1. Liñolo la 2 Makorinte 3:1-3 lilutusa cwañi kuitebuha tohonolo yelunani yona ya kuluta batu Bibele ni kubatusa kukolobezwa? (Mubone siswaniso sesi fa kava.)

MUIKUTWANGA cwañi hamubona muituti wa Bibele mwa puteho yamina hakolobezwa? Kusina kukakanya, mubanga ni tabo. (Mat. 28:19) Mi haiba ki mina bane baitutanga Bibele ni muituti yo, mubanga ni tabo yetuna kumubona hakolobezwa! (1 Mates. 2:19, 20) Balutiwa babanca babasazo kolobezwa ki ‘mañolo [amande] apaka’ bahasanyi bane baitutanga ni bona hamohocwalo ni puteho kaufela.—Mubale 2 Makorinte 3:1-3.

2. (a) Ki puzo mañi ya butokwa yeluswanela kunyakisisa, mi ki kabakalañi? (b) Tuto ya Bibele ki nto mañi? (Mubone litaluso ze kwatasi.)

² Kwatabisa luli kuziba kuli mwa lilimo zeene zefelile, ka avareji, bahasanyi mwa lifasi kaufela babihile lituto za Bibele * zebato eza 10,000,000 ka kweli. Mi mwa lilimo zeswana zeo, ka avareji, batu babafitelela 280,000 nebakolobelizwe silimo ni silimo ni kuba Lipaki za Jehova ni balutiwa ba Jesu Kreste babanca. Lukona kutusa cwañi baituti ba Bibele babañata-ñata bao kuli bakolobezwe? Jehova usabonisa batu pilu-telele mi ubafile kolo ya kuba balutiwa ba Kreste; kacwalo, luswanela kueza molukonela kaufela kubatusa kueza zwelopili kuli bakolobezwe kapili-pili. Nako yesiyezi ki yekuswani!—1 Makor. 7:29a; 1 Pit. 4:7.

3. Ki lika mañi zeluka nyakisisa mwa taba ye ka za kuzamaisa lituto za Bibele?

 ³ Bakeñisa kuli musebezi wa kuluta batu kuba balutiwa uswanela kuezwa ka putako, ba Sitopa Sesietelela nebakupile liofisi za mutai kueza lipatisiso kuli luzibe zelukona kueza kuli lutuse batu boluituta ni bona Bibele kueza zwelopili ni kukolobezwa. Mwa taba ye ni yetatama, lukanyakisisa zelukona kuituta kwa mizwale ni likaizeli babanani yeloseli babacwale ka mapaina, balumiwa, ni baokameli ba mupotoloho. * (Liprov. 11:14; 15:22) Mizwale ni likaizeli bao nebafile liakalezo zekona kutusa bahasanyi ni baituti ba Bibele kuziba zebaswanela kueza kuli tuto ya Bibele ituse muituti kueza zwelopili. Mwa taba ye, lukanyakisisa lika zeketalizoho zatokwa kueza muituti kuli aeze zwelopili ni kukolobezwa.

4. Ki lika mañi zeluswanela kulemuha ka za kuzamaisa lituto za Bibele ka nako yekuswani feela?

⁴ Mizwale ni likaizeli baluna babañata bazamaisanga lituto za Bibele ka nako yekuswani, mi fokuñwi baitutanga ni baituti babona inze bayemi fa minyako. Nihaike kuli kueza cwalo kukona kutusa mutu kutabela kuituta Bibele, hañata lipuisano zeo libanga zekuswani, mi mwendi fokuñwi halieziwangi sunda ni sunda. Mi kuli batuse mutu yanaabonisize kuli watabela kuituta Bibele, mizwale babañwi bakupanga mutu yo kuli abafe nombolo ya luwaile lwahae, mi hasamulaho bamulizezanga kamba kumuñolela kashango ni kuikambota ni yena litaba zeñwi za mwa Mañolo basika mupotela kale. Bakona kuzwelapili kuba ni lipuisano zekuswani zeo ka likweli kusina kuzamaisa tuto ya Bibele yezwelapili. Niteñi, kana muituti wakona kuunga muhato wa kuineela ni kukolobezwa haiba aituta feela Linzwi la Mulimu ka nako yekuswani yeo? Kutokwa.

5. Ki lika mañi zanaakoñomekile Jesu kwa liñolo la Luka 14:27-33 zekona kulutusa kupeta hande musebezi wa kuluta batu kuba balutiwa?

