu ba mwa naha ya Kanana, moni mitisa. . . . Naha isilafezi, mi nikafa babapila mwateñi koto kabakala bufosi bwabona.” Mulimu wa Isilaele yakenile naanga mupilelo wa Makanana kuba onyenyisa hahulu kuli mane naanga kuli naha yabona isilafezi.—Liv. 18:3, 25.

Nihaike kuli Jehova naafile koto Makanana, batu babañwi nebazwezipili kuikenya mwa muzamao wa buhule. Hamulaho wa lilimo zefitelela 1,500, Paulusi naatalusize kuli batu ba macaba bane bapila ni Bakreste, ‘nebasa lemuhi bumaswe nibobukana.’ Mane “[nebaituhelezi] kuya ka muzamao wa kusaswabela bufosi kuli baeze mufuta kaufela wa masila ka mukwañuli.” (Maef. 4:17-19) Ni kacenu, batu babañata habaswabeli muzamao wabona omaswe. Bakreste ba niti baswanela kueza mobakonela kaufela kuli baambuke kubuha maswaniso a mapunu.

Kubuha maswaniso a mapunu ki kushwaula Mulimu. Mulimu naabupile batu ka siswaniso sahae ni ka kuswana ni yena, mi naalubupile ni buikoneli bwa kulemuha lika zelukile ni lika zesika luka. Mulimu ka lilato naatomile milao yenebonisa lika zesaswaneli ka za somano. Naalukisize kuli somano ikone kuikoliwa feela ki batu babanyalani. (Gen. 1:26-28; Liprov. 5:18, 19) Kono batu babalukisanga maswaniso a mapunu kamba babasusueza babañwi kuabuha baanga cwañi likuka za Mulimu? Balikeshebisa. Kaniti luli, batu babasusueza babañwi kubuha maswaniso a mapunu bashwaula Jehova. Mulimu ukafa koto batu babaloba likuka zahae za muzamao ka kulukisa kamba kususueza babañwi kubuha maswaniso a mapunu.—Maro. 1:24-27.

Kono kucwañi ka za batu bababalanga litaba zebulela za maswaniso a mapunu kamba kuabuha ka bomu? Babañwi baikutwanga kuli kuitabisa ka nzila yeo hakusika fosahala. Kono mane ka kueza cwalo baswalisana ni batu babaloba likuka za Jehova. Mwendi hane bakala kubuha maswaniso a mapunu nebasina mulelo ocwalo. Kono Bibele ibonisa hande kuli balapeli ba Mulimu ba niti baswanela kutoya hahulu mukwa wa kubuha maswaniso a mapunu. Bibele ili: “Mina babalata Jehova, mutoye bumaswe.”—Samu 97:10.

 Kono nihaiba batu bababata kuambuka kubuha maswaniso a mapunu kubabelanga taata kueza cwalo. Bakeñisa kuli halusika petahala, lutokwa kueza molukonela kaufela kuhanyeza litakazo zemaswe za somano. Hape, pilu yaluna yakona kulupuma kuli lunahane kuli hakusika fosahala kubuha maswaniso a mapunu. (Jer. 17:9) Kono Bakreste babañata batulile muliko wo. Kuziba taba yeo kwakona kumitusa kuba ni buikolwiso bwa kuli ni mina mwakona kutula muliko oswana. Halunyakisiseñi mo Linzwi la Mulimu likona kumituseza kuambuka katwa ka kubuha maswaniso a mapunu kaitusisanga Satani.

Sina molunyakisiselize, Maisilaele nebatuhelezi litakazo zemaswe kuhula mwa lipilu zabona mi baeza lika zene batahiselize butata bobutuna. Nto yeswana yeo yakona kuezahala ni ku luna kacenu. Jakobo, munyanaa Jesu, naañozi cwana hanaatalusa butata bobukona kubateñi haiba lutuhelela litakazo zemaswe kuhula: “Mutu ni mutu . . . [uhohiwa] ni kuhapiwa ki takazo yahae. Cwale takazo hase ihulile, izwala sibi.” (Jak. 1:14, 15) Haiba mutu atuhelela takazo yemaswe kuhula mwa pilu yahae, hamulaho wa nako ukona kueza sibi. Kacwalo, luswanela kueza molukonela kaufela kufelisa mihupulo kaufela yemaswe yelukona kuba ni yona, ni kutuhela kuinahanisisa.

Haiba mulemuha kuli mubanga ni minahano yemaswe, muunge muhato kapili-pili. Jesu naabulezi kuli: “Cwale haiba lizoho kamba lihutu lahao likusitatalisa, ulipume mi ulinepele kwahule ni wena. . . . Mi haiba liito lahao lakusitatalisa, ulikumule mi ulinepele kwahule ni wena.” (Mat. 18:8, 9) Jesu hanaabulela cwalo, naasatalusi kuli luholofaze mibili yaluna luli. Ka kuitusisa swanisezo yeo, naabonisize kuli luswanela kulemuha lika zelutahisezanga kuli lube ni minahano yemaswe, mi hase luezize cwalo, luunge muhato wa kutuhela lika zeo kapili-pili. Lukona kusebelisa cwañi kelezo yeo haiba kutaha maswaniso a mapunu fa sipangaliko seluitusisa?

