1-2. Ki ifi swalisano ye mwahalaa manzwi abulezwi kwa Muekelesia 11:6 ni musebezi wa kukutaza taba yende ya Mubuso?

MWA linaha zeñwi, batu babañata batabelanga kuituta zeñata hase bautwile taba yende. Mwa libaka zeñwi mona, batu babañwi habatabelangi kuutwa za Mulimu kamba za Bibele. Kucwañi kwa sibaka semupila ku sona, batu babañata baezanga cwañi hamukutaza ku bona? Kusina taba ni mobaangela lushango lwaluna batu, Jehova ubata kuli luzwelepili kukutaza kufitela abulela kuli musebezi wo ufelile.

² Nako yatomile Jehova haika fita, musebezi wa kukutaza ukafela, “kihona kukataha mafelelezo.” (Mat. 24:14, 36) Kono pili nako yeo isika fita kale, lukona kubonisa cwañi kuli lwamamela manzwi a kuli “lizoho lahao lisike lapumula”? *—Mubale Muekelesia 11:6.

3. Lukanyakisisañi mwa taba ye?

³ Mwa taba yefelile, nelunyakisisize lika zeene zelutokwa kueza kuli lube “bayambi ba batu” babande. (Mat. 4:19) Mwa taba ye, lukanyakisisa lika zetaalu zekona kulutusa kuzwelapili kukutaza kusina taba ni miinelo yelukopana ni yona. Lukanyakisisa libaka hakuli kwa butokwa kuzwelapili (1) kuisa pilu kwa musebezi wa kukutaza, (2) kuba ni pilu-telele, ni (3) kuba ni tumelo yetiile.

4. Ki kabakalañi haluswanela kuzwelapili kuisa pilu kwa musebezi walufile Jehova?

⁴ Jesu naapolofitile likezahalo ni miinelo yeneka bonisa kuli  lupila mwa mazazi a mafelelezo, ili zenekona kutahisa kuli balutiwa bahae basike bazwelapili kuisa pilu kwa musebezi wa kukutaza. Naabulelezi balutiwa bahae kuli ‘bazwelepili kutona.’ (Mat. 24:42) Mwa linako za Nuwe, kunani lika zeñata zenetahisize kuli batu basike baisa pilu kwa temuso yanaa bafile; nto yeswana yakona kuezahala ni ku luna kacenu. (Mat. 24:37-39; 2 Pit. 2:5) Ki lona libaka haluswanela kuzwelapili kuisa pilu kwa musebezi walufile Jehova.

5. Liñolo la Likezo 1:6-8 libonisa cwañi kuli musebezi wa kukutaza ukaezwa mwa libaka zeñata?

⁵ Kacenu, luswanela kuisa hahulu pilu kwa musebezi wa kukutaza taba yende ya Mubuso. Jesu naapolofitile kuli musebezi wa kukutaza neuka zwelapili kuezwa hasaashwile, mi balutiwa bahae nebaka eza musebezi wo mwa libaka zeñata. (Joa. 14:12) Jesu hasaashwile, balutiwa bahae babañwi nebakutezi kueza musebezi one baezanga wa kuyamba. Jesu hasaazusizwe kwa bafu, naaezize makazo ya kutusa balutiwa bahae kuswasa litapi zeñata. Hamulaho wa kueza makazo yeo, Jesu naataluselize balutiwa bahae kuli musebezi wa kuyamba batu neli ona wa butokwa hahulu kufita musebezi ufi kamba ufi. (Joa. 21:15-17) Nakonyana pili Jesu asika kambamela kale kwa lihalimu, naataluselize balutiwa bahae kuli musebezi wa kukutaza wanaakalile neuka ezwa mwa libaka zeñata za lifasi isiñi feela mwa Isilaele. (Mubale Likezo 1:6-8.) Hamulaho wa lilimo zeñata kuzwa fo, Jesu naafile muapositola Joani pono yenebonisa zeneka ezahala “mwa lizazi la Mulena.” * Yeñwi ya lika zanaaboni Joani neli pono yemakaza ya lingeloi lene lishaela “taba yende yesafeli,” ili yenekutazwa kwa “macaba kaufela ni mishobo ni malimi ni batu.” (Sin. 1:10; 14:6) Kaniti luli, Jehova ubata kuli luzwelepili kukutaza mwa lifasi kaufela kufitela musebezi wo ufela.

