Kana mubalile ka tokomelo limagazini za Tawala ya Mulibeleli za silimo se? Hamubone nji mwakona kualaba lipuzo zelatelela:

Ki mutala mañi walutomezi Jehova wa moluswanela kuungela basali?

Haaketululangi basali, mi haangi baana kuba ba butokwa hahulu kufita basali. Mulimu wateelezanga kwa basali, waisa pilu kwa maikuto abona ni kwa lika zebabilaeza. Mi usepile basali ka kubafa tohonolo ya kueza musebezi wahae.—w24.01, make. 15-16.

Lukona kusebelisa cwañi kelezo ye kwa Maefese 5:​7, yeli: “Musike mwaswalisana ni bona”?

Muapositola Paulusi naalulemusa kuli haluswaneli kuswalisana ni batu babakona kutahisa kuli kulubele taata kupila ka kulumelelana ni likuka za Mulimu. Lukona kuswalisana ni batu babamaswe ka kutanda nako ni bona pata ka pata kamba ka kuitusisa mawebusaiti a kulumelana ka ona litaba.—w24.03, make. 22-23.

Luswanela kuisileleza kwa litaba mañi za buhata?

Luswanela kutokomela litaba zesina hande bupaki zezwa kwa mizwale ni likaizeli baluna, litaba zene lusalibeleli ili zelumilwe ka kapangaliko ki batu bolusa zibi, ni litaba zebabulela bakwenuheli babaipumisa kuli batabela kuituta niti.—w24.04, like. 12.

Ki lika mañi zeluziba ni zelusa zibi ka za mo Jehova akaatulela Mulena Salumoni hamohocwalo ni batu bane bashwile muleneñi wa Sodoma ni wa Gomora hauyundiswa ni ka nako ya Muunda?

Halukoni kubulela ka buikolwiso kuli Jehova naaatuzi kuli batu bao bayundiswe kuya kuile. Nihakulicwalo, lwaziba kuli waziba litaba kaufela ni kuli unani sishemo sesituna.—w24.05, make. 3-4.

Pulelo ya kuli Mulimu “ki yena Licwe” ilutusa kuba ni buikolwiso mañi? (Deut. 32:4)

Lwakona kusabela ku Jehova. Waitingwa, mi kamita watalelezanga lisepiso zahae. Mi hacinci, hacincangi butu bwahae ni mulelo wahae.—w24.06, make. 26-28.

Ki lika mañi zekona kumitusa hamututela mwa puteho isili?

Muitinge ku Jehova, mi uka mitusa sina feela mwanaatuselize batanga bahae kwamulaho. Musike mwabapanya puteho yene muswalisana ni yona kwamulaho kwa puteho yenca. Mutuse mwa misebezi ya puteho, mi muitame bulikani ni babañwi mwa puteho.—w24.07, make. 26-28.

Luitutañi kwa linguli zetaalu ze kwa Mateu 25?

Nguli ya lingu ni lipuli ikoñomeka butokwa bwa kusepahala. Nguli ya basizana babanani kutwisiso ni ba likuba ikoñomeka butokwa bwa kuitukiseza ni kutona. Mi nguli ya litalenta ikoñomeka butokwa bwa kubeleka ka taata ni ka tukufalelo.—w24.09, make. 20-24.

Malibela a tempele ya Salumoni neli amatelele cwañi?

Kwa 2 Makolonika 3:​4, miputo yemiñwi ya kwaikale iitusisize ‘liñokolwa ze 120,’ ili kutahisa kuli malibela aeze limita ze 53 mwa butelele bwa kuya mwahalimu. Kono mwa lihatiso zeñwi zesepeha kuitusisizwe “liñokolwa ze 20,” ili kutahisa kuli aeze limita ze 9 mwa butelele bwa kuya mwahalimu. Mubonelo wa mafelelezo ubonahala kuli walumelelana ni butuna bwa mamota a tempele.—w24.10, like. 31.

Taba ya kuli sikombwa sa puteho uswanela kuba “muuna wa musali alimuñwi” italusañi? (1 Tim. 3:12)

Italusa kuli uswanela kuba feela ni musali alimuñwi mi haswaneli kuikenya mwa muzamao wa buhule. Kutuha fo, haaswaneli kueza linyawe ni basali basili.—w24.11, like. 19.

Ki kabakalañi halukona kubulela kuli manzwi a kwa Joani 6:53 haki mutala wa mwakuezeza Mulalelo wa Mulena?

Joani 6:53 ibulela za kuca nama ya Jesu ni kunwa mali ahae. Jesu naabulezi manzwi ao ka 32 C.E., mwa Galilea, kwa Majuda bane basatokwa kubonisa tumelo ku yena. Kono Mulalelo wa Mulena neutomilwe mwa Jerusalema hamulaho wa silimo kuzwa fo. Ka nako yeo, Jesu naabulela ni batu bane bakabusa ni yena kwa lihalimu.—w24.12, make. 10-11.