1. Jehova uunga cwañi batu babaikokobeza? Mutaluse.

JEHOVA ulata batu babaikokobeza. Ki batu feela babaikokobeza babakona kuba ni silikani sesinde ni yena. Kono “yaikuhumusa umuzibela feela kwahule.” (Samu 138:6) Kaufelaa luna lubata kutabisa Jehova ni kulatiwa ki yena; kacwalo, luswanela kuba ni buikokobezo.

2. Lukanyakisisañi mwa taba ye?

² Mwa taba ye, lukanyakisisa likalabo za lipuzo zetaalu ze: (1) Buikokobezo ki nto mañi? (2) Ki kabakalañi haluswanela kuba ni kalemeno kao? (3) Ki lika mañi zekona kutahisa kuli kulubele taata kubonisa buikokobezo? Sina moluka nyakisiseza, haiba luba ni buikokobezo, lukatabisa pilu ya Jehova mi ni luna lukafumana tuso.—Liprov. 27:11; Isa. 48:17.

3. Buikokobezo ki nto mañi?

³ Kuikokobeza kutalusa kuba ni munahano o kwatasi ni kusaikuhumusa kamba kuikankabeka. Bibele ibonisa kuli mutu yaikokobeza unani mubonelo oswanela ka za silikani sahae ni Jehova Mulimu mi hape unani mubonelo oswanela ka za batu babañwi. Mutu yaikokobeza waziba kuli batu babañwi bamufita mwa linzila zeñwi.—Mafil. 2:3, 4.

4-5. Ki kabakalañi halukona kubulela kuli mutu yabonahala kuba ni buikokobezo mwendi haana buikokobezo luli?

⁴ Batu babañwi babonahalanga inge babaikokobeza, kono mwendi habana buikokobezo luli. Mwendi ki batu babanani maswabi kamba babakuzize. Kamba mwendi babonisanga likute  bakeñisa kuli ki mona mobahuliselizwe. Kono mwendi banani hahulu buikuhumuso. Hamulaho wa nako, babonisanga sebali sona luli.—Luka 6:45.

⁵ Niteñi, hakutalusi kuli mutu habulela ka kulukuluha kamba ka buikolwiso unani buikuhumuso. (Joa. 1:46, 47) Kono batu babacwalo, baswanela kutokomela kuli habaitingi hahulu fa buikoneli bwabona kakuli bakona kuba ni buikuhumuso. Ibe kuli lunani maswabi kamba kutokwa, kaufelaa luna luswanela kueza molukonela kaufela kuli lube ni buikokobezo.

6. Ka kuya ka liñolo la 1 Makorinte 15:10, luitutañi kwa mutala wa muapositola Paulusi?

⁶ Halunyakisiseñi mutala wa muapositola Paulusi. Jehova naaitusisize yena kuli atome liputeho zenca mwa mileneñi yemiñata. Mi mwendi naapetile zeñata mwa bukombwa bwahae kufita baapositola ba Jesu Kreste kaufela. Kono Paulusi naasika ikutwa kuli neli wa butokwa hahulu kufita mizwale bahae. Ka buikokobezo, naabulezi kuli: “Ki na yomunyinyani hahulu kwa baapositola, mi haniswaneli kubizwa muapositola, kakuli neninyandisize puteho ya Mulimu.” (1 Makor. 15:9) Hape Paulusi naabulezi kuli naanani silikani sesinde ni Jehova isiñi ka libaka la kuli naanani tulemeno totunde kamba kuli naapetile lika zeñata, kono ki kabakala kuli Mulimu naamubonisize sishemo. (Mubale 1 Makorinte 15:10.) Paulusi ulutomezi mutala omunde wa kuba ni buikokobezo. Mi hanaañolezi Bakreste ba mwa puteho ya Korinte liñolo, naasika ikutwisisa kabakala lika zanaapetile, nihaike kuli batu babañwi mwa puteho yeo nebaanga kuli bamufita.—2 Makor. 10:10.

