1. Paradaisi ya kwa moya ki nto mañi, mi luswanela kuikatulela kuezañi?

 KUNANI paradaisi ya swanisezo fa lifasi kacenu, ili mokunani batu babañata babapatehile kueza lika zende. Mwa paradaisi yeo kufumaneha batu babañata hahulu, ili babaikola kozo ya luli. Batu baba mwa paradaisi yeo, baikatulezi kuli habana kuzwa mwateñi. Hape babata kutusa batu babañata ka mokukonahalela kaufela kuli bato swalisana ni bona. Paradaisi yeo ki nto mañi? Ki paradaisi ya kwa moya! a

2. Ki lika mañi zekomokisa ka za paradaisi ya kwa moya?

² Kwa komokisa kuli Jehova ulukisize sibaka sa swanisezo, ili mo batu bahae bapilisana ka kozo ni swalisano kusina taba kuli bapila mwa lifasi la Satani mokunani hahulu sitoyo, bumaswe, ni lika zesabisa. (1 Joa. 5:19; Sin. 12:12) Mulimu waluna yalilato wabona bumaswe bobuatile mwa lifasi le ni mobuamela batu, mi usileleza batanga bahae ilikuli bazwelepili kumusebeleza ka tabo. Linzwi lahae litalusa paradaisi ya kwa moya yeo kuli ki “sisabelo” sesinde ni “simu yenani mezi amañata.” (Isa. 4:6; 58:11) Ka tuso ya Jehova, batu baba mwa paradaisi yeo banani tabo mi baikutwa kusilelezwa mwa mazazi a mafelelezo ataata a.—Isa. 54:14; 2 Tim. 3:1.

3. Isaya kauhanyo 65 neitalelelizwe cwañi kwamulaho?

³ Ka kuitusisa mupolofita Isaya, Jehova naatalusize mone bukabela bupilo bwa batu bane bakapila mwa paradaisi ya kwa moya. Mwakona kufumana litaba zeo kwa Isaya kauhanyo  65, ili yenetalelelizwe lwapili mwa silimo sa 537 B.C.E. Ka nako yeo, Majuda bane babakile nebalukuluzwi mwa buhapiwa mwa Babilona mi nebakutezi kwa naha yahabo bona. Jehova naafuyauzi batu bahae ni kubatusa kulukisa sinca muleneñi wa Jerusalema one usinyehile ni kuyaha sinca tempele ya ona, sona sibaka kone kulapelelwa Jehova ka nzila yelukile mwa Isilaele.—Isa. 51:11; Zak. 8:3.

4. Liñolo la Isaya kauhanyo 65 lisweli kutalelezwa cwañi mwa linako zaluna?

⁴ Bupolofita bobu kwa Isaya nebukalile kutalelezwa lwabubeli ka 1919 C.E., batu ba Jehova ba mwa linako zaluna hane balukuluzwi mwa buhapiwa ku Babilona Yomutuna. Hasamulaho, paradaisi ya kwa moya yakala kuyanduluka mwa lifasi kaufela. Bashaeli ba Mubuso babanani tukufalelo nebatomile liputeho zeñata ni kubonisa tulemeno twa Sikreste. Baana ni basali bane babanga ba mifilifili ni bane bapila ka muzamao wa buhule “[nebaapezi] butu bobunca bone bubupilwe ka kulikana ni tato ya Mulimu.” (Maef. 4:24) Niti kikuli, buñata bwa limbuyoti zenetalusizwe ki Isaya, likatalelezwa ka kutala kwapili mwa lifasi lelinca. Kono nihaiba ka nako ya cwale, kunani limbuyoti zeñata zeluikola. Halunyakisiseñi molutusezwa kabakala kuba mwa paradaisi ya kwa moya, ni libaka halusa swaneli kuzwa mwateñi.

LIMBUYOTI ZEBAIKOLA BATU BABA MWA PARADAISI YA KWA MOYA

5. Sina mone kusepiselizwe kwa Isaya 65:​13, ki lika mañi zeluikola mwa paradaisi ya kwa moya?

⁵ Kufepiwa hande hahulu ni kukatuluswa. Bupolofita bwa Isaya bubonisa shutano yetuna ye mwahalaa bupilo bobapila batu baba mwa paradaisi ya kwa moya ni bobapila batu babasiyo mwateñi. (Mubale Isaya 65:13.) Jehova ufanga batanga bahae lika kaufela zebatokwa kuli bazwelepili kumusebeleza. Ulufile moya wahae okenile, Linzwi lahae, ni lico zeñata za kwa moya kuli ‘luce, lunwe, ni kunyakalala.’ (Mubapanye Sinulo 22:17.) Ka kushutana, batu babasiyo mwa paradaisi ya kwa moya bona ‘balapa, bashwa linyolwa, mi baswabile.’ Habana silikani sesinde ni Mulimu.—Amo. 8:11.

