TABA YA KUITUTA 37
Muipeye Kwatasaa Zamaiso ya Jehova
‘Kana haluswaneli kuipeya kwatasaa Ndate?’—MAHEB. 12:9.
PINA 9 Jehova ki Mulenaa Luna!
ZELUKA ITUTA *
1. Ki kabakalañi haluswanela kuipeya kuutwa Jehova?
LUSWANELA kuipeya kuutwa * Jehova kabakala kuli ki yena Mubupi waluna. Kacwalo, unani tukelo ya kulutaluseza zeluswanela kueza ni zelusa swaneli kueza. (Sin. 4:11) Kono libaka leliñwi haluswanela kuipeya kuutwa Jehova kikuli ki yena Mubusi yomunde ka kufitisisa. Kuzwa feela kwamulaho, batu babañata babile ni maata a kuzamaisa babañwi. Kono puso ya Jehova ifitela kwahule ya batu kakuli yena unani butali, lilato, makeke, ni mukekecima.—Exo. 34:6; Maro. 16:27; 1 Joa. 4:8.
2. Ka kuya ka liñolo la Maheberu 12:9-11, ki kabakalañi haluswanela kuipeya kwatasaa Jehova?
2 Jehova ubata kuli lumuutwe isiñi ka libaka feela la kuli lwamukuteka kono kabakala kuli ki Ndataa luna yalilato ni kuli lwamulata. Paulusi naabulezi cwana mwa liñolo lanaañolezi Bakreste ba Maheberu: ‘Muipeye kwatasaa Ndate’ kakuli ululuta kuli lufumane ‘tuso.’—Mubale Maheberu 12:9-11.
3. (a) Lukona kubonisa cwañi kuli lwaipeya kuutwa Jehova? (b) Ki lipuzo mañi zeluka nyakisisa mwa taba ye?
3 Lubonisa kuli lwaipeya kuutwa Jehova haiba lueza molukonela kaufela kumamela litaelo zahae mwa miinelo kaufela ni ka kusaitinga fa kutwisiso yaluna. (Liprov. 3:5) Kukona kulubela bunolo kuutwa Jehova haiba luituta tulemeno twahae totunde. Ki kabakalañi? Kakuli Jehova ubonisa tulemeno twahae mwa lika kaufela zaeza. (Samu 145:9) Haiba luituta zeñata ka za Jehova, luka mulata hahulu. Mi halulata Jehova, haluna kutokwa mukoloko wa milao obonisa lika zeluswanela kueza ni zelusa swaneli kueza. Lukalika molukonela kaufela kuunga lika sina mwaliingela Jehova, mi lukaambuka lika zemaswe. (Samu 97:10) Kono fokuñwi, kukona kulubela taata kuutwa Jehova. Ki kabakalañi hakukona kulubela taata kueza cwalo? Mi baana-bahulu, bo ndate lubasi, ni bo maa lubasi bakona kuitutañi kwa mutala wa Mubusisi Nehemia, Mulena Davida, ni Maria, yena mahe Jesu? Mwa taba ye, lukanyakisisa lipuzo zeo.
LIBAKA HAKUKONA KULUBELA TAATA KUIPEYA KUUTWA JEHOVA
4-5. Ka kuya ka liñolo la Maroma 7:21-23, ki kabakalañi hakukona kulubela taata kuipeya kuutwa Jehova?
4 Libaka leliñwi hakukona kulubela taata kuutwa Jehova kikuli kaufelaa luna luhozize sibi mi halusika petahala. Kacwalo, halutabelangi kuipeya kuutwa Mulimu ka nako kaufela. Bo Adama ni Eva hane basika utwa Mulimu ka kuca muselo, nebaitomezi likuka zene bakalatelela. (Gen. 3:22) Kacenu batu babañata ni bona habatabeli kuetelelwa ki Jehova mi babata kuiketela lika zelukile ni zesika luka.
5 Mane nihaiba batu babaziba Jehova ni kumulata, kukona kubabela taata kumuutwa ka kutala. Muapositola Paulusi ni yena neku mubelanga taata kueza cwalo. (Mubale Maroma 7:21-23.) Sina Paulusi, ni luna lubata kueza lika zelukile mwa meeto a Jehova. Kono luswanela kueza molukonela kaufela kuambuka kueza lika zemaswe.
