1-2. Ka kuya ka liñolo la 1 Timotea 6:20, ki lika mañi zanaaswanela kueza Timotea?

HAÑATA, lufanga batu lika zaluna za butokwa kuli balibabalele. Ka mutala, lubulukisanga masheleñi aluna kwa panga. Haluezanga cwalo, lulibelelanga kuli masheleñi aluna akabulukiwa hande, mi haana kulateha kamba kuuzwiwa. Kacwalo, lwautwisisa sekutalusa kufa mutu nto yeñwi yeluunga kuba ya butokwa kuli aibabalele.

² Mubale 1 Timotea 6:20. Muapositola Paulusi naahupulisize Timotea kuli naafilwe nto yende hahulu, ili zibo yenepahezi ka za mulelo wa Mulimu kwa batu. Timotea hape naafilwe tohonolo ya ‘kukutaza linzwi’ ni kueza “musebezi wa mukutazi wa evangeli.” (2 Tim. 4:2, 5) Paulusi naasusuelize Timotea kuli abuluke sanaafilwe kuli ababalele. Sina Timotea, ni luna lufilwe kuli lubabalele lika za butokwa. Ki lika mañi ona zeo? Mi ki kabakalañi haluswanela kubabalela lika za butokwa zalufile Jehova?

3-4. Ki kabakalañi niti ya mwa Bibele haili ya butokwa?

³ Jehova ulushemubile ka kulufa zibo yenepahezi, ili niti ya butokwa yefumaneha mwa Linzwi lahae, yona Bibele. Niti yeo ki ya butokwa kakuli ilutusa kuziba molukona kubela ni silikani sesinde ni Jehova, mi ilutusa kuziba zekona kulutahiseza tabo sakata mwa bupilo. Haiba lulumela niti yeo ni kusebelisa zeluituta, haluna kupumiwa ki lituto za buhata, mi lukaambuka muzamao omaswe.—1 Makor. 6:9-11.

⁴ Hape niti ya mwa Linzwi la Mulimu ki ya butokwa kakuli Jehova upatulula feela niti yeo kwa batu babaikokobeza “ba lipilu  zende.” (Lik. 13:48) Batu babacwalo balumela kuli Jehova kacenu uitusisa mutanga yasepahala yanani kutwisiso kululuta litaba za mwa Bibele. (Mat. 11:25; 24:45) Halukoni kuutwisisa litaba za mwa Bibele ka ili luna, mi hakuna nto ya butokwa hahulu yefita litaba zeo.—Liprov. 3:13, 15.

5. Ki lika mañi zeñwi zalufile Jehova kuli lubabalele?

⁵ Hape Jehova ulufile tohonolo yetuna ya kuluta batu niti ka za hae ni zalelile kueza. (Mat. 24:14) Lushango lolukutaza ki lwa butokwa hahulu kakuli lutusa batu kuba mwa lubasi lwa Jehova, mi lubafa kolo ya kufumana bupilo bobusa feli. (1 Tim. 4:16) Ibe kuli zelupeta mwa bukombwa ki zetuna kamba ki zenyinyani, lutusa kueza musebezi wa butokwa hahulu osweli kueziwa mwa mazazi aluna. (1 Tim. 2:3, 4) Kaniti luli, lunani tohonolo yetuna ya kusebeza hamoho ni Mulimu!—1 Makor. 3:9.

6. Ki lika mañi zeneezahezi kwa batu babañwi bane batuhezi kuzwelapili kubabalela zene bafilwe?

⁶ Mwa linako za Timotea, Bakreste babañwi nebasika itebuha tohonolo yene banani yona ya kusebeza hamoho ni Mulimu. Bakeñisa kuli Demasi naalatile lifasi la cwale, naatuhezi kusebeza ni Paulusi. (2 Tim. 4:10) Kubonahala kuli Figelo ni Ermogene nebatuhezi kukutaza bakeñisa kuli nebasaba kunyandiswa sina mwanaanyandiselizwe Paulusi. (2 Tim. 1:15) Imenea, Alexandere, ni Fileto nebabile bakwenuheli mi nebatuhezi kulapela Jehova. (1 Tim. 1:19, 20; 2 Tim. 2:16-18) Batu bao kaufela nebalata Jehova nako yeñwi, kono nebatuhezi kuitebuha lika za butokwa zene bafilwe.

