TABA YA KUITUTA 25
Musepe Jehova Hamukopana ni Miinelo Yetaata
‘Niziyelehile hahulu.’—1 SAM. 1:15.
PINA 30 Ndate, Mulimu Waka, ni Mulikanaa Ka
ZELUKA ITUTA *
1. Ki kabakalañi haluswanela kumamela temuso ya Jesu?
JESU naafile temuso ye, hanaapolofita zeneka ezahala mwa mazazi a mafelelezo, naaize: “Mutokomele kuli lipilu zamina lisike zaimezwa ki . . . lipilaelo za bupilo.” (Luka 21:34) Luswanela kumamela temuso yeo. Kabakalañi? Kabakala kuli lusweli lwakopana ni miinelo yetaata yebakopana ni yona batu babañwi kaufela mwa lifasi.
2. Mizwale ni likaizeli baluna bakopana ni miinelo mañi yetaata?
2 Fokuñwi, lukopananga ni miinelo yetaata yemiñata ka nako yeswana. Halunyakisiseñi mitala yelatelela. Paki yabizwa John, * yakula butuku bwa mwa booko bobubizwa multiple sclerosis, naalembwalile hahulu musalaa hae hanaa muyubekile hamulaho wa kuba mwa linyalo ka lilimo ze 19. Hasamulaho, bana bahae babasizana bababeli batuhela kusebeleza Jehova. Mutala omuñwi wa batu bane bakopani ni miinelo yetaata ki wa bo mutu ni musalaa hae, bo Bob ni bo Linda. Sibeli sabona nebatuhelisizwe musebezi mi bazwisiwa mwa ndu mone baina. Kwandaa miinelo yeo, bo Linda hape bafumanwa kuli nebakula butuku bwa pilu bobubulaya, mi hape nebanani butuku bobuñwi bone bupaleliswa maselusi a mubili wabona kulwanisa matuku.
3. Liñolo la Mafilipi 4:6, 7 lilufa buikolwiso mañi?
3 Lunani buikolwiso bwa kuli Mubupi waluna, yena Ndataa luna yalilato Jehova, wautwisisa moluikutwelanga halutalimana ni miinelo yetaata. Hape, ubata kulutusa kutiyela miinelo yeo. (Mubale Mafilipi 4:6, 7.) Mwa Linzwi la Mulimu kunani mitala yemiñata ya batanga ba Mulimu bane batalimani ni miinelo yetaata. Bibele hape ilutaluseza mo Jehova naatuselize batanga bahae kutiyela miinelo yetaata yeo. Halunyakisiseñi mitala isikai.
ELIA ‘NAANANI MAIKUTO ASWANA NI ALUNA’
4. Ki miinelo mañi yetaata yanaakopani ni yona Elia, mi naaikutwile cwañi ka za Jehova?
4 Elia naasebelelize Jehova ka nako yeo miinelo neitatafezi, mi naakopani ni twaniso yetuna. Akabe, yomuñwi wa malena ba Isilaele bane basasepahali, naanyezi Jezabele, musali yamaswe yanaalapela Baale. Mulena yo ni musalaa hae, nebabata kuli batu kaufela mwa naha balapele Baale, mi nebabulaile bapolofita ba Jehova babañata. Elia yena naabalehile. Naaitingile ku Jehova ka nako yene kunani lukupwe. (1 Mal. 17:2-4, 14-16) Hape, Elia naasepile Jehova ka nako yene kulukisizwe kuli akopane hamoho ni bapolofita ni balapeli ba Baale. Naasusuelize Maisilaele kusebeleza Jehova. (1 Mal. 18:21-24, 36-38) Elia naaiponezi hande kuli Jehova naamutusa hanaaipumani mwa miinelo yetaata yeo.
Jehova naalumile lingeloi lahae kuli atuse Elia kutiyela muinelo wanaali ku ona (Mubone paragilafu 5 ni 6) *
5-6. Ka kuya ka liñolo la 1 Malena 19:1-4, Elia naaikutwile cwañi ka za muinelo wanaali ku ona, mi Jehova naabonisize cwañi kuli naamulata?