6. Liñolo la Joele 2:​21-24 litalusa cwañi lico zaluna za kwa moya, mi lico zeo likona kulutusa cwañi?

⁶ Mwa bupolofita bwahae, Joele naaitusisize lico zecwale ka bubeke, waine, ni oli ya olive kuli abonise kuli Jehova ufanga batu bahae lika zebatokwa, kukopanyeleza cwalo ni lico za kwa moya. (Joe. 2:​21-24) Uezanga cwalo ka kuitusisa Bibele ni lihatiso zaluna zetomile fa Bibele, webusaiti yaluna, hamohocwalo ni mikopano ya puteho, ya mupotoloho, ni yemituna. Lwakona kuca lico za kwa moya zeo zazi ni zazi, mi kueza cwalo kukona kutahisa kuli luikutwe kuli lwafepiwa hande hahulu ni kukatuluha.

7. Ki lika mañi zetahisa kuli lube ni ‘buiketo mwa lipilu zaluna’? (Isaya 65:14)

⁷ Kuba ni tabo yetuna. Batu ba Mulimu bakona ‘kuhuweleza ka tabo’ kabakala kuli baitebuha lika kaufela zabaezeza Jehova. (Mubale Isaya 65:14.) Litaba za niti ni lisepiso zeomba-omba ze mwa Linzwi la Mulimu, ni sepo yaluna yetiile yetomile fa sitabelo sa tiululo sa Kreste, litahisa kuli lube ni ‘buiketo mwa lipilu zaluna.’ Kuikambota litaba zeo ni mizwale ni likaizeli baluna, kulutahisezanga tabo yetuna.—Samu 34:8; 133:​1-3.

8. Ki lifi limbuyoti zepeli za butokwa hahulu zebaikola batu baba mwa paradaisi ya kwa moya?

⁸ Limbuyoti zepeli za butokwa hahulu zebaikola batu baba mwa paradaisi ya kwa moya, ki lilato ni swalisano ze mwahalaa batu ba Jehova. Swalisano yetuna yeo, ilutusa kuziba mobuka bela bupilo mwa lifasi  lelinca, ili mo batanga ba Jehova bakalatana hahulu ni kuswalisana, kufita mobaezeza kacenu. (Makolo. 3:14) Kaizeli yomuñwi utalusa zanaalemuhile ka za batu ba Jehova hanaakopani ni bona lwapili, uli: “Nenisa zibi kuli kuba yatabile kucwañi, mane nihaiba mwa lubasi lwahesu. Lwapili kubona molibonisezwa lilato neli mwahalaa Lipaki za Jehova.” Mutu kaufela yabata kuba ni tabo ya luli, uswanela kutaha mwa paradaisi ya kwa moya. Batanga ba Jehova banani libubo lelinde ni Jehova ni baba mulapela kaufela kusina taba ni moba baangela batu ba mwa lifasi le.—Isa. 65:15.

9. Liñolo la Isaya 65:​16, 17, lisepisa kuli kukaezahalañi kwa manyando elukopana ni ona?

⁹ Kuwa pilu ni kusa ikalelwa. Isaya 65:14 ibulela kuli batu babaikatulela kuba kwande a paradaisi ya kwa moya ‘balila kabakala kuutwa butuku kwa lipilu zabona mi babokolola kabakala kulobeha lipilu.’ Kono ki lika mañi zekaezahala kwa lika kaufela zetahiseza batu ba Mulimu butuku ni manyando? Hamulaho wa nako, lika zeo ‘likalibalwa ni kupatelwa meeto a Mulimu.’ (Mubale Isaya 65:​16, 17.) Jehova ukafelisa miinelo yetaata kaufela yelukopana ni yona, mi hasamulaho haluna nihaiba kuhupula manyando elukopana ni ona cwale.

10. Ki kabakalañi hamuikutwa kuli ki tohonolo kuswalisana ni mizwale ni likaizeli bamina? (Mubone ni siswaniso.)

¹⁰ Nihaiba ka nako ya cwale, luikutwanga kulukuluha haluli kwa mikopano ya Sikreste, mi haluikalelwangi kamba kuisa pilu kwa manyando elukopana ni ona mwa lifasi lelimaswe le. Hape lwakona kutusa mizwale ni likaizeli baluna kuikutwa kulukuluha haluba ni lilato, tabo, kozo, sishemo, ni bunolo, ili tulemeno totuli kalulo ya muselo wa moya wa Mulimu. (Magal. 5:​22, 23) Kaniti luli, ki tohonolo yetuna kuswalisana ni kopano ya Mulimu! Batu babazwelapili kuba mwa paradaisi ya kwa moya, bakaiponela sepiso ya Mulimu haika talelezwa ka kutala, yona ya kueza “mahalimu amanca ni lifasi lelinca.”

11. Ka kuya ka Isaya 65:​18, 19, luswanela kuikutwa cwañi kabakala kuba mwa paradaisi ya kwa moya?

¹¹ Kuitumela ni kunyakalala. Isaya uzwelapili kutalusa libaka haluswanela ‘kuwabelwa ni kunyakalala’ mwa paradaisi ya kwa moya. Jehova ki yena yalukisize paradaisi ya swanisezo yeo. (Mubale Isaya 65:​18, 19.) Ki lona libaka haitusisa luna kutusa batu kuzwa mwa likopano za lifasi le, zesaluti niti ka za Mulimu, ni kubatusa kutaha mwa paradaisi yaluna yende ya swanisezo. Limbuyoti zeluikola kabakala kuba mwa niti, lilutahiseza tabo mi  lunani takazo yetuna ya kutaluseza babañwi ka za teñi.—Jer. 31:12.

12. Muikutwa cwañi ka za lisepiso zebulezwi kwa Isaya 65:​20-24, mi ki kabakalañi?

¹² Hape lwaitumela ni kunyakalala kabakala sepo yelunani yona bakeñisa kuba mwa paradaisi ya kwa moya. Munahane feela ka za lika kaufela zeluka bona ni kueza mwa lifasi lelinca la Mulimu! Bibele isepisa kuli: ‘Hakusana kufumaneha mbututu yepila mazazi amanyinyani feela, kamba muuna-muhulu yapalelwa kufeleleza mazazi a bupilo bwahae. Lukayaha mandu ni kupila mwateñi, mi lukacala masimu a likota za veine ni kuca miselo yazona. Haluna kuikataza feela lusafumani sesiñwi, kakuli lukafuyaulwa ki Jehova.’ Ulusepisa kuli lukaba mwa buiketo mi lukaikola bupilo. Ukaziba zatokwa mañi ni mañi pili ‘asika biza kale,’ mi ‘ukakulisa takazo ya zepila kaufela.’—Isa. 65:​20-24; Samu 145:16.

13. Isaya 65:25 italusa cwañi licinceho zebaezanga batu mwa bupilo bwabona habakala kusebeleza Jehova?

¹³ Kuba mwa kozo ni kusilelezwa. Ka kutusiwa ki moya wa Mulimu, batu babañata bane bali ba mifilifili, bane banani buhali, kamba bane basasepahali bakonile kueza licinceho zetuna mwa bupilo bwabona. (Mubale Isaya 65:25.) Basebelize ka taata kuli batuhele mikwa yemaswe yene banani yona. (Maro. 12:2; Maef. 4:​22-24) Kono niti kikuli, batu ba Mulimu habasika petahala; kacwalo, lukazwelapili kueza mafosisa. Nihakulicwalo, Jehova uswalisanisize “batu ba mufuta kaufela,” mi ubatusize kulatana hahulu ni kupilisana ka kozo. (Tite 2:11) Yeo ki makazo luli, mi Mulimu Yamaata Kaufela ki yena feela yakona kueza cwalo!

14. Manzwi a kwa Isaya 65:25 naatalelelizwe cwañi ku muzwale yomuñwi?

¹⁴ Kana batu bakona luli kucinca butu bwabona? Halunyakisiseñi mutala wo. Mucaha yomuñwi hatokwanisanga lilimo ze 20, naasaabile mwa tolongo hañata-ñata mi naaikenyize hahulu mwa muzamao wa buhule ni mifilifili. Naatamezwi milatu ye cwale ka busholi bwa limota, bwa mwa miyaho, ni milatu yemiñwi yemituna. Naaitukiselize kulwana ni mutu ufi kamba ufi. Hanaaitutile niti ya mwa Bibele lwapili ni kukala kufumaneha kwa mikopano ya Lipaki za Jehova, naakozwi kuli naafumani nto ya butokwa hahulu mwa bupilo, yona ya kuba mwa paradaisi ya kwa moya. Hasaakolobelizwe sina yomuñwi wa Lipaki za Jehova, hañata naanahanisisanga mo liñolo la Isaya 65:25 neli talelelizwe ku yena. Pili naabanga wa mifilifili sina tau, kono naacincize ni kuba mutu wa kozo sina ngu.

