1. Ki lili fokukona kulubela taata kusebeleza Jehova?

KI LILI fokukona kumibela bunolo kusebeleza Jehova, kana ki hamukopana ni miinelo yetaata kamba ki ka nako yeli mizamaela hande lika mwa bupilo? Halukopana ni miinelo yetaata, kubunolo kuitinga ku Jehova. Kono luezanga cwañi haiba lika liluzamaela hande mwa bupilo? Kana fokuñwi lwalibalanga kuli lutokwa kusebeleza Mulimu? Jehova naalemusize Maisilaele ka za taba yeo.—Deut. 6:10-12.

2. Mulena Asa ulutomezi mutala mañi?

² Mulena Asa ki mutala omunde hahulu wa mutu yanaabonisize butali ka kuitinga ku Jehova ka kutala. Asa naasebelelize Jehova ka nako yanaapila mwa kozo ni ka nako yanaakopani ni miinelo yetaata. Kuzwa feela kwa bwanana bwahae, “Asa [naasebelelize] Jehova ka pilu yeineezi ka kutala.” (1 Mal. 15:14, litaluso ze kwatasi) Nzila yeñwi yanaabonisize Asa ka yona kuli naasebeleza Jehova ka pilu yahae kaufela ki ka kufelisa bulapeli bwa buhata mwa Juda. Bibele ibulela kuli “azwisa lialetare za milimu isili ni libaka zelumbile, atubaka misumo ya macwe ya kulapela, mi alemaka likota za kulapela.” (2 Makol. 14:3, 5) Mane naatuluzi Maaka, yena kuku wahae, fa situlo sanaanani sona mwa mubuso. Kabakalañi? Kabakala kuli Maaka naasusuezanga batu kulapela mulimu wa siswaniso.—1 Mal. 15:11-13.

3. Lukanyakisisañi mwa taba ye?

³ Asa naaezize lika zeñata kwandaa kufelisa feela bulapeli bwa buhata. Naatusize batu ba mwa mubuso wa Juda kukutela ku Jehova. Jehova naafuyauzi Asa ni Maisilaele ka kutahisa  kuli bapile mwa kozo. * Ka lilimo zelishumi za puso ya Asa, “naha neili mwa kozo.” (2 Makol. 14:1, 4, 6) Mwa taba ye, lukanyakisisa mo Asa naaitusiselize nako yeo yanaapila mwa kozo. Hasamulaho, lukanyakisisa mutala wa Bakreste ba mwa linako za baapositola, ili bao sina Asa, nebaitusisize hande nako yene bapila mwa kozo. Kihona lukanyakisisa puzo ye: Haiba mwa naha yemupila ku yona mulukuluhile kulapela, mukona kuitusisa cwañi hande nako yemupila mwa kozo?

4. Ka kuya ka liñolo la 2 Makolonika 14:2, 6, 7, Asa naaitusisize cwañi nako yanaapila mwa kozo?

⁴ Mubale 2 Makolonika 14:2, 6, 7. Asa naataluselize sicaba kuli Jehova ki yena “[yanaa bafile] pumulo mwa maneku kaufela.” Nihakulicwalo, Asa naasika ikutwa kuli yeo neli yona nako ya kuca kobe ka mutwa. Kono naakalile kuyaha mileneñi, mamota, litawala, ni likwalo. Naabulelezi batu ba Juda kuli: “Naha isali yaluna.” Asa naatalusañi? Naatalusa kuli batu nebalukuluhile kuzamaya mwa naha yanaa bafile Mulimu ni kuyaha kusina twaniso yezwa kwa lila zabona. Naasusuelize batu kuli baitusise hande nako yeo yene bapila mwa kozo.

5. Ki kabakalañi Asa hanaatiisize mpi yahae?

⁵ Asa hape naaitusisize nako yanaapila mwa kozo kutiisa mpi yahae. (2 Makol. 14:8) Kana fo kutalusa kuli naasasepi Jehova? Batili. Asa naaziba kuli ka kuba mulena, naanani buikalabelo bwa kutusa sicaba kuitukiseza muinelo ufi kamba ufi one bakona kukopana ni ona kwapili. Asa naaziba kuli sicaba sa Juda niha nesipila mwa kozo, kozo yeo neisike yazwelapili, mi ki mona mone kubezi honacwalo.

