1. Jehova naapatuluzi litaba mañi ka za sila saluna mwa simu ya Edeni?

ADAMA naaziba kuli linoha halikoni kubulela. Kacwalo, mwendi naalemuhile kuli kunani sibupiwa sesiñwi sa moya sene sibulezi ni Eva ka kuitusisa noha. (Gen. 3:1-6) Bo Adama ni Eva hakuna luli sene baziba ka za sibupiwa sa moya seo. Nihakulicwalo, Adama naaiketezi kusautwa Ndatahe yalilato ya kwa lihalimu ka kuswalisana ni sibupiwa sanaasa zibi seo kulwanisa tato ya Mulimu. (1 Tim. 2:14) Hamulaho feela wa fo, Jehova akala kupatulula litaba ka za sila sene sitahisize kuli bo Adama ni Eva bapalelwe kusepahala, ni kusepisa kuli sila seo nesika sinyiwa kwapili. Kono Jehova hape naalemusize kuli ka nakonyana, sibupiwa sa moya seo sene sibulezi ka kuitusisa noha nesikaba ni maata a kulwanisa batu babalata Mulimu.—Gen. 3:15.

2, 3. Ki kabakalañi hane kusika bulelwa hahulu za Satani pili Mesia asika taha kale fa lifasi?

² Ka butali, Jehova haasika patulula libizo la lingeloi lene limukwenuhezi. * Mulimu hape naasika patulula libizo lelitalusa sila saluna seo, konji hamulaho wa lilimo zebato ba 2,500 kuzwa fakwenuhelwa  lwapili. (Jobo 1:6) Mane mwa Mañolo A Siheberu, ki mwa libuka zetaalu feela molufumana pulelo ya Satani, yetalusa “Muhanyezi,” mi libuka zeo ki 1 Makolonika, Jobo, ni Zakaria. Ki kabakalañi hakusika bulelwa zeñata ka za sila saluna pili Mesia asika taha kale fa lifasi?

³ Kubonahala kuli Jehova naasabati kuli kubulelwe hahulu za Satani ni misebezi yahae mwa Mañolo A Siheberu, kakuli kueza cwalo neikaba kumutumisa. Mulelo omutuna wanaasusumelize batu Jehova kuñola kalulo yeo ya Mañolo neli kuzibahaza Mesia ni kulibisa batu ba Mulimu ku yena. (Luka 24:44; Magal. 3:24) Mulelo wo hane utalelelizwe ka kutaha kwa Mesia fa lifasi, Jehova naaitusisize yena ni balutiwa bahae kupatulula litaba zeñata zeluziba ka za Satani ni mangeloi anaaswalisani ni yena. * Taba yeo yaswanela kakuli Jehova ukaitusisa Jesu ni babatozizwe bakabusa ni bona kupyata Satani ni baba mulatelela.—Maro. 16:20; Sin. 17:14; 20:10.

4. Ki kabakalañi halusa swaneli kusaba Diabulosi?

⁴ Muapositola Pitrosi utalusa Satani Diabulosi kuli ki “tau yebuluma,” mi Joani yena umutalusa kuli ki “noha” ni “drakoni.” (1 Pit. 5:8; Sin. 12:9) Kono haluswaneli kusaba Diabulosi, kakuli maata ahae anani maciñekelo. (Mubale Jakobo 4:7.) Lutusiwa ki Jehova, Jesu, ni mangeloi asepahala. Ka kutusiwa ki bona, lwakona kuhanyeza sila saluna. Nihakulicwalo, lutokwa kuziba likalabo kwa lipuzo za butokwa zetaalu ze: Satani unani maata akuma kai? Uitusisanga cwañi maata ao kukelusa batu? Mi ki lika mañi zasakoni kueza? Halunze lualaba lipuzo zeo, lukanyakisisa zelukona kuituta.

5, 6. Ki kabakalañi mibuso ya batu haisa koni kutahisa licinceho zebatokwa hahulu batu?

⁵ Mangeloi amañata naaswalisani ni Satani kukwenuhela Mulimu. Muunda usika taha kale, Satani naakukuelize mangeloi amañwi kuli alobale ni bana babasizana ba batu. Bibele ibonisa kuli Satani uzamaisa mangeloi ao ka kutalusa ka swanisezo kuli drakoni naawile inzaa hoha iliñwi kwa likalulo zetaalu za linaleli za lihalimu. (Gen. 6:1-4; Juda 6; Sin. 12:3, 4) Mangeloi ao hanaaikauhanyize kwa lubasi lwa Mulimu, akala kuzamaiswa ki Satani. Kono bakwenuheli bao haki sikwata feela sa baipanguli babasa swalisani. Satani ni yena utomile mubuso wahae ka kubata kulikanyisa Mubuso wa Mulimu, mi uipeile kuba mulena. Satani uonga-ongile madimona kuaeza mibuso, kuafa maata, ni kuaeza babusi babazamaisa lifasi.—Maef. 6:12.

