1. Mufe mutala obonisa libaka haluswanela kuetelelwa ki Jehova.

 MUUNGE kuli mu mwa mushitu otibani mi mulatehile. Bupilo bwamina bu mwa lubeta, kakuli mwa mushitu wo kunani libatana, likokwani zetahisa matuku, limela zenani sifanu, ni misima ya macwe. Kusina kukakanya, mukaitebuha hahulu haiba muetelelwa ki mutu yaziba hande sibaka seo, ili yakona kumitusa kusakena mwa butata! Lifasi le, liswana sina mushitu wo. Kutezi lika zeñata zesabisa zekona kusinya silikani saluna ni Jehova. Kono lunani yaluetelela hande hahulu, yena Jehova. Ulusileleza kwa lika zekona kulutahiseza butata ni kululibisa mwa lifasi lelinca, molukayo ikola bupilo kuya kuile.

2. Jehova uluetelela cwañi?

² Jehova uluetelela cwañi? Sihulu, uluetelela ka kuitusisa Linzwi lahae, yona Bibele. Kono hape, uitusisanga batu. Ka mutala, uitusisanga “mutanga yasepahala yanani kutwisiso” kulufa lico za kwa moya zelutusa kueza likatulo zende. (Mat. 24:45) Jehova hape uluetelela ka kuitusisa baana babañwi babakwanisize zetokwahala. Ka mutala, baokameli ba mupotoloho ni baana-bahulu ba puteho, balususuezanga ni kulufa litaelo zekona kulutusa kutiyela miinelo yetaata. Ka niti luli, lwaitumela kuli Jehova uluetelela hande hahulu halunze lukopana ni miinelo yetaata mwa mazazi a mafelelezo a! Ketelelo yeo, ilutusa kuzwelapili kuba balikani ba Jehova ni kulutusa kuzwelapili kuzamaya mwa nzila yelibisa kwa bupilo.

3. Lukanyakisisañi mwa taba ye?

³ Nihakulicwalo, ka linako zeñwi kukona kulubela taata kulatelela ketelelo ya Jehova, sihulu haiba alufa ketelelo yeo ka kuitusisa batu babasika petahala. Kabakalañi? Mwendi ki kabakala kuli halutabeli ketelelo yelufilwe. Kamba mwendi lukona kuikutwa kuli ketelelo yelufilwe haikoni kulutusa mi lukona  kunahana kuli haizwi ku Jehova. Ka nako yeluikutwa cwalo, lutokwa hahulu kukolwa kuli Jehova ki yena yaetelela batu bahae ni kuli kulatelela ketelelo yahae kutahisa limbuyoti. Kuli luzwelepili kuba ni buikolwiso bo, mwa taba ye lukanyakisisa (1) mo Jehova naaetelezi batu bahae mwa linako zene iñolwa Bibele, (2) mo Jehova aetelela batu bahae kacenu, ni (3) molukona kutusezwa haiba luzwelapili kulatelela ketelelo yahae.

MO JEHOVA NAAETELEZI SICABA SA ISILAELE

4-5. Jehova naabonisize cwañi kuli naaetelela Maisilaele ka kuitusisa Mushe? (Mubone siswaniso.)

⁴ Jehova naaketile Mushe kuli aetelele Maisilaele kuzwa mwa Egepita. Mi naafile Maisilaele bupaki bone buiponahalela hande bwa kuli naabaetelela ka kuitusisa Mushe. Ka mutala, naalukisize kuli kube ni lilu leliyemi nonga ka nako ya musihali ni mulilo oyemi nonga ka nako ya busihu. (Exo. 13:21) Mushe naalatelezi lilu leliyemi nonga, ili lene lilibisize yena ni Maisilaele kwa Liwate Lelifubelu. Batu nebakenezwi ki sabo ka kunahana kuli nebaka bulaiwa bakeñisa kuli fapilaa bona nekunani liwate, mi kwamulaho wabona nekutaha mpi ya Maegepita. Nebanahanile kuli Mushe naafosize kubaisa kwa Liwate Lelifubelu. Kono naasika fosa. Jehova naanani mulelo hanaaisize batu bahae kwa Liwate Lelifubelu, ka kuitusisa Mushe. (Exo. 14:2) Hasamulaho, Mulimu abalamulela ka nzila yekomokisa hahulu.—Exo. 14:​26-28.

