Kana Mwaziba?
Ki kabakalañi hane kunani bazwahule mwa mpi ya Mulena Davida?
MWA mpi ya Davida nekunani bazwahule bane bali lindwalume babacwale ka Zeleki wa Muamoni, Uria wa Muhiti, ni Itima wa Mumoabi. a (1 Makol. 11:39, 41, 46) Mwa mpi ya Davida hape nekunani “Makereti, Mapeleti, ni Magiti.” (2 Sam. 15:18) Kubonahala kuli Makereti ni Mapeleti neli bahabo Mafilisita. (Ezek. 25:16) Mi Magiti nebasimuluha mwa muleneñi wa Gati wa Mafilisita.—Josh. 13:2, 3; 1 Sam. 6:17, 18.
Ki kabakalañi Davida hanaalumelelize bazwahule kuba mwa mpi yahae? Kakuli naanani buikolwiso bwa kuli nebasepahala ku yena, mi sa butokwa nikufita kikuli, nebasepahala ku Jehova. Ka mutala, buka yeñwi yebizwa The New Interpreter’s Dictionary of the Bible, neibulezi ka za Makereti ni Mapeleti kuli: “Nebazwezipili kusepahala ku Davida hanaakopana ni miinelo yetaata hahulu ka nako yanaabusa sina mulena.” Nebaezize cwañi cwalo? “Baana kaufela ba Maisilaele” hane basiile Mulena Davida ni kulatelela “muuna wa sikatazi yabizwa Sheba,” Makereti ni Mapeleti nebazwezipili kukumalela Davida ni kutusa kuli Sheba apalelwe kupeta mulelo wahae omaswe. (2 Sam. 20:1, 2, 7) Nako yeñwi, Adonija mwanaa Mulena Davida naabatile kuikeza mulena mwa sibaka sa Salumoni. Kono Makereti ni Mapeleti nebazwezipili kusepahala ku Davida mi nebatusize kubeya Salumoni fa bulena, yena yanaaketilwe ki Jehova.—1 Mal. 1:24-27, 38, 39.
Muzwahule yomuñwi yanaazwezipili kusepahala hahulu ku Davida neli Itai wa Mugiti. Itai ni baana bahae ba 600 bane bali lindwalume, nebatusize Mulena Davida ka nako yanaakwenuhezwi ki Abisalomi mwanaa hae yanaahapile lipilu za Maisilaele kuli bafetuhele mulena. Davida naataluselize Itai kuli naasaswaneli kuikenya mwa ndwa yeo bakeñisa kuli naali muzwahule. Kono Itai ali: “Ka Jehova yapila, ni ka wena mulena muñaaka yapila, kwakaya mulena muñaaka kaufela, ibe kuli ukayo shwela kwateñi kamba ukapila, mutangaa hao ni yena ukaba kwateñi!”—2 Sam. 15:6, 18-21.
Itai naasepahala ku Davida, yena mulena yanaatozizwe ki Jehova
Nihaike kuli Makereti, Mapeleti, ni Magiti neli bazwahule, nebalemuhile kuli Jehova neli yena Mulimu wa niti, ni kuli Davida naali mutoziwa wahae. Kaniti luli, Davida naaitebuhile hahulu kuba ni baana bane basepahala bao kwa lineku lahae!
a Mulao wa Mulimu o kwa Deuteronoma 23:3-6 neuhanisa Maamoni ni Mamoabi kukena mwa puteho ya Isilaele. Nihakulicwalo, kubonahala kuli mulao wo neusa balumelezi kuba bayahi ba naha babalumelelizwe ka mulao ni kuikola litukelo kaufela zene banani zona Maisilaele, kono nebakona kuswalisana ni Maisilaele kamba kupila ni bona. Mubone buka ya Insight on the Scriptures, Volyumu 1, like. 95.