⁶ Ka kuitusisa kopano yahae ya libupiwa za moya, Satani uzamaisa mibuso kaufela ya batu. Taba yeo neibonahezi Satani hanaabonisize Jesu “mibuso kaufela ya lifasi” ni kubulela kuli: “Nika kufa maata fahalimwaa mibuso ye kaufela ni kanya yayona, kakuli nifilwe maata ao, mi niafa ku yenitabela kufa kaufela.” (Luka 4:5, 6) Kusina taba kuli Satani ukukueza mibuso ya batu kueza lika zemaswe, mibuso yemiñata ilikanga kuezeza batu bayona lika zende. Mi babusi babañwi babanga ni milelo yeminde. Kono hakuna mubuso wa batu kamba mutu yakona kutahisa licinceho zebatokwa hahulu batu.—Samu 146:3, 4; Sin. 12:12.

7. Satani uitusisa cwañi mibuso, bulapeli bwa buhata ni lipisinisi? (Mubone siswaniso sesi fa likepe 22.)

⁷ Satani ni madimona ahae habaitusisi feela mibuso ya batu kono hape baitusisa ni bulapeli bwa buhata ni lipisinisi kuli bakeluse “lifasi  kaufela.” (Sin. 12:9) Satani uitusisa bulapeli bwa buhata kuhasanya litaba za buhata ka za Jehova. Hape Diabulosi ulika ka taata kutahisa kuli batu babañata basike baziba libizo la Mulimu. (Jer. 23:26, 27) Kabakaleo, batu babañwi ba lipilu zende babanahana kuli balapela Mulimu bapumilwe, mi balapela madimona. (1 Makor. 10:20; 2 Makor. 11:13-15) Satani hape uhasanya litaba za buhata ka kuitusisa lipisinisi. Ka mutala, batu babañata mwa lifasi balutilwe kuli bakona feela kuba ni tabo mwa bupilo haiba baikataza kubata masheleñi ni kuikubukanyeza maluwo amañata. (Liprov. 18:11) Batu babalumela buhata bo baitusisanga nako yeñata mwa bupilo bwabona kusebeleza “Bufumu” kufita kusebeleza Mulimu. (Mat. 6:24) Hamulaho wa nako, lilato labona la kulata sifumu libapaleliswanga kuzwelapili kulata Mulimu.—Mat. 13:22; 1 Joa. 2:15, 16.

8, 9. (a) Ki lituto mañi zepeli zeluituta kwa taba ya bo Adama, Eva, ni mangeloi anaakwenuhezi Mulimu? (b) Kuziba fakuma maata a Satani kulutusa cwañi?

⁸ Mutala wa bo Adama, Eva, ni mangeloi anaakwenuhezi Mulimu ululuta lituto zepeli za butokwa. Tuto yapili kikuli, kunani maneku amabeli, mi luswanela kuketa feela lineku lililiñwi. Lwakona kuiketela kuzwelapili kusepahala ku Jehova kamba kuswalisana ni Satani. (Mat. 7:13) Tuto yabubeli kikuli, batu babaswalisana ni Satani bafumananga feela lituso za makutelakaufi. Adama ni Eva nebabile ni kolo ya kuiketela kueza zende ni zemaswe, mi madimona ni ona naabile ni maata fahalimwaa mibuso ya batu. (Gen. 3:22) Kono kuswalisana ni Satani kamita kutahisanga butata bobutuna bobufita tuso ifi kamba ifi ya makutelakaufi yasepisa kufa batu Satani.—Jobo 21:7-17; Magal. 6:7, 8.