⁵ Ka lilimo ze 40 zenelatelezi, Mushe naazwezipili kuitinga fa lilu leliyemi nonga kuli aetelele batu ba Mulimu mwa lihalaupa. a Jehova naabeile lilu leo fahalimwaa tende ya Mushe ka nakonyana, mi Maisilaele kaufela nebakona kulibona. (Exo. 33:​7, 9, 10) Jehova naabulezi ku Mushe kuzwelela mwa lilu leo, mi Mushe ataluseza sicaba zanaa mubulelezi Jehova. (Samu 99:7) Maisilaele nebakona kuiponela hande kuli Jehova naabaetelela ka kuitusisa Mushe.

6. Kana Maisilaele nebalatelezi ketelelo ya Jehova? (Numere 14:​2, 10, 11)

⁶ Ka bumai, Maisilaele babañata nebahanile bupaki bone buiponahalela hande bwa kuli Jehova naabaetelela ka kuitusisa Mushe. (Mubale Numere 14:​2, 10, 11.) Nebakuta-kutezi kuhana kuli Jehova naabaetelela ka kuitusisa Mushe. Kabakaleo, lusika lwa Maisilaele lo, nelusika lumelezwa kukena mwa Naha ya Sepiso.—Num. 14:30.

7. Mufe mitala ya Maisilaele bane balatelezi ketelelo ya Jehova. (Numere 14:24) (Mubone ni siswaniso.)

⁷ Nihakulicwalo, Maisilaele babañwi nebalatelezi ketelelo ya Jehova. Ka mutala, Jehova naabulezi kuli: “Kalebu . . . naazwezipili kunilatelela ka pilu kaufela.” (Mubale Numere 14:24.) Mulimu naafuyauzi Kalebu, mi mane naamulumelelize kuketa kwanaaka pila mwa Naha ya Sepiso. (Josh. 14:​12-14) Maisilaele bane balumelelizwe kukena mwa naha ya sepiso, ni bona nebatomile mutala omunde wa kulatelela ketelelo ya Jehova. Joshua hanaayolile Mushe kuetelela Maisilaele, “bamukuteka hahulu mwa mazazi a bupilo bwahae kaufela.” (Josh. 4:14) Kabakaleo, Jehova abafuyaula mi abafa naha yanaa basepisize.—Josh. 21:​43, 44.

8. Mutaluse mo Jehova naaetelezi batu bahae ka nako yene babusa malena. (Mubone ni siswaniso.)

⁸ Lilimo zeñata kuzwa fo, Jehova naaketile baatuli kuli baetelele batu bahae. Hasamulaho, ili ka nako yene babusa malena, Jehova naaketile bapolofita kuli baetelele batu bahae. Malena babasepahala nebautwile kelezo  ya bapolofita. Ka mutala, Mulena Davida naaikokobelize ni kuamuhela kalimelo kuzwelela ku mupolofita Natani. (2 Sam. 12:​7, 13; 1 Makol. 17:​3, 4) Mulena Josafati naaitingile fa ketelelo ya mupolofita Jahaziele mi naasusuelize batu ba Juda kuli babe “ni tumelo kwa bapolofita [ba Mulimu].” (2 Makol. 20:​14, 15, 20) Mulena Ezekiasi hanaaziyelehile, naakupile tuso ku mupolofita Isaya. (Isa. 37:​1-6) Jehova naafuyaulanga malena nako kaufela hane balatelelanga ketelelo yahae, mi naasilelezanga batu bahae. (2 Makol. 20:​29, 30; 32:22) Batu kaufela nebaswanela kuutwisisa kuli Jehova naaetelela batu bahae ka kuitusisa bapolofita. Niteñi, malena babañata hamohocwalo ni batu nebahanile kuteeleza kwa bapolofita ba Jehova.—Jer. 35:​12-15.

