1-2. Ki miinelo mañi yetaata yebakona kukopana ni yona batanga ba Jehova babasepahala?

 HAKUEZAHALA lika zemaswe, bupilo bwaluna bukona kucinca ka sipundumukela. Ka mutala, muzwale yasepahala wa libizo la Luis, a naafumanwi ni mufuta omuñwi wa kansa. Mualafi naamutaluselize kuli naakapila feela likweli lisikai. Kaizeli yabizwa Monika ni muunaa hae nebapatehile kusebeleza Jehova hamoho. Kono zazi leliñwi, Kaizeli Monika alemuha kuli muunaa hae yanaali muuna-muhulu, naaezanga sibi kwa mukunda ka lilimo zeñata. Kaizeli wa likwasha yabizwa Olivia, naanani kubaleha mwa ndu yahae bakeñisa kuli nekutuha kuba ni ñuli yetuna. Kaizeli yo hanaakutile, naafumani kuli ñuli neisinyize ndu yahae. Bupilo bwa batu bao nebucincize ka sipundumukela. Kana ni mina mukile mwakopana ni miinelo yeswana ni yene bakopani ni yona? Kana mukile mwakopana ni muinelo one ucincize hahulu bupilo bwamina ka sipundumukela?

² Kusina taba kuli lu batanga ba Jehova babasepahala, lwakopananga ni miinelo yetaata yebakopananga ni yona batu kaufela. Hape mwendi lukatokwa kutiyela twaniso kamba nyandiso yezwa kwa batu babatoile batanga ba Mulimu. Nihaike kuli Jehova haalutibelangi kwa miinelo yetaata yeo, ulusepisa kuli uka lutusa. (Isa. 41:10) Ka tuso yahae, lwakona kuzwelapili kuba ni tabo, kueza likatulo zende, ni kuzwelapili kusepahala ku yena niha lukopana ni miinelo yetaata hahulu. Mwa taba ye, lukanyakisisa linzila zeene zalutusanga ka zona Jehova halukopana ni  miinelo yetaata. Hape lukanyakisisa zeluswanela kueza kuli lutusiwe ki tuso yalufa.

JEHOVA UKA MISILELEZA

3. Haluezahalelwa ki nto yemaswe, ki lika mañi zekona kulubela taata kueza?

³ Butata bolukona kukopana ni bona. Nto yemaswe haiezahala ku luna, kukona kulubela taata kunahana hande ni kueza likatulo. Libaka? Lukona kuutwa hahulu butuku kwa pilu. Lukona kuimezwa hahulu ki lipilaelo. Lukona kuikutwa inge mutu yalatehile mi lwakona kupalelwa kuziba za kueza. Mulemuhe mone baikutwezi likaizeli bababeli bababulezwi kwamulaho, hane bakopana ni miinelo yetaata. Kaizeli Olivia utalusa kuli: “Ñuli hane isinyize ndu yaka, neniikutwile kuziyeleha hahulu, mi nenisa zibi za kueza.” Kaizeli Monika yanaabetekilwe ki muunaa hae utalusa kuli: “Neniikutwile hahulu bumaswe. Nenilobehile hahulu pilu. Neku nibezi taata kueza nihaiba misebezi yebunolo yene niezanga ka zazi. Nenisa libeleli kuli nto yecwalo neikona kuezahala ku na.” Jehova ulusepisa kuli uka lutusa cwañi haluziyelehile?

4. Ka kuya ka Mafilipi 4:​6, 7, ki lika mañi zalusepisa Jehova?

⁴ Mwalutuseza Jehova. Usepisa kulufa “kozo ya Mulimu” yebulezwi mwa Bibele. (Mubale Mafilipi 4:​6, 7.) Kozo yeo ki kozo yelubanga ni yona mwa munahano ni mwa pilu kabakala kuba ni silikani sesinde ni yena. Kozo yeo ‘ifita kutwisiso kaufela,’ mi ki yende hahulu nikufita. Kana mukile mwaikutwa kuba ni kozo ya mwa munahano hamulaho wa kulapela ka taata ku Jehova? Kozo yeo, ki yona “kozo ya Mulimu.”

5. Kozo ya Mulimu ikona kusileleza cwañi minahano yaluna ni lipilu zaluna?

⁵ Liñolo leo hape libulela kuli kozo ya Mulimu “ikasileleza lipilu zamina ni maata amina a kunahana.” Linzwi la kwa makalelo lelitolokilwe kuli “kusileleza,” neliitusiswanga ki masole, mi neliama kwa masole bane basilelezanga muleneñi kuli usike watasezwa ki lila. Batu ba mwa muleneñi nebalobalanga basaikalelwi sesiñwi, kakuli nebaziba kuli masole nebakantela minyako ya muleneñi. Ka mukwa oswana, kozo ya Mulimu haisileleza lipilu zaluna ni minahano yaluna, haluikalelwangi sesiñwi. (Samu 4:8) Muinelo waluna niha usakoni kucinca honafