1. Ki kabakalañi batu babañwi habafumananga taata kuituta Bibele?

KACENU batu batokwa kuikataza hahulu kuli bafumane lika za kuipilisa ka zona. Mizwale baluna babañata batandanga lihora zeñata kwa mubeleko kuli bafumanele mabasi abona lika zebatokwa. Babañwi babañata batokwanga kuzamaya misipili yemitelele habaya kwa mibeleko yabona ni habakutela kwa mandu abona zazi ni zazi. Babañwi baipilisanga ka kueza misebezi ya mazoho yekatalisa. Mi lizazi haliyo likela, mizwale ni likaizeli baluna bababeleka ka taata bao, bakatalanga luli. Kacwalo, babañwi kubabelanga taata kuituta Bibele ka nako yebakatezi yeo.

2. Mulukisize kuli muitutange Bibele ka nako mañi?

² Kono niti kikuli luswanela kufumananga nako ya kuituta Linzwi la Mulimu ni lihatiso zaluna. Kueza cwalo ki kwa butokwa bakeñisa kuli kulutusa kutiisa silikani saluna ni Jehova ni kufumana bupilo bobusa feli! (1 Tim. 4:15, 16) Babañwi bapakelanga zazi ni zazi kuli baitute Bibele ka nako yekukuzize, hamulaho wa kupumula busihu. Babañwi bona balukisanga kuituta ni kunahanisisa zebaitutile mwa Bibele ni mwa lihatiso zaluna ka nako ya manzibwana hase kukuzize.

3-4. Ki licinceho mañi zebile teñi ka za litaba zeluamuhelanga, mi ki kabakalañi licinceho zeo hane liezizwe?

³ Kaniti, mwalemuha kuli muswanela kufumananga nako ya kuituta. Kono ki lika mañi zemukona kuituta? Mwendi mukona kubulela kuli: ‘Litaba za kubala ki zeñata hahulu. Nipalelwa kulibala kaufelaa zona.’ Nihaike kuli babañwi bakonanga kubala lihatiso zaluna kaufela, buñata bwa mizwale baluna bapalelwanga kufumana nako ya kueza cwalo. Ba Sitopa Sesietelela baziba taba yeo. Kabakaleo, cwanoñu fa bakusufalize kwa lihatiso zeluamuhelanga hamohocwalo ni litaba zefumaneha fa Intaneti.

 ⁴ Ka mutala, kopano haisa hatisanga buka ya Yearbook of Jehovah’s Witnesses bakeñisa kuli litaba zeñata zesusueza zebonisa zeezahezi mwa bupilo bwa batu zafumaneha fa webusaiti yaluna ya jw.org^®, mi litaba zeñwi zecwalo liboniswangwa mwa progilamu ya ka kweli ya JW Broadcasting^®. Limagazini za Tawala ya Mulibeleli ya nyangela ni za Muzuhe! selihatiswangwa feela halaalu ka silimo. Licinceho ze, nelisika ezwa ka mulelo wa kuli lube ni nako yeñata ya kueza misebezi ya kwa mubili. Mulelo one liezelizwe ki kulutusa kuli lube ni nako yeñata ya kuisa mamelelo kwa “lika za butokwa hahulu nikufita.” (Mafil. 1:10) Halunyakisiseñi momukona kuketela litaba zemuka ituta, ni zemuswanela kueza kuli mutusiwe hahulu hamuituta Bibele.

5-6. Ki lihatiso lifi zeluswanela kuituta ka tokomelo?

⁵ Ki lika mañi zeluswanela kuituta pili? Luswanela kulukisa nako ya kubala Linzwi la Mulimu zazi ni zazi. Litimana zebonisizwe mwa Buka ya Mukopano, ili zelufiwanga kubala mwahalaa sunda, likusufalizwe ilikuli lukone kuba ni nako yeñata ya kunahanisisa zelubalile ni kueza lipatisiso. Halubala, mulelo waluna haki wa kufeza feela kubala litimana zebonisizwe zeo, kono lubata kuli litaba zelubala lilufite kwa pilu ni kulutusa kutiisa silikani saluna ni Jehova.—Samu 19:14.