⁵ Nako yeñwi, Jesu naafile swanisezo yebonisa zatokwa kueza mutu kuli abe mulutiwa wahae. Naabulezi za mutu yomuñwi yabata kuyaha tawala ni za mulena yabata kuya kwa ndwa. Jesu naabulezi kuli muyahi uswanela ‘kuina fafasi pili ni kubala lisinyehelo’ kuli abone haiba unani masheleñi a kufeza kuyaha tawala ni kuli mulena utokwa ‘kuina pili fafasi ni kulelisana ni babañwi’ kuli abone haiba mpi yahae yakona kutula mwa ndwa. (Mubale Luka 14:27-33.) Ka mukwa oswana, Jesu naaziba kuli mutu yabata kuba mulutiwa wahae, uswanela pili kunahanisisa ka  tokomelo zatokwa kueza kuli abe mulutiwa wahae. Lwakona kutusa baituti baluna ba Bibele kueza zanaabulezi Jesu ka kubasusueza kuli baitutange ni luna sunda ni sunda. Lukona kueza cwañi cwalo?

6. Ki lika mañi zelutokwa kueza kuli lube ni lituto zezwelapili?

⁶ Mukale ka kuekeza kwa nako yemuitutanga ni baituti bamina. Mwendi mwakona kunyakisisa ni bona litaba zeñwi za mwa Mañolo nako kaufela hamu bapotela. Muñaa ndu hasaatwaezi kuituta ni mina ka nako yetelelenyana, mumukupe haiba kunani sibaka sesiñwi komukona kuyo ina ni yena ni kuzwelapili kunyakisisa litaba za mwa Bibele. Kalabo yakafa muñaa ndu ika mitusa kuziba haiba luli watabela kuzwelapili kuituta Bibele kamba kutokwa. Mi kuli mumutuse kuituta litaba zeñata, mwakona kukupa muituti wamina haiba watabela kuitutanga ni mina habeli ka sunda. Kono kunani lika zeñwi zemutokwa kueza kwandaa kuitutanga feela hañwi kamba habeli ka sunda.

7. Muluti ukona kuitukiseza cwañi hande tuto ni tuto yakazamaisa?

⁷ Ka kuba muluti, muswanela kuitukisezanga hande tuto ni tuto yemuka zamaisa. Mwakona kukala ka kubala litaba zemukayo ituta ni kubala mañolo abonisizwe. Muutwisise hande lisupo zetuna. Munyakisise toho ya taba ya tuto, tutohonyana twa taba, lipuzo, mañolo abonisizwe kuli “mubale,” maswaniso, ni mavidio aswalisana ni tuto yemukayo nyakisisa. Munahanisise ka za muituti wamina wa Bibele ni momukona kutaluseza litaba zeo ka nzila yebunolo ni yeutwahala kuli muituti wamina akone kuutwisisa hande ni kusebelisa zakaituta.—Neh. 8:8; Liprov. 15:28a.

8. Luitutañi kwa manzwi anaabulezi muapositola Paulusi a kwa Makolose 1:9, 10?

⁸ Hamuitukiseza, mulapele ku Jehova ka za muituti wamina ni butokwi bwahae. Mukupe Jehova kuli amituse kuluta litaba za mwa Bibele ka nzila yekafita muituti kwa pilu. (Mubale Makolose 1:9, 10.) Mulike kunahanisisa haiba kunani nto yeñwi yakona kupalelwa kulumela kamba kuutwisisa hande muituti wamina. Muhupule kuli mulelo wamina ki wa kumutusa kueza zwelopili kuli akolobezwe.

9. Muhasanyi ukona kutusa cwañi muituti wahae kuitukiseza tuto? Mutaluse.

⁹ Lusepa kuli lituto za Bibele zaituta muituti waluna, lika mutusa kuitebuha zamuezelize Jehova ni Jesu, ni kuli ukabata kuituta zeñata. (Mat. 5:3, 6) Kuli atusiwe hahulu ki litaba zaituta, muituti utokwa kuisa hahulu pilu kwa litaba  zeo. Mi kuli mumutuse kueza cwalo, mumutaluseze libaka haswanela kuitukisezanga pili musika ituta kale ni yena, ka kubala litaba zakaituta ni kunahanisisa mwakona kulisebeliseza. Mukona kutusa cwañi muituti wamina kuitukiseza? Muitukiseze tuto hamoho ni muituti wamina kuli mumubonise mwakona kuitukiseza tuto. * Mumubonise mwakona kufumanela likalabo zenongile za lipuzo, mi mumutaluseze libaka kulala feela manzwi kamba mibamba yealaba puzo hakukona kumutusa kuhupula kalabo. Cwale kihona muka mukupa kuli aalabe ka kuitusisa manzwi ahae. Hakaeza cwalo, mukaziba haiba uutwisisize hande litaba zaituta. Kono hape kunani nto yeñwi yemutokwa kususueza muituti wamina kueza.

