1. Luziba cwañi kuli musebezi wa kuluta batu kuba balutiwa, ukona kutusa batu kupiliswa?

MUSEBEZI wa kuluta batu kuba balutiwa ki musebezi okona kutusa batu kupiliswa! Luziba cwañi cwalo? Jesu hanaafile taelo yeñozwi kwa liñolo la Mateu 28:19, 20, naabulezi kuli: “Hamuye, . . . mulute batu . . . , kuba balutiwa, mubakolobeze.” Ki kabakalañi kukolobezwa hakuli kwa butokwa? Lutokwa kukolobezwa haiba lubata kuli luto piliswa. Mutu yabata kukolobezwa uswanela kulumela kuli ukona feela kufumana bupilo bobusa feli kabakala kuli Jesu naalushwezi mi naazusizwe kwa bafu. Ki lona libaka muapositola Pitrosi hanaabulelezi Bakreste babañwi kuli: “Kolobezo . . . yamipilisa cwale . . . ka zuho ya Jesu Kreste.” (1 Pit. 3:21) Kacwalo, mulutiwa yomunca hakolobezwa uba ni sepo ya kupila kuya kuile.

2. Liñolo la 2 Timotea 4:1, 2, lilususueza kuezañi ka kuba baluti?

² Kuli lulute batu kuba balutiwa, lutokwa kuba ni “bukwala bwa kuluta.” (Mubale 2 Timotea 4:1, 2.) Kabakalañi? Kabakala kuli Jesu naalulaezi kuli: “Hamuye, . . . mulute batu . . . , kuba balutiwa, . . . , mubalute.” Muapositola Paulusi naabulezi kuli ‘lutundamene’ kueza musebezi wo, ‘kakuli ka kueza cwalo luka ipilisa ni kupilisa baba luutwa.’ Ki lona libaka Paulusi hanaabulezi kuli: “Uzwelepili kutokomela . . . tuto yahao.” (1 Tim. 4:16) Bakeñisa kuli lutokwa kuluta batu kuli babe balutiwa, luswanela kueza molukonela kaufela kuba baluti babande.

3. Lukanyakisisañi mwa taba ye ka za kuzamaisa lituto za Bibele?

³ Mwa lifasi kaufela, lusweli kuluta batu babañata-ñata litaba za niti za mwa Bibele. Kono sina molunyakisiselize mwa taba yefelile, lubata kuziba molukona kutuseza batu bao kuba balutiwa  ba Jesu Kreste babakolobelizwe. Mwa taba ye, lukanyakisisa lika zeñwi zeketalizoho zaswanela kueza muhasanyi kuli atuse muituti wahae kueza zwelopili ni kukolobezwa.

4. Ki kabakalañi muhasanyi hasaswaneli kubulela litaba zeñata hazamaisa tuto ya Bibele? (Mubone ni litaluso ze kwatasi.)

⁴ Lwalata litaba zeluluta batu zezwa mwa Linzwi la Mulimu. Kacwalo, halusa tokomeli lukona kubulela litaba zeñata haluluta batu. Nihakulicwalo, ibe kuli luzamaisa Tuto ya Tawala ya Mulibeleli, Tuto ya Bibele ya Puteho, kamba luzamaisa tuto ya Bibele, luswanela kutokomela kuli halubuleli hahulu litaba zeñata. Bahasanyi baswanela kuitusisa Bibele habaluta batu kono baswanela kutokomela kuli habatalusi litaba zeñata kamba kutalusa litaba kaufela zebaziba ka za liñolo leliñwi kamba taba yeñwi ya mwa Bibele. * (Joa. 16:12) Munahane litaba zene muziba ka za Bibele hamukolobezwa ni zese muziba cwale. Mwendi ka nako yeo, nemuziba feela lituto za makalelo za mwa Bibele. (Maheb. 6:1) Nekufitile nako yetelele kuli muzibe litaba zemuziba cwale; kacwalo musike mwaluta muituti wamina wa Bibele litaba kaufela ka nako yeswana.

5. (a) Sina moliboniseza liñolo la 1 Matesalonika 2:13, ki nto mañi yelubata kuli muituti waluna autwisise? (b) Lukona kususueza cwañi muituti waluna kutalusa litaba zasweli kuituta?

