Malivi babañwi bane basi baprisita nebaezanga misebezi yemiñwi yecwale ka bupolisa. Musebezi wo neuzamaiswa ki nduna wa tempele. Muñoli wa Mujuda yabizwa Philo, utalusa misebezi yene baezanga mapolisa bao ka kubulela kuli: “Malivi babañwi nebayemanga kwa minyako ye kwa makenelo a tempele, babañwi nebayemanga mwa tempele, fapilaa sibaka sesikenile, kubona teñi kuli hakuna mutu yasaswaneli yakena mwateñi, ili yakena ka kulela kamba ka kusa lela. Babañwi nebakantelanga tempele ka kuzamaya inze baipotoloha, mi nebaezanga cwalo ka kuicapa, babañwi nebasebezanga busihu babañwi musihali.”

Ba mwa kuta ya Sanhedrini nebakupanga mapolisa bao kuli babatuse. Seo neli sona feela sikwata sa Majuda sene silumelelizwe kulwala lilwaniso ki Maroma.

Caziba wa litaba za Bibele yabizwa Joachim Jeremias, utalusa kuli “mapolisa hane baile kuyo tama Jesu, naababuzize libaka hane basika mutama hanaanzaa luta mwa Tempele. (Mat. 26.55) Jesu naasike ababuza puzo yeo kambe nesi bona mapolisa bane bakantelanga tempele.” Caziba yaswana yo, naalumela kuli batu bane balumilwe kuyo tama Jesu nako yeñwi kwamulaho, ni bona neli mapolisa ba tempele. (Joa. 7:32, 45, 46) Hasamulaho, mapolisa ni nduna wa tempele nebalumilwe kuyo tisa balutiwa ba Jesu fapilaa kuta ya Sanhedrini, mi kubonahala kuli ki bona bane bazwiselize muapositola Paulusi kwande a tempele.—Lik. 4:1-3; 5:17-27; 21:27-30.