⁹ Kuziba fakuma maata a Satani kulutusa cwañi? Kulutusa kuba ni mubonelo oswanela ka za mibuso ya lifasi, mi kulususueza kukutaza. Lwaziba kuli Jehova ubata kuli lukuteke mibuso ya lifasi. (1 Pit. 2:17) Mi ubata kuli lulatelele milao yelufiwa ki mibuso ya lifasi yeo, ibile feela milao yeo isatahisi kuli lulobe likuka zahae. (Maro. 13:1-4) Kono hape lwaziba kuli haluswaneli kuikenya mwa litaba za bupolitiki, mi haluswaneli kuyemela kopano ya bupolitiki ifi kamba ifi kamba mueteleli ufi kamba ufi. (Joa. 17:15, 16; 18:36) Bakeñisa kuli lwaziba kuli Satani ubata kusinya Jehova libizo, luikutwa kuli luswanela kuluta babañwi niti ka za Mulimu. Lutabile kubizwa ka libizo lahae ni kuitusisa lona, mi lwaziba kuli lukafumana limbuyoti zeñata haiba lumulata hahulu kufita molulatela masheleñi kamba lika zeñwi.—Isa. 43:10; 1 Tim. 6:6-10.

10-12. (a) Satani naakelusize cwañi mangeloi amañwi? (b) Luitutañi ku zeneezahezi kwa mangeloi amañata?

¹⁰ Satani uitusisanga linzila zaziba kuli zakona kukelusa batu. Ka mutala, uitusisanga tushambwe twahae kucoweza batu kuli baeze lika mwalatela. Hape ubembanga batu kuli bakale kumusebeleza.

¹¹ Muhupule zanaaezize Satani kuli akeluse mangeloi amañata kuli akale kumulatelela. Kuswanela kuba kuli naatandile nako yeñata kuli azibe zeneka kelusa mangeloi ao kuli aswalisane ni yena. Mangeloi amañwi naawezi mwa lilaba lahae ka kulobala ni bana babasizana ba batu, mi apepa makwenyepa bane bakalile kunyandisa batu. (Gen. 6:1-4) Mwendi Satani naalikile mangeloi ao ka kuasepisa kuli naakaba ni maata a kubusa batu, kwandaa kulobala feela ni bana babasizana ba batu. Naabata kuli “mwanaa musali” yanaasepisizwe asike abateñi. (Gen. 3:15) Nihakulicwalo, Jehova naatahisize Muunda, ili kupaleliswa milelo ya Satani kaufela ni ya mangeloi anaaipanguzi.

¹² Luitutañi kwa taba yeo? Haluswaneli kulibala kuli Satani uitusisanga hahulu muzamao wa buhule ni buikuhumuso kuli aswase batu. Ka lilimo zeñata-ñata, mangeloi anaaswalisani ni Satani naasebelezanga fapilaa Mulimu. Kono kusina taba kuli naasebelezanga mwa sibaka sesinde cwalo, buñata bwaona naatuhelezi litakazo zemaswe kuahapa. Ka nzila yeswana, mwendi ni luna seluswalisani ni kalulo ya fa lifasi ya kopano ya Mulimu ka lilimo zeñata. Niha luli mwa kopano yekenile cwalo, lwakona kukalisa kuba ni litakazo zemasila. (1 Makor. 10:12) Kacwalo, ki kwa butokwa hahulu kuli luzwelepili kutatuba lipilu zaluna, kuhana litakazo za buhule ni buikuhumuso!—Magal. 5:26; mubale Makolose 3:5.

13. Satani uitusisanga katwa kafi kakañwi kuli aswase batu, mi lukona kukaambuka cwañi?

¹³ Satani hape ukukuezanga batu ka kutahisa kuli babate kuziba litaba za mioya. Kacenu, Satani uitusisa bulapeli bwa buhata ni lika za kuitabisa ka zona kuli akukueze batu kubata kuziba litaba za mioya. Mafilimu, lipapali za fa lipangaliko, ni lika zeñwi za kuitabisa ka zona litahisa kuli batu batabele lika zeswalisana ni tumelo ya mioya. Lukona kueza cwañi kuli lusike lwaswasiwa ki katwa kao? Haluswaneli kulibelela kuli kopano ya Mulimu ika lutaluseza lika za kuitabisa ka zona zeswanela ni zesaswaneli. Yomuñwi ni yomuñwi waluna uswanela kuluta lizwalo lahae ilikuli aeze likatulo zelumelelana ni likuka za Mulimu. (Maheb. 5:14) Kono lwakona kueza likatulo zende haiba lumamela kelezo yanaafile Paulusi ka kususumezwa ki moya wa Mulimu ya  kuli lilato laluna ku Mulimu “litokwe buipi.” (Maro. 12:9) Lwakona kuipuza kuli: ‘Kana lika zeniketa kuitabisa ka zona libonisa kuli ni muipi? Haiba batu boniituta ni bona Bibele kamba boniezezanga misipili ya makutisezo babona lika zeniitabisa ka zona, kana baka niinga kuli niezanga lika zenikutaza?’ Haiba lueza lika zelukutazanga, haluna kuswasiwa ki tutwa twa Satani.—1 Joa. 3:18.

