Bupolofita bobuñwi bobubonisizwe fa chati ye butalusa litaba zeneezahezi ka nako yeswana. Kaufelaa bona bubonisa kuli lupila mwa “nako ya mafelelezo.”—Dan. 12:4.

• Liñolo Sin. 11:7; 12:13, 17; 13:1-8, 12

  Bupolofita “Sibatana” sesibusize batu ka lilimo-limo. Mwa nako ya mafelelezo, toho yasona yabu 7 ibonahala kuli ibulailwe. Kono hasamulaho, toho yeo yafola mi “lifasi kaufela” lilatelela sibatana. Satani uitusisa sibatana seo ‘kulwanisa babasiyezi.’

  Talelezo Hamulaho wa twaniso yetuna yeo yeswana sina mezi a Muunda, mibuso yelwanisa Jehova ikalisa kubusa batu. Hase kufitile lilimo zeñata kuzwa fo, ka nako ya Ndwa ya Lifasi Yapili, naha ya Britain ifelelwa ki maata. Kono naha ya America haikala kuswalisana ni yona, iba ni maata hape. Mwa nako ya mafelelezo, Satani uzwezipili kuitusisa mibuso ya lifasi kaufela kunyandisa batu ba Mulimu.

• Liñolo Dan. 11:25-45

  Bupolofita Mwa nako ya mafelelezo, mulena wa kwa mutulo ni mulena wa kwa mboela nebaka lwanisana.

  Talelezo Germany ilwanisa mubuso wa Britain ni America. Ka 1945, mubuso wa Soviet Union ni linaha zeswalisana ni ona liba mulena wa kwa mutulo. Ka 1991, mubuso wa Soviet Union wawa, mi hamulaho wa nako, Russia ni linaha zeswalisana ni yona liba mulena wa kwa mutulo.

• Mañolo Isa. 61:1; Mala. 3:1; Luka 4:18

  Bupolofita Jehova uluma “numwana” wahae kuli ‘alukise nzila’ pili Mubuso wa Mesia usika tomiwa kale. Numwana yo ukala ‘kushaela taba yende ku babaishuwa.’

  Talelezo Kuzwa ka 1870, Muzwale C. T. Russell ni mizwale babañwi bakala kuituta Bibele ka tokomelo ilikuli balute litaba za niti ze mwateñi. Ka 1881, balemuha kuli batanga ba Mulimu kaufela baswanela kukutaza. Bahatisa litaba zecwale ka “Bakutazi ba 1,000 Ba Tokwiwa” ni “Ba Ba Ketezwi ku Kutaza.”

• Liñolo Mat. 13:24-30, 36-43

  Bupolofita Sila sicala mufuka mwa simu ya buloto, mufuka uhulelela hamoho ni buloto mi hakuzibahali shutano ye mwahalaa zona konji ka nako ya kutulo; hasamulaho, mufuka ukauhanywa kwa buloto.

  Talelezo Kukala ka 1870, shutano ye mwahalaa Bakreste ba niti ni Bakreste ba buhata ikala kuiponahalela hande. Mwa nako ya mafelelezo, Bakreste ba niti bakubukanywa ni kukauhanywa kwa Bakreste ba buhata.

• Liñolo Dan. 2:31-33, 41-43

  Bupolofita Mahutu a sipi yezwakani ni lizupa ki kalulo ya siswaniso sesipangilwe fa lisipi zeshutana-shutana.

  Talelezo Lizupa liyemela batu-tu feela bababusiwa ki Britain ni America, ili babahanyeza puso yeo. Batu bao bapaleliswa mubuso wo kubusa ka maata.

• Liñolo Mat. 13:30; 24:14, 45; 28:19, 20

  Bupolofita “Buloto” bukubukanyezwa mwa “sibulukelo” mi “mutanga yasepahala yanani kutwisiso” uketiwa kubabalela “babeleki ba mwa ndu.” “Taba yende ye ya Mubuso” ikala kukutazwa mwa “lifasi kaufela.”

  Talelezo Ka 1919, mutanga yasepahala uketiwa kuli ababalele batu ba Mulimu. Kuzwa feela ka nako yeo, Baituti ba Bibele bakala kukutaza mwa libaka zeñata. Kacenu, Lipaki za Jehova bakutaza mwa linaha zefitelela 200 mi bahatisa lihatiso zetomile fa Bibele mwa lipuo zefitelela 1,000.