7. Muzwale yomuñwi wa mwa linako zaluna, ili yanaazibahala kuba mutu yomunde naabonisize cwañi kuli naaikokobeza?

⁷ Batanga ba Jehova babañata basusuelizwe hahulu ki likande la Muzwale Karl F. Klein,  yanaali mwa Sitopa Sesietelela. Mwa likande lahae, Muzwale Klein naatalusize miinelo yetaata yanaakopani ni yona mwa bupilo bwahae. Ka mutala, mwa lilimo za ma 1920, neku mubelanga taata kueza musebezi wa kukutaza fa ndu ni ndu, kuli mane hanaa uezize feela hañwi, neku muungezi lilimo zepeli kuli aeze musebezi wo hape. Hasamulaho, ka nako yanaasebeleza fa Betele, nako yeñwi hanaafilwe kalimelo ki muzwale yomuñwi, anyema hahulu mi aba ni ndimbelela ka nakonyana. Hape naalembwalile hahulu kabakala kubilaezwa ki lika zeñwi, kono hamulaho wa nako, aba hande. Nihakulicwalo, naaikozi kueza misebezi yemiñata. Kaniti luli, Muzwale Klein naaikokobeza kakuli naaitumelelanga mifokolo yahae niha naazibahala kuba mutu yomunde. Mizwale ni likaizeli babañata basahupula Muzwale Klein ni likande lahae lelinde, ili mo naatalusize litaba kaufela kusina kupata. *

8. Liñolo la 1 Pitrosi 5:6 libonisa cwañi kuli haiba luba ni buikokobezo lukatabisa Jehova?

⁸ Libaka lelituna haluswanela kuba ni buikokobezo kikuli kueza cwalo kutabisa Jehova. Zanaabulezi muapositola Pitrosi libonisa kuli taba yeo ki ya niti. (Mubale 1 Pitrosi 5:6.) Buka ya “Come Be My Follower” neibulezi cwana ka za manzwi anaabulezi Pitrosi: “Buikuhumuso buswana sina mulyani obulaya. Bukona kutahisa butata bobutuna. Mutu yaikuhumusa niha kona kuba ni buikoneli bobuipitezi, haki sesiñwi ku Mulimu. Kono mutu yaikokobeza yena niha sina hande buikoneli, Jehova wakona kuitusisa yena kupeta lika zeñata. Kacwalo, haiba muikokobeza, mukatabisa Jehova mi uka mifuyaula.” * Kutabisa Jehova ki kwa butokwa hahulu kufita nto ifi kamba ifi!—Liprov. 23:15.

9. Ki kabakalañi batu habakona kutabela kuswalisana ni luna haiba luba ni buikokobezo?

⁹ Haiba luba ni buikokobezo lukatabisa Jehova mi hape lukatusiwa mwa linzila zeñata. Haluikokobeza, batu babañwi bakatabela kuba balikani baluna. Kuli muutwisise hande taba yeo, munahanisise mufuta wa batu bomutabela kuli babe balikani bamina. (Mat 7:12) Buñata bwaluna halutabelangi kuswalisana ni batu babatabela feela kuli lueze lika zebalata, ili babasa amuheli liakalezo za babañwi. Kono lutabelanga kuswalisana ni mizwale ni likaizeli baluna kakuli ‘baluutwelanga butuku, balulata, balubonisanga mukekecima, mi baikokobeza.’ (1 Pit. 3:8) Lutabelanga kuswalisana ni  batu babacwalo kakuli baikokobeza, mi haiba ni luna luba ni buikokobezo, ni bona bakatabela kuba balikani baluna.