5 Mubale 1 Malena 19:1-4. Kono Elia naasabile hahulu Muoli Jezabele hanaa mufumbezi kuli naaka mubulaya. Kacwalo, abalehela kwa Beere-sheba. Naalembwalile hahulu kuli mane “aikupela kuli ashwe.” Ki kabakalañi hanaaikutwile cwalo? Elia neli mutu yasika petahala, yanaanani “maikuto aswana ni aluna.” (Jak. 5:17) Elia mwendi naaikutwile kuziyeleha hahulu bakeñisa muinelo wanaali ku ona mi naakatezi hahulu. Kubonahala kuli naaikutwa kuli zanaaezize kaufela kuli atuse batu kusepahala ku Jehova neli za mbango, mi miinelo neisika cinca mwa Isilaele, ni kuli neli yena feela yanaasiyezi yanaalapela Jehova. (1 Mal. 18:3, 4, 13; 19:10, 14) Lwakona kukomoka kuli mupolofita yanaasepahala yo naaikutwile cwalo. Kono Jehova yena naautwisisize mwanaaikutwela.
6 Jehova naasika halifela Elia kabakala kutalusa maikuto ahae. Kono naatusize Elia kutiya hape. (1 Mal. 19:5-7) Hasamulaho, Jehova ka lilato atusa Elia kucinca mubonelo wahae ka kueza lika zenebonisize maata ahae amatuna. Cwale Jehova ataluseza Elia kuli nekusa nani batu ba 7,000 mwa Isilaele bane basika kubamela Baale. (1 Mal. 19:11-18) Ka kueza cwalo, Jehova naabonisize Elia kuli naamulata.
MWAKA LUTUSEZA JEHOVA
7. Luitutañi kwa taba yebonisa mo Jehova naatuselize Elia?
7 Kana kunani nto yeñwi yemibilaeza? Kwaomba-omba kuziba kuli Jehova naautwisisize mwanaaikutwela Elia. Taba yeo ibonisa kuli ni luna wautwisisanga moluikutwela. Waziba lika zelukona kueza ni zelusa koni, mi mane waziba ni lika zelunahana ni moluikutwela. (Samu 103:14; 139:3, 4) Haiba luitinga ku Jehova sina mwanaaezelize Elia, Jehova uka lutusa kutiyela miinelo yetaata yelubilaeza.—Samu 55:22.
8. Jehova uka mitusa cwañi kutiyela miinelo yetaata yemibilaeza?
8 Lipilaelo zakona kumizwafisa ni kutahisa kuli muikutwe kuli muinelo wamina hauna kuba hande muta omuñwi. Haiba muikutwa cwalo, muhupule kuli Jehova uka mitusa kutiyela miinelo yetaata yeo. Ukaeza cwañi cwalo? Umimema kuli mumutaluseze lipilaelo zamina ni maikuto amina. Haiba mueza cwalo, uka mitusa. (Samu 5:3; 1 Pit. 5:7) Kacwalo, mutalusezange Jehova miinelo yetaata yemukopana ni yona. Ki niti kuli hamuna kuutwa linzwi lahae halibulela ku mina sina mone kubezi ku Elia, kono ukaambola ni mina ka kuitusisa Bibele ni kopano yahae. Hape uitusisanga mizwale ni likaizeli bamina kuli bamisusueze.—Maro. 15:4; Maheb. 10:24, 25.
9. Kuba ni mulikani kukona kulutusa cwañi?
9 Jehova hanaataluselize Elia kufa Elisha misebezi yemiñwi yanaaezanga, naatusize Elia kufumana mulikani yanaaka sebeza ni yena, mi mulikani yo naaka muomba-ombanga. Ni luna haiba lutaluseza mulikanaa luna lika zelubilaeza, mulikani yo uka lutusa kutiyela muinelo oluli ku ona. (2 Mal. 2:2; Liprov. 17:17) Haiba muikutwa kuli hakuna mutu yemukona kutaluseza maikuto amina, mulapele ku Jehova kuli amituse kufumana Mukreste yatiile kwa moya yaka mitusa kutiyela miinelo yetaata yemukopana ni yona.
10. Likande la Elia likona kulutusa cwañi kuba ni sepo, mi sepiso yeñozwi kwa liñolo la Isaya 40:28, 29, ikona kulutusa cwañi?
10 Jehova naatusize Elia kutiyela miinelo yenee mubilaeza mi naamutusize kumusebeleza ka busepahali ka lilimo zeñata. Likande la Elia lilutusa kuba ni sepo. Lwakona kuipumana mwa miinelo yetaata yekona kulukatalisa kwa mubili ni mwa munahano. Kono haiba lusepa Jehova, uka lufa maata alutokwa kuli luzwelepili kumusebeleza.—Mubale Isaya 40:28, 29.