7. Satani uitusisa linzila mañi kuli alulwanise?

⁷ Satani usweli kulika cwañi kulutuhelisa kuitebuha lika za butokwa zalufile Jehova? Halunyakisiseñi linzila zeñwi zasweli kuitusisa Satani. Uitusisa TV, mafilimu, Intaneti, mitende, libuka, ni limagazini ilikuli akukueze minahano yaluna ni kuli lueze lika ka nzila yekona kutahisa kuli lilato laluna ku Jehova likale kufokola hanyinyani-hanyinyani. Ulika kulubemba ka kuitusisa litaka zaluna, mi uitusisa batu kuli balunyandise, ilikuli lutuhele kukutaza. Mi ulika kulukukueza kuli luteeleze kwa litaba zezwa kwa bakwenuheli “zebabulela ka mafosisa kuli ki ‘zibo,’” ilikuli lufulalele niti.—1 Tim. 6:20, 21.

8. Muitutañi kwa mutala wa muzwale yabizwa Daniel?

⁸ Haiba lusatokomeli, lwakona kusiya niti hanyinyani-hanyinyani. Halunyakisiseñi mutala wa muzwale yabizwa Daniel, * yanaalata hahulu kubapala lipapali za fa kompyuta.  Utalusa kuli: “Nenikalile kubapalanga lipapali za fa kompyuta inze ninani lilimo zebato eza 10. Sapili, nenibapalanga lipapali zende. Kono hanyinyani-hanyinyani, nakala kubapalanga lipapali za lindwa ni lipapali zebonisa lika za sidimona.” Nako hainze iya, muzwale yo akala kubapalanga lipapali za fa kompyuta ka lihora zebato eza 15 zazi ni zazi. Muzwale yo utalusa kuli: “Mwa pilu neniziba kuli mufuta wa lipapali zene nibapalanga ni nako yenitandanga kueza cwalo nelisweli kufokolisa silikani saka ni Jehova hanyinyani-hanyinyani. Nihakulicwalo, pilu yaka neitatafalile, mi nenikalile kulumela kuli likuka za mwa Bibele nelisa niami.” Kacwalo, halusa tokomeli, lika za kuitabisa ka zona likona kutahisa kuli silikani saluna ni Jehova sifokole. Haiba kuba cwalo, lwakona kulatehelwa ki lika za butokwa zalufile Jehova.

9. Ka kuya ka liñolo la 1 Timotea 1:18, 19, Paulusi naabapanyize Timotea kwañi?

⁹ Mubale 1 Timotea 1:18, 19. Paulusi naabapanyize Timotea kwa lisole, mi naamususuelize ‘kuzwelapili kulwana ndwa yende.’ Ndwa yeo nesi ya kulwana ka mazoho, kono neli ndwa ya kwa moya. Bakreste baswana cwañi ni masole babalwana mwa ndwa? Ki lika mañi zelutokwa kueza ka kuba masole ba Kreste? Halunyakisiseñi lituto zeketalizoho zelukona kuituta kwa swanisezo ya Paulusi. Lituto zeo zakona kulutusa kuzwelapili kuba mwa niti.

10. Ki kabakalañi halutokwa kusepahala ku Mulimu?

¹⁰ Musepahale ku Mulimu. Lisole yomunde wasepahala. Walwananga ka taata kuli asileleze mutu yalata kamba nto yeñwi ya butokwa. Paulusi naasusuelize Timotea kusepahala ku Mulimu. (1 Tim. 4:7) Haiba lulata hahulu Mulimu ni kusepahala ku yena, lukazwelapili kuba mwa niti.—1 Tim. 4:8-10; 6:6.