6-7. Ki lifi libaka leliñwi lelikona kutahisa kuli kulubele taata kuipeya kuutwa Jehova? Mufe mutala.
6 Libaka leliñwi hakukona kulubela taata kuipeya kuutwa Jehova kikuli lukukuezwanga ki lizo za batu ba mwa sibaka seluhuliselizwe ku sona. Batu babañata bakona kulukukueza kueza lika zasatabeli Jehova; kacwalo, luswanela kueza molukonela kaufela kuli lusike lwanahana sina bona. Halunyakisiseñi mutala olatelela.
7 Mwa libaka zeñata, babanca bakukuezwanga hahulu kubata musebezi oka bafumanisa masheleñi amañata. Kaizeli yabizwa Mary * naaipumani mwa muinelo oswana. Pili asika ziba kale Jehova, naakeni sikolo sesipahami sa mwa naha yahabo bona. Bo Mary nebakukuezwanga hahulu ki ba lubasi lwabona kuli babate musebezi one uka bafumanisa masheleñi amañata. Ni bona nebatabela kufumana musebezi ocwalo. Nihakulicwalo, hase baitutile ka za Jehova ni kumulata, bacinca mubonelo wabona. Niteñi, batalusa kuli: “Fokuñwi, nafumananga misebezi yekona kunifumanisa masheleñi amañata kono naziba kuli misebezi yeo ikona kutahisa kuli nipalelwe kueza lika za kwa moya. Kunibelanga taata kuhana misebezi yeo kabakala simuluho yaka. Nikupanga Jehova kuli anituse kuhana kueza musebezi okona kutahisa kuli nituhele kumusebeleza.”—Mat. 6:24.
8. Ki nto mañi yeluka nyakisisa cwale?
8 Sina mose lunyakisiselize, kuipeya kuutwa Jehova kwalutusa. Kono haiba batu babanani maata a kuetelela babañwi inge cwalo baana-bahulu, bo ndate lubasi ni bo maa lubasi baipeya kuutwa Jehova, bakona kutusa batu babañwi. Halunyakisiseñi mitala yemiñwi ya batu bababulezwi mwa Bibele, ili yekona kulutusa kuitusisa hande maata alufilwe a kuetelela babañwi ka nzila yetabisa Jehova.
ZEBAKONA KUITUTA BAANA-BAHULU KWA MUTALA WA NEHEMIA
Baana-bahulu basebeza hamoho ni babañwi kwa Ndu ya Mubuso sina feela Nehemia mwanaasebelisanezi ni batu babañwi kuyaha limota la Jerusalema (Mubone maparagilafu 9-11) *
9. Ki miinelo mañi yetaata yanaakopani ni yona Nehemia?
9 Jehova ufile baana-bahulu buikalabelo bobutuna bwa kubabalela lingu zahae. (1 Pit. 5:2) Baana-bahulu bakona kuituta zeñata kwa mutala wa Nehemia obonisa mwanaasebelisanezi ni batanga ba Jehova. Nehemia ka kuba mubusisi wa Juda, naanani maata amatuna. (Neh. 1:11; 2:7, 8; 5:14) Halunyakisiseñi yemiñwi ya miinelo yetaata yanaakopani ni yona Nehemia. Naafumani kuli batu nebasilafalize tempele mi nebasa fangi Malivi linubu sina mone uboniseza Mulao wa Mushe. Kuzwa fo, Majuda nebasa mameli mulao wa Sabata, mi babañwi ku bona nebanyezi basali ba macaba asili. Mubusisi Nehemia naatokwa kutatulula butata bo.—Neh. 13:4-30.
10. Ki lika mañi zanaaezize Nehemia hanaakopani ni miinelo yetaata?
10 Nehemia naasika itusisa maata ahae kuli ahapeleze batanga ba Mulimu kueza lika sina mwanaabatela. Kono naalapezi ku Jehova kuzwelela kwatasaa pilu ni kukupa ketelelo yahae, mi naabalutile Mulao wa Jehova. (Neh. 1:4-10; 13:1-3) Hape ka buikokobezo, Nehemia mane naasebelize hamoho ni batu kuyaha limota la Jerusalema.—Neh. 4:15.