⁶ Ki lika mañi hape zelukona kuituta ka tokomelo? Luswanela kuitukisezanga Tuto ya Tawala ya Mulibeleli, Tuto ya Bibele ya Puteho, hamohocwalo ni litaba zekayo itutiwa kwa mukopano wa mwahalaa sunda. Hape luswanela kubalanga magazini ni magazini ya Tawala ya Mulibeleli ni ya Muzuhe!

7. Kana lwaswanela kuzwafa haiba halukoni kubala litaba kamba kubuha mavidio kaufela afumaneha fa webusaiti yaluna kamba fa JW Broadcasting?

⁷ Mwendi hape mukona kubulela kuli: ‘Ki niti kuli lihatiso zeluamuhelanga likusufalizwe, kono mavidio ni litaba zefumaneha fa webusaiti yaluna ya jw.org, ni mavidio afumaneha fa JW Broadcasting ki amañata hahulu!’ Haiba ki mona momuikutwela cwalo, muswanela kuezañi? Halunyakisiseñi mutala wo: Mwa macelo amañwi, kubanga ni lico zende zeñata za mifuta-futa. Makasitoma babona balumelezwangwa kuutwa moliutwahalela lico zeliteñi kaufela, kono bakonanga feela kuutwa lico lisikai. Ka mukwa oswana, hamuswaneli kuzwafa haiba hamukoni kubala kamba kubuha litaba kaufela zefumaneha fa webusaiti yaluna. Mubale ni kubuha litaba zemukona. Halunyakisiseñi sekutalusa kuituta ni zeluswanela kueza kuli lutusiwe hahulu haluituta Bibele.

8. Ki lika mañi zemukona kueza hamuitukiseza tuto ya Tawala ya Mulibeleli, mi kueza cwalo kuka mitusa cwañi?

⁸ Kuituta ki kubala inze muisize hahulu mamelelo kwa litaba zemubala ilikuli mutusiwe ki litaba zeo. Haki kubala feela ka bubebe taba yefilwe ni kulala likalabo. Ka mutala, hamuitukiseza tuto ya Tawala ya Mulibeleli, mukale ka kubala litaba ze mwa kalulo yeli, “Zeluka Ituta” yebonisizwe kwa makalelo a taba yeitutiwa. Hasamulaho, munyakisise toho ya taba, tutohonyana totubonisizwe, hamohocwalo ni lipuzo za lundululo. Kihona cwale mukabala taba kaufela ka tokomelo kusina kumata-mata. Munyakisise mubamba obonisa mulelo wa paragilafu, mi hañata mubamba wo ubanga ona mubamba wapili mwa paragilafu ni paragilafu. Mubamba wo hañata ubonisanga sisupo sesituna sa paragilafu. Hamunze mubala taba yeitutiwa, mulike kulemuha mo paragilafu ni paragilafu iswalisanela ni tohonyana yebonisizwe, ni moiswalisanela ni toho ya taba yenyakisiswa. Muñole manzwi emusa zibi ni lisupo zeñwi zemubata kubatisisa, ilikuli muliutwisise.

9. (a) Ki kabakalañi haluswanela kuisa hahulu mamelelo kwa mañolo abonisizwe haluituta Tawala ya Mulibeleli, mi lukona kueza cwañi cwalo? (b) Ka kuya ka liñolo la Joshua 1:8, ki lika mañi zeluswanela kueza kwandaa kubala feela mañolo?

 ⁹ Haluituta Tawala ya Mulibeleli kwa mikopano ya puteho, seluituta luli ki Bibele. Kacwalo, ka nako ya tuto yeo muise hahulu mamelelo kwa mañolo, sihulu mañolo abonisizwe kuli atokwa kubaliwa. Mulemuhe mo manzwi aitusisizwe mwa mañolo aswalisanela ni sisupo sesituna sesi mwa paragilafu. Kuzwa fo, munahanisise ka tokomelo zemubalile mwa liñolo, mi mulike kulemuha momukona kusebeliseza liñolo leo mwa bupilo bwamina.—Mubale Joshua 1:8.

10. Ka kuya ka liñolo la Maheberu 5:14, ki kabakalañi bashemi habaswanela kuluta bana babona kuziba mwakuitutela Bibele ni mwakuezeza lipatisiso ka nako ya kulapela sina lubasi?