6. Ki lika mañi zekona kulutusa kuzwelapili kuisa pilu kwa musebezi wa kukutaza?

 ⁶ Haiba lunahanisisa lika kaufela zaluezelize Jehova, lukazwelapili kuisa pilu kwa musebezi wa kukutaza. Ka mutala, ulufa lico zeñata za kwa moya ka kuitusisa lihatiso, lihatiso za fa tupangaliko, litaba za kuteeleza, mavidio, ni liprogilamu zeñwi za fa JW Broadcasting ni fa webusaiti ya jw.org. Munahane feela taba ye: Fa webusaiti yaluna kunani litaba zefumaneha mwa lipuo zefitelela 1,000! (Mat. 24:45-47) Nihaike kuli batu mwa lifasi kacenu habaswalisani bakeñisa kuba mwa likopano za lipolitiki zeshutana, bulapeli bobushutana, ni kuli babañwi ki bafumi mi babañwi ki babotana, batanga ba Mulimu babafitelela 8 milioni mwa lifasi kaufela, bona baswalisani. Ka mutala, la Bufaifi, April 19, 2019, Lipaki za Jehova mwa lifasi kaufela nebaswalisani kubuha vidio yenelukisizwe ya kunyakisisa liñolo la zazi. Fa lizazi leo manzibwana, batu babaeza 20,919,041 nebakopani hamoho kueza Kupuzo ya Lifu la Jesu. Haiba lunahanisisa tohonolo yelunani yona ya kutusa mwa musebezi wo ni ya kuiponela likezahalo zemakaza zeo, lukasusuezwa kuzwelapili kuisa hahulu pilu kwa musebezi wa kukutaza taba yende ya Mubuso.

7. Kulikanyisa mutala wa Jesu kukona kulutusa cwañi kuisa pilu kwa musebezi wa kukutaza?

⁷ Nzila yeñwi yekona kulutusa kuzwelapili kuisa pilu kwa musebezi wa kukutaza ki kulikanyisa mutala wa Jesu. Jesu naasika tuhelela nto ifi kamba ifi kumupaleliswa kupaka niti. (Joa. 18:37) Satani hanaa mulikile ka kusepisa kuli naaka mufa “mibuso kaufela ya lifasi ni kanya yayona,” Jesu naasika kukuezwa ki taba yeo nihanyinyani, mi batu hane babatile kumueza mulena, naahanile. (Mat. 4:8, 9; Joa. 6:15) Jesu naasika bata kuba ni sifumu, mi mane naasika tuhela kukutaza niha naalwanisizwe hahulu. (Luka 9:58; Joa. 8:59) Kuhupula kelezo yanaafile muapositola Paulusi kuka lutusa, tumelo yaluna hailikiwa. Naasusuelize Bakreste babañwi kulikanyisa mutala wa Jesu ilikuli basike ‘bakatala ni kuzwafa.’—Maheb. 12:3.

8. Kuba ni pilu-telele kutalusañi, mi ki kabakalañi kuba ni pilu-telele hakuli kwa butokwa sihulu kacenu?

⁸ Kuba ni pilu-telele kutalusa kuba ni buikoneli bwa kulibelela kuli miinelo icince. Lutokwa kuba ni pilu-telele, ibe kuli lubata kuli butata bobuñwi boluli kubona bufele kamba lunyolelwa kubona nto yeñwi yende yese lulibelezi ka nako yetelele. Mupolofita Habakuki naanyolezwi kubona nako yeo bumaswe bone buezwa mwa Juda nebuka feliswa. (Hab. 1:2) Balutiwa ba Jesu nebanahana kuli Mubuso wa Mulimu “neuka bonahala honafo” feela, mi neuka balukulula kwa puso ya Maroma. (Luka 19:11) Lunyolelwa hahulu kubona Mubuso wa Mulimu hauka felisa bumaswe ni kutahisa lifasi lelinca mokuka pila batu babalukile. (2 Pit. 3:13) Nihakulicwalo, lutokwa kuba ni pilu-telele ni kulibelela kuli nako yatomile Jehova ya kueza cwalo ifite. Halunyakisiseñi linzila zeñwi zebonisa mo Jehova alutuseza kuba ni pilu-telele.