11. Ka kuya ka 1 Matesalonika 2:7, 8, baana-bahulu baswanela kusebelisana cwañi ni mizwale ni likaizeli mwa puteho?
11 Baana-bahulu mwendi habana kukopana ni miinelo yeswana yanaakopani ni yona Nehemia, kono bakona kumulikanyisa mwa linzila zeñata. Ka mutala, basebezanga ka taata kuli batuse mizwale ni likaizeli babona. Mi habaikutwangi kuli ki ba butokwa hahulu kufita babañwi kabakala maata abafilwe a kuetelela babañwi. Kono babonisanga lilato kwa mizwale ni likaizeli mwa puteho. (Mubale 1 Matesalonika 2:7, 8.) Baambolanga ni bona ka likute bakeñisa kuli babalata mi banani buikokobezo. Bo Andrew base babile baana-bahulu ka lilimo zeñata batalusa kuli: “Nilemuhile kuli mizwale ni likaizeli baitebuhanga hahulu muuna-muhulu yanani sishemo ni yalilato. Haiba baana-bahulu baba ni tulemeno totucwalo, kukabela bunolo bahasanyi kulatelela ketelelo yebafiwa ki baana-bahulu.” Muzwale yomuñwi yabizwa Tony yasaabile muuna-muhulu ka lilimo zeñata utalusa kuli: “Nilikanga kusebelisa kelezo ye kwa Mafilipi 2:3, mi niezanga monikonela kaufela kuunga babañwi kuli banifita. Kueza cwalo kunitusanga kusaba ni moya wa kuhapeleza babañwi kueza feela lika zenitabela.”
12. Ki kabakalañi baana-bahulu habatokwa kuba ni buikokobezo?
12 Baana-bahulu baswanela kuba ni buikokobezo sina Jehova haali yaikokobeza. Nihaike kuli Jehova ki Yapahami ka Kufitisisa mwa pupo kaufela, “uinama kuli . . . azwise wa mayemo a kwatasi mwa liluli.” (Samu 18:35; 113:6, 7) Mane mutu yaikuhumusa wanyenyisa mwa meeto a Jehova.—Liprov. 16:5.
13. Ki kabakalañi baana-bahulu habatokwa ‘kuswala lilimi labona’?
13 Muuna-muhulu yaipeya kuutwa Jehova ‘uswala lilimi lahae.’ Hakusicwalo, ukona kuitusisa manzwi amaswe ku mutu yasa mukuteki. (Jak. 1:26; Magal. 5:14, 15) Bo Andrew bababulezwi kwa makalelo batalusa kuli: “Fokuñwi niikutwanga kuli niswanela kuitusisa manzwi amaswe ku muzwale kamba kaizeli yasa nikuteki ka kuba muuna-muhulu mwa puteho. Nihakulicwalo, kunahanisisa mitala ya baana babasepahala bababulezwi mwa Bibele kunitusize kuba ni buikokobezo ni buishuwo.” Muuna-muhulu ubonisa kuli uipeya kuutwa Jehova ka kuambola ni mizwale ni likaizeli hamohocwalo ni baana-bahulu sina yena ka lilato ni ka musa.—Makolo. 4:6.
ZEBAKONA KUITUTA BO NDATE LUBASI KWA MUTALA WA MULENA DAVIDA
14. Jehova ufile bo ndate lubasi buikalabelo mañi, mi ubata kuli baezeñi?
14 Jehova ufile bo ndate lubasi buikalabelo bwa kuba toho ya lubasi, mi ubata kuli balute bana babona ni kubakalimela habafosa. (1 Makor. 11:3; Maef. 6:4) Kono taba yeo haitalusi kuli toho ya lubasi uswanela kuitusisa maswe maata ahae kakuli ukaikalabela ku Jehova yena musimululi wa lubasi. (Maef. 3:14, 15) Bo ndate lubasi babonisa kuli baipeya kuutwa Jehova ka kuitusisa maata abafilwe ka nzila yetabisa Mulimu. Bakona kuituta zeñata ka kunyakisisa litaba zebulela za bupilo bwa Mulena Davida.