ANNA, DAVIDA, NI MUÑOLI YOMUÑWI WA SAMU NEBASEPILE JEHOVA
11-13. Miinelo yetaata yene bakopani ni yona batanga ba Mulimu babalaalu ba kwamulaho, neitahisize kuli baikutwe cwañi?
11 Bibele ilutaluseza za batanga babañwi ba Mulimu bane bakopani ni miinelo yenee babilaeza. Ka mutala, Anna naaikutwanga hahulu bumaswe kabakala kuli naasina mwana, mi muhalizo wahae naamusheununanga. (1 Sam. 1:2, 6) Anna naalembwalile hahulu kuli mane naalilanga ni kuhana kuca lico.—1 Sam. 1:7, 10.
12 Mulena Davida ni yena naakopani ni miinelo yetaata. Halunyakisiseñi miinelo yemiñwi yanaakopani ni yona. Naaikutwile kuziyeleha kabakala mafosisa amañata anaaezize. (Samu 40:12) Mwanaa hae yalatwa Abisalomi naamukwenuhezi, mi hasamulaho, Abisalomi naabulailwe. (2 Sam. 15:13, 14; 18:33) Mi yomuñwi wa balikani ba Davida babatuna naamubetekile. (2 Sam. 16:23–17:2; Samu 55:12-14) Mwa lisamu zeñata zanaañozi Davida, naatalusize masitapilu ahae ni tumelo yahae yetiile ku Jehova.—Samu 38:5-10; 94:17-19.
Ki lika mañi zenetusize muñoli yomuñwi wa samu kusebeleza Mulimu ka tabo hape? (Mubone maparagilafu 13-15) *
13 Hamulaho wa nako, muñoli yomuñwi wa samu naakalile kuikumbuta mupilelo wa batu babamaswe. Mwendi muñoli yo naasebelezanga kwa “sibaka sa Mulimu sesikenile,” mi naasimuluha mwa lusika lwa Asafi yanaali Mulivi. Muñoli wa samu yo, naabilaelizwe hahulu ki zeneezahala kuli mane afelelwa ki tabo. Hape, akala kuikutwa kuli kusebeleza Mulimu hakutusi sesiñwi.—Samu 73:2-5, 7, 12-14, 16, 17, 21.
14-15. Mitala ya batu babalaalu bababulezwi mwa Bibele ilulutañi ka za kukupa tuso ku Jehova?
14 Batu babalaalu bababulezwi mwa Bibele bao, kaufelaa bona nebaitingile ku Jehova kuli abatuse. Neba mutaluselize lika kaufela zenee babilaeza. Mi neba mutaluselize ka kulukuluha libaka hane baikutwa kuziyeleha. Kuzwa fo, nebazwezipili kuyanga kwa sibaka sa Jehova sa kulapelela.—1 Sam. 1:9, 10; Samu 55:22; 73:17; 122:1.
15 Jehova ka sishemo, naaalabile litapelo zabona. Anna naabile ni kozo ya mwa munahano. (1 Sam. 1:18) Davida naañozi kuli: “Manyando a mutu yalukile ki amañata, kono Jehova umulamulela ku ona kaufela.” (Samu 34:19) Mi muñoli yomuñwi wa samu yanaazwafile, hasamulaho naabulezi kuli Jehova ‘naasweli lizoho lahae la bulyo’ mi naamuetelela ka kumufa kelezo. Naaize: “Haili na, kusutelela ku Mulimu ki yona nto yende ku na. Jehova Mulena Yapahami ka Kufitisisa ki yena masabelo aka.” (Samu 73:23, 24, 28) Mitala yeo ilulutañi? Ka linako zeñwi, lukaipumana mwa miinelo yetaata yekatahisa kuli luikutwe kuziyeleha. Kono kuli lutiyele miinelo yeo, luswanela kunahanisisa mo Jehova naatuselize babañwi, kuitinga ku yena ka tapelo, ni kuipeya kuutwa ka kumamela litaelo zalufa.—Samu 143:1, 4-8.
MUSEPE JEHOVA MI MUKAKONDISA
Kaizeli yomuñwi naaikauhanyanga ku babañwi, kono aikutwa kuomba-ombiwa hanaakalile kutusa babañwi (Mubone paragilafu 16 ni 17)
16-17. (a) Ki kabakalañi halusa swaneli kuikauhanya ku Jehova ni kwa batu bahae? (b) Lutokwa kuezañi kuli lube ni maata a kutiyela miinelo yeelubilaeza?