10. Ki kabakalañi kuba ni buikokobezo hakukona kulutusa kutiyela miinelo yetaata?

¹⁰ Kuba ni buikokobezo hape kulutusa kutiyela miinelo yetaata. Fokuñwi lika hali luzamaelangi hande mwa bupilo. Mulena Salumoni yabutali naabulezi kuli: “Niboni batanga inze bapahami lipizi kono manduna inze bazamaya ka mahutu sina batanga.” (Muek. 10:7) Fokuñwi batu babanani buikoneli habalumbiwangi. Mi fokuñwi batu babasina hande buikoneli bafiwanga tumbo yetuna ni likute. Nihakulicwalo, Salumoni naalemuhile kuli ka linako zeñwi, halukoni kucinca muinelo oluli ku ona; kacwalo, haluswaneli kubilaezwa hahulu ki taba yeo. (Muek. 6:9) Kuba ni buikokobezo kuka lutusa kutiyela miinelo yetaata yelukona kukopana ni yona mwa bupilo.

11. Luswanela kueza cwañi halufiwa kalimelo?

¹¹ Zazi ni zazi, lwakona kubonisa kuli lwaikokobeza. Halunyakisiseñi miinelo isikai. Halufiwa kalimelo. Luswanela kuhupula kuli haiba mutu alufa kalimelo, uzibe mwendi kunani mafosisa amañwi eluezize lusika lemuha. Mutu yomuñwi halufa kalimelo, hañata halutabelangi kuiamuhela. Mi mwendi lukona kunyaza mutu yo yalufile kalimelo kamba mane kunyaza mwalufezi yona. Kono haiba lunani buikokobezo, lukaamuhela kalimelo yelufiwa.

12. Ka kuya ka liñolo la Liproverbia 27:5, 6, ki kabakalañi haluswanela kubonisa buitumelo ku mutu yalufa kalimelo? Mufe mutala.

¹² Mutu yaikokobeza uitebuha kalimelo yafiwa. Ka mutala, muunge kuli muinzi kwa mukopano wa puteho. Hase muambozi ni mizwale ni likaizeli babañwi, yomuñwi ku bona umibizeza kwatuko mi umitaluseza kuli munani kaco fa liino. Kusina kukakanya, mukaikutwa hahulu maswabi. Kono mukaitumela hahulu ku yena bakeñisa kuli umilemusize taba yeo. Mane mwendi nemuka tabela kuli kambe nekunani mutu yanaa mitaluselize zateñi isali kwa makalelo. Ka mukwa oswana, ni luna halufiwa kalimelo yelutokwa, luswanela kuikokobeza ni kubonisa buitumelo. Lukaanga mutu yo kuli ki mulikanaa luna isiñi sila saluna.—Mubale Liproverbia 27:5, 6; Magal. 4:16.

13. Lukona kubonisa cwañi buikokobezo babañwi habafiwa buikalabelo mwa kopano?

¹³ Batu babañwi habafiwa buikalabelo mwa kopano. Muuna-muhulu yabizwa Jason naabulezi kuli: “Batu babañwi habafiwanga buikalabelo bobuñwi, fokuñwi niipuzanga libaka hane nisika fiwa kueza musebezi wo.” Kana mukile  mwaikutwa cwalo? Hakusika fosahala ‘kueza ka taata’ kuli mueze zeñata hamunze sebeleza Jehova. (1 Tim. 3:1) Niteñi, luswanela kutokomela lika zelunahana. Haiba lusatokomeli lwakona kukalisa kuba ni buikuhumuso. Ka mutala, muzwale ukona kukalisa kunahana kuli ki yena feela yakona kupeta hande musebezi omuñwi mwa kopano. Kamba kaizeli ukona kunahana kuli, ‘Bo munaaka bakwanisize zetokwahala kuli bafiwe buikalabelo kufita bo ngete ni bo ngete!’ Kono haiba lunani buikokobezo, haluna kuba ni moya ocwalo wa buikuhumuso.