Ndate lubasi halapela uswanela kubonisa kuli unani buikokobezo (Mubone paragilafu 15 ni 16) *
15. Ki kabakalañi Mulena Davida haali mutala omunde obaswanela kulikanyisa bo ndate lubasi?
15 Jehova naafile Davida buikalabelo bwa kuba toho ya lubasi ni bwa kuba mulena wa sicaba sa Isilaele. Ka kuba mulena, Davida naanani maata amatuna. Fokuñwi, naaitusisanga maswe maata ahae mi naaezanga mafosisa amatuna. (2 Sam. 11:14, 15) Kono naabonisize kuli naaipeya kuutwa Jehova ka kuamuhela kalimelo yanaa mufile. Davida naalapezi ku Jehova ni kumutaluseza mwanaaikutwela. Mi naaezize mwanaakonela kaufela kusebelisa kelezo yanaa mufile Jehova. (Samu 51:1-4) Kuzwa fo, naaikokobeza hahulu kuli mane naasika amuhela feela kelezo yanaafilwe ki baana kono hape naaamuhezi ni kelezo yanaafilwe ki basali. (1 Sam. 19:11, 12; 25:32, 33) Davida naasika kutela kueza mafosisa aswana anaaezize mi naabonisize kuli kusebeleza Jehova neli yona nto ya butokwa hahulu mwa bupilo bwahae.
16. Ki lituto mañi zebakona kuituta bo ndate lubasi kwa mutala wa Davida?
16 Ki ze lituto zebakona kuituta bo ndate lubasi kwa mutala wa Mulena Davida: Musike mwaitusisa maswe maata amifile Jehova. Muitumelelange mafosisa amina ni kuamuhela kelezo ya mwa Bibele yemufiwa ki babañwi. Haiba mueza cwalo, lubasi lwamina luka mikuteka kabakala kuli munani buikokobezo. Hamulapela ni lubasi lwamina, mulapelange ku Jehova kuzwelela kwatasaa pilu mi mubatuse kulemuha kuli muitingile hahulu ku yena. Mi sa butokwa nikufita kikuli, mutuse lubasi lwamina kulemuha kuli kusebeleza Jehova ki yona nto ya butokwa hahulu mwa bupilo bwamina. (Deut. 6:6-9) Haiba mutomela lubasi lwamina mutala omunde, muka batusa luli.
ZEBAKONA KUITUTA BO MAA LUBASI KWA MUTALA WA MARIA
17. Jehova ufile bo maa lubasi buikalabelo mañi?
17 Jehova ufile bo maa lubasi buikalabelo bwa butokwa mwa lubasi mi ubafile maata alikani a kuetelela bana babona. (Liprov. 6:20) Mane zabulela ni kueza me, likona kuama bupilo bwa bana bahae. (Liprov. 22:6) Halunyakisiseñi zebakona kuituta bo maa lubasi kwa mutala wa Maria, yena mahe Jesu.
18-19. Bo maa lubasi bakona kulikanyisa cwañi mutala wa Maria?
18 Maria naaziba hande Mañolo. Naakuteka hahulu Jehova mi naanani silikani sesitiile ni yena. Naaikatulezi kueza lika kaufela zanaabata Jehova kuli aeze nihaike kuli kueza cwalo nekuka cinca bupilo bwahae.—Luka 1:35-38, 46-55.
Bo maa lubasi batokwa kubonisa hahulu kuli balata lubasi lwabona ka nako yebakatezi ni habahalifile (Mubone paragilafu 19) *
19 Bo maa lubasi, mwakona kulikanyisa mutala wa Maria mwa linzila zeñata. Ka mukwa ufi? Sapili, mutiise silikani samina ni Jehova ka kuezanga tuto ya Bibele ya ka butu ni kulapelanga ku yena kamita. Sabubeli, muitatele kueza licinceho mwa bupilo bwamina kuli mutabise Jehova. Ka mutala, mwendi bashemi bamina hañata nebahalifanga mi nebaambolanga ni mina ka mabifi. Kacwalo, mwendi muhulile inze munahana kuli yeo ki yona nzila yende ya kuhulisa ka yona bana. Mane niha semuitutile likuka za Jehova, kukona kumibela taata kuwa pilu ni kuba ni pilu-telele, sihulu haiba mukatezi mi bana bamina bahana kumiutwa. (Maef. 4:31) Mwa muinelo ocwalo, muswanela kukupa Jehova kuli amituse. Mushemi yomuñwi yabizwa Lydia utalusa kuli: “Fokuñwi, nitokwanga kulapela ku Jehova kuli anituse kusahalifela bana baka habahana kuniutwa. Mane ka linako zeñwi, nenisa felelezangi zene nibulela ilikuli nilapele ku Jehova kuli anituse. Kulapela kunitusanga kuwa pilu.”—Samu 37:5.
