1. Ka kuya ka liñolo la Mateu 11:28-30, Jesu naasepisize nto mañi?

JESU naafile sepiso yende kwa batu bane bateeleza ku yena. Naabulezi kuli: “Hamutahe ku na, . . . mi nika mikatulusa.” (Mubale Mateu 11:28-30.) Yeo nesi sepiso feela ya fahalimu. Ka mutala, munyakisise zanaaezize Jesu ku musali yanaakula butuku bobumaswe hahulu.

2. Jesu naaezizeñi ku musali yanaakula?

² Musali yo naatokwa tuso luli. Naaile kwa baalafi babañata ka kusepa kuli naakafoliswa. Naasakulile ka lilimo ze 12 kono naasika fumana kalafo. Mi ka kuya ka Mulao wa Mushe, naali mutu yasika kena. (Liv. 15:25) Hasamulaho, musali yo autwa kuli Jesu usweli kufolisa bakuli, mi aya kuyo mubata. Hasaa mufumani, aswala kwa mungundo wa siapalo sahae sa fahalimu, mi honafo feela afola kwa butuku bwahae. Niteñi, Jesu naasika mufolisa feela kono hape naamuezize ka nzila yenetahisize kuli aikutwe kukutekiwa ni kulatiwa. Ka mutala, Jesu hanaaambola ni musali yo, naamubonisize lilato ni kumukuteka ka kumubiza kuli “mwanaka.” Kaniti luli, musali yo naaikutwile kukatuluha ni kuimululwa!—Luka 8:43-48.

3. Ki lipuzo mañi zeluka nyakisisa?

³ Mulemuhe kuli musali yo naasika ina feela. Naaezize buikatazo bwa kuya ku Jesu. Ni luna kacenu luswanela kuunga muhato wa ‘kuya’ ku Jesu. Mwa linako zaluna, Jesu haana kufolisa ka makazo batu ‘babaya’ ku yena. Niteñi, usa lumema kuli  “Hamutahe ku na, . . . mi nika mikatulusa.” Mwa taba ye, lukanyakisisa lipuzo zeketalizoho zelatelela: Lukona ‘kuya’ cwañi ku Jesu? Jesu naatalusañi hanaabulezi kuli: “Muitwese coko yaka”? Lukona kuitutañi kwa mutala wa Jesu? Ki kabakalañi musebezi walufile hauli okatulusa? Mi luswanela kuezañi kuli luzwelepili kukatuluswa ki coko ya Jesu?

4-5. Ki ifi yeñwi ya linzila zelukona ‘kuya’ ka yona ku Jesu?

⁴ Nzila yeñwi yelukona ‘kuya’ ka yona ku Jesu ki ka kueza molukonela kaufela kuituta litaba zanaabulezi ni zanaaezize. (Luka 1:1-4) Hakuna mutu yakona kuluezeza cwalo; luswanela kuituta litaba zeo luna bañi. Kuzwa fo, ‘luya’ ku Jesu haluunga muhato wa kukolobezwa ni kuba mulutiwa wahae.

⁵ Hape ‘luya’ ku Jesu ka kukupa tuso ya baana-bahulu ba puteho. Jesu uitusisa “limpo zeli batu” bao kuli bababalele lingu zahae. (Maef. 4:7, 8, 11; Joa. 21:16; 1 Pit. 5:1-3) Luswanela kuunga muhato wa kukupa tuso yabona. Haluswaneli kulibelela kuli baana-bahulu bakaziba lika zelunahana ni zelutokwa. Halunyakisiseñi zanaabulezi muzwale yabizwa Julian, naaize: “Nenituhezi kusebeleza fa Betele kakuli nenikula, mi yomuñwi wa balikani baka anisusueza kukupa baana-bahulu kuli bato nipotela. Sapili, neninahana kuli nenisa tokwi kueza cwalo. Kono hasamulaho, nakupa baana-bahulu kuto nipotela mi neniitebuhile hahulu susuezo yene banifile.” Ka kuswana ni baana-bahulu bababeli bane bapotezi bo Julian, baana-bahulu bakona kulutusa kuziba “munahano wa Kreste,” fo kikuli, kulutusa kuutwisisa ni kulikanyisa mwanahanela ni mwaangela lika. (1 Makor. 2:16; 1 Pit. 2:21) Kaniti luli, yeo ki yeñwi ya linzila zende hahulu zeba lutusa ka zona baana-bahulu.