11. Ki kabakalañi halutokwa kusebeza ka taata?

¹¹ Muitwaeze kusebeza ka taata. Lisole uswanela kuitwaeza kusebeza ka taata kuli aitukiseze kulwana ndwa. Timotea naatiile kwa moya bakeñisa kuli naazwezipili kulatelela kelezo yanaañozi Paulusi ka kususumezwa ki moya okenile ya kuambuka litakazo zemaswe, kuba ni tulemeno twanani tona Mulimu, ni kueza siango ni Bakreste babañwi. (2 Tim. 2:22) Kono kuli aeze cwalo, naatokwa kuikataza. Lutokwa kuzwelapili kuikataza kuli luambuke litakazo za nama. (Maro. 7:21-25) Kuzwa fo, lutokwa kueza ka taata kuli lutubule butu bwakale ni kuapala butu bobunca. (Maef. 4:22, 24) Mi haluikutwa kukatala hamulaho wa kusebeza lizazi kaufela, lukana lwatokwa kuikapeleza kuli luyo fumaneha kwa mikopano ya puteho.—Maheb. 10:24, 25.

12. Ki lika mañi zekona kulutusa kuekeza kwa buikoneli bwaluna bwa kuitusisa Bibele?

¹² Lisole uswanela kuitwaeza kuitusisa lilwaniso zahae. Kuli azibe hande mwakuitusiseza lilwaniso, uswanela kuzwelapili kuitwaeza zona. Ka nzila yeswana, ni luna lutokwa kuziba hande mwakuitusiseza Linzwi la Mulimu. (2 Tim. 2:15) Haluli kwa mikopano ya puteho, lwakona kuziba molukona kuezeza cwalo. Kono haiba lubata kukolwisa batu babañwi kuli litaba za niti za mwa Bibele zakona kubatusa, luswanela kuzwelapili kuezanga tuto ya Bibele ya ka butu. Kuli lutiise tumelo yaluna, luswanela kuituta Linzwi la Mulimu. Kueza cwalo hakutalusi feela kubalanga Bibele. Kono luswanela kunahanisisanga zelubala ni kueza lipatisiso mwa lihatiso zaluna ilikuli luutwisise hande Mañolo ni kuziba mwaku ataluseza. (1 Tim. 4:13-15) Haluka eza cwalo, lukakona kuluta batu ka kuitusisa Linzwi la Mulimu. Mi kuli lueze cwalo, halutokwi feela kubabalela timana ya mwa Bibele. Luswanela kutusa bateelezi baluna kuutwisisa hande  zelu babalela ni kuziba mobakona kulisebeliseza mwa bupilo bwabona. Haiba luba ni tomahanyo ya kuitutanga Bibele kamita, lukaekeza kwa buikoneli bwaluna bwa kuitusisa hande Linzwi la Mulimu leliñozwi ka kususumezwa ki moya wahae haluluta babañwi.—2 Tim. 3:16, 17.

13. Ka kuya ka liñolo la Maheberu 5:14, ki kabakalañi haluswanela kuba ni temuho?

¹³ Mube ni temuho. Lisole uswanela kuitukiseza kozi yakona kukopana ni yona ni kuiambuka. Ni luna luswanela kulemuha miinelo yekona kulutahiseza kozi mi luswanela kuiambuka. (Liprov. 22:3; mubale Maheberu 5:14.) Ka mutala, luswanela kuketa hande lika za kuitabisa ka zona. Hañata mafilimu ni maprogilamu abuhiswanga fa TV abonisanga litaba za muzamao wa buhule. Lwaziba kuli Jehova utoile muzamao ocwalo, mi batu babaikenyanga mwa muzamao wo bakenanga mwa butata. Kacwalo, luambuka kuitabisa ka lika zekona kutahisa kuli lilato laluna ku Mulimu likale kufokola hanyinyani-hanyinyani.—Maef. 5:5, 6.

14. Kuba ni temuho nekutusize cwañi bo Daniel?

¹⁴ Bo Daniel, bababulezwi kwamulaho, nebalemuhile kuli kubapala lipapali za fa kompyuta za lindwa ni lipapali zebonisa lika za sidimona, neku batahiseza butata. Nebaezize lipatisiso mwa Sifalana sa Lihatiso za Watchtower kuli bafumane litaba zenekona kubatusa kutatulula butata bo. Kueza cwalo neku batusize cwañi? Nebatuhezi kubapalanga lipapali za fa kompyuta zemaswe. Kuzwa fo, nebakwalile tukiso yene baezize ya kuamuhelanga lipapali za fa Intaneti mi nebatuhezi kuswalisana ni batu bane babapalanga ni bona fa Intaneti. Bo Daniel batalusa kuli: “Kufita kubapala lipapali za fa kompyuta, nakala kuezanga lika lisili fande mi nenikalile kutandanga nako ni balikani baka ba mwa puteho.” Bo Daniel cwale sebasebeza sina mapaina mi ki baana-bahulu mwa puteho.