MO JEHOVA NAAETELEZI BAKRESTE BA KWA MAKALELO

9. Ki bo mañi banaaitusisize Jehova mwa linako za baapositola kuli aetelele Bakreste? (Mubone ni siswaniso.)

⁹ Jehova naatomile puteho ya Sikreste fa Pentekota ya 33 C.E. Naaetelezi cwañi Bakreste ba kwa makalelo bao? Naaketile Jesu kuli abe toho ya puteho. (Maef. 5:23) Kono Jesu naasa ambolangi ni mañi ni mañi wa balutiwa kubataluseza za kueza. Naaetelela balutiwa bahae ka kuitusisa baapositola ni baana-bahulu mwa Jerusalema. (Lik. 15:​1, 2) Hape mwa liputeho nekuketilwe baana-bahulu kuli baetelele.—1 Mates. 5:12; Tite 1:5.

10. (a) Kana Bakreste babañata mwa linako za baapositola nebalatelezi ketelelo yene bafilwe? (Likezo 15:​30, 31) (b) Ki kabakalañi batu babañwi mwa linako zene iñolwa Bibele hane basika lemuha kuli Jehova naabaetelela ka kuitusisa batu? (Mubone mbokisi yeli, “ Libaka Batu Babañwi Habahanile Bupaki Bobu Iponahalela Hande.”)

¹⁰ Kana Bakreste ba mwa linako za baapositola nebalatelezi ketelelo yene bafilwe? Buñata bwabona nebaamuhezi ka tabo litaelo zene bafilwe. Mane “banyakalala kabakala susuezo” yene bafilwe. (Mubale Likezo 15:​30, 31.) Kono Jehova uetelezi cwañi batu bahae mwa linako zaluna?

MO JEHOVA AETELELA BATU BAHAE KACENU

11. Mufe mutala obonisa kuli mwa lilimo za cwanoñu fa Jehova naatusize batu baba luetelela.

¹¹ Jehova uzwelapili kuetelela batu bahae kacenu. Ueza cwalo ka kuitusisa Linzwi lahae ni Mwanaa hae, yena toho ya puteho. Kana kunani  bupaki bobubonisa kuli Mulimu hape uzwezipili kuluetelela ka kuitusisa batu. Eni. Ka mutala, halunyakisiseñi zeneezahezi kwa mafelelezo a lilimo za ma 1800. Muzwale Charles Taze Russell ni banaaswalisana ni bona, nebakalile kuutwisisa kuli silimo sa 1914 nesikaba silimo sa butokwa hahulu kuamana ni kutomiwa kwa Mubuso wa Mulimu. (Dan. 4:​25, 26) Nebazibile taba yeo bakeñisa kuli nebaitingile fa bupolofita bwa mwa Bibele. Kana Jehova naabaetelela hane baeza lipatisiso mwa Bibele? Eni. Zeneezahezi mwa lifasi ka 1914, nelibonisize kuli Mubuso wa Mulimu neukalile kubusa. Ndwa ya Lifasi Yapili neitumbukile ka silimo seo, mi kuzwa fo, nekubile ni matuku ayambukela, lizikinyeho za lifasi, ni kutaela kwa lico. (Luka 21:​10, 11) Kusina kukakanya, Jehova naaitusisa baana babasepahala bao kuli atuse batu bahae.

12-13. Ki litukiso mañi zeneezizwe kuli musebezi wa kukutaza ni kuluta batu uekezehe ka nako ya Ndwa ya Lifasi Yabubeli?

