Niti kikuli hakuna mutu kacenu yaziba luli mwanaabonahalela Paulusi. Maswaniso afumaneha mwa libuka zaluna ki maswaniso feela, isiñi kuli ki mona mwanaabonahalela luli kulikana ni litaba zakale zepumbuzwi.

Kono kunani litaba zeliteñi zekona kulutusa kuziba hanyinyani mwanaabonahalela Paulusi. Ka mutala, mwa magazini ya Zion’s Watch Tower ya March 1, 1902, nekubulezwi kuli: “Ka za ponahalo ya Paulusi: . . . Mwa hatiso yebulela za Paulusi yebizwa ‘Acts of Paul and Thecla,’ . . . yeneñozwi ibato ba ka 150 A. D., nekuñozwi litaba zeama ponahalo ya Paulusi, ili zebonahala kuba zona zeemutalusa hande, mi libonahala kuli lilumelelana ni litaba zese balumezi batu ka nako yetelele. Mwa litaba zeo, Paulusi utaluswa kuli neli ‘muuna yomukuswani, wa sitenda, wa mangombwe, yatomile, wa linsi zeñata; wa ngo yetelele.’”

Hatiso yebizwa The Oxford Dictionary of the Christian Church (yenehatisizwe ka 1997) ibulela cwana ka za litaba zakale zeo: “Kubonahala kuli hatiso ya ‘Acts’ inani litaba za niti zekona kupakiwa ki litaba zakale.” Hatiso yeo neikutekiwa hahulu mwa linako za kwamulaho, kakuli mane kunani miputo yayona ye 80 ya Sigerike yesali teñi ni kacenu, mi litaba zeo zafumaneha ni mwa lipuo zeñwi. Kacwalo, maswaniso afumaneha mwa libuka zaluna alumelelana ni litaba zakale zetalusa mwanaabonahalela muapositola Paulusi.

Kono muhupule kuli kunani litaba za butokwa hahulu zeama Paulusi zefita feela kuziba ponahalo yahae. Paulusi niha naapeta bukombwa bwahae, bahanyezi bahae bane banani mubonelo wa nama neba mutameleza kuli ‘yena hanaaliteñi naafokola, mi manzwi ahae naanyazahala.’ (2 Makor. 10:10) Kono haluswaneli kulibala kuli naabile Mukreste hamulaho wa kubona makazo yanaaezize Jesu. Hape luhupuleñi misebezi yanaaezize Paulusi ka kuba “sisebeliso [sanaaketile Kreste] kuli aise libizo [la Jesu] kwa macaba.” (Lik. 9:3-5, 15; 22:6-8) Mi hape lunahanisise molutusezwa hahulu ki libuka za mwa Bibele zanaañozi Paulusi ka kususumezwa ki moya wa Jehova.

Paulusi naasika ipahamisa kabakala misebezi yanaaezize pili asikaba kale Mukreste, mi naasika bulela sesiñwi ka za ponahalo yahae. (Lik. 26:4, 5; Mafil. 3:4-6) Naabulezi kuli: “Ki na yomunyinyani hahulu kwa baapositola, mi haniswaneli kubizwa muapositola.” (1 Makor. 15:9) Hasamulaho naañozi kuli: “Na yomunyinyani kufita wa mafelelezo ku babakenile kaufela, nenifilwe sishemo seo, kuli nishaele kwa macaba taba yende ya bufumu bwa Kreste bobutuna bobusa koni kufumanwa.” (Maef. 3:8) Kaniti, taba yeo ki ya butokwa hahulu kufita kuziba mwanaabonahalela Paulusi.