1. Pitrosi naaezizeñi Jesu hanaaezize makazo ya kuli baswale litapi zeñata?

 PITROSI naatandile busihu kaufela inzaa yamba, kono naasika fumana litapi. Kono naakomokile, Jesu hanaa mubulelezi kuli: “Isa sisepe fokutungile, mi munepele tunyandi twamina mwa mezi kuli muswase litapi.” (Luka 5:4) Nihaike kuli Pitrosi naakakanya ka za haiba naaka fumana litapi, naaezize zanaa mubulelezi Jesu. Tunyandi tone banepezi mwa mezi twakala kupazauha kabakala bukiti bwa litapi. Pitrosi ni banaali ni bona hase balemuhile kuli Jesu uezize makazo, ‘bakomoka hahulu.’ Pitrosi ahuwa ali: “Hakuzwe ku na Mulena, kakuli ni muezalibi.” (Luka 5:​6-9) Kubonahala kuli Pitrosi naaikutwile kuli naasaswaneli nihaiba feela kuba ni Jesu.

2. Kunyakisisa mutala wa Pitrosi kukona kulutusa cwañi?

² Pitrosi naabulezi niti—‘naali muezalibi.’ Mañolo abonisa kuli fokuñwi naabulelanga ni kueza lika zeñwi zenetahisanga kuli ainyaze hasamulaho. Kana ni mina fokuñwi mwaikutwanga sina Pitrosi? Kana musweli mwaikataza kutuhela mukwa omuñwi omaswe ose mubile ni ona ka nako yetelele? Haiba ki cwalo, mukatuseha haiba munyakisisa mutala wa Pitrosi. Ka mukwa ufi? Munyakisise taba ye: Nekuli hahulu bunolo kuli mafosisa anaaezize Pitrosi asike añolwa mwa Bibele. Nihakulicwalo, mafosisa ao ni ona naañozwi mwa Bibele kuli luitute sesiñwi ku ona. (2 Tim. 3:​16, 17) Kuituta ka za muuna yo yanaanani bufokoli ni yanaanani maikuto aswana ni aluna, kwakona kulutusa kulemuha kuli Jehova halibeleli kuli lueze lika ka kupetahala. Ubata kuli lusike lwazwafa, ni kuli luzwelepili kuikataza kusina taba ni bufokoli bolunani bona.

3. Ki kabakalañi halusa swaneli kuzwafa?

³ Ki kabakalañi hakuli kwa butokwa kusazwafa? Haiba luzwelapili kueza nto yeñwi lukafita fa kuiziba hande hahulu. Ka mutala, muopeli ukona kutanda lilimo zeñata kuli azibe hande  mwakuitusiseza siliziso sesiñwi. Mwahalaa nako yeo, ukona kueza mafosisa amañata, kono haiba azwelapili kuikataza, ukaziba hande mwakuitusiseza siliziso seo. Nihakaba sikwala kwa kuitusisa siliziso seo, fokuñwi ukaezanga mafosisa. Kono haana kuzwafa. Ukazwelapili kuekeza kwa buikoneli bwahae. Ka mukwa oswana, nihaiba hamulaho wa kuikutwa kuli lutuhezi mukwa omuñwi, lusakona kuba ni mukwa wo hape. Kono lukazwelapili kuikataza kuli lutuhele mukwa wo. Kaufelaa luna lwabulelanga kamba kueza lika zeñwi zetahisanga kuli luinyaze hasamulaho; nihakulicwalo, haiba lusazwafi, Jehova uka lutusa kuzwelapili kueza licinceho. (1 Pit. 5:10) Halunyakisiseñi mutala wa Pitrosi obonisa kuli naasika zwafa. Kuziba kuli Jesu naamubonisize mukekecima kusina taba ni bufokoli bwahae, kwakona kulutusa kuzwelapili kusebeleza Jehova.

4. Sina mokuboniselizwe kwa Luka 5:​5-10, Pitrosi naabuleziñi ka za hae, kono Jesu naamutusize cwañi?

⁴ Bibele haibuleli libaka Pitrosi hanaabulezi kuli ‘naali muezalibi’ kamba libi zanaa ama ku zona. (Mubale Luka 5:​5-10.) Kono mwendi naaezize mafosisa amatuna. Jesu naalemuhile kuli Pitrosi naasabile, kakuli mwendi naaikutwile kuli naasaswaneli kuba ni Jesu. Kono Jesu naaziba kuli Pitrosi naakazwelapili kusepahala. Kacwalo, Jesu abulelela Pitrosi ka sishemo kuli “usike wasaba.” Jesu naanani buikolwiso bwa kuli Pitrosi naakona kucinca mi taba yeo neicincize bupilo bwahae. Hasamulaho, Pitrosi ni munyanaa hae Andreasi batuhela pisinisi yabona ya kuyamba mi baswalisana ni Jesu mwa musebezi wa kukutaza. Katulo yene baezize nei batahiselize limbuyoti zeñata.—Mare. 1:​16-18.