⁵ Lubata kutusa muituti waluna kuutwisisa kuli litaba zasweli kuituta lizwa mwa Bibele. (Mubale 1 Matesalonika 2:13.) Lukona kueza cwañi cwalo? Mususueze muituti wamina kutalusa litaba zasweli kuituta. Kufita kutalusezanga muituti wamina mañolo a mwa Bibele nako kaufela, fokuñwi mwakona kumukupa kuli amitaluseze ona. Mutuse muituti wamina kubona mwakona kusebeliseza litaba zaituta mwa Linzwi la Mulimu. Mumubuze lipuzo zeka mutusa kutalusa zanahana ni mwaikutwela ka za Mañolo abala. (Luka 10:25-28) Ka mutala, mumubuze kuli: “Liñolo le limitusize cwañi kuziba kakañwi ka tulemeno twanani tona Jehova?” “Litaba za niti zemubalile mwa Bibele likona kumitusa cwañi?” “Muikutwa cwañi ka za litaba zemusazo ituta?” (Liprov. 20:5) Nihaike kuli ki kwa butokwa hahulu kuli muituti wamina azibe litaba zeñata, sa butokwa nikufita kikuli abonise kuli walata litaba zaituta ni kulisebelisa mwa bupilo bwahae.

6. Ki kabakalañi haluswanela kuyanga ni muhasanyi yanani yeloseli kwa tuto yaluna ya Bibele?

⁶ Hamuzamaisa tuto ya Bibele, kana fokuñwi mwasebezanga ni bahasanyi babanani yeloseli? Haiba ki cwalo, mwakona kubakupa kuli bamitaluseze zebalemuhile ka za mone muzamaiseza tuto ya Bibele ni kumitusa kuziba haiba  nemuitusisa Bibele hane muluta. Kuli muekeze kwa buikoneli bwamina bwa kuluta batu, muswanela kuba ni buikokobezo. (Mubapanye Likezo 18:24-26.) Hasamulaho, mubuze muhasanyi yanani yeloseli yo kuli amitaluseze haiba muituti wamina naautwisisa litaba zanaasweli kuituta. Hape mwakona kukupa muhasanyi yaswana yo kumizamaiseza tuto yeo haiba hamuna kubateñi ka sunda iliñwi kamba kufitelela. Kueza cwalo kukatusa kuli muituti wamina aitutange Bibele kamita mi ukalemuha kuli kuituta Bibele ki kwa butokwa. Musike mwaikutwa kuli yeo ki tuto yamina, hakuna mutu yomuñwi yaswanela kuizamaisa. Kakuli mane mulelo wamina omutuna kikuli muituti wamina azwelepili kuituta litaba za niti za mwa Bibele.

7. Ki lika mañi zekona kutusa muituti wamina kulata litaba zaituta?

⁷ Muituti wamina uswanela kulemuha kuli mwalata litaba zemuluta mi munani buikolwiso bwa kuli zeiluta Bibele ki za niti. (1 Mates. 1:5) Haiba mueza cwalo, mukatusa muituti wamina kutabela litaba zaituta. Mwendi mwakona kumutaluseza momutuselizwe ki kusebelisa likuka za mwa Bibele mwa bupilo bwamina. Haiba mueza cwalo, mukatusa muituti wamina kulemuha kuli kusebelisa likuka za mwa Bibele kwakona kumutusa ni yena.

8. Ki lika mañi zeñwi zemukona kueza kuli mutuse muituti wamina wa Bibele, mi ki kabakalañi hamuswanela kueza cwalo?

⁸ Hamunze muituta ni muituti wamina, mumutaluseze mitala ya mizwale ni likaizeli bane bakopani ni miinelo yetaata yeswana ni yakopana ni yona ni zenee batusize kuitiyela. Mwakona kuya ni muhasanyi yomuñwi kwa tuto yamina, ili yali mutala omunde wakona kulikanyisa muituti wamina. Kamba mwendi mwakona kumubonisa zebonwi za batu zefumaneha fa webusaiti ya jw.org mwatasaa taba yeli, “Bibele Yacincanga Bupilo Bwa Batu.” * Litaba zecwalo ni mavidio zakona kutusa muituti wamina kulemuha kuli kusebelisa likuka za mwa Bibele kwakona kumutusa mwa bupilo bwahae.