¹⁰ Ki niti kuli bashemi babatanga kuli bana babona baikole hahulu tukiso ya Kulapela Sina Lubasi sunda ni sunda. Kono bashemi niha batokwa kulukisanga litaba zekanyakisiswa ka nako ya kulapela sina lubasi, habaswaneli kuikutwa kuli batokwa kulukisanga lika zeñwi zeipitezi sunda ni sunda. Nihaike kuli bakona kulukisa kuli ka Nako ya Kulapela Sina Lubasi kubuhiwe progilamu ya ka kweli ya JW Broadcasting kamba kuli kuezwe nto yeñwi yeipitezi, inge cwalo kuyaha aleka ya Nuwe, hape ki kwa butokwa kuli bashemi balute bana babona kuziba mobakona kuitutela Bibele. Ka mutala, bashemi baswanela kuluta bana babona kuziba mwakuitukiseleza mikopano kamba kuziba mwakuezeza lipatisiso ka za puzo yeñwi yebabuzizwe kwa sikolo. (Mubale Maheberu 5:14.) Haiba banana batanda nako inze baituta litaba zeñwi za mwa Bibele habali kwa ndu, kuka babela bunolo kuisa mamelelo kwa taba yenyakisiswa kwa mikopano ya puteho, kwa mikopano ya mupotoloho, kamba kwa mikopano yemituna, niha kusabuhiswi vidio. Niteñi, nako yebakona kutanda bashemi inze baituta ni bana babona iitingile fobakuma bana ni buikoneli bwabona.

11. Ki kabakalañi hakuli kwa butokwa kuluta batu boluituta ni bona Bibele kuziba mwakuezeza tuto ya ka butu?

¹¹ Batu boluituta ni bona Bibele ni bona baswanela kuziba mwakuezeza tuto ya ka butu. Halukalisa kuituta Bibele ni bona, lubanga ni tabo kubabona habalala likalabo mwa buka yabona ili kubonisa kuli baitukiselize tuto ya Bibele kamba mikopano ya puteho. Kono luswanela kuluta batu boluituta ni bona Bibele kuziba mwakuezeza tuto ya ka butu. Kueza cwalo kuka batusa kakuli habaka kopana ni butata mwa bupilo, habana kumatukela kubuza mizwale ni likaizeli mwa puteho kuli babataluseze za kueza, kono bakaziba mwakufumanela  litaba zekona kubatusa ka kueza lipatisiso mwa lihatiso zaluna.

12. Ki mulelo mañi oluswanela kuba ni ona haluituta Bibele?

¹² Haiba hamu batu babatabela kuituta, mukona kuikutwa kuli hakukonahali kuikola kueza cwalo. Kono mane kwakonahala. Mwakona kukala ka kuitutanga ka nako yekuswani, mi nako hainze iya, muekeze kwa nako yemutanda kueza cwalo. Mube ni mulelo hamunze mueza cwalo. Mulelo waluna omutuna haluituta kikuli lutiise silikani saluna ni Jehova. Kono hape lwakona kuba ni mulelo omuñwi, inge cwalo kualaba puzo yelubuzizwe ki mutu yomuñwi kamba kueza lipatisiso ka za butata bobuñwi bolukopana ni bona.

13. (a) Mutaluse zakona kueza mutu yomunca kuli ayemele litaba zalumela kwa batu bakena ni bona sikolo. (b) Mukona kusebelisa cwañi kelezo yefumaneha kwa liñolo la Makolose 4:6?

¹³ Ka mutala, mwendi mu babanca mi musakena sikolo. Batu bomukena ni bona mwa kilasi bakona kumikataza kabakala kuli hamuopelangi pina ya naha. Mwendi mubata kubataluseza libaka hamusa ezangi cwalo ka kuya ka zemuitutile mwa Bibele, kono mwendi muikutwa kuli hamuzibi mwakutaluseza taba yeo. Kacwalo, mutokwa kueza lipatisiso ka za teñi. Mulelo wa kueza cwalo kikuli mupete lika zepeli ze: (1) kutiisa tumelo yamina ya kuli hamuswaneli kuba ba lifasi ni (2) kuituta zemukona kubulela kuli muyemele niti. (Joa. 17:16; 1 Pit. 3:15) Pili muipuze kuli: ‘Batu bonikena ni bona mwa kilasi bafanga mabaka mañi a kuopela pina ya naha?’ Kihona cwale mukaeza lipatisiso mwa lihatiso zaluna. Mukona kuikutwa kuli kuyemela litaba zemulumela kutaata, kono mane haki cwalo. Batu babañata baikutwa kuli baswanela kuopela pina ya naha bakeñisa kuli mutu yomuñwi yebakuteka ubataluselize kuli baswanela kueza cwalo. Haiba mufumana nihaiba feela sisupo silisiñwi kamba lisupo zepeli, musakona kukolwisa mutu yamibuzize puzo, ili yatabela kuziba luli.—Mubale Makolose 4:6.