14. Satani ukona kulubemba cwañi, mi lukona kutiyela cwañi muinelo wo?

¹⁴ Kwandaa kuitusisa tushambwe twahae, Satani ulikanga kulubemba ilikuli lutuhele kusepahala ku Jehova. Ka mutala, ukona kukukueza mibuso ya batu kuli ikwalele musebezi waluna wa kukutaza. Mi wakona kuitusisa batu bolubeleka ni bona kamba bolukena ni bona sikolo kuli balusheunune bakeñisa kuli lupila ka likuka za Bibele za muzamao. (1 Pit. 4:4) Hape ukona kuitusisa banabahabo luna baba lulata kuluzwafisa kuli lusike lwayanga kwa mikopano ya puteho. (Mat. 10:36) Lukona kutiyela cwañi miinelo yeo? Sapili, luswanela kulibelela twaniso yecwalo kakuli Satani walulwanisa. (Sin. 2:10; 12:17) Hape, luswanela kuutwisisa libaka halukopana ni miinelo yeo—Satani upiha kuli lukona feela kusebeleza Jehova haiba lika liluzamaela hande. Upiha kuli haiba lukopana ni miinelo yetaata, lukatuhela kusebeleza Mulimu. (Jobo 1:9-11; 2:4, 5) Kuzwa fo, luswanela kukupa kuli Jehova alufe maata a kutiyela miinelo yetaata yelukopana ni yona. Muhupule kuli Jehova haana kuluyubeka nikamuta.—Maheb. 13:5.

15. Kana Satani wakona kuluhapeleza kueza lika zelusa lati? Mutaluse.

¹⁵ Satani haakoni kuhapeleza batu kueza lika zebasa lati. (Jak. 1:14) Niteñi, batu babañata ka kusaziba baezanga lika zatabela Satani. Kono hase baitutile niti, baswanela kuiketela yebabata kusebeleza. (Lik. 3:17; 17:30) Haiba luikatulezi kueza tato ya Mulimu, Satani haana kukona kulutuhelisa kusepahala ku Mulimu.—Jobo 2:3; 27:5.

16, 17. (a) Ki lika lifi zeñwi zasakoni kueza Satani ni madimona ahae? (b) Ki kabakalañi halusa swaneli kusaba kulapela ku Jehova ka kutumusa?

¹⁶ Kunani lika zeñwi hape zasakoni kueza Satani ni madimona ahae. Ka mutala, Mañolo abonisa kuli habakoni kuziba zanahana mutu kamba ze mwa pilu yahae. Ki Jehova feela ni Jesu babanani buikoneli bo. (1 Sam. 16:7; Mare. 2:8) Kono kana lwaswanela kusaba kubulela kamba kulapela ka kutumusa? Kana lwaswanela kusaba kuli Diabulosi ni madimona bakautwa litapelo zaluna ni kulueza maswe? Batili. Kabakalañi? Halusabangi kueza misebezi yeminde halunze lusebeleza Jehova ka kuikalelwa kuli Diabulosi uka lubona. Ka mukwa oswana, haluswaneli kusaba kulapela ka kutumusa ka kuikalelwa kuli Diabulosi uka luutwa. Mane Bibele ilutaluseza za batanga ba Mulimu babañata bane balapezi ka kutumusa, ili bane basika saba kuli Diabulosi uka bautwa. (1 Mal. 8:22, 23; Joa. 11:41, 42; Lik. 4:23, 24) Haiba mwa lipulelo zaluna ni mwa likezo zaluna, luikataza kueza tato ya Mulimu, lwakona kuba ni buikolwiso bwa kuli Jehova haana kutuhelela Diabulosi kulutahiseza kozi yekona kulupaleliswa kusepahala kuya kuile.—Mubale Samu 34:7.

¹⁷ Lwatokwa kuziba sila saluna, kono haluswaneli kumusaba. Ka tuso ya Jehova lwakona kukoma Satani, kusina taba kuli halusika petahala. (1 Joa. 2:14) Haiba lumuhanyeza, ukasaba ku luna. (Jak. 4:7; 1 Pit. 5:9) Babanca sihulu ki bona babata kukelusa Satani. Ki sika mañi sebaswanela kueza kuli batiyele twaniso ya Diabulosi? Puzo yeo ikaalabiwa mwa taba yetatama.