9. Mukona kususueza cwañi muituti wamina kutaluseza ba lubasi lwahae ni balikani bahae litaba zaituta?

⁹ Haiba muituti wamina unyezi kamba unyezwi, kana bakubona ni bona baituta Bibele? Haiba habaituti, mubameme kuli ni bona babange kwa tuto hamuituta. Mususueze muituti wamina kutalusezanga ba lubasi lwahae ni balikani bahae litaba zaituta. (Joa. 1:40-45) Mukona kueza cwañi cwalo? Mwendi mwakona kumubuza  kuli: “Mukona kutalusa cwañi litaba za niti ze ku ba lubasi lwamina?” kamba kumubuza kuli: “Ki liñolo lifi lemukona kuitusisa kuli mutuse mulikanaa mina kulumela taba ye?” Ka kueza cwalo, mukatusa muituti wamina kuba muluti yomunde. Mi hasaakwanisize zetokwahala, wakona kuba muhasanyi yasika kolobezwa ni kukala kukutaza hamoho ni mizwale ni likaizeli mwa puteho. Mwakona kubuza muituti wamina haiba kunani mutu yomuñwi yaziba yakona kutabela kuituta Bibele. Haiba kunani, muambole ni mutu yo honafo feela mi mukale kuituta ni yena Bibele. Mumubuhise vidio ya Tuto ya Bibele I Eeziwanga Cwañi? *

10. Sina mokuboniselizwe kwa liñolo la 1 Matesalonika 2:7, 8, bahasanyi bakona kulikanyisa cwañi mutala wa Paulusi?

¹⁰ Bahasanyi baswanela kubonisa kuli balata baituti babona kuzwelela kwa pilu. Muunge baituti bamina kuli kwapili ni bona bakona kuba mizwale kamba likaizeli baluna. (Mubale 1 Matesalonika 2:7, 8.) Kukona kubabela taata kutuhela kuswalisana ni balikani babona ba lifasi ni kueza licinceho zetokwahala kuli basebeleze Jehova. Luswanela kubatusa kufumana balikani babande mwa puteho. Mube mulikanaa muituti wamina ka kutandanga nako ni yena isiñi feela hamuituta Bibele kono ni ka linako zeñwi. Mukona kubonisa kuli mwamuisa pilu ka kumulizezanga luwaile, kumuñolela tushango, kamba mane kumupotela ka nako yemusa ituti ni yena.

11. Ki nto mañi yelubata kuli baituti baluna bafumane mwa puteho, mi ki kabakalañi?

¹¹ Batu babañwi babulelanga kuli: “Mwanana kuli ahule hande mwa hae, utokwa tuso ya batu babañwi.” Lukona kubulela kuli: “Kuli lutuse mutu kuba mulutiwa, lutokwa tuso ya mizwale ni likaizeli babañwi mwa puteho.” Ki lona libaka bahasanyi babali baluti babande habazibahazanga baituti babona kwa mizwale ni likaizeli mwa puteho babakona kubatusa kusutelela ku Jehova. Baituti ba Bibele bakona kuikola siango sesinde ni batu ba Mulimu, ili babakona kubatusa kuba balikani babande ba Jehova ni kubatiisa habakopana ni miinelo yetaata. Lubata kuli yomuñwi ni yomuñwi wa baituti baluna aikutwe kuli walatiwa ki mizwale ni likaizeli mwa puteho, mi ni yena ki yomuñwi wa lubasi lwaluna lwa kwa moya. Lubata kuli alate lubasi lwaluna lwa mizwale ni likaizeli. Mi kuka mubela bunolo kutuhela kuswalisana ni batu babasa mutusi kulata Jehova. (Liprov. 13:20) Haiba bane babanga balikani bahae batuhela kuswalisana ni yena, ukaziba kuli wakona kufumana balikani babande mwa kopano ya Jehova.—Mare. 10:29, 30; 1 Pit. 4:4.

12. Ki kabakalañi haluswanela kuambolanga ni muituti waluna ka za kuineela ni kukolobezwa?

¹² Muswanela kuambolanga ni baituti bamina ka za libaka kuineela ni kukolobezwa hakuli kwa butokwa. Kakuli mane libaka lelituna haluituta Bibele ni batu kikuli lubatuse kusebeleza Jehova ni kukolobezwa. Hamulaho wa kuituta Bibele ni mutu ka likweli lisikai, mi sihulu hasaakalile kufumanehanga kwa mikopano, muituti uswanela kuutwisisa kuli mulelo omutuna haluituta ni yena kikuli lumutuse kuba yomuñwi wa Lipaki za Jehova.