14. Luitutañi ku zanaaezize Mushe babañwi hane bafilwe buikalabelo?

¹⁴ Halunyakisiseñi zanaaezize Mushe batu babañwi hane bafilwe buikalabelo. Mushe naaitebuha hahulu musebezi wanaafilwe wa kuetelela sicaba sa Isilaele. Mushe naaezize cwañi muta Jehova naaketile batu babañwi kuli basebelisane ni yena? Naasika shwela batu bao muna. (Num. 11:24-29) Mushe naaikokobelize mi naalumelelize batu babañwi kuli bamutuse mwa musebezi wa kuatula sicaba sa Isilaele. (Exo. 18:13-24) Kueza cwalo nekutusize kuli litaba za Maisilaele liatulwe kapili. Taba ye ibonisa kuli Mushe naaiyakatwa zeneka tusa babañwi kufita kuba ni buikalabelo bobuñata. Kaniti luli, Mushe ulutomezi mutala omunde oluswanela kulikanyisa! Haiba lubata kuli Jehova aitusise luna, luswanela kuhupula kuli kuba ni buikokobezo ki kwa butokwa hahulu kufita buikoneli bwaluna. “Jehova niha li yapahami, ulemuha yaikokobeza.”—Samu 138:6.

15. Miinelo ya mizwale ni likaizeli baluna neicincize cwañi?

¹⁵ Miinelo yaluna haicinca. Mwa lilimo zefelile, mizwale ni likaizeli babañata babasebelelize Jehova ka lilimo zeñata nebakupilwe kutuhela musebezi one baezanga. Ka mutala, mwa silimo sa 2014, kopano neiezize cinceho ya kuli hakusana kubanga ni baokameli ba sikiliti; kacwalo, mizwale bao ni basali babona nebakupilwe kueza misebezi isili ya kopano. Hape mwa  silimo sesiswana seo, kopano neiezize cinceho ya kuli baokameli ba mipotoloho habakwanisa lilimo ze 70 basike bazwelapili kuba baokameli ba mipotoloho. Mi mizwale babakwanisize lilimo ze 80 nebasike bazwelapili kusebeza sina baswalisanisi ba litopa za baana-bahulu. Kuzwa fo, mwa lilimo zefelile, mizwale ni likaizeli babañwi bane basebeleza fa Betele, nebakupilwe kuyo eza misebezi isili ya kopano. Babañwi nebatuhezi sebelezo yeipitezi ya nako kaufela kabakala kukula, buikalabelo bwa lubasi, kamba kabakala miinelo yemiñwi.

16. Mizwale ni likaizeli baluna babonisize cwañi buikokobezo hane kubile ni licinceho?

¹⁶ Nesi nto yebunolo kwa mizwale ni likaizeli baluna kutwaela licinceho zeneezizwe zeo. Kusina kukakanya, mizwale ni likaizeli bao nebasa lata hahulu musebezi one baezanga, mi babañata nebaezize musebezi wo ka lilimo zeñata. Babañwi ku bona neku babezi hahulu taata kueza licinceho hane bakupilwe kutuhela musebezi one balata hahulu. Kono hamulaho wa nako, batwaela muinelo. Ki kabakalañi hane bakonile kueza cwalo? Libaka lelituna ki la kuli nebalata hahulu Jehova. Nebaziba kuli hane baineela ku Mulimu, nebasika musepisa kuli nebaka musebeleza feela hane bakafiwa musebezi kamba buikalabelo bobuñwi mwa kopano. (Makolo. 3:23) Batabela kuzwelapili kusebeleza Jehova kusina taba ni musebezi obafilwe kueza mwa kopano yahae. ‘Banepela lipilaelo zabona ku yena’ ka kuziba kuli wabaisa pilu.—1 Pit. 5:6, 7.

17. Ki kabakalañi haluitebuha kuli Linzwi la Mulimu lilususueza kuba ni buikokobezo?

¹⁷ Kaniti luli, luitebuha hahulu kuli Linzwi la Mulimu lilususueza kuba ni buikokobezo. Haluikokobeza, batu babañwi bakatabela kuba balikani baluna mi ni luna lukatuseha. Lukakona kutiyela miinelo yetaata yelukona kukopana ni yona mwa bupilo. Mi sa butokwa nikufita kikuli lukaba ni silikani sesinde ni Ndataa luna wa kwa lihalimu. Kwatabisa kuziba kuli Jehova niha li “Yapahami,” walulata mi waitebuha batanga bahae babaikokobeza!—Isa. 57:15.