Haiba muitusisa sipangaliko sesiñwi, mi kutaha maswaniso a mapunu, musike mwanahana kuli, ‘Hakuna butata bobukona kubateñi.’ Kapili-pili mutalimele kusili. Honafo feela mutime TV yamina. Mutime kompyuta  kamba luwaile lwamina kapili-pili. Mi munahane lika zende. Kueza cwalo kuka mitusa kuli musike mwaba ni litakazo zemaswe.

Muswanela kuezañi haiba muzwelapili kuhupula maswaniso a mapunu ane muboni kwamulaho, kusina taba kuli mutuhezi kubuha maswaniso a mapunu? Mutu hasaabuhile maswaniso a mapunu wakona kuzwelapili kuahupulanga ka nako yetelele. Mwakona kuhupula maswaniso ao musika libelela. Haiba muipumana mwa muinelo ocwalo, mwakona kukenelwa ki muliko wa kueza nto yeñwi yemasila. Kacwalo, mulemuhe kuli mukatelwangwa ki mihupulo yecwalo ka nako yemusika libelela, mi muitukiseze kuihanyeza.

Muikatulele kunahana ni kueza lika ka kuya ka mwabatela Mulimu. Mulikanyise muapositola Paulusi yanaatabela ‘kutitika mubili wahae ni kuuzamaisa sina mutanga.’ (1 Makor. 9:27) Musike mwatuhelela litakazo zemaswe kumizamaisa. “Mutuhele kuya ka mikwa ya lifasi le, kono mufetuhe ka kucinca munahano wamina, kuli mulemuhe tato ya Mulimu yende ni yeamuheleha ni yepetehile.” (Maro. 12:2) Muhupule taba ye: Mukaba ni tabo yetuna haiba munahana ni kueza lika ka kuya ka mwabatela Mulimu, kufita kueza lika ka kuya ka litakazo za sibi.

Mulike kupeta mañolo amañwi a mwa Bibele. Mi haiba muba ni mihupulo yemaswe, munahane zabulela mañolo ao. Mañolo acwale ka Samu 119:37; Isaya 52:11; Mateu 5:28; Maefese 5:3; Makolose 3:5; ni 1 Matesalonika 4:4-8 aka mitusa kuba ni mubonelo wa Jehova ka za kubuha maswaniso a mapunu ni zabata kuli mueze.

Muswanela kuezañi haiba fokuñwi muba ni takazo yetuna ya kubuha maswaniso a mapunu kamba mwendi mufumana taata kutuhela kunahana za lika zeo? Mueze momukonela kaufela kulikanyisa mutala wa Jesu. (1 Pit. 2:21) Jesu hasaakolobelizwe, Satani naazwezipili kumulika. Jesu naaezizeñi? Naazwezipili kumuhanyeza. Naakuta-kutezi kuitusisa mañolo kuhanyeza litiko za Satani. Naaize: “Zwa Satani!” mi Satani amusiya. Jesu naasika tuhela kuhanyeza Diabulosi, mi ni mina hamuswaneli kutuhela kueza cwalo. (Mat. 4:1-11) Satani ni lifasi lahae bakazwelapili kumikukueza kuli mube ni minahano yemaswe, kono musike mwatuhela kumuhanyeza. Mwakona kutula muliko wa kubuha maswaniso a mapunu. Jehova wakona kumitusa kutula sila samina.

Muzwelepili kulapela ku Jehova, mi mumukupe kuli amituse. Paulusi naabulezi kuli: “Muzibise Mulimu zemukupa . . . mi kozo ya Mulimu yefita kutwisiso kaufela ikasileleza lipilu zamina ni maata amina a kunahana ka Kreste Jesu.” (Mafil. 4:6, 7) Kozo ya Mulimu ika mitusa kuhanyeza litakazo zemaswe. Haiba musutelela ku Jehova, “ukasutelela ku mina.”—Jak. 4:8.

Lukasilelezwa kwa tutwa twaitusisanga Satani haiba lutiisa silikani saluna ni Mulimu waluna, yena Yapahami ka Kufitisisa mwa pupo kaufela. Jesu naabulezi kuli: “Mubusi wa lifasi [yena Satani] wataha, mi haakoni kuniswala.” (Joa. 14:30) Ki kabakalañi Jesu hanaanani buikolwiso bo? Naatalusize kuli: “Yanilumile uinzi ni na; hasika nisiya ninosi, kakuli kamita nieza lika zemutabisa.” (Joa. 8:29) Ni mina haiba muzwelapili kueza lika zetabisa Jehova, hanaa kumisiya. Muambuke mukwa wa kubuha maswaniso a mapunu, mi Satani hanaa kukona kumiswasa.