20. Ki butata mañi bobakona kukopana ni bona bo maa lubasi, mi bakona kubutatulula cwañi?
20 Butata bobuñwi bobakona kukopana ni bona bashemi ba basali babañwi kikuli, kukona kubabela taata kubonisa kuli balata bana babona. (Tite 2:3, 4) Buñata bwabona nebahuliselizwe mwa lubasi mo bashemi babona nebasa babonisangi kuli babalata. Haiba ni mina nemuhuliselizwe mwa lubasi lolucwalo, musike mwaeza mafosisa aswana ni ane baezize bashemi bamina. Me yaipeya kuutwa Jehova uswanela kuituta mwakulatela bana bahae. Niteñi, kukona kumubela taata kucinca mwanahanela, mwaikutwela ni mwaezeza lika. Kono wakona kueza licinceho kakuli kueza cwalo kukatahisa kuli yena ni lubasi lwahae babe ni tabo.
MUZWELEPILI KUIPEYA KUUTWA JEHOVA
21-22. Ka kuya ka liñolo la Isaya 65:13, 14, lukona kutusiwa cwañi haiba luipeya kuutwa Jehova?
21 Mulena Davida naaziba kuli kuipeya kuutwa Jehova kwatusa. Naañozi kuli: “Litaelo za Jehova lilukile, litabisa pilu; mulao wa Jehova ukenile, ubenyisa meeto. Mutangaa hao ulemusizwe ka zona; kulimamela kufumanisa mupuzo omutuna.” (Samu 19:8, 11) Kacenu, lwaiponela shutano ye mwahalaa batu babaipeya kuutwa Jehova ni babasa tabeli kulatelela kelezo yahae yelilato. Batu babaipeya kuutwa Jehova ‘bahuweleza ka tabo kabakala buiketo bwa lipilu zabona.’—Mubale Isaya 65:13, 14.
22 Baana-bahulu, bo ndate lubasi ni bo maa lubasi habaipeya kuutwa Jehova, bakaba ni bupilo bobunde, lubasi lwabona lukaba ni tabo, mi mizwale ni likaizeli mwa puteho bakaswalisana. Mi sa butokwa nikufita kikuli, bakatabisa pilu ya Jehova. (Liprov. 27:11) Kaniti luli, kuipeya kuutwa Jehova kwatusa.
PINA 123 Kuipeya ka Busepahali Kwatasaa Zamaiso ya Mulimu
^ para. 5 Mwa taba ye, lukanyakisisa libaka haluswanela kuipeya kuutwa Jehova. Hape lukanyakisisa mo batu babafilwe maata a kuetelela babañwi ili baana-bahulu, bo ndate lubasi, ni bo maa lubasi bakona kulikanyiseza mutala wa Mubusisi Nehemia, Mulena Davida, ni Maria, yena mahe Jesu.
^ para. 1 TALUSO YA MANZWI: Pulelo ya kuipeya kuutwa kamba kuipeya kwatasi haitabelwangi ki batu babahapelezwanga kueza cwalo. Kono batanga ba Mulimu bona baikatulelanga kumuutwa ka kuitatela.
^ para. 7 Mabizo amañwi mwa taba ye acincizwe.
^ para. 62 LITABA ZETALUSA MASWANISO: Muuna-muhulu usebeza hamoho ni mwanaa hae kulukisa Ndu ya Mubuso sina feela Nehemia mwanaasebelisanezi ni batu babañwi kuyaha limota la Jerusalema.
^ para. 64 LITABA ZETALUSA SISWANISO: Ndate lubasi ulapela kuzwelela kwatasaa pilu ni lubasi lwahae.
^ para. 66 LITABA ZETALUSA SISWANISO: Mushimani naatandile nako yeñata inzaa bapala lipapali za fa kompyuta kono haasika feleleza kueza misebezi ya fa lapa kamba ya kwa sikolo. Bo mahe bazwa kwa musebezi mi bakatezi; bamufa kalimelo inze bawile pilu mi haba muhanyaukeli.
