BO DANIEL NI BO MIRIAM nebanyalani mwa September 2000 mi bakalisa kupila mwa tolopo ya Barcelona, kwa Spain. Bo Daniel bali: “Nelupila bupilo bobuungiwa kuba bupilo bobunde luli. Mibeleko yaluna nei lufumanisa masheleñi amañata anaa lukonisa kucelanga kwa libaka zende kokulekiswa lico, kuyo pota kwa linaha lisili, ni kuapala liapalo zende hahulu. Hape neluyanga kamita mwa sebelezo ya mwa simu.” Kono cwale kwaba ni cinceho yeñwi.

Kwa mukopano omutuna wa mwa 2006, bo Daniel nebafitilwe kwa pilu ki ngambolo mone kunani puzo yeli: “Kana lusweli kutukufalelwa kutusa ‘babasitatala babaya kwa kubulaiwa’ kuli bakene mwa nzila yeliba kwa bupilo bobusa feli?” (Liprov. 24:11) Ngambolo yeo neikoñomekile butokwa bwa kueza musebezi wa kuzibahaza lushango lolupilisa lolu mwa Bibele. (Lik. 20:26, 27) Bo Daniel babulela kuli: “Neniikutwa inge kuli Jehova naabulela ku na.” Mwa ngambolo yeo hape nekutalusizwe kuli kuekeza kwa bukombwa kukona kutahiseza mutu tabo yetuna. Bo Daniel nebaziba kuli taba yeo neli ya niti. Bo Miriam nese bakalile kale kueza bupaina mi nebanani tabo yetuna.

Bo Daniel babulela kuli: “Naikutwa kuli yeo neli yona nako yene nitokwa kueza cinceho yetuna.” Mi nebaezize cwalo luli. Bakusufaza kwa nako yene batandanga kwa mubeleko, bakalisa kueza bupaina, mi bakala kunahana tabo yebakona kuba ni yona, bona ni bo Miriam, hane bakayo sebeleza kwa sibaka kokutokwahala hahulu bakutazi ba Mubuso.

Mwa May 2007, bo Daniel ni bo Miriam batuhela misebezi yabona, mi hasamulaho baya kwa Panama, ili naha yebakile bapotela. Kalulo ya simu yenca yene bakutaleza ku yona neikopanyeleza lioli zeñata zefumaneha mwa sibaka sesibizwa Bocas del Toro Archipelago mwa Liwate la Caribbean, mi buñata bwa batu bane bayahile mwateñi babulela puo ya mwa sibaka seo ya Guaymi. Bo Daniel ni bo Miriam nebanahana kuli masheleñi ane babulukile naakakona kubatusa kuzwelapili kupila mwa Panama ka likweli zebato ba 8.

Nebazamayanga mwa lioli zeo ka kuitusisa mikolo ni linjinga, mi mane basahupula hande musipili wabona wapili, ili musipili one batokwa kuzamaya likilomita zebato eza 32, inze bakambama malundu amatelele, lizazi inze licisa hahulu. Bo Daniel nebakatezi hahulu kuli mane babata kuwelela. Kono hane banze bapota fa mandu ane bafumana mwa nzila, mabasi anaabulela puo ya Guaymi naabaamuhela hande, sihulu bo Daniel ni bo Miriam hane sebaitutile lipulelo lisikai za puo ya mwa sibaka seo. Hañihañi, bakalisa kuzamaisa lituto za Bibele ze 23.

Kono bo Daniel ni bo Miriam hase bafelezwi ki masheleñi, tabo yabona yafela mi bazwafa. Bo Daniel habahupula ka za nako yeo, bali: “Lwakalisa kunahana za kukutela kwa Spain mi lwalotisa miyoko. Neluikutwa hahulu bumaswe kuli neluka siya baituti baluna ba Bibele.” Kono hamulaho wa kweli iliñwi kuzwa fo, baamuhela taba yende. Bo Miriam babulela kuli: “Nelukupilwe kusebeza sina mapaina babaipitezi. Nelutabile hahulu kuli neluka zwelapili mwa sebelezo yaluna!”

Mwa 2015, bo Daniel ni bo Miriam nebakupilwe kuli bakalise kusebeza sina mapaina ba kamita, kabakala licinceho zeneezahala mwa kopano. Nebaka ezañi cwale? Nebasepile manzwi afumaneha kwa Samu 37:5, aali: “Ufe Jehova nzila yahao; uitinge ku yena, mi uka kutusa.” Nebafumani musebezi one baka ipilisa ka ona habanze baeza musebezi wa bupaina, mi kacenu baswalisana ni puteho yefumaneha mwa provinsi ya Veraguas, kwa Panama.

Bo Daniel batalusa kuli: “Lusika zwa kale mwa Spain, nelusa zibi kuli neluka kona kupila bupilo bobubunolo. Kono kacenu lupila bupilo bobucwalo, mi hakuna lika za butokwa luli zelusina.” Ki nto mañi yenee bafile tabo yetuna ka kufitisisa? Babulela kuli: “Hakuna nto yetahisa tabo yetuna inge kutusa batu babaikokobeza kuituta ka za Jehova!”