6. Bakreste ba mwa linako za baapositola nebaitusisize cwañi nako yene bapila mwa kozo?

⁶ Nihaike kuli Bakreste ba mwa linako za baapositola nebanyandisizwe hahulu, fokuñwi nebapilanga mwa kozo. Nebaitusisize cwañi nako yeo? Baana ni basali babasepahala bao nebakutalize taba yende ya Mubuso kusina kulisela. Buka ya Likezo ibonisa kuli ‘nebazamaile ka sabo ya Jehova.’ Nebazwezipili kukutaza taba yende, mi kabakaleo, palo yabona ‘yazwelapili kuhula.’ Kaniti, Jehova naabafuyauzi hahulu hane banze bakutaza ka kutukufalelwa ka nako yene bapila mwa kozo.—Lik. 9:26-31.

7-8. Paulusi ni Bakreste babañwi nebaezizeñi hane banani kolo ya kukutaza? Mutaluse.

⁷ Bakreste ba mwa linako za baapositola nebaitusisize kolo yene banani yona kaufela kukutaza taba yende. Ka mutala, muapositola Paulusi hanaalemuhile kuli naakwalulezwi munyako omutuna hanaali kwa Efese, naaitusisize kolo yeo kukutaza ni kuluta batu ba mwa muleneñi wo kuba balutiwa.—1 Makor. 16:8, 9.

⁸ Paulusi ni Bakreste babañwi nebabile ni kolo yeñwi ya kukutaza, taba ya mupato hane itatuluzwi ka 49 C.E. (Lik. 15:23-29) Liputeho hase lizibisizwe katulo yeneezizwe, Bakreste nebaezize mone bakonela kaufela “kushaela taba yende ya linzwi la Jehova.” (Lik. 15:30-35) Nekuezaheziñi hasamulaho? Bibele ibulela kuli “liputeho zazwelapili kutiiswa mwa tumelo mi palo ya balumeli yazwelapili kuekezeha ka zazi ni zazi.”—Lik. 16:4, 5.

9. Batanga ba Jehova mwa linaha zeñata kacenu balukuluhile kuezañi, mi ki puzo mañi yelukona kuipuza?

⁹ Mwa linaha zeñata kacenu, batanga ba Jehova basweli kukutaza kusina twaniso. Kana mwa naha yemupila ku yona mulukuluhile kulapela? Haiba ki cwalo, muipuze kuli: ‘Niitusisa cwañi tukuluho yeo?’ Mwa mazazi a mafelelezo a, batu ba Jehova bapatehile kueza musebezi omutuna ka kufitisisa mwa lifasi kaufela wa kukutaza ni kuluta batu. (Mare. 13:10) Kunani lika zeñata zelukona kueza mwa musebezi wo.

10. Liñolo la 2 Timotea 4:2 lilususueza kuezañi?

¹⁰ Mukona kuitusisa cwañi hande nako yemupila mwa kozo? (Mubale 2 Timotea 4:2.) Munyakisise miinelo yamina kubona haiba mina kamba yomuñwi mwa lubasi lwamina wakona kuekeza kwa bukombwa bwahae, inge cwalo kusebeza sina paina. Ye haki nako ya kuipatela sifumu ni maluwo—lika zeo halina kulutusa ka nako ya ñalelwa yetuna.—Liprov. 11:4; Mat. 6:31-33; 1 Joa. 2:15-17.

11. Ki lika mañi zebaezize bahasanyi babañwi kuli bakone kukutaza taba yende kwa batu babañata?

¹¹ Bahasanyi babañata baitutile lipuo lisili ilikuli bakone kukutaza ni kuluta batu ka za Jehova. Kopano ya Mulimu ilukisize lihatiso zetomile fa Bibele mwa lipuo zeñata-ñata ilikuli lukone kukutaza mwa lipuo zeñata. Ka mutala, ka silimo sa 2010, lihatiso zaluna nelifumaneha mwa lipuo zebato eza 500. Kono kacenu, lihatiso zaluna selifumaneha mwa lipuo zefitelela 1,000!