15. Ki kabakalañi halubata kumema batu kuli batahe mwa paradaisi ya kwa moya, mi lukona kueza cwañi cwalo?

¹⁵ Isaya 65:13 ikala ka manzwi ali: “Jehova Mulena Yapahami ka Kufitisisa, sabulela ki se.” Timana 25 ifela ka manzwi ali, “kubulela Jehova.” Manzwi ahae atalelezwanga kamita. (Isa. 55:​10, 11) Paradaisi ya kwa moya iteñi ka nako ya cwale. Jehova utahisize kuli kube ni lubasi lwa kwa moya loluipitezi. Kabakala kuli lu mwa lubasi lo, lunani kozo yetuna ka nako ya cwale mi luikutwa kusilelezwa mwa lifasi lelitezi mifilifili le. (Samu 72:7) Kabakaleo, lubata kutusa batu babañata hahulu kuli bato swalisana ni lubasi lwaluna lwa kwa moya. Lukona kueza cwalo ka kuisa pilu kwa musebezi wa kuluta batu kuba balutiwa.—Mat. 28:​19, 20.

MOLUKONA KUTUSEZA BABAÑWI KULI BATAHE MWA PARADAISI YA KWA MOYA

16. Ki lika mañi zekona kutusa batu kutaha mwa paradaisi ya kwa moya?

¹⁶ Mañi ni mañi waluna unani buikalabelo bobutuna bwa kutusa babañwi kuli batahe  mwa paradaisi ya kwa moya. Lwakona kupeta buikalabelo bwaluna haiba lulikanyisa Jehova. Hahapelezangi batu kutaha mwa kopano yahae. Kono ‘ubahohelanga’ ku yena ka lilato. (Joa. 6:44; Jer. 31:3) Batu ba lipilu zende habaituta za tulemeno twa Jehova totunde ni butu bwahae, basusuezwanga kutaha ku yena. Kuba ni tulemeno totunde ni mikwa yeminde, kukona kutusa cwañi batu kutaha mwa paradaisi ya kwa moya?

17. Lukona kutusa cwañi babañwi kuli batahe mwa paradaisi ya kwa moya?

¹⁷ Kubonisa mizwale ni likaizeli baluna lilato ni sishemo ki yeñwi ya linzila zelukona kutusa ka zona batu kutaha mwa paradaisi ya kwa moya. Lubata kuli batu babataha lwapili kwa mikopano ya puteho baikutwe sina mone baikutwezi batu bane basi balumeli, ili bao mwendi nebayanga kwa mikopano mwa Korinte wa kwaikale. Nebabulezi kuli: “Kaniti Mulimu uteñi mwahalaa mina.” (1 Makor. 14:​24, 25; Zak. 8:23) Kacwalo, luswanela kuzwelapili kusebelisa kelezo yeli, “mupilisane ka kozo.”—1 Mates. 5:13.

18. Ki lika mañi zekona kutusa batu kutaha mwa kopano yaluna?

¹⁸ Luswanela kuzwelapili kuunga mizwale ni likaizeli baluna sina mwabaangela Jehova. Lukona kueza cwalo ka kuisa pilu kwa tulemeno twabona totunde isiñi kwa bufokoli bwabona, ili bobuka feliswa nako yeñwi. Lwakona kutatulula butata bobukona kuba mwahalaa luna ka lilato haiba luzwelapili ‘kubonisana sishemo, kuba ni mukekecima, inze luswalelana ka pilu kaufela.’ (Maef. 4:32) Haiba lueza cwalo, lukatusa batu bababata kuboniswa lilato lelicwalo kutaha mwa paradaisi ya kwa moya. b

 MUZWELEPILI KUBA MWA PARADAISI YA KWA MOYA

19. (a) Sina mokuboniselizwe mwa mbokisi yeli, “ Nebazwile mi Sebakuta,” ki lika mañi zebabulezi batu hamulaho wa kukutela mwa paradaisi ya kwa moya? (b) Luswanela kuikatulela kuezañi? (Mubone ni siswaniso.)

¹⁹ Lwaitebuha hahulu paradaisi yaluna ya kwa moya! Seli yende hahulu nikufita, mi sekunani mwateñi batu babañata hahulu babalapela Jehova kufita mone kuinezi kwamulaho. Haike luzwelepili kuitebuha paradaisi yeo yalulukiselize Jehova. Mutu kaufela yabata kukatuluswa, kuba ni tabo, kusaikalelwa, ni kusilelezwa, uswanela kutaha mwa paradaisi ya kwa moya ni kuzwelapili kuba mwateñi! Kono mutokomele, kakuli Satani ueza mwakonela kaufela kulupuma kuli luzwe mwateñi. (1 Pit. 5:8; Sin. 12:9) Haluswaneli kumulumeleza kueza cwalo. Haike lueza ka taata kuli lusileleze bunde, bukeni, ni kozo, ze mwa paradaisi yaluna ya kwa moya.