1. Mizwale ni likaizeli babañwi baikutwanga cwañi ka za kukutaza ku babañwi? (Mubone ni siswaniso.)

 KA KUBA batu ba Jehova, lwakutazanga ku babañwi bakeñisa kuli lwalata Ndataa luna wa kwa lihalimu mi lubata kutusa batu babañwi kuli bamuzibe. Bahasanyi babañata baikolanga musebezi wa kukutaza. Kono babañwi bona kubabelanga taata kuba ni tabo habaeza musebezi wo. Kabakalañi? Babañwi banani hahulu maswabi mi baikutwa kuli haki baluti babande. Babañwi habaikutwangi kulukuluha kuya fa mandu a batu basika memiwa. Babañwi baikalelwanga kuli mwendi batu habana kuamuhela lushango lobakutaza. Babañwi balutilwe kuli habaswaneli kueza lika zekona kufilikanya babañwi. Kusina taba ni kuli mizwale ni likaizeli bao balata hahulu Jehova, kubabelanga taata kukutaza taba yende kwa batu bobasa zibi. Niteñi, baziba butokwa bwa musebezi wo, mi baabananga ku ona kamita. Kaniti luli, zebaeza litabisa hahulu Jehova!

2. Haiba kumibelanga taata kuba ni tabo mwa bukombwa, ki kabakalañi hamusa swaneli kuzwafa?

² Kana ni mina fokuñwi mwabanga ni maikuto ao kuli mane mwapalelwanga kuba ni tabo mwa bukombwa? Haiba ki cwalo, musike mwazwafa. Kuba ni maikuto acwalo kubonisa kuli mwaikokobeza ni kuli hamulati kuli batu baise hahulu mamelelo ku mina kamba kukananisana ni mina. Mi hakuna mutu yatabela kufilikanya babañwi sihulu haiba ubata kubatusa. Ndataa mina wa kwa lihalimu waziba hande butata bomukopana ni bona mi ubata kumitusa. (Isa. 41:13) Mwa taba ye, lukanyakisisa liakalezo zeketalizoho zekona kumitusa kufelisa maikuto ao ni lika zekona kumitusa kuba ni tabo mwa bukombwa.

MUTIISWE KI LINZWI LA MULIMU

3. Ki lika mañi zeneetusize mupolofita Jeremia kuli akutaze ku babañwi?

³ Kuzwa feela kwamulaho, lushango loluzwa ku Mulimu lutusize  batanga bahae kuba ni maata a kupeta misebezi yetaata. Halunyakisiseñi mutala wa mupolofita Jeremia. Naaikalezwi, Jehova hanaa mufile musebezi wa kukutaza. Jeremia naabulezi kuli: “Hanizibi kubulela, kakuli ni mutangana feela.” (Jer. 1:6) Ki lika mañi zenee mutusize kuba ni bundume kuli akutaze? Naatiisizwe ki manzwi anaa mubulelezi Mulimu. Jeremia naabulezi kuli: “Laba inge mulilo otuka okwalezwi mwa masapo aka, mi nenikatezi kuiswala.” (Jer. 20:​8, 9) Nihaike kuli batu banaakutaza ku bona Jeremia nebali taata, lushango lwanaafilwe kukutaza nelu mufile maata a kupeta musebezi wahae.

4. Ki lika mañi zekaezahala haiba lubala Linzwi la Mulimu ni kunahanisisa zelubala? (Makolose 1:​9, 10)

⁴ Bakreste batiiswanga ki lushango lolufumaneha mwa Linzwi la Mulimu. Muapositola Paulusi hanaañolezi puteho ya mwa Kolose, naasusuelize mizwale bahae kuba ni zibo yenepahezi, ilikuli ‘bazamaye ka mukwa oswanela Jehova’ inze bazwelapili “kubeya muselo mwa musebezi kaufela omunde.” (Mubale Makolose 1:​9, 10.) Musebezi omunde wo ukopanyeleza kukutaza taba yende. Kacwalo, halubala Linzwi la Mulimu ni kunahanisisa litaba zelubala, tumelo yaluna ku Jehova ikatiya mi luka lemuha butokwa bwa kukutaza lushango lwa Mubuso.