10. Ki kabakalañi muituti hatokwa kubalanga Bibele zazi ni zazi, mi uswanela kuezañi kuli atusiwe hahulu ki litaba zabala mwa Bibele?

¹⁰ Kwandaa kuituta sunda ni sunda ni muluti wahae, muituti ukatusiwa hahulu haiba aeza lika zeñwi anosi zazi ni zazi. Uswanela kuambolanga ni Jehova. Ka mukwa ufi? Ka kuteeleza ku Jehova ni kuambola ni yena. Ukona kuteeleza ku Mulimu ka kubalanga Bibele zazi ni zazi. (Josh. 1:8; Samu 1:1-3) Mumubonise mwakona kuitusiseza “Tomahanyo ya Kubala Bibele” yefumaneha fa webusaiti ya jw.org. * Kono kuli atusiwe hahulu ki litaba zabala mwa Bibele, mumususueze kunahanisisa zeibulela Bibele ka za Jehova ni mwakona kusebeliseza litaba zaituta mwa bupilo bwahae.—Lik. 17:11; Jak. 1:25.

11. Ki lika mañi zekona kutusa muituti kuziba mwakulapelela, mi ki kabakalañi haswanela kulapelanga ku Jehova kamita?

¹¹ Mususueze muituti wamina kuambola ni Jehova ka kulapelanga ku yena zazi ni zazi. Musika kalisa kale tuto ni hase mufelize kuituta, mulapelange ni muituti wamina kuzwelela kwatasaa pilu, mi mumubeyange mwa tapelo. Muituti wamina hanzaa teeleza kwa litapelo zamina, ukaituta mwakona kulapelela kuzwelela kwatasaa pilu ni kufitisa litapelo zahae ku Jehova Mulimu ka libizo la Jesu Kreste. (Mat. 6:9; Joa. 15:16) Kaniti luli, haiba muituti wamina abala Bibele zazi ni zazi (kuteeleza ku Jehova) ni kulapela (kuambola ni Jehova) ukasutelela hahulu ku Mulimu. (Jak. 4:8) Haiba muituti wamina aeza lika zeo zazi ni zazi, ukaeza zwelopili yeka mutusa kuineela bupilo bwahae ku Jehova ni kukolobezwa.

12. Muhasanyi ukona kutusa cwañi muituti wahae kuba mulikanaa Jehova?

¹² Muituti haswaneli feela kuhupula litaba zaituta kono hape litaba zeo liswanela kumufita kwa pilu. Kabakalañi? Kakuli pilu yaluna ilususuezanga kuunga muhato. Jesu naalutile batu litaba zeñata mi batu nebatabela kuteeleza ku yena. Kono batu neba mulatelelanga kabakala kuli litaba zanaa balutanga neli bafitile kwa pilu. (Luka 24:15, 27, 32) Muituti wamina utokwa kuunga Jehova kuba wa luli, mi utokwa kuziba kuli wakona kuba ni silikani sesinde ni yena, ni kuunga Jehova sina Ndatahe, Mulimu wahae, ni Mulikanaa hae. (Samu 25:4, 5) Ka nako yemuituta Bibele ni yena, mumutuse kulemuha tulemeno totunde twanani tona Mulimu. (Exo. 34:5, 6; 1 Pit. 5:6, 7) Muswanela kuezanga cwalo ni hamuituta litaba lisili. Mutuse muituti wamina kuitebuha tulemeno totunde twanani tona Jehova totucwale ka lilato, sishemo, ni mukekecima. Jesu naabulezi kuli “taelo yetuna ka kufitisisa ni yapili” ki “kulata Jehova Mulimu wahao.” (Mat. 22:37, 38) Mutuse muituti wamina kulata Jehova.