9. Ki ifi mitala yebonisa kuli Jehova unani pilu-telele?

⁹ Jehova ulutomezi mutala omunde hahulu wa kuba ni pilu-telele. Naafile Nuwe nako yeñata ya kuyaha aleka ni kuba “mukutazi wa kuluka.” (2 Pit. 2:5; 1 Pit. 3:20) Abrahama hanaakuta-kutezi kubuza Jehova ka za katulo yahae ya kusinya batu babamaswe bane bapila mwa muleneñi wa Sodoma ni Gomora, Jehova naateelelize. (Gen. 18:20-33) Ka lilimo zeñata, Jehova naabonisize pilu-telele yetuna kwa sicaba sa Isilaele sene sisasepahali. (Neh. 9:30, 31) Kacenu, lusweli lwaiponela kuli Jehova unani pilu-telele kakuli ufile batu kaufela kolo ya kuli “babake.” (2 Pit. 3:9; Joa. 6:44; 1 Tim. 2:3, 4) Mutala wa Jehova ulutusa kuba ni pilu-telele halunze luzwelapili kukutaza ni kuluta batu.  Hape Jehova uitusisize swanisezo yefumaneha mwa Linzwi lahae kuli alutuse kuba ni pilu-telele.

10. Mutala wa mulimi obulezwi kwa Jakobo 5:7, 8 ululutañi?

¹⁰ Mubale Jakobo 5:7, 8. Mutala wa mulimi ululuta molukona kubela ni pilu-telele. Ki niti kuli licalo zeñwi lihulanga kapili. Nihakulicwalo, licalo zeñata, zaliyehanga kuhula, sihulu zebeya miselo. Mwa linako za Maisilaele, batu nebacalanga licalo zabona mwa likweli ze 6. Mulimi naacalanga lipeu zahae pula ya makalelo hase inelile mwa mbumbi mi naakutulanga kwa mafelelezo a litabula. (Mare. 4:28) Haike lulikanyise mutala wa mulimi yanani pilu-telele. Kono kueza cwalo kukona kuba taata.

11. Kuba ni pilu-telele kukona kulutusa cwañi haluli mwa bukombwa?

¹¹ Ka kuba batu babasika petahala, hañata lubatanga kubona lika zende haliezahala honafo feela hamulaho wa kuikataza. Kono haiba lubata kuli licalo zaluna lihule ni kubeya miselo, luswanela kuzwelapili kulibabalela; luswanela kulima mwa simu, kucala, kutahulela, ni kuselaela. Musebezi wa kuluta batu kuba balutiwa ni ona utokwa kuli luzwelepili kusebeza ka taata. Lutokwa kuba ni pilu-telele kuli lutuse muituti waluna wa Bibele kuambuka moya wa kuketulula babañwi ni kumutusa kuba ni lilato. Kuba ni pilu-telele kuka lutusa kusazwafa batu habasa tabeli kuteeleza ku luna. Hape lusatokwa kuba ni pilu-telele batu habatabela kuteeleza ku luna ni kuituta. Halukoni kuhapeleza muituti wa Bibele kueza zwelopili ya kwa moya. Fokuñwi, balutiwa ba Jesu ni bona neku baangelanga nako kuli bautwisise zanaa baluta. (Joa. 14:9) Haike luhupulange kuli luna lwakona kucala ni kuselaela, kono Mulimu ki yena yahulisa.—1 Makor. 3:6.