5. Ki lika mañi zeluswanela kueza kuli lutusiwe hahulu halubala Bibele ni kuituta yona?

⁵ Kuli lutusiwe hahulu ki Linzwi la Mulimu, luswanela kubanga ni nako yeñata ya kulibala, kuituta lona, ni kunahanisisa zelubala. Musike mwamata-mata. Haiba mufumana liñolo lemusa utwisisi hande, musike mwalitula. Kono muitusise Buka ya Lipatisiso ya Lipaki za Jehova kamba lihatiso zeñwi kuli mufumane litaba zeñata ka za timana yeo. Haiba muba ni nako yeñata ya kuituta, mukakolwa hahulu kuli zeibulela Bibele ki za niti. (1 Mates. 5:21) Kuba ni buikolwiso bobucwalo, kuka mitusa kuba ni tabo hamunze mutaluseza babañwi zemuitutile.

MUITUKISEZE HANDE PILI MUSIKAYA KALE MWA BUKOMBWA

6. Ki kabakalañi haluswanela kuitukiseza hande pili lusikaya kale mwa bukombwa?

⁶ Haiba muitukiseza hande pili musikaya kale mwa bukombwa, hamuna kuikalelwa hahulu hamuka ambola ni batu. Jesu naatusize balutiwa bahae kuitukiseza hande pili asika baluma kale mwa bukombwa. (Luka 10:​1-11) Bakeñisa kuli nebasebelisize zanaa balutile  Jesu, nebakonile kupeta lika zende zeñata mwa bukombwa mi nebabile ni tabo yetuna.—Luka 10:17.

7. Lukona kuitukiseza cwañi pili lusikaya kale mwa bukombwa? (Mubone ni siswaniso.)

⁷ Lukona kuitukiseza cwañi pili lusikaya kale mwa bukombwa? Luswanela kunahanisisa molukona kutaluseza hande litaba za niti ka manzwi aluna. Hape lukatusiwa hahulu haiba lunahanisisa lika zepeli kamba zetaalu zebakona kubulela kamba kueza batu ba mwa kalulo yaluna ya simu ni kulelela cimo zeluka eza mwa miinelo yeo. Mi haluatumela batu, luswanela kuikataza kuwa pilu, kumenya, ni kubonisa silikani.

8. Bakreste baswana cwañi ni lipiza za lizupa zanaaitusisize muapositola Paulusi mwa swanisezo yahae?

⁸ Muapositola Paulusi naaitusisize swanisezo kuli ataluse buikalabelo bwaluna mwa musebezi wa kukutaza, naaize: “Lunani bufumu bo mwa lipiza za lizupa.” (2 Makor. 4:7) Bufumu bo ki nto mañi? Ki musebezi otusa batu kufumana bupilo, ona wa kukutaza lushango lwa Mubuso. (2 Makor. 4:1) Lipiza za lizupa liyemelañi? Liyemela batanga ba Mulimu babakutazanga taba yende ku babañwi. Mwa mazazi a Paulusi, balekisi nebaitusisanga lipiza za lizupa kuli balwale lika za butokwa zecwale ka lico, waine, ni masheleñi. Ka mukwa oswana, Jehova ulufile musebezi wa butokwa hahulu, ona wa kukutaza taba yende. Ka tuso ya Jehova, lwakona kuba ni maata elutokwa kuli luzwelepili kukutaza.

MULAPELE KU JEHOVA KULI AMITUSE KUBA NI BUNDUME

9. Lukona kufelisa cwañi sabo ya kusaba batu kamba maikuto a kuli habana kuteeleza kwa lushango lwaluna? (Mubone ni siswaniso.)

⁹ Ka linako zeñwi, lwakona kukenelwa ki sabo ya kusaba batu kamba kuikalelwa kuli mwendi habana kuteeleza kwa lushango lwaluna. Lukona kufelisa cwañi butata bo? Halunyakisiseñi zene babulezi baapositola mwa tapelo hane balaezwi kuli batuhele kukutaza. Kufita kukenelwa ki sabo, nebakupile Jehova kuli abatuse “kuzwelapili kubulela linzwi [lahae] ka bundume.” Jehova naaalabile tapelo yabona honafo feela. (Lik. 4:​18, 29, 31) Haiba lukenelwa ki sabo ka linako zeñwi, ni luna luswanela kulapela ku Jehova kuli alutuse. Mukupe Jehova kuli amituse kulata hahulu batu, ilikuli mufelise sabo ya kusaba batu.

