Liñolo leo libulela kuli: “Haiba mwa sikiliti seupila ku sona ubona mubotana yanyandiswa mi ubona likezo za kukopamisa katulo yelukile ni kuluka, usike wakomokiswa ki taba yeo. Kakuli nduna yapahami yo ubonwa ki yapahami kumufita, mi kunani babañwi hape babapahami hahulu kubafita.”—Muek. 5:8.

Haiba lusanahanisisi mubonelo wa Jehova fa taba ye, lukana lwanahana kuli timana yeo italusa feela babusi ba batu. Kono haiba lunyakisisa hande timana yeo, lukalemuha kuli ilubulelela niti ka za Jehova, yeomba-omba ni kulufa sepo.

Liñolo la Muekelesia 5:8 libulela za mubusi yanyandisa mubotana ni kusa muatula ka kuluka. Mubusi yo hazibi kuli ubonwa ki mutu yomuñwi yanani situlo sesipahami kumufita kamba yanani maata kumufita. Mi mane kunani batu babañwi babanani litulo zepahami hahulu kumufita. Ka bumai, babusi kaufela ba lifasi bakona kuba babasa sepahali mi batu bakona kunyanda hahulu bakeñisa kuli babusi bao habaezangi lika ka kuluka.

Lika niha lisa luzamaeli hande, kwaomba-omba kuziba kuli Jehova ‘ubona nihaiba nduna yapahami’ wa muuso. Lwakona kukupa Mulimu kuli alutuse, mi lwakona kunepela mishimbo yaluna ku yena. (Samu 55:22; Mafil. 4:6, 7) Lwaziba kuli “meeto a Jehova atalimisisa mwa lifasi kaufela, kuli abonise maata ahae kutusa babasepahala ku yena ka lipilu zabona kaufela.”—2 Makol. 16:9.

Kacwalo, liñolo la Muekelesia 5:8, liluhupulisa mobainezi babusi ba batu kacenu, ni kuli kunani yapahami hahulu kufita babusi bao. Mi sa butokwa nikufita kikuli, liñolo leo lilutusa kulemuha kuli Jehova ki yena Yapahami ka Kufitisisa, mi ki yena yanani maata amatuna ka kufitisisa. Mi usweli wabusa ka kuitusisa Mwanaa hae, yena Jesu Kreste, yali Mulena wa Mubuso wa Mulimu. Jehova, yena Mulimu Yamaata Kaufela, ili yabona lika kaufela zeezahala, unani katulo yelukile mi ni Mwanaa hae ucwalo.