14-16. (a) Ki lika mañi zemuswanela kueza kuli muzibe hande buka yeñwi ya mwa Bibele yene musazibi hande sapili? (b) Ka kuitusisa mañolo abonisizwe, mutaluse momukona kuutwisiseza hande buka ya Amosi. (Mubone ni mbokisi yeli, “ Muzibe Hande Batu Bababulezwi Mwa Bibele.”)

¹⁴ Luungeñi kuli kwa mukopano wa puteho omuñwi kukaitutiwa taba yeñwi yeñozwi ki mupolofita, ili yo mwendi hamuzibi hahulu zeñata ka za hae. Kuli muutwisise taba yeo, mutokwa pili kuba ni takazo ya kuziba zeñata ka za litaba zanaañozi. Mukona kueza cwañi cwalo?

¹⁵ Pili, muipuze kuli: ‘Nizibañi ka za mutu yanaañozi buka ya mwa Bibele ye? Neli mutu yacwañi, naapila kai, mi naaeza musebezi mañi?’ Kuziba simuluho ya muñoli hape kwakona kulutusa kuziba libaka hanaaitusisize lipulelo kamba liswanisezo zeñwi. Hamunze mubala Bibele, mulike kulemuha lipulelo zaitusisize muñoli zemitusa kuziba butu bwahae.

¹⁶ Hasamulaho, mulike kueza lipatisiso kuli muzibe fone iñolezwi buka yemubala. Kuli kumibele bunolo kuziba taba yeo, muitusise “Mukoloko wa Libuka za Mwa Bibele” ofumaneha kwa makepe a kwa mafelelezo a Bibele ya Toloko ya Lifasi Lelinca. Hape mwakona kunyakisisa chati yebonisa bapolofita ni malena, yefumaneha mwa Litaba Zeekelizwe A6. Haiba buka ya mwa Bibele yemuituta ki ya bupolofita, mueze lipatisiso kuli muzibe mone iinezi miinelo ka nako yene iñolwa buka yeo. Muipuze kuli: ‘Batu nebaeza lika mañi zemaswe zanaabata kubalemusa mupolofita yo? Ki bo mañi bane bapila ka nako yeswana ni yena?’ Kuli muzibe litaba zeñata, mutokwa kubatisisa mwa libuka zeñwi. Ka mutala, kuli muutwisise mone iinezi miinelo mwa naha ka nako  yanaapila mupolofita Amosi, muye fa liñolo la Amosi 1:1 mi mukafumana tutaku totuka milibisa kwa mañolo a 2 Malena ni 2 Makolonika, ili abonisizwe mwa mukoloko ofumaneha fahalaa likepe. Hape mwendi mukona kubala litaba zeneñozwi ki mupolofita Hosea, ili yo mwendi naapila ka nako yeswana yanaapila Amosi. Litaba ze kaufela zakona kulutusa kuziba mone iinezi miinelo ka nako yanaapila Amosi.—2 Mal. 14:25-28; 2 Makol. 26:1-15; Hos. 1:1-11; Amo. 1:1.

17-18. Ka kuitusisa mitala yebonisizwe mwa maparagilafu kamba mitala yamina, mubonise mo kubatisisa litaba ka butungi kukona kumituseza kuikola tuto ya Bibele ya ka butu.