¹² Halunyakisiseñi hape zeneezahezi ka nako ya Ndwa ya Lifasi Yabubeli. Hamulaho wa kunyakisisa Sinulo 17:​8, mizwale bane baetelela kwa ofisi yetuna yezamaisa musebezi waluna mwa lifasi kaufela, nebalemuhile kuli ndwa yeo neisa libisi kwa ndwa ya Armagedoni, kono neilibisa kwa nako ya kozonyana yene ikatahisa kuli batu babañata nikufita bakutazwe. Kopano ya Jehova neitomile Sikolo sa Giliadi sa Bibele sa Watchtower, ilikuli balumiwa balutiwe mwa kukutaleza ni mwa kulutela batu mwa linaha zeñata za lifasi. Kono ka nako yeo, muhato wo neubonahala kuli neusa koni kutusa. Mane balumiwa nebalumilwe nihaiba ka nako ya ndwa. Kuzwa fo, mutanga yasepahala naalukisize kuli kube ni sikolo (sesibizwa Course in Theocratic Ministry,) b ilikuli batu kaufela mwa puteho balutiwe kuba bakutazi ni baluti babande. Ka linzila zeo, batu ba Mulimu nebatusiwa kuitukiseza musebezi one bakaeza kwapili.

¹³ Haluiheta kwamulaho, lwakona kuiponela hande kuli Jehova naaetelela batu bahae ka nako yetaata yeo. Kuzwa feela ka nako ya Ndwa ya Lifasi Yabubeli, batu ba Mulimu mwa linaha zeñata baikozi kozonyana ni tukuluho ya kueza musebezi wa kukutaza. Mane kunani zende zeñata zezwile mwa musebezi wo.

14. Ki kabakalañi halukona kusepa ketelelo yelufiwa ki kopano ya Jehova ni baana-bahulu? (Sinulo 2:1) (Mubone ni siswaniso.)

 ¹⁴ Kacenu, mizwale ba mwa Sitopa Sesietelela bazwelapili kuitinga fa ketelelo ya Kreste. Babata kuli litaelo zebafa kwa mizwale lizamaelele ni mubonelo wa Jehova ni Jesu. Mi baitusisanga baokameli ba mupotoloho ni baana-bahulu kufa litaelo kwa liputeho. c Baana-bahulu babatozizwe ba “mwa lizoho [la Jesu] la bulyo.” (Mubale Sinulo 2:1.) Kono niti kikuli, baana-bahulu ba habasika petahala mi baezanga mafosisa. Mushe ni Joshua ka linako zeñwi nebaezanga mafosisa, mi nekubanga cwalo ni kwa baapositola. (Num. 20:12; Josh. 9:​14, 15; Maro. 3:23) Niteñi, Kreste uetelela ka tokomelo mutanga yasepahala ni baana-bahulu babaketilwe, mi ukazwelapili kueza cwalo mwa “mazazi kaufela kuisa nako ya kufela kwa lifasi.” (Mat. 28:20) Kacwalo, lunani mabaka amande haluswanela kusepa ketelelo yeba lufa batu babaketilwe kuli baluetelele.

LUKATUSEHA HAIBA LUZWELAPILI KULATELELA KETELELO YA JEHOVA

15-16. Muitutañi kwa batu bane balatelezi ketelelo ya Jehova?