• Mañolo Dan. 12:11; Sin. 13:11, 14, 15

  Bupolofita Sibatana sesinani manaka amabeli sibulelela batu kueza “siswaniso sa sibatana,” mi sifa “siswaniso sa sibatana bupilo.”

  Talelezo Mubuso wa Britain ni America utoma Kopano ya League. Linaha zeñwi liswalisana ni kopano yeo. Hamulaho wa nako, mulena wa kwa mutulo ni yena ukala kuswalisana ni Kopano ya League, kono ueza cwalo kuzwa feela ka 1926 kuisa 1933. Batu nebalumela kuli Kopano ya League neika tahisa kozo mwa lifasi kaufela, hailifo ki Mubuso wa Mulimu feela okona kueza cwalo. Ka mukwa oswana, batu kacenu balumela kuli Kopano ya UN yakona kutahisa kozo mwa lifasi.

• Liñolo Dan. 8:23, 24

  Bupolofita Mulena yabonahala kuba ni buhali ‘utisa sinyeho ka nzila yekomokisa.’

  Talelezo Mubuso wa Britain ni America utahisize sinyeho yetuna. Ka mutala, Ndwa ya Lifasi Yabubeli hane inze ikolota, naha ya America neiitusisize limbomba zepeli zemaata hahulu kutahisa sinyeho yetuna kwa naha yeneli sila sayona ni mubuso wa Britain.

• Mañolo Dan. 11:31; Sin. 17:3, 7-11

  Bupolofita “Sibatana sa mubala wa bufubelu bobutona” sesinani manaka alishumi silongoka mwa mukoti mi ki sona mulena wabu 8. Mwa buka ya Daniele, mulena yo ubizwa “nto yenyenyisa yetahisa sinyeho.”

  Talelezo Ka nako ya Ndwa ya Lifasi Yabubeli, Kopano ya League neisina maata. Hamulaho wa ndwa yeo, Kopano ya UN ‘yatomiwa.’ Sina feela batu hane balumela kuli Kopano ya League neikona kutahisa kozo mwa lifasi, batu kacenu balumela kuli Kopano ya UN yakona kutahisa kozo mwa lifasi kaufela, hailifo ki Mubuso wa Mulimu feela okona kueza cwalo. Kopano ya UN ikalwanisa bulapeli.

• Mañolo 1 Mates. 5:3; Sin. 17:16

  Bupolofita Macaba afa zibiso ya “kozo ni buiketo,” mi “manaka alishumi” ni “sibatana” lilwanisa “lihule” ni kuliyundisa. Hasamulaho, macaba asinyiwa.

  Talelezo Macaba akaipapata kuli akonile kutahisa kozo ni buiketo mwa lifasi kaufela. Hasamulaho, macaba aswalisana ni Kopano ya UN akasinya bulapeli bwa buhata kaufela. Ao akaba ona makalelo a ñalelwa yetuna. Ñalelwa yeo ikafela Jesu haakasinya lifasi la Satani kaufela fa Armagedoni.

• Mañolo Ezek. 38:11, 14-17; Mat. 24:31

  Bupolofita Gogo utaseza naha ya batu ba Mulimu. Hasamulaho, mangeloi akubukanya “baketiwa.”

  Talelezo Mulena wa kwa mutulo ni mibuso yemiñwi ya lifasi bakalwanisa batu ba Mulimu. Twaniso yeo hase ikalile, Bakreste babatozizwe babasa liteñi fa lifasi, bakakubukanyezwa kwa lihalimu.

• Mañolo Ezek. 38:18-23; Dan. 2:34, 35, 44, 45; Sin. 6:2; 16:14, 16; 17:14; 19:20

  Bupolofita ‘Yapahami’ fa “pizi yesweu” ufeleleza “tulo yahae” ka kuyundisa Gogo ni mpi yahae. “Sibatana” ‘sinepelwa mwa lisa la mulilo,’ mi siswaniso sesituna sasinyiwa.

  Talelezo Jesu, yena Mulena wa Mubuso wa Mulimu uto pilisa batu ba Mulimu. Jesu, hamoho ni babusi babañwi ba 144,000 ni limpi za mangeloi zeetelelwa ki yena, ukasinya macaba a lifasi la Satani alwanisa batu ba Mulimu.