5. Ki limbuyoti mañi zanaafumani Pitrosi kabakala kufelisa sabo yanaanani yona ni kuamuhela memo ya Jesu?

⁵ Pitrosi naaikozi lika zeñata kabakala kuba mulateleli wa Kreste. Naaiponezi Jesu hafolisa bakuli, kuleleka madimona, mane ni kuzusa bane bashwile. b (Mat. 8:​14-17; Mare. 5:​37, 41, 42) Pitrosi hape naaboni pono yemakaza yenebonisa buikalabelo bwanaakaba ni bona Jesu kwapili hanaaka busa sina Mulena wa Mubuso wa Mulimu, mi kezahalo yeo neiamile hahulu bupilo bwahae. (Mare. 9:​1-8; 2 Pit. 1:​16-18) Kaniti luli, Pitrosi naaboni lika zanaasike abona kambe naasika latelela Jesu. Kusina kukakanya, naabile ni tabo yetuna kabakala kuli naatuhezi kuikutwa kuli naasaswaneli kuba ni Jesu, ili nto yenetahisize kuli aiponele lika zeo kaufela!

6. Kana Pitrosi naatuhezi bufokoli bwahae honafo feela? Mutaluse.

 ⁶ Kusina taba ni lika zanaaboni Pitrosi ni zanaautwile, naasanani bufokoli. Halunyakisiseñi mitala isikai. Jesu hanaatalusize kuli naakanyandiswa ni kubulaiwa kuli bupolofita bwa mwa Bibele butalelezwe, Pitrosi amukalimela. (Mare. 8:​31-33) Pitrosi ni baapositola babañwi nebakuta-kutezi kukananisana za kuli ki mañi yomutuna mwahalaa bona. (Mare. 9:​33, 34) Fa busihu bone butatamiwa ki lizazi lanaabulailwe Jesu, Pitrosi awencula zebe ya muuna yomuñwi. (Joa. 18:10) Fa busihu bobuswana bo, Pitrosi naasabile hahulu mi alatula mulikanaa hae Jesu halaalu. (Mare. 14:​66-72) Taba yeo neitahisize kuli Pitrosi alile hahulu.—Mat. 26:75.

7. Ki musebezi mañi wanaafilwe Pitrosi Jesu hasaazusizwe kwa bafu?

⁷ Jesu naasika yubeka muapositola wahae yanaazwafile yo. Jesu hasaazusizwe kwa bafu, naafile Pitrosi kolo ya kubonisa kuli naasa mulata. Jesu naafile Pitrosi musebezi wa kulisa lingu zahae. (Joa. 21:​15-17) Pitrosi naaitukiselize kueza musebezi wanaafilwe. Naali mwa Jerusalema fa lizazi la Pentekota, mi naali yomuñwi wa batu bapili bane batozizwe ka moya okenile.

8. Ki mafosisa mañi amatuna anaaezize Pitrosi kwa Antioke?

⁸ Pitrosi niha saabile Mukreste yatozizwe, naasatokwa kulwanisa bufokoli bwahae. Pitrosi naaliteñi ka 36 C.E., Kornele, Mulicaba yanaasika ya kwa mupato hatoziwa ka moya okenile, ili taba yenebonisize kuli “Mulimu haketululi” ni kuli ba Macaba ni bona nebakona kuba mwa puteho ya Sikreste. (Lik. 10:​34, 44, 45) Hamulaho wa fo, Pitrosi akalisa kucanga ni ba Macaba, ili nto yanaasa ezangi kwamulaho. (Magal. 2:12) Nihakulicwalo, Bakreste babañwi ba Majuda nebaikutwa kuli Majuda ni ba Macaba nebasa swaneli kuca hamoho. Bakreste babañwi bane banani mubonelo wo hane batile kwa Antioke, Pitrosi atuhela kucanga ni mizwale bahae ba Macaba, mi mwendi naaezize cwalo ka kusaba kusitatalisa Bakreste ba Majuda. Muapositola Paulusi hanaaboni buipumisi bwa Pitrosi, amukalimela fapilaa batu. (Magal. 2:​13, 14) Kusina taba ni bufokoli bo, Pitrosi naasika zwafa. Ki lika mañi zenee mutusize?