¹⁵ Haiba luzwelapili kulatelela ketelelo ya Jehova, lukaikola limbuyoti nihaiba ka nako ya cwale. Ka mutala, bo Andy ni bo Robyn nebasebelisize kelezo ya kupila bupilo bobubunolo. (Mat. 6:22) Kabakaleo, nebakonile kuitatela kutusa mwa musebezi wa kuyaha miyaho ya kopano. Bo Robyn batalusa kuli: “Hañata nelupilanga mwa mandu amanyinyani hahulu, mi fokuñwi naasa bangi ni matatehelo. Mi neninani kulekisa lika zeñata zene niitusisanga kwa kuunga maswaniso, ili musebezi one nitabela hahulu kueza hanipatuluhile. Mi nenilotisize miyoko hane nilekisize lika zeo. Kono ka kuswana ni Sara, musalaa Abrahama, neniikatulezi kuisa pilu kwa lika zene nikafumana kwapili kufita kuisa pilu kwa lika zene niitombozi.” (Maheb. 11:15) Katulo yene baezize bo mutu ni musalaa hae bao nei batusize cwañi? Bo Robyn batalusa kuli: “Lunani tabo yetuna kakuli lwaziba kuli lusweli kufa Jehova zelunani kaufela. Na ni bo muunaaka haluezanga musebezi walufile Jehova, lulemuhanga mobuka bela bupilo mwa lifasi lelinca.” Bo Andy balumelelana ni bona, mi bali: “Lunani tabo bakeñisa kuli luitusisa nako ni maata aluna kuzwisezapili za Mubuso.”

 ¹⁶ Ki nzila ifi yeñwi yeluka tusiwa ka yona haiba luzwelapili kulatelela ketelelo ya Jehova? Hamulaho wa kukwaza sikolo sa sekondari, kaizeli yabizwa Marcia naabata kusebelisa kelezo yanaafilwe ya kusebeleza Jehova mwa sebelezo ya nako kaufela. (Mat. 6:33; Maro. 12:11) Utalusa kuli: “Nenifilwe tohonolo ya kuyo eza kosi ya lilimo zeene kwa yunivesiti nisatokwi kulifa sesiñwi. Kono nenibata kupeta likonkwani za kwa moya. Kacwalo, naikatulela kuya fa sikolo fone kulutiwa misebezi ya mazoho kuyo ituta kasebezi kakañwi kane kaka nitusa kuzwelapili kueza bupaina. Yeo ki yeñwi ya likatulo zende hahulu zenikile naeza. Ka nako ya cwale, niikola kusebeza sina paina wa kamita, mi musebezi onieza unikonisa kutusanga fa Betele ka linako zeñwi ni kusebeleza Jehova ka linzila zeñwi.”

17. Ki limbuyoti mañi zeñwi zelukona kufumana haiba lulatelela ketelelo ya Jehova? (Isaya 48:​17, 18)

¹⁷ Ka linako zeñwi, lufiwanga kelezo yelusileleza kwa lika zecwale ka kulata hahulu sifumu, ni kwa lika zekona kutahisa kuli kulubele bunolo kuloba milao ya Mulimu. Lukafuyaulwa haiba lulatelela ketelelo yalufa Jehova. Lukazwelapili kuba ni lizwalo lelikenile ni kuambuka lika zeñata zekona kulutahiseza butata. (1 Tim. 6:​9, 10) Kabakaleo, lwakona kusebeleza Jehova ka pilu kaufela, ili nto yelutahiseza tabo yetuna ni kozo.—Mubale Isaya 48:​17, 18.

18. Ki kabakalañi hamuikatulezi kuzwelapili kulatelela ketelelo ya Jehova?

¹⁸ Kusina kukakanya, Jehova ukazwelapili kuluetelela ka kuitusisa batu ka nako ya ñalelwa yetuna kuisa mane ni ka nako ya Puso ya Lilimo ze 1,000. (Samu 45:16) Kana lukazwelapili kulatelela ketelelo yeo nihaikaba kuli kueza cwalo kukatokwa kuli luitombole lika zeñwi zelutabela? Kukaba cwalo haiba lwalatelela ketelelo yalufa Jehova ka nako ya cwale. Kacwalo, haike kamita lulatelele ketelelo ya Jehova, kukopanyeleza cwalo ni ketelelo yelufiwa ki baana babaketilwe kuli balubabalele. (Isa. 32:​1, 2; Maheb. 13:17) Halueza cwalo, lunani mabaka amande alutahiseza kuli lusepe Jehova, yena yaluetelela, ili yalusileleza kwa lika zekona kusinya silikani saluna ni yena ni kululibisa mwa lifasi lelinca, molukayo ikola bupilo kuya kuile.