12. Lukona kubonisa cwañi pilu-telele halukutaza ku bahabo luna babasi Lipaki?

¹² Kukona kulubela taata kuba ni pilu-telele halukutaza ku bahabo luna babasi Lipaki. Sikuka sesi kwa liñolo la Muekelesia 3:1, 7, sakona kulutusa. Liñolo leo libulela kuli:  ‘Kunani . . . nako ya kukuza ni nako ya kubulela.’ Muzamao waluna omunde niha ukona kutusa bahabo luna kuteeleza kwa lushango lwaluna, luswanela kukutaza ku bona folubela ni kolo kaufela. (1 Pit. 3:1, 2) Luswanela kuba ni pilu-telele ni tukufalelo halukutaza ni kuluta batu, kukopanyeleza cwalo ni halukutaza ku bahabo luna.

13-14. Ki mitala ifi ya batu bane babonisize pilu-telele yeluswanela kulikanyisa?

¹³ Kunyakisisa mitala ya batanga ba Mulimu babasepahala bababulezwi mwa Bibele ni babapila mwa linako zaluna kwakona kulutusa kuba ni pilu-telele. Habakuki niha naanyolelwa kubona bumaswe habufeliswa, naabulezi cwana ka buikolwiso: “Nikazwelapili kuyema mwa sibaka saka sa bulibeleli.” (Hab. 2:1) Muapositola Paulusi naatalusize kuli naatabela luli ‘kufeleleza’ bukombwa bwahae. Nihakulicwalo, naazwezipili kuba ni pilu-telele ni ‘kupaka ka kutala taba yende.’—Lik. 20:24.

¹⁴ Halunyakisiseñi mutala wa muzwale ni kaizeli babanyalani, ili bao hamulaho wa kukwaza sikolo sa Giliadi, nebalumilwe kuyo sebeleza kwa naha kokunani Lipaki babanyinyani, mi bulapeli bobuñata bwa kwateñi haki bwa Sikreste. Neli feela batu babanyinyani bane batabela kuituta Bibele. Nihakulicwalo, mizwale ni likaizeli bane bali ni bona kwa sikolo sa Giliadi, ili bane basebeleza mwa linaha lisili, neba balumelanga lipiho zebonisa kuli bazamaisa lituto za Bibele zeñata zezwelapili. Muzwale ni kaizeli yo bazwelapili kukutaza kusina taba ni kuli batu babañata nebasa ezi zwelopili mwa sibaka sene bakutaleza ku sona. Hamulaho wa kukutaleza mwa sibaka seo ka lilimo ze 8, kusina mutu yaeza zwelopili, muzwale ni kaizeli yo nebabile ni tabo yetuna kubona yomuñwi wa baituti ba Bibele babona hakolobezwa. Luitutañi kwa mitala yeo ya batu ba mwa linako za kwamulaho ni mwa linako zaluna? Batanga ba Jehova babasepahala bao, nebasika tuhela kuba ni tukufalelo kamba kupumulisa lizoho labona, mi Jehova naabafuyauzi kabakala pilu-telele yabona. Haike ‘lulikanyise babayola lisepiso ka tumelo ni pilu-telele yabona.’—Maheb. 6:10-12.

15. Ki ifi nzila yapili yebonisa mo tumelo ikona kulutuseza kuzwelapili kukutaza?

¹⁵ Lwalumela kuli lushango lolukutaza ki lwa niti; kacwalo lubata kueza molukonela kaufela kulutaluseza batu babañata. Lunani tumelo ya kuli Mulimu ukataleleza lika kaufela zalusepisize mwa Linzwi lahae. (Samu 119:42; Isa. 40:8) Luboni bupolofita bobubulezwi mwa Bibele habutalelezwa mwa linako zaluna. Luiponezi batu habacinca mupilelo wabona hane bakalile kusebelisa litaba zene baitutile mwa Bibele. Litaba zeo lilutusa kuba ni buikolwiso bobutuna bwa kuli batu kaufela batokwa kuutwa taba ye nde ya Mubuso.