12. Batu baikutwanga cwañi habautwa taba yende ya Mubuso mwa puo yabona? Mufe mutala.

¹² Batu baikutwanga cwañi habaituta niti yefumaneha mwa Linzwi la Mulimu mwa puo yabona? Halunyakisiseñi mutala wa kaizeli yanaafumanehile kwa mukopano omutuna one uezelizwe kwa Memphis, mwa Tennessee, kwa U.S.A. Mukopano wo neuezizwe mwa puo ya Sikinyarwanda, ili puo yebulelwa hahulu mwa Rwanda, Congo (Kinshasa), ni Uganda. Hamulaho wa mukopano wo, kaizeli yo yabulela puo ya Sikinyarwanda naabulezi kuli: “Kuzwa fonitela  kwa America lilimo ze 17 kwamulaho, lo ki lona lwapili kuutwisisa hande lingambolo kaufela fa mukopano.” Kaniti luli, kaizeli yo naafitilwe kwa pilu kabakala kuli mukopano wo neuezizwe mwa puo yahae. Haiba miinelo yamina yamikonisa, kana mwakona kuituta puo isili kuli mutuse batu babapila mwa sibaka semukutaleza ku sona? Kana batu babapila mwa sibaka semukutaleza ku sona bakatabela kuteeleza kwa lushango lwamina haiba muitusisa puo yabona? Mukaba ni tabo yetuna haiba mueza cwalo.

13. Mizwale baluna kwa Russia nebaitusisize cwañi nako yene bapila mwa kozo?

¹³ Mwa linaha zeñwi, mizwale baluna habaikoli tukuluho ya kukutaza kabakala kuli muuso hau balumelezi kueza lika zeñwi ka za musebezi waluna wa kukutaza. Ka mutala, halunyakisiseñi muinelo obali ku ona mizwale baluna kwa Russia. Hamulaho wa kunyandiswa hahulu ka nako yetelele, muuso neu bafile tukuluho ya kulapela ka silimo sa 1991 mwa March. Ka nako yeo, nekunani feela bahasanyi ba Mubuso bababato eza 16,000 kwa Russia. Hamulaho wa lilimo ze 20 kuzwa fo, palo yeo yaekezeha hahulu, kuli mane bahasanyi sebafitelela 160,000! Kaniti luli, mizwale baluna hane bafilwe tukuluho, nebaitusisize hande kolo yeo ka kueza mone bakonela kaufela kukutaza. Nihakulicwalo, nako ya kozo yeo neisika zwelapili. Miinelo niha icincize mwa naha yabona, basazwelapili kusebeleza Jehova ka kutukufalelwa. Bazwelapili kueza mobakonela kaufela mwa sebelezo yabona ku Jehova.

14-15. Jehova naatusize cwañi sicaba sahae ka maata ahae?

¹⁴ Mwa mazazi a Asa, kozo yene baikola batu neifelile hamulaho wa nako. Nebataselizwe ki mpi yetuna ya batu babaeza 1 milioni,  bane bazwa kwa Etopia. Zera, yena muzamaisi wa mpi yeo, naanani buikolwiso bwa kuli yena ni mpi yahae nebaka tula Juda. Mulena Asa yena naasika itinga fa palo ya mpi yahae, kono naasepile Jehova Mulimu wahae. Asa naalapezi kuli: “Lutuse, wena Jehova Mulimu waluna, kakuli ki wena yelusepile, mi lutilo lwanisa sicaba se ka libizo lahao.”—2 Makol. 14:11.

¹⁵ Nihaike kuli mpi ya Maetopia neli yetuna hahulu haibapanywa kwa mpi ya Asa, Asa naaziba kuli Jehova naanani maata, mi naakona kutusa sicaba sahae. Mi Jehova luli naatusize sicaba sahae, mpi ya Maetopia neituzwi.—2 Makol. 14:8-13.