6. Jesu naatalusañi hanaabulela kuli: “Muitwese coko yaka”?

⁶ Jesu hanaabulela kuli: “Muitwese coko yaka” mwendi naatalusa kuli “Muniutwe ka kuba Mulena.” Hape mwendi naatalusa kuli “Muitwese coko ni na, mi lukasebeleza Jehova hamoho.” Kusina taba ni zanaatalusa Jesu, taba yanaabulezi ya kuitwesa coko yahae, ibonisa kuli lutokwa kuikataza kuli lusebeleze Mulimu.

7. Ka kuya ka liñolo la Mateu 28:18-20, ki musebezi mañi olufilwe kueza, mi lunani buikolwiso mañi?

⁷ Luamuhela memo ya Jesu haluneela bupilo bwaluna ku Jehova ni kukolobezwa. Jesu umema batu kaufela kuli baye ku yena, mi uamuhela mutu kaufela yatabela kusebeleza Mulimu. (Joa. 6:37, 38) Jehova naafile Jesu musebezi wa kukutaza taba yende kwa batu kaufela, mi ka kuba balateleli ba Jesu, lunani tohonolo ya kueza musebezi wo. Lunani buikolwiso bwa kuli Jesu ukazwelapili kulutusa halunze lupeta musebezi wo.—Mubale Mateu 28:18-20.

8-9. Ki kabakalañi batu babaikokobeza hane batabela kuba bukaufi ni Jesu, mi luswanela kuipuza lipuzo mañi?

⁸ Batu babaikokobeza nebatabela kuba bukaufi ni Jesu. (Mat. 19:13, 14; Luka 7:37, 38) Ki kabakalañi? Kuli luutwisise taba yeo, halunyakisiseñi shutano ye mwahalaa Jesu ni Bafalisi. Baeteleli ba bulapeli bao nebasina lilato mi nebaikuhumusa. (Mat. 12:9-14) Kono Jesu yena naanani lilato mi naaikokobeza. Bafalisi nebatabela hahulu kuzibahala ni kufiwa likute. Jesu naasusuelize balutiwa bahae kusaba ni moya wa kuipatela libubo mi naabalutile kuli babe batu babaikokobeza ni babatabela kusebeleza babañwi. (Mat. 23:2, 6-11) Bafalisi nebabusa batu ka taata mi batu nebasaba kuli nebaka ezwa maswe hane  basike balatelela milao yabona. (Joa. 9:13, 22) Kono Jesu yena naakatulusanga babañwi ka kubonisa kuli wabalata ni ka kuitusisa manzwi amande ku bona.

⁹ Kana mulemuhile momukona kulikanyiseza mutala wa Jesu? Muipuze kuli: ‘Kana batu baniinga kuli ninani musa mi naikokobeza? Kana naitatelanga kueza misebezi ya kwatasi kuli nisebeleze babañwi? Kana nabonisanga babañwi sishemo?’

12-14. Ki kabakalañi musebezi walufile Jesu haukatulusa?

¹² Ki kabakalañi kueza musebezi walufile Jesu hakukatulusa? Kunani mabaka amañata kono halunyakisiseñi feela asikai.

¹³ Lunani baokameli babande. Jehova yena Muokameli waluna Yomutuna haki yasituhu mi ubonisanga buitumelo kwa batanga bahae. Waitebuhanga musebezi olueza. (Maheb. 6:10) Mi ulufanga maata alutokwa kuli lupete hande musebezi walufile. (2 Makor. 4:7; Magal. 6:5) Jesu, yena Mulenaa luna ulutomezi mutala omunde. (Joa. 13:15) Mi baana-bahulu, bona balisana baluna, balikanyisa Jesu, yena “mulisana yomutuna.” (Maheb. 13:20; 1 Pit. 5:2) Baana-bahulu baeza mobakonela kaufela kulubonisa sishemo, kulususueza, ni kuba ni bundume habanze balufepa kwa moya ni kulusileleza.

¹⁴ Lunani balikani babande hahulu. Hakuna batu babanani balikani babande hahulu ni babaeza musebezi omunde sina waluna. Munahane feela taba ye: Lunani tohonolo ya kusebeza ni batu babanani muzamao omunde ni babasina buitati. Banani buikoneli bwa kueza lika kono baikokobeza, mi baanga babañwi kuli babafita. Haba luungi feela kuba babeleki sina bona, kono hape baluunga kuli lu balikani babona. Balulata hahulu kuli mane bakona kuitombola kulushwela.