13. Mufe mutala obonisa momukona kutuseza muituti wa Bibele kuziba tulemeno twa Jehova.

¹³ Mutaluseze muituti wamina libaka hamulata hahulu Jehova. Kueza cwalo kukona kumutusa kulemuha kuli ni yena utokwa kuba ni silikani sesinde ni Mulimu ni kumulata hahulu. (Samu 73:28) Ka mutala, kana kunani taba yeñwi yemulata hahulu ye mwa hatiso yeluitusisanga kwa kuluta batu kamba ye mwa liñolo, yebonisa kuli Jehova unani lilato, butali, katulo yelukile, ni maata? Mutaluseze muituti wamina taba yeo mi mumutuse kuziba kuli yeo ki yeñwi ya lika zetahisa kuli mulate hahulu Ndataa luna wa kwa lihalimu. Kunani nto yeñwi hape yatokwa kuziba muituti wa Bibele kuli aeze zwelopili ni kukolobezwa.

14. Litaba zeñozwi kwa liñolo la Maheberu 10:24, 25, likona kutusa cwañi muituti wa Bibele kueza zwelopili?

¹⁴ Kaufelaa luna, lubata kuli batu boluituta ni bona Bibele baeze zwelopili ni kukolobezwa. Nzila yeñwi yelukona kubatusa kueza cwalo, ki kubasusueza kuyanga kwa mikopano ya puteho. Bahasanyi babanani yeloseli batalusa kuli baituti babafumanehanga kwa mikopano basakalisa feela kuituta Bibele, baezanga zwelopili kapili. (Samu 111:1) Bahasanyi babañwi batalusezanga baituti babona kuli haiba bafumaneha kwa mikopano ya puteho, bakaituta litaba zeñata, ili zebasike baziba habaituta ni bona kwa ndu. Mubale Maheberu  10:24, 25 ni muituti wamina mi mumutuse kuziba bunde bwa kufumaneha kwa mikopano ya puteho. Mumubuhise vidio yeli, Kiñi ze Ezahalanga Kwa Ndu ya Mubuso? * Mususueze muituti wamina kufumanehanga kwa mikopano kamita.

15. Luswanela kuezañi kuli lutuse baituti baluna kufumanehanga kwa mikopano kamita?

¹⁵ Muswanela kuezañi haiba muituti wamina haasika fumaneha kale kwa mikopano ya puteho kamba hafumanehangi kwa mikopano kamita? Mumutaluseze nto yeñwi yene muitutile kwa mikopano cwanoñu fa, ili yene mutabezi hahulu. Hakaziba taba yeo, ukatabela hahulu kufumaneha kwa mikopano kufita hane muka mumema feela kusina kubulela zene muitutile kwa mikopano. Mumufe Tawala ya Mulibeleli kamba Buka ya Mukopano wa Bupilo ni Bukombwa yekaitutiwa kwa mikopano. Mumubonise zekaitutiwa fa mukopano otatama mi mumukupe kuli amitaluseze taba yatabezi hahulu kwa litaba zekaitutiwa. Litaba zakabona ni kuutwa muituti wamina hakaya kwa mikopano lwapili, halikoni kubapanywa kwa nto ifi kamba ifi yakile abona ni kuutwa hanaaile kwa bulapeli busili. (1 Makor. 14:24, 25) Haakafumaneha kwa mikopano ya puteho, ukakopana ni batu babali mitala yeminde, ili bakona kulikanyisa ni babakona kumutusa kueza zwelopili kuli akolobezwe.

16. Ki lika mañi zatokwa kueza muhasanyi kuli atuse muituti wahae wa Bibele kueza zwelopili ni kukolobezwa, mi ki lika mañi zeluka nyakisisa mwa taba yetatama?

¹⁶ Ki lika mañi zekona kulutusa kuzamaisa lituto za Bibele ka nzila yekona kutusa baituti kuunga muhato wa kukolobezwa? Lwakona kutusa muituti waluna kuisa pilu kwa tuto ka kumususueza kuli luitutange ni yena sunda ni sunda ni kuli aitukisezange tuto ni tuto. Hape luswanela kumususueza kuambolanga ni Jehova zazi ni zazi ni kuba ni silikani sesinde ni yena. Mi luswanela kususueza muituti waluna kufumanehanga kwa mikopano ya puteho. (Mubone mbokisi ye fa likepe 12, yeli, “ Zatokwa Kueza Muituti wa Bibele Kuli Aeze Zwelopili ni Kukolobezwa.”) Niteñi, sina moluka nyakisiseza mwa taba yetatama, kunani lika zeñwi zeketalizoho zatokwa kueza muhasanyi kuli atuse muituti wahae kueza zwelopili ni kukolobezwa.