9. Liñolo la Joani 6:​68, 69, libonisa cwañi kuli Pitrosi naasepahala?

⁹ Pitrosi naasepahala; kacwalo, naasika tuhelela nto ifi kamba ifi kumupaleliswa kuzwelapili kulatelela Jesu. Naabonisize kuli naasepahala nako yeñwi Jesu hanaabulezi taba yene basika utwisisa balutiwa bahae. (Mubale Joani 6:​68, 69.) Kufita kulibelela kamba kukupa Jesu kuli abataluseze zanaatalusa, babañata batuhela kumulatelela. Kono Pitrosi naasika eza cwalo. Naalemuhile kuli Jesu ki yena feela yanaanani “manzwi a bupilo bobusa feli.”

10. Jesu naabonisize cwañi buikolwiso bwa kuli Pitrosi naakacinca? (Mubone ni siswaniso.)

¹⁰ Jesu naasika yubeka Pitrosi. Fa busihu bone butatamiwa ki lizazi lanaabulailwe, Jesu naaziba kuli Pitrosi ni baapositola babañwi nebaka muyubeka. Niteñi, Jesu naabonisize buikolwiso bwa kuli Pitrosi naaka kuta ni kuzwelapili kusepahala. (Luka 22:​31, 32) Jesu naaziba kuli “moya ona walata, kono nama yafokola.” (Mare. 14:38) Kacwalo, nihaiba hamulaho wa kulatulwa ki Pitrosi, Jesu naasika yubeka muapositola wahae yo. Jesu hasaazusizwe kwa bafu naabonahezi ku Pitrosi, mi kubonahala kuli Pitrosi naali anosi ka nako yeo. (Mare. 16:7; Luka 24:34; 1 Makor. 15:5) Munahane feela taba yeo mone itiiselize  Pitrosi yanaaikutwa bumaswe kabakala lika zanaaezize!

11. Jesu naakolwisize cwañi Pitrosi kuli Jehova naaka mubabalela?

¹¹ Jesu naakolwisize Pitrosi kuli Jehova naaka mubabalela. Jesu yanaazusizwe kwa bafu naaezize makazo yeñwi kuli Pitrosi ni baapositola babañwi bafumane litapi. (Joa. 21:​4-6) Kusina kukakanya, makazo yeo neikolwisize Pitrosi kuli Jehova naaka mutusa kufumana lika za kwa mubili zanaatokwa. Mwendi muapositola yo naahupuzi manzwi anaabulezi Jesu a kuli Jehova ukababalela batu ‘bababata pili Mubuso.’ (Mat. 6:33) Lika zeo kaufela nelitusize Pitrosi kuunga musebezi wa kukutaza kuba wa butokwa hahulu mwa bupilo bwahae kufita musebezi wa bundui. Naakutalize ka bundume fa lizazi la Pentekota ya 33 C.E., mi naatusize batu babañata-ñata kuamuhela taba yende. (Lik. 2:​14, 37-41) Mi hasamulaho, atusa Masamaria ni ba Macaba kuamuhela Kreste. (Lik. 8:​14-17; 10:​44-48) Kaniti luli, Jehova naaitusisize Pitrosi ka nzila yeipitezi kutusa batu ba mufuta kaufela kutaha mwa puteho.

12. Mutala wa Pitrosi ukona kulutusa cwañi haiba lusweli kuikataza kutuhela bufokoli bobuñwi bose lubile ni bona ka nako yetelele?

¹² Jehova wakona kulutusa kuli lusike lwazwafa. Kukona kulubela taata kuzwelapili kuitiisa, sihulu haiba lusweli kuikataza kutuhela bufokoli bobuñwi bose lubile ni bona ka nako yetelele. Fokuñwi, kukona kubonahala inge kuli bufokoli bwaluna ki bobutuna hahulu kufita bwanaanani bona Pitrosi. Kono Jehova wakona kulufa maata kuli lusike lwazwafa. (Samu 94:​17-19) Ka mutala, muzwale yomuñwi naali wa kalombe ka lilimo zeñata pili asika ituta kale niti. Naacincize mupilelo wahae ka kutala, mi akala kupila ka likuka za mwa Bibele. Nihakulicwalo, fokuñwi naakatazwanga ki litakazo zemaswe. Ki lika mañi zenee mutusize kusazwafa? Utalusa kuli: “Jehova wanifanga maata.” Uekeza kuli: “Ka tuso ya moya wa Jehova . . . , niitutile kuli kwakonahala [kuzwelapili] kupila ka nzila yemutabisa . . . Jehova uzwezipili kuitusisa na, mi kusina taba ni bufokoli bwaka, uzwelapili kunitiisa.”