16. Luziba cwañi kuli kozo yeluikola haina kuzwelapili?

¹⁶ Nihaike kuli haluzibi miinelo yeluka kopana ni yona kwapili, lwaziba kuli kozo yebaikola batu ba Mulimu kacenu ki ya ka nakonyana. Mane Jesu naapolofitile kuli mwa mazazi a mafelelezo, balutiwa bahae nebaka ‘toiwa ki macaba kaufela.’ (Mat. 24:9) Muapositola Paulusi ni yena naabulezi kuli “batu kaufela babalakaza kupila ka kusepahala ku Mulimu ka kuswalisana ni Kreste Jesu ni bona bakanyandiswa.” (2 Tim. 3:12) Satani ‘uhalifile hahulu;’ kacwalo haluswaneli kunahana kuli haana kulunyandisa.—Sin. 12:12.

17. Tumelo yaluna ikalikiwa cwañi?

¹⁷ Hona cwale-cwale fa, kaufelaa luna lukakopana ni miinelo yekalika tumelo yaluna. Lifasi lelimaswe le lituha litahelwa ki “ñalelwa yetuna yesika bonwa kale kuzwa kwa simuluho ya lifasi kutisa cwale.” (Mat. 24:21) Ka nako yeo, ba lubasi lwaluna mwendi baka lulwanisa, mi musebezi waluna mwendi ukakwalelwa. (Mat. 10:35, 36) Kana lukalikanyisa Asa ka kusepa Jehova kuli alutuse ni kulusileleza?

18. Ka kuya ka Maheberu 10:38, 39, ki lika mañi zekona kulutusa kuitukiseza nako yelusike lwapila mwa kozo?

¹⁸ Jehova kacenu usweli walutusa kutiisa tumelo yaluna kuli luitukiseze lika zekaezahala kwapili. Uitusisa “mutanga yasepahala yanani kutwisiso” kulufa ‘lico [za kwa moya] ka nako yeswanela’ kuli lilutuse kuzwelapili kutiya kwa moya. (Mat. 24:45) Kono mañi ni mañi waluna uswanela kueza mwakonela kaufela kutiisa tumelo yahae ku Jehova.—Mubale Maheberu 10:38, 39.

19-20. Hamulaho wa kubala liñolo la 1 Makolonika 28:9, ki lipuzo mañi zeluswanela kuipuza, mi ki kabakalañi?

 ¹⁹ Sina Mulena Asa, luswanela ‘kubata Jehova.’ (2 Makol. 14:4; 15:1, 2) Lukona kukalisa kubata Jehova ka kuituta ka za hae ni kukolobezwa. Luswanela kueza molukonela kaufela kutiisa lilato laluna ku Jehova. Kuli luzibe haiba lwalata Jehova kamba kutokwa, luipuzeñi kuli: ‘Kana nafumanehanga kwa mikopano ya puteho kamita?’ Mikopano yelukisizwe ki kopano ya Jehova, yalukatulusanga kwa moya mi lwaikolanga siango ni mizwale ni likaizeli baluna. (Mat. 11:28) Hape luipuzeñi kuli: ‘Kana naitutanga Bibele kamita?’ Haiba mupila ni lubasi lwamina, kana mwabanga ni nako ya kulapela sina lubasi sunda ni sunda? Kamba haiba mupila munosi, kana mwaezanga tuto ya ka butu sina mone mukaezeza hamuli ni lubasi lwamina? Mi kana mwaeza monikonela kaufela kukutaza ni kuluta batu kuba balutiwa?

²⁰ Ki kabakalañi haluswanela kuipuza lipuzo zeo? Bibele ibonisa kuli Jehova utatuba lipilu zaluna mi ulemuha zelunahana, mi ni luna luswanela kueza nto yeswana. (Mubale 1 Makolonika 28:9.) Haiba lulemuha kuli lutokwa kueza licinceho ka za likonkwani zeluitomezi, mubonelo waluna, kamba lika zelunahana, luswanela kukupa Jehova kuli alutuse kueza licinceho zeo. Ye ki yona nako yeluswanela kuitukiseza miinelo yekona kulika tumelo yaluna. Lusike lwalumeleza nto ifi kamba ifi kulupaleliswa kuitusisa hande nako yelupila mwa kozo!