¹⁷ Hamubala Bibele, mubange ni takazo ya kubata kuziba litaba ka butungi. Ka mutala, luungeñi kuli mubala liñolo la Zakaria kauhanyo 12, yepolofita za lifu la Mesia. (Zak. 12:10) Mwa timana 12, nekupolofitilwe kuli “lubasi lwa ba ndu ya Natani” lukabokolola Mesia haakabulaiwa. Mwa sibaka sa kubala feela taba yeo mushalandanda, mukutumane hanyinyani mi muipuze kuli: ‘Ki swalisano mañi yeliteñi mwahalaa lubasi lwa ba ndu ya Natani ni Mesia? Kana kunani konikona kufumana litaba zeñwi?’ Mueze lipatisiso. Hamuka talima fa timana 12 mukalemuha kuli kunani kataku kaka milibisa kwa mukoloko wa mañolo abonisizwe fahalaa likepe, mi liñolo lapili leliswalisana ni timana yeo ki liñolo la 2 Samuele 5:13, 14, lelibonisa kuli Natani neli yomuñwi wa bana ba Mulena Davida. Liñolo labubeli lelibonisizwe ki liñolo la Luka 3:23, 31, mi lona libonisa kuli Jesu naasimuluha kwa lusika lwa Natani, yanaali kukululu wa Maria. (Mubone Tawala ya Mulibeleli ya August 2017, like. 32, para. 4) Cwale fa mwendi semuutwisisa swalisano yeliteñi mwahalaa lubasi lwa ba ndu ya Natani ni Mesia. Nemuziba kuli nekupolofitilwe kuli Jesu naakasimuluha mwa lusika lwa Davida. (Mat. 22:42) Kono cwale  Davida naanani bana babashimani babafitelela 20. Kuswanezi kanti Zakaria hanaapolofitile ka kunonga kuli ba lubasi lwa Natani nebaka bokolola Jesu hanaaka bulaiwa.

¹⁸ Halunyakisiseñi mutala omuñwi. Liñolo la Luka kauhanyo 1 libonisa kuli lingeloi lelibizwa Gabriele nelipotezi Maria mi nelibulezi cwana ka za mwanaa yanaaka pepa: “Yena ukaba yomutuna mi ukabizwa Mwana wa Yapahami ka Kufitisisa, mi Jehova Mulimu uka mufa lubona lwa Davida ndatahe, mi ukabusa sina Mulena fahalimwaa ba ndu ya Jakobo kuya kuile.” (Luka 1:32, 33) Mwendi luisanga hahulu mamelelo kwa manzwi apili anaabulezi Gabriele abonisa kuli Jesu naakabizwa “Mwana wa Yapahami ka Kufitisisa.” Kono Gabriele hape naapolofitile kuli Jesu ‘naakabusa sina Mulena.’ Mwendi lwakona kuipuza kuli: ‘Maria naaikutwile cwañi hanaautwile manzwi anaabulezi Gabriele? Kana naanahanile kuli Gabriele naatalusa kuli Jesu naakayola Mulena Heroda kamba kuyola yomuñwi wa malena ba Isilaele?’ Jesu hanaakaba mulena fa lifasi, fo kutalusa kuli Maria naakakutekiwa hahulu ka kuba mahe mulena, mi lubasi lwahae neluka pila mwa lapa la mulena. Kono hakuna litaba zebonisa kuli Maria naanahanile kuli ki zona zanaatalusa Gabriele zeo kamba zebonisa kuli Maria naakupile kufiwa situlo mwa Mubuso, sina feela mone baezelize balutiwa ba Jesu bababeli. (Mat. 20:20-23) Kaniti luli, taba ye ilutusa kulemuha kuli Maria naali mutu yaikokobeza!

19-20. Ka kuya ka liñolo la Jakobo 1:22-25 ni Jakobo 4:8, luswanela kuba ni mulelo mañi haluituta?

¹⁹ Kamita luhupulange kuli mulelo waluna omutuna haluituta Linzwi la Mulimu ni lihatiso zaluna kikuli lutiise silikani saluna ni Jehova. Hape, lubata kuziba hande moluinezi ni kuziba licinceho zeluswanela kueza kuli lutabise Mulimu. (Mubale Jakobo 1:22-25; 4:8.) Kacwalo, lusika kalisa kale kuituta Bibele, luswanela kukupanga Jehova kuli alufe moya wahae. Luswanela kumukupa kuli alutuse kuutwisisa litaba zelubala ni kulutusa kulemuha licinceho zeluswanela kueza.

²⁰ Haike kaufelaa luna lulikanyise muuna wa Mulimu yatalusizwe ki muñoli yomuñwi wa samu kuli: “Utabela mulao wa Jehova, mi waubala ni kuunahanisisa, musihali ni busihu. . . . Zaeza kaufela likakonda.”—Samu 1:2, 3.