15. Luswanela kuikutwa cwañi ka za musebezi olueza?

¹⁵ Lueza musebezi omunde hahulu. Luluta batu niti ka za Jehova mi lupatulula litaba za buhata zahasanya Diabulosi. (Joa. 8:44) Satani usweli kuimeza batu ka kubaluta litaba za buhata zetahisa kuli basike baba ni sepo ya za kwapili. Ka mutala, ubata kuli lulumele kuli Jehova haana kuswalela libi zaluna mi haalulati. Litaba za buhata zeo limaswe luli mi lizwafisanga batu. ‘Haluya’ ku Kreste, libi zaluna zaswalelwa. Mi niti kikuli kaufelaa luna lwalatiwa ki Jehova. (Maro. 8:32, 38, 39) Kaniti luli, kwatabisa kutusa batu kuitinga ku Jehova ni kubona habaeza licinceho mwa bupilo bwabona!

16. Ki kabakalañi musebezi walufile Jesu haushutana ni musebezi ufi kamba ufi olukona kueza?

¹⁶ Musebezi walufile Jesu ushutanela kwahule ni musebezi ufi kamba ufi olukona kueza. Ka mutala, batu hañata habakotokanga kwa mibeleko baikutwanga kukatala ni kufelelwa ki tabo. Ka kushutana ni batu bao, luna lubanga ni tabo hamulaho wa kusebeleza Jehova ni Kreste. Fokuñwi luikutwanga kukatala hahulu hamulaho wa kupeta sebelezo yaluna mi mane lutokwanga kuikapeleza kuya kwa mikopano ya puteho manzibwana. Kono hañata hamulaho wa kufumaneha kwa mikopano ya puteho, luikutwanga kukatuluha mi lubanga ni tabo. Hape, lubanga ni tabo yetuna haluya mwa bukombwa ni halueza tuto ya Bibele ya ka butu. Lufumananga tuso yetuna mane kufita ni buikatazo boluezanga.

17. Ki nto mañi yeluswanela kulemuha ka za muinelo waluna mi luswanela kutokomelañi?

¹⁷ Luswanela kulemuha kuli kaufelaa luna halukoni kupeta lika zeswana. Buikoneli bwaluna bwashutana. Kacwalo, luswanela kutokomela hahulu lika zeluikatulela kueza. Ka mutala, mwendi lukona kutanda nako yeñata kuli luikubukanyeze sifumu. Mulemuhe zanaabulezi Jesu ku muuna yomuñwi wa mukulwani yanaafumile hahulu, yanaa mubuzize kuli: “Ki sifi senilukela kueza kuli niyole saanda sa bupilo bobusa feli?” Muuna yo naamamela Mulao nikale. Kubonahala kuli muuna yo naanani tulemeno totunde kakuli litaba za Buka ya Evangeli ya Mareka libonisa kuli Jesu ‘naamulatile.’ Jesu naakupile muuna yo kuli aeze nto yeñwi. Naamubulelezi kuli: “Zamaya, uyo lekisa zeuluwile . . . mi utahe unilatelele.” Kubonahala kuli muuna yo naatabela kulatelela Jesu kono naapalezwi kusiya ‘maluwo ahae amañata.’ (Mare. 10:17-22) Kabakaleo, apalelwa kuitwesa coko yanaa mufile Jesu mi ayo zwelapili kusebeleza “Bufumu.” (Mat. 6:24) Kambe neli mina nemuka ezañi?

18. Ki lika mañi zeluswanela kuezanga, mi ki kabakalañi?

¹⁸ Luswanela kunyakisisanga lika zeluunga kuba za butokwa mwa bupilo. Kabakalañi? Kabakala kuli kueza cwalo kuka lutusa kuziba haiba lwaitusisa hande maata aluna kamba kutokwa. Halunyakisiseñi zanaabulezi mutangana yomuñwi yabizwa Mark. Naabulezi kuli: “Ka lilimo zeñata, neninahananga kuli neninolofalize bupilo bwaka. Niha nenieza bupaina, neniitusisa nako yaka yeñata kubata masheleñi ilikuli nipile bupilo bwa mbombolelwa. Neniikutwanga kuli bupilo habu nizamaeli hande. Hamulaho wa nako, nalemuha kuli nenibeile lika za kwa mubili mwa sibaka sapili kufita lika za kwa moya.” Hasamulaho, bo Mark nebacincize mubonelo ni mupilelo wabona, mi nebaikatulezi kusebeleza Jehova ka mone bakonela kaufela. Bo Mark hape bali: “Fokuñwi, naikalelwanga ka za masheleñi, kono Jehova ni Jesu banitusize kubeya za Mubuso mwa sibaka sapili.”