16 Mitala ya batu babalaalu bababulezwi mwa Bibele bao hape iluluta tuto yeñwi ya butokwa ye: Haluswaneli kuikauhanya ku Jehova ni kwa batu bahae. (Liprov. 18:1) Bo Nancy, bane balembwalile hahulu bakeñisa kuli bo muunaa bona neba bayubekile, batalusa kuli: “Fokuñwi nenisa latangi kubonahala kwa batu kamba kuambola ni mutu, mi taba yeo neiezahezi hañata. Kono nenilemuhile kuli hane niikauhanyanga kwa batu, neniikutwanga hahulu bumaswe nikufita.” Kono bo Nancy hane banze batusa babañwi bane bakopana ni miinelo yetaata, baikutwa kuomba-ombiwa. Batalusa kuli: “Babañwi hane banitalusezanga butata bone bali ku bona, neniteelezanga ka tokomelo. Nenilemuhile kuli hane nishwela babañwi makeke, nenisa isangi hahulu pilu kwa muinelo waka one unibilaeza.”
17 Haiba lufumaneha kwa mikopano ya puteho, lukaba ni maata a kutiyela miinelo yeelubilaeza. Jehova ‘walutusanga ni kuluomba-omba’ haluli kwa mikopano ya puteho. (Samu 86:17) Walutiisanga ka kuitusisa moya wahae okenile, Linzwi lahae, ni batu bahae. Mikopano ilufa kolo yende ya kuli “lususuezane.” (Maro. 1:11, 12) Kaizeli yabizwa Sophia, naabulezi kuli: “Jehova ni mizwale ni likaizeli baka mwa puteho neba nitusize kutiyela muinelo otaata one nili ku ona. Mi mikopano ya puteho ni yona nei nitusize hahulu. Nilemuhile kuli kutanda nako yeñata mwa simu ni kuswalisana hahulu ni puteho yahesu, kunitusanga kuba ni maata a kutiyela miinelo yeenibilaeza.”
18. Jehova ukona kulutusa cwañi haiba lukopana ni miinelo yezwafisa?
18 Haiba lukopana ni miinelo yezwafisa, luhupuleñi kuli Jehova usepisa kuli kwapili ukafelisa miinelo kaufela yeelubilaeza, mi ni kacenu ulutusa kutiyela miinelo yeo. Ulufanga “takazo ni maata” a kutiyela miinelo yezwafisa ni yetahisa kuli lufelelwe ki sepo.—Mafil. 2:13.
19. Liñolo la Maroma 8:37-39, lilutusa kuba ni buikolwiso mañi?
19 Mubale Maroma 8:37-39. Muapositola Paulusi naañozi kuli hakuna nto yekona kulukauhanya kwa lilato la Mulimu. Lukona kutusa cwañi mizwale ni likaizeli baluna kutiyela miinelo yetaata yebatalimana ni yona? Mwa taba yetatama, lukanyakisisa molukona kulikanyiseza Jehova ka kubonisa mukekecima ni kutusa mizwale ni likaizeli baluna babatalimana ni miinelo yetaata.
PINA 44 Tapelo ya Mutu Yaishuwa
^ para. 5 Kubilaela hahulu ka nako yetelele kukona kulutahiseza butata mwa mubili ni kulukatalisa mwa munahano. Jehova ukona kulutusa cwañi kutalimana ni muinelo wo? Mwa taba ye, lukanyakisisa mo Jehova naatuselize Elia kutalimana ni muinelo otaata wanaali ku ona. Hape lukanyakisisa mitala ya mwa Bibele yemiñwi yeka lutusa kuziba molukona kuboniseza kuli lusepile Jehova halukopana ni miinelo yetaata.
^ para. 2 Mabizo aitusisizwe mwa taba ye acincizwe.
^ para. 53 LITABA ZETALUSA SISWANISO: Lingeloi la Jehova lizusa Elia ni kumufa sinkwa ni mezi.
^ para. 55 LITABA ZETALUSA SISWANISO: Muñoli yomuñwi wa samu, ili yo mwendi naasimuluha mwa lusika lwa Asafi, uikola kuñola lisamu ni kuliopela ni banabahabo yena ba Malivi.