10. Jehova ulutusa cwañi kupeta buikalabelo bwaluna bwa kuba Lipaki zahae? (Isaya 43:​10-12)

 ¹⁰ Jehova uluketile kuli lube Lipaki zahae, mi usepisa kuli uka lutusa kuba ni bundume. (Mubale Isaya 43:​10-12.) Halunyakisiseñi feela linzila zeene kwa linzila zalutusanga ka zona. Nzila yapili, Jesu ubanga ni luna nako kaufela halukutaza taba yende. (Mat. 28:​18-20) Nzila yabubeli, Jehova uketile mangeloi kuli alutuse. (Sin. 14:6) Nzila yabulaalu, Jehova ulufile moya wahae okenile kuli ulutuse kuhupula lika zeluitutile. (Joa. 14:​25, 26) Nzila yabune, Jehova ulufile mizwale ni likaizeli bolukona kubeleka ni bona. Ka tuso ya Jehova ni ka tuso ya mizwale ni likaizeli baluna baba lulata, lunani lika kaufela zelutokwa kuli lukondise.

MUCINCE KA BUNOLO, MI MUBE NI MUBONELO OSWANELA

11. Ki lika mañi zekona kumitusa kufumana batu babañata hamuli mwa bukombwa? (Mubone ni siswaniso.)

¹¹ Kana mwazwafanga hamufumana batu basikai feela fa mandu? Mukaeza hande haiba muipuza kuli: ‘Batu ba mwa kalulo yaka ya simu bakai ka nako ye?’ (Lik. 16:13) ‘Kana ba kwa mubeleko kamba baizo leka lika zeñwi kwa musika?’ Haiba ki cwalo, mwendi kukutaleza mwa makululu kwakona kumitusa kufumana batu babañata. Muzwale yabizwa Joshua utalusa kuli: “Nibanga ni kolo ya kukutaza kwa batu babañata hanizamaya mwa libaka mokulekiswa lika ni mwa libaka zeñwi mokufumaneha batu babañata.” Muzwale yo ni musalaa hae, yabizwa Bridget, hape bafumananga batu babañata haba bapotela fa mandu manzibwana kamba la Sunda musihali.—Maef. 5:​15, 16.

12. Ki lika mañi zekona kulutusa kuziba zebalumela batu kamba zebabilaeza?

¹² Haiba batu hababonahali kutabela hahulu lushango lwaluna, muikataze kuziba zebalumela kamba zebabilaeza. Bo Joshua ni bo Bridget baitusisanga puzo ye fa likepe lapili la trakiti habakalisa puisano. Ka mutala, habaitusisa trakiti yeli, Muunga Cwañi Bibele? babulelanga kuli: “Batu babañwi baanga Bibele kuli ki buka yezwa ku Mulimu, kono babañwi bona haba iingi cwalo luli. Mina bo muiinga cwañi?” Kueza cwalo hañata kutahisanga kuli babe ni puisano yende.

13. Ki kabakalañi halukona kubulela kuli lukondisize mwa bukombwa nihaikaba kuli batu habalati kuteeleza kwa lushango lwaluna? (Liproverbia 27:11)

 ¹³ Nihaikaba kuli batu habateelezi halukutaza ku bona, hakutalusi kuli halusika kondisa mwa bukombwa. Kabakalañi? Kabakala kuli lufile bupaki, ili nto yabata Jehova ni Mwanaa hae kuli lueze. (Lik. 10:42) Nihaikaba kuli halufumani batu ba kukutaza ku bona kamba batu habalati kuteeleza kwa lushango lwaluna, lusakona kuba ni tabo kakuli lwaziba kuli lutabisa Ndataa luna wa kwa lihalimu.—Mubale Liproverbia 27:11.