19. Ki kabakalañi halutokwa kuba ni mubonelo oswanela?

¹⁹ Haiba lubata kuzwelapili kukatuluswa kabakala kuitwesa coko ya Jesu, luswanela kueza lika zetaalu zelatelela. Sapili, luswanela kuba ni mubonelo oswanela. Lueza musebezi wa Jehova; kacwalo, luswanela kuueza ka nzila yeemutabisa. Jehova ki Mulenaa luna mi luna lu batanga bahae. (Luka 17:10) Haiba lusaezi lika ka nzila yatabela Jehova, kuka lubela taata kulwala coko ya Kreste. Mane nihaiba pulu yetiile yakona kuikolofaza ni kukatala hahulu haiba ilika kufetuha inze iinzi kwa coko ni kulika kuloba coko yailwesize muñaa yona. Kono luna haiba lueza lika ka nzila yatabela Jehova, lukapeta lika zetuna, ili zene lunahana kuli nelusike lwakona kueza, mi lukakona kutiyela  muinelo ufi kamba ufi olukona kukopana ni ona. Muhupule kuli hakuna mutu yakona kupaleliswa Mulimu kupeta tato yahae.—Maro. 8:31; 1 Joa. 4:4.

20. Ki kabakalañi hane luikatulezi kulwala coko ya Jesu?

²⁰ Sabubeli, luswanela kueza lika ka mabaka aswanela. Mulelo waluna omutuna ki kukanyisa Ndataa luna yalilato, yena Jehova. Mwa linako za baapositola, Bakreste bane banani buitati nebafelezwi ki tabo mi nebatuhezi kulwala coko ya Jesu. (Joa. 6:25-27, 51, 60, 66; Mafil. 3:18, 19) Kono bane balata Mulimu ni batu, nebazwezipili kulwala coko ya Kreste mwa bupilo bwabona kaufela inze batabile, mi nebanani sepo ya kuyo busa ni Kreste kwa lihalimu. Ka kuswana ni bona, ni luna haiba lueza lika ka mabaka aswanela, lukazwelapili kulwala coko ya Kreste inze lutabile.

21. Ka kuya ka liñolo la Mateu 6:31-33, ki lika mañi zaka luezeza Jehova?

²¹ Sabulaalu, lube ni buikolwiso bwa kuli Jehova uka lutusa. Luikatulezi kuitombola lika zeñwi mwa bupilo bwaluna kuli lusebeleze Jehova mi lukasebeza ka taata. Jesu naalulemusize kuli lukanyandiswa. Kono lunani buikolwiso bwa kuli Jehova uka lufa maata a kutiyela miinelo yetaata yelukona kukopana ni yona. Kutiyela miinelo yetaata kuka lutusa kuba ni tumelo yetiile. (Jak. 1:2-4) Hape lunani buikolwiso bwa kuli Jehova uka lufa lika zelutokwa, Jesu ukazwelapili kuba mulisanaa luna, mi mizwale ni likaizeli baluna baka lususueza. (Mubale Mateu 6:31-33; Joa. 10:14; 1 Mates. 5:11) Kaniti luli, Jehova ulufile lika zelutokwa kuli lutiyele miinelo yetaata yelukona kukopana ni yona.

22. Ki nto mañi yende yeluezize?

²² Musali yanaafolisize Jesu naakatuluhile zazi lanaafolisizwe. Kono musali yo naakaikutwa kukatuluha kuya kuile haiba naabile mulutiwa wa Kreste yasepahala. Mubona cwañi, ki lika mañi zanaaezize? Haiba musali yo naaiketezi kulwala coko yanaa mufile Jesu, uzibe naaezize keto yende kakuli naakafiwa mupuzo omunde hahulu wa kuyo busa hamoho ni Jesu kwa lihalimu! Mbuyoti yeo ifita nto ifi kamba ifi yanaaka itombola kueza kuli alatelele Kreste. Ibe kuli lunani sepo ya kuyo pila kwa lihalimu kamba ya kuto pila fa lifasi, luezize nto yende hahulu kuamuhela memo ya Jesu yeli: “Hamutahe ku na!”