13. Ki lika mañi zaswanela kueza muituti wa Bibele kuli akolobezwe?

¹³ Kunani lika zeñwi zaswanela kueza muituti wa Bibele yabata kukolobezwa. Sapili, muituti wa Bibele ufitanga fa kuziba ni kulata Jehova ni kuba ni tumelo ku yena. (Joa. 3:16; 17:3) Mi muituti ubanga mulikanaa Jehova ni mizwale ni likaizeli mwa puteho. (Maheb. 10:24, 25; Jak. 4:8) Hasamulaho, muituti utuhelanga kueza lika zemaswe mi ubakelanga libi zahae. (Lik. 3:19) Hape utalusezanga babañwi litaba za niti zalumela cwale. (2 Makor. 4:13) Mi kihona aineela ku Jehova ni kubonisa buineelo bwahae ka kukolobezwa. (1 Pit. 3:21; 4:2) Kaniti, leo libanga lizazi lelitabisa luli! Muituti wamina hakwanisa zetokwahala kuli akolobezwe, mumubabazange mi mumususueze kuzwelapili kueza lika zeo.

14. Muhasanyi ukona kuziba cwañi zwelopili yaeza muituti wahae?

¹⁴ Luswanela kuba ni pilu-telele halunze lutusa muituti waluna kueza zwelopili ya kuineela ni kukolobezwa. Kono hamulaho wa nako, luswanela kuziba haiba muituti waluna watabela kusebeleza Jehova Mulimu kamba kutokwa. Kana muituti wamina wabonisa kuli waeza mwakonela kaufela kumamela litaelo za Jesu? Kamba kana ubata feela kuituta litaba za mwa Bibele?

15. Ki lika mañi zekona kutusa muhasanyi kulemuha kuli muituti wahae waeza zwelopili kamba kutokwa?

¹⁵ Kamita munyakisisange zwelopili yaeza muituti wamina. Ka mutala, kana lipulelo zahae zabonisa kuli walata Jehova? Kana walapelanga ku Jehova? (Samu 116:1, 2) Kana waikolanga kubala Bibele? (Samu 119:97) Kana wafumanehanga kwa mikopano kamita? (Samu 22:22) Kana uezize licinceho mwa bupilo bwahae zebonisa kuli wasebelisa zaituta? (Samu 119:112) Kana ukalile kutaluseza ba lubasi lwahae ni balikani bahae zaituta? (Samu 9:1) Mi sa butokwa  nikufita kikuli, kana watabela kuba yomuñwi wa Lipaki za Jehova? (Samu 40:8) Haiba muituti wamina hakuna zaeza kwa lika zebulezwi zeo kaufela, ka maseme mulike kuziba libaka hasaezi cwalo, mi munyakisise ni yena taba yeo ka musa kono ili ka kunonga. *

16. Ki lika mañi zekona kumitusa kuziba haiba muswanela kuzwelapili kuituta Bibele ni mutu kamba kutokwa?

¹⁶ Ka nako ni nako, munyakisisange ka za haiba muswanela kuzwelapili kuituta Bibele ni mutu kamba kutokwa. Muipuze kuli: ‘Kana muituti waka wapalelwanga kuitukiseza tuto? Kana haatabelangi kufumaneha kwa mikopano ya puteho? Kana usanani mikwa yemaswe? Kana usaswalisana ni bulapeli bwa buhata?’ Haiba mualaba kuli eni kwa lipuzo zeo, uzibe kuzwelapili kuituta ni mutu yacwalo kuswana feela inge kuluta mutu kutapa hailifo yena haalati kukoloba. Haiba muituti wamina haitebuhi lituto zaituta mi haalati kueza licinceho mwa bupilo, hamuswaneli kuzwelapili kuituta ni yena.

17. Ka kuya ka liñolo la 1 Timotea 4:16, ki lika mañi zebaswanela kueza bahasanyi kaufela?

¹⁷ Luunga musebezi wa kuluta batu kuba balutiwa kuba wa butokwa, mi lubata kutusa baituti baluna ba Bibele kueza zwelopili ni kukolobezwa. Ki lona libaka haluitusisanga Bibele haluluta batu, ni haluluta litaba zeo ka mafulofulo ni ka buikolwiso. Lususuezanga baituti baluna kuba ni balikani mwa puteho. Kamita luambolanga ni baituti baluna ka za kuineela ni kukolobezwa, mi lunyakisisanga ka za haiba baeza zwelopili. (Mubone mbokisi ye fa likepe 13 yeli, “ Zebaswanela Kueza Bahasanyi Kuli Batuse Baituti Babona Kueza Zwelopili ni Kukolobezwa.”) Lunani tabo kabakala kuli lusweli kueza musebezi otusa batu kuli bapiliswe! Haike lueze molukonela kaufela kutusa baituti baluna ba Bibele kueza zwelopili kuli bakolobezwe.