15. Ki kabakalañi kulumela litaba za buhata hakukona kutahisa butata?

¹⁵ Sina Timotea, ni luna luswanela kutokomela kuli lusike lwakukuezwa ki litaba za buhata zebasweli kuhasanya bakwenuheli. (1 Tim. 4:1, 7; 2 Tim. 2:16) Ka mutala, bakwenuheli bakona kuhasanya litaba za buhata ka za mizwale ni likaizeli baluna kamba kutahisa kuli lukale kukakanya ka za haiba luswanela  kusepa kopano ya Jehova. Litaba zecwalo zakona kufokolisa tumelo yaluna. Haluswaneli kulumela litaba zeo. Kabakalañi? Kakuli litaba zecwalo lihasanywa ki “batu babasilafezi mwa munahano ni babasina niti.” Mulelo wabona ki wa kukala “likañi ni kukananisana.” (1 Tim. 6:4, 5) Babata kuli lulumele litaba zabona za buhata ni kuli lutuhele kusepa mizwale baluna.

16. Ki lika mañi zeluswanela kuambuka?

¹⁶ Muambuke lika zekona kumiyaulula. “Ka kuba lisole lelinde la Kreste Jesu,” Timotea naaisize pilu kwa bukombwa bwahae kufita kundongwama sifumu ni lika zeñwi za mwa bupilo. (2 Tim. 2:3, 4) Sina Timotea, lusike lwatuhelela takazo ya kulata sifumu kuluyaulula. “Maata apuma a sifumu” akona kutahisa kuli lutuhele kulata Jehova, kuitebuha Linzwi la Mulimu, ni kukutaza ku babañwi. (Mat. 13:22) Luswanela kunolofaza bupilo bwaluna ni kuitusisa hande nako ni maata aluna kuli luzwisezepili za Mubuso wa Mulimu.—Mat. 6:22-25, 33.

17-18. Luswanela kuezañi kuli lusileleze silikani saluna ni Jehova?

¹⁷ Muitukiseze kuunga muhato kapili. Lisole uswanela kuitukiseza zaswanela kueza kuli aisileleze. Haiba lubata kusileleza lika zalufile Jehova kuli lubabalele, lutokwa kuunga muhato kapili halulemuha kozi. Ki lika mañi zekona kulutusa kueza cwalo? Luswanela kuitukiseza cimo zeluka eza haluka kopana ni muliko.

¹⁸ Ka mutala, kwa mukiti, batu basupezwanga minyako yeli bukaufi yebakona kuitusisa hababata kuzwela fande, pili mukiti usika kalisa kale. Kabakalañi? Baezanga cwalo kuli batuse batu kuzwela fande kapili haiba kuba ni kozi. Ka nzila yeswana, lwakona kuitukiseza cimo muhato oluka anga haiba ka nako yeluitusisa Intaneti kamba yelubuha filimu kamba tukiso yeñwi fa TV kukala kubuhiswa maswaniso a mapunu, batu babalwana, kamba litaba za bakwenuheli. Haiba luitukiseza cimo zekona kuezahala, lwakona kuunga muhato kapili kuli lusileleze silikani saluna ni Jehova ni kuzwelapili kuba babakenile mwa meeto ahae.—Samu 101:3; 1 Tim. 4:12.

19. Ki limbuyoti mañi zeluka ikola haiba lubabalela lika za butokwa zalufile Jehova?

¹⁹ Luswanela kubabalela lika za butokwa zalufile Jehova, ili litaba za niti za mwa Bibele ni tohonolo ya kuluta batu litaba zeo. Haiba lueza cwalo, lukaba ni lizwalo lelikenile, lukaba ni tabo mwa bupilo, mi lukaba ni tabo yetahiswa ki kutusa babañwi kuziba Jehova. Ka tuso yahae, lukakona kubuluka selufilwe kuli lubabalele.—1 Tim. 6:12, 19.