LA BULAALU, January 18, 2023, nekunani zibiso yeipitezi fa jw.org, yenebulela kuli Muzwale Gage Fleegle ni Muzwale Jeffrey Winder baketilwe kuba mwa Sitopa Sesietelela sa Lipaki za Jehova. Mizwale ba, kaufelaa bona basebelelize Jehova ka busepahali ka nako yetelele.

Muzwale Fleegle naahuliselizwe kwa wiko wa Pennsylvania, kwa America, ki bashemi babasaba Mulimu. Hanaali mwa lilimo za kunonoboka, lubasi lwahae lwatutela kwa matakanyani kuyo tusa kone kutokwahala hahulu bakutazi. Nakonyana kuzwa fo, muzwale yo akolobezwa la November 20, 1988.

Bashemi ba Muzwale Fleegle kamita neba mususuezanga kukena mwa sebelezo ya nako kaufela. Hañata nebamemanga baokameli ba mupotoloho ni babasebeleza fa Betele, mi Muzwale Fleegle naalemuhanga tabo yene banani yona mizwale ni likaizeli bao. La September 1, 1989, ili nakonyana kuzwa fa kolobelezwa, aba paina wa kamita. Hamulaho wa lilimo zepeli, apeta sikonkwani sanaaitomezi hanaanani lilimo ze 12, ili sikonkwani sa kusebeleza fa Betele. Naakalile kusebeleza fa Betele kwa Brooklyn mwa October 1991.

Fa Betele, Muzwale Fleegle naabelekile lilimo ze 8 kwa sibaka kokumanekiwa libuka, hasamulaho akupiwa kuyo sebeleza kwa Liluko la Sebelezo. Ka nako yeo, naali mwa puteho yeneitusisa puo ya Sirussia, ka lilimo lisikai. Mwa 2006, anyala kaizeli yabizwa Nadia, mi ni yena akala kusebeleza fa Betele. Bubeli bwabona nebaswalisana ni puteho yeneitusisa puo ya Siputukisi, mi ka lilimo zefitelela 10 nebaswalisana ni puteho yeneitusisa puo ya Sisipanishi. Hamulaho wa kusebeleza mwa Liluko la Sebelezo ka lilimo zeñata, Muzwale Fleegle naakupilwe kusebeleza mwa Ofisi ya Katengo ka Tuto mi hasamulaho akupiwa kusebeleza mwa Ofisi ya Katengo ka Sebelezo. Mwa March 2022, naaketilwe kuba mutusi mwa Katengo ka Sebelezo ka Sitopa Sesietelela.

 Muzwale Winder naahuluselizwe mwa Murrieta, kwa California, mwa America. Naalutilwe niti ki bashemi bahae, mi naakolobelizwe la March 29, 1986. Kweli yenetatami, akupa kueza bupaina bwa kutusa. Naaikozi hahulu sebelezo yeo kuli mane aikatulela kuzwelapili. Hamulaho wa kueza bupaina bwa kutusa ka likweli lisikai, akalisa kueza bupaina bwa kamita la October 1, 1986.

Muzwale Winder hanaali mwa lilimo za kunonoboka, ayo potela bahulwani bahae bababeli bane basebeleza fa Betele ka nako yeo. Kueza cwalo nekutahisize kuli abe ni takazo ya kukupa kuyo sebeleza fa Betele hanaaka hula. Mi mwa May 1990, naakupilwe kuyo sebeleza fa Betele mwa Wallkill.

Fa Betele, Muzwale Winder naabelekezi mwa maluko ashutana-shutana, kukopanyeleza cwalo ni Liluko la Kukenisa, kwa Famu, ni mwa Liluko Lelitalima za Babasebeleza fa Betele. Naanyezi kaizeli yabizwa Angela ka 1997, mi basebelelize hamoho fa Betele kuzwa feela ka nako yeo. Mwa 2014, nebakupilwe kuyo sebeleza kwa Warwick, ili ko Muzwale Winder naatusize mwa musebezi wa kuyaha ofisi yetuna yezamaisa musebezi waluna mwa lifasi kaufela. Mwa 2016, nebakupilwe kuyo sebeleza kwa Sibaka sa Tuto sa Watchtower kwa Patterson, ili ko Muzwale Winder naasebelelize mwa Likolo la Sebelezo ya Kunopa Manzwi ni Mavidio. Hamulaho wa lilimo zeene, nebakupilwe kukutela kwa Warwick, mi Muzwale Winder naakupilwe kusebeleza mwa Ofisi ya Katengo Kakatalima za Babasebeleza fa Betele. Mwa March 2022, naaketilwe kuba mutusi mwa Katengo Kakatalima za Babasebeleza fa Betele ka Sitopa Sesietelela.

Lulapela kuli Jehova afuyaule hahulu baana babali “limpo” ba, habanze bazwelapili kusebeza ka taata kuzwisezapili za Mubuso.—Maef. 4:8.