Muapositola Paulusi naañolezi Timotea yanaali muuna-muhulu sina yena kuli: “Nikulaela ka taata fapilaa Mulimu ni Kreste Jesu ni mangeloi aketilwe kuli umamele litaelo ze, kusina saluluti kamba ketululo.”—1 Tim. 5:21.

Sapili, lukanyakisisa babasiyo mwa sikwata seo sa mangeloi. Kwaiponahalela hande kuli mangeloi ao haki kalulo ya ba 144,000. Paulusi hanaañolezi Timotea, Bakreste babatozizwe nebasika kala kale kuzusezwa kwa lihalimu. Baapositola ni Bakreste babañwi babatozizwe nebasikaba kale libupiwa za moya; kacwalo, haki bona “mangeloi aketilwe.”—1 Makor. 15:​50-54; 1 Mates. 4:​13-17; 1 Joa. 3:2.

Hape, “mangeloi aketilwe” hakoni kuba mangeloi hanaasika utwa Mulimu ka nako ya Muunda. Mangeloi ao naabile kwa lineku la Satani ni kuba madimona, mi Jesu naahanyelize. (Gen. 6:2; Luka 8:​30, 31; 2 Pit. 2:4) Kwapili, madimona ao akakwalelwa mwa mukoti ka lilimo ze 1,000 mi hasamulaho akayundiswa hamohocwalo ni Satani.—Juda 6; Sin. 20:​1-3, 10.

“Mangeloi aketilwe” anaabulezi Paulusi aswanela kuba mangeloi a kwa lihalimu anaayemezi “Mulimu ni Jesu Kreste,” ili bababulezwi mwa timana yeswana.

Kunani mangeloi amañata-ñata asepahala. (Maheb. 12:​22, 23) Haluswaneli kunahana kuli mangeloi ao kaufela aezanga musebezi oswana ka nako yeswana. (Sin. 14:​17, 18) Ka mutala, Jehova naalumile lingeloi lililiñwi feela kuyo bulaya masole ba Maasiria ba 185,000. (2 Mal. 19:35) Kubonahala kuli mangeloi amañata afilwe buikalabelo bwa ‘kukumula mwa Mubuso wa Jesu lika kaufela zesitatalisa ni batu kaufela babaeza zemaswe.’ (Mat. 13:​39-41) Amañwi ‘akakubukanyeza baketiwa bahae’ kwa lihalimu. (Mat. 24:31) Mi amañwi ona afilwe buikalabelo bwa ‘kulusileleza mwa linzila zaluna kaufela.’—Samu 91:11; Mat. 18:10; Mubapanye Mateu 4:11; Luka 22:43.

Kubonahala kuli “mangeloi aketilwe” abulezwi kwa 1 Timotea 5:21 naafilwe misebezi yeipitezi yeama batu ba Mulimu. Litaba zeswalisana ni taba ye libonisa kuli Paulusi naafa kelezo ka za baana-bahulu, ili babaswanela kukutekiwa ki puteho. Baana-bahulu baswanela kupeta buikalabelo bwabona “kusina saluluti kamba ketululo” mi habaswaneli kueza katulo kamba kuatula ka kayeye. Libaka lelituna habaswanela kusebelisa kelezo yeo Paulusi naafile ka kususumezwa ki moya kikuli, bapeta buikalabelo bwabona “fapilaa Mulimu ni Kreste Jesu ni mangeloi aketilwe.” Kacwalo, kwaiponahalela hande kuli mangeloi amañwi afilwe misebezi yeama puteho, yecwale ka kusileleza, kuokamela musebezi wa kukutaza, ni kubihela Jehova zealemuha.—Mat. 18:10; Sin. 14:6.