13. Sina mokuboniselizwe kwa Likezo 4:​13, 29, 31, lukona kulikanyisa cwañi mutala wa Pitrosi? (Mubone ni siswaniso.)

¹³ Sina moluitutezi, Pitrosi naaezize mafosisa amatuna kabakala kusaba batu. Kono Pitrosi hasaalapezi kuli afiwe maata, naakonile  kubonisa bundume. (Mubale Likezo 4:​13, 29, 31.) Ni luna lwakona kufelisa sabo yaluna. Halunyakisiseñi zeneezahezi ku muzwale yabizwa Horst, yanaapila kwa Germany ka nako ya Ndwa ya Lifasi Yabubeli inzaa sali yomunca. Bakeñisa sineneketo yanaakopana ni yona kwa sikolo, naaswalisananga ni babañwi kubulela kuli “Hitler Uyoye!” Bashemi ba Muzwale Horst nebasika muhalifela, kono nebalapezi ku Jehova kumukupa kuli amufe bundume. Ka tuso ya bashemi bahae ni ka kuitinga ku Jehova, Muzwale Horst naakonile kuba ni maata anaa mutusize kueza zelukile. Hasamulaho, naabulezi kuli: “Jehova naasika niyubeka.” c

14. Balisana babalilato bakona kutusa cwañi babazwafile?

¹⁴ Jehova ni Jesu habana kuluyubeka. Pitrosi hasaalatuzi Jesu, naatokwa kueza katulo ya butokwa. Kana naakatuhela kuba mulutiwa wa Jesu kamba kana naakazwelapili? Jesu naalapezi ku Jehova kukupa kuli tumelo ya Pitrosi isike yafela. Jesu naabulelezi Pitrosi ka za tapelo yeo, mi naabonisize buikolwiso bwa kuli hasamulaho Pitrosi naakatiisa mizwale bahae. (Luka 22:​31, 32) Munahane feela mwanaatiiselizwe Pitrosi hanaahupuzi manzwi a Jesu! Halutokwa kueza katulo ya butokwa, Jehova wakona kuitusisa baana-bahulu baba luisa pilu kuli balutuse kuzwelapili kusepahala. (Maef. 4:​8, 11) Muzwale yabizwa Paul yasaasebelize sina muuna-muhulu ka nako yetelele, uikatazanga kuomba-omba babañwi. Ukupanga batu babaikutwa kuzwafa kuli bahupule mo Jehova naabahohezi mwa niti. Kihona abakolwisa kuli Jehova haana kubayubeka kabakala lilato lahae lelisa feli. Ubulela kuli: “Niboni  batu babañata bane bazwafile habazwelapili kusebeleza Jehova ka tuso yahae.”

15. Mutala wa Pitrosi ni wa Muzwale Horst ubonisa cwañi buniti bwa manzwi a kwa Mateu 6:33?

¹⁵ Sina feela Jehova mwanaatuselize Pitrosi ni baapositola babañwi kufumana lika zene batokwa kwa mubili, ni luna uka lutusa kufumana zelutokwa kwa mubili ibile feela lubeya bukombwa mwa sibaka sapili. (Mat. 6:33) Hamulaho wa Ndwa ya Lifasi Yabubeli, Muzwale Horst yabulezwi kwamulaho, alela kuunga bupaina. Nihakulicwalo, muzwale yo naashebile hahulu, mi naakakanya ka za haiba naakafumana zanaatokwa kuli azwelepili kuba mwa sebelezo ya nako kaufela. Ki lika mañi zanaaezize? Naaikatulezi kuyanga mwa bukombwa sunda yeo kaufela yene bapotelwa ki muokameli wa mupotoloho, kuli abone haiba Jehova naaka mubabalela. Kwa mafelelezo a sunda yeo, Muzwale Horst naakomokile hahulu, muokameli wa mupotoloho hanaa mufile ingilopu, kono naasika mutaluseza kone izwa. Nekunani mwateñi masheleñi amañata anaakona kuitusisa ka likweli zeñata inzaa eza bupaina. Mpo yeo neikolwisize Muzwale Horst kuli Jehova naaka mubabalela. Mi naabeile za Mubuso mwa sibaka sapili mwa bupilo bwahae kaufela.—Mala. 3:10.

16. Ki kabakalañi hakuli kwa butokwa kuituta kwa mutala wa Pitrosi ni kwa litaba zanaañozi?

¹⁶ Kaniti luli, Pitrosi naabile ni tabo yetuna kabakala kuli Jesu naasika zwa ku yena sina mwanaa kupezi ka nako yeñwi! Kreste naazwezipili kuluta Pitrosi kuli abe muapositola yasepahala ni kuli atomele Bakreste mutala omunde. Mi kaufelaa luna luituta litaba zeñata za butokwa kwa tuto yanaafilwe Pitrosi. Pitrosi naañozi zeñwi za lituto zeo ni litaba zeñwi mwa mañolo amabeli anaasusumelizwe kuñolela liputeho za mwa linako za baapositola. Mwa taba yetatama, lukanyakisisa likupuliso lisikai ze mwa mañolo ao ni molukona kulisebeliseza kacenu.