16. Liñolo la Samu 46:1-3 lilutusa cwañi kuziba mo tumelo yaluna ku Jehova ikona kulutuseza kuzwelapili kukutaza, mi kuba ni tumelo ku Jesu kuka lutusa cwañi?

¹⁶ Hape lunani tumelo ku Jehova, yena Muñaa lushango lolukutaza, ni ku Jesu yena yaketilwe kuba Mulena wa Mubuso wa Mulimu. (Joa. 14:1) Kusina taba ni zelukona kukopana ni zona, Jehova ukazwelapili kuba masabelo aluna ni maata aluna. (Mubale Samu 46:1-3.) Kuzwa fo, lunani buikolwiso bwa kuli Jesu usweli kuetelela musebezi wa kukutaza kuzwelela kwa lihalimu, mi uitusisa maata afilwe ki Jehova.—Mat. 28:18-20.

17. Mufe mutala obonisa libaka haluswanela kuzwelapili kukutaza?

¹⁷ Kuba ni tumelo kulutusa kuba ni buikolwiso bwa kuli Jehova ukafuyaula buikatazo bwaluna, mi lwaziba kuli fokuñwi uezanga cwalo ka nzila yelusika libelela. (Muek. 11:6) Ka mutala, batu babañata-ñata babonanga lihatiso zelubeyanga fa litafule ni fa tukalani. Kana mukutalezo wo usweli watusa? Eni! Bukombwa Bwa Luna  Bwa Mubuso bwa November 2014 nebubulezi za musizana yomuñwi yanaali fa yunivesiti, ili yanaabata kuñola taba yeñwi ka za Lipaki za Jehova. Musizana yo naapalezwi kufumana Ndu ya Mubuso kono naafumani lihatiso zenebeilwe fa litafule kwa yunivesiti, mi Lipaki neba mutusize kufumana litaba zanaabata kuñola. Hamulaho wa nako, aba Paki yakolobelizwe, mi cwale sasebeza sina paina wa kamita. Litaba zecwalo lilutusa kuzwelapili kukutaza bakeñisa kuli libonisa kuli kunani batu babañata babasa tokwa kuutwa taba yende ya Mubuso.

18. Luziba cwañi kuli musebezi wa kukutaza ukafezwa kulikana ni mwabatela Jehova?

¹⁸ Lwakona kuba ni buikolwiso bwa kuli musebezi wa kukutaza taba yende ya Mubuso ukafela ka nako yetomilwe. Halunyakisiseñi zeneezahezi mwa mazazi a Nuwe. Jehova naabonisize kuli waezanga lika ka nako yatomile. Lilimo ze 120 pili Muunda usika taha kale, Jehova naazibisize cimo fone ikaezahalela taba yeo. Hase kufitile lilimo zeñata kuzwa fo, Jehova abulelela Nuwe kuli ayahe aleka. Nuwe naazwezipili kusebeza ka taata pili Muunda usika kalisa kale, mi mwendi naaezize cwalo ka lilimo ze 40 kamba ze 50. Nihaike kuli batu nebahanile kumuutwa, Nuwe naazwezipili kukutaza ni kulemusa batu, kufitela Jehova amutaluseza kuli akenye lifolofolo mwa aleka. Mi ka nako yeswanela, “Jehova akwala sikwalo.”—Gen. 6:3; 7:1, 2, 16.

19. Ki lika mañi zelunyolelwa kubona haiba lusatuheleli lizoho laluna kupumula?

¹⁹ Hona cwale-cwale fa, Jehova uka luzibisa kuli musebezi wa kukutaza taba yende ya Mubuso ufelile; ukasinya lifasi la Satani ni kutahisa lifasi lelinca mokuka pila batu babalukile. Kufitela nako yeo ifita, haike lulikanyise mutala wa Nuwe, Habakuki, ni babañwi bane basika tuhelela lizoho labona kupumula. Haike luzwelepili kuisa pilu kwa musebezi wa kukutaza, kuba ni pilu-telele, ni kuzwelapili kuba ni tumelo yetiile ku Jehova ni mwa lisepiso zahae.