14. Ki kabakalañi halukona kuba ni tabo muhasanyi yomuñwi hafumana mutu wa pilu yende mwa bukombwa?

¹⁴ Hape lwakona kuba ni tabo muhasanyi yomuñwi hafumana mutu wa pilu yende mwa bukombwa. Tawala ya Mulibeleli yeñwi neibapanyize musebezi waluna kwa musebezi wa kubata mwanana yalatehile. Batu babañata bakona kutusa mwa musebezi wa kubata mwanana yo mwa libaka zeshutana-shutana. Mwanana yo hafumanwa, haki mutu feela yamufumani yakaba ni tabo, kono batu kaufela bane batusize mwa musebezi wo bakaba ni tabo. Ka mukwa oswana, batu kaufela mwa puteho batusanga kuli mutu abe mulutiwa wa Jesu. Kalulo ya simu ya puteho ikona kukwahelwa ki batu babañata, mi kaufelaa bona batabanga mutu wa pilu yende hakala kufumaneha kwa mikopano.

MULATE HAHULU JEHOVA NI BATU BABAÑWI

15. Kusebelisa litaba ze kwa Mateu 22:​37-39 kukona kulutusa cwañi kutukufalelwa hahulu mwa bukombwa? (Mubone ni siswaniso.)

¹⁵ Lukatukufalelwa hahulu mwa musebezi wa kukutaza haiba lulata hahulu Jehova ni batu babañwi. (Mubale Mateu 22:​37-39.) Munahane feela tabo yetuna yabanga ni yona Jehova halubona inze lueza musebezi wo, ni tabo yetuna yebakaba ni yona batu habaka kalisa kuituta Bibele! Hape muhupule kuli batu babateeleza kwa lushango lwaluna ni kuikatulela kusebeleza Jehova bakona kupila kuya kuile.—Joa. 6:40; 1 Tim. 4:16.

16. Lukona kuba cwañi ni tabo mwa bukombwa haiba muinelo olukopana ni ona ulupaleliswa kuzwa fa lapa? Mufe mitala.

¹⁶ Kana kunani muinelo omuñwi omukopana ni ona omipaleliswa kuzwa fa lapa? Haiba ki cwalo, muise pilu kwa lika zemukona kueza kuli mubonise kuli mwalata Jehova ni batu babañwi. Muzwale yabizwa Samuel ni musalaa  hae wa libizo la Dania, nebasa koni kuzwa fa lapa kabakala butuku bobuyambukela bwa COVID-19. Ka nako yetaata yeo, nebakutazanga kamita ka kuitusisa foni, ni ka kuñola mañolo, mi nebazamaisanga lituto za Bibele ka kuitusisa Zoom. Muzwale Samuel naakutazanga kwa batu banaakopananga ni bona kwa kapatela kwanaafiwa likalafo za kansa. Utalusa kuli: “Halukopana ni manyando lwakona kuikutwa kukatala mwa munahano ni kwa mubili, mi kukona kulubela taata kueza lika za kwa moya. Lutokwa kuba ni tabo halunze lusebeleza Jehova.” Ka nako yene bakopana ni miinelo yetaata yeo, Kaizeli Dania awa, mi naasakoni kuzamaya ka likweli zetaalu. Hasamulaho, naanani kuitusisa sipula sa mawili ka likweli ze 6. Utalusa kuli: “Neniezize lika kaufela zene nikona kueza kulikana ni muinelo one nili ku ona. Nenikonile kukutaza ku nasi yanaa tilo nilekula, mi nenikutazanga ni kwa batu bane batisanga lika kwa ndu. Hape nenibanga ni lipuisano zende ni musali yanaabeleka kwa kampani kone kulekiswa lika za kuitusisa kwa sipatela.” Nihaike kuli Muzwale Samuel ni musalaa hae Dania nebasa koni kueza zeñata sina kwamulaho, nebaezize zene bakona kulikana ni muinelo one bali ku ona mi nebabile ni tabo.

17. Ki lika mañi zemuswanela kueza kuli mutusiwe hahulu ki liakalezo zefilwe mwa taba ye?

¹⁷ Liakalezo zefilwe mwa taba ye, likona kusebeza hande haiba muitusisa zona kaufela. Akalezo ni akalezo ikona kuswanisezwa kwa nto ni nto yetokwa kuitusiswa hakulukiswa sico. Haiba lika zeo kaufela liitusiswa, sico sesika lukiswa sikatabusa luli. Haiba lusebelisa liakalezo kaufela zefilwe, lukakona kufelisa maikuto akona kuluzwafisa mi lukaba ni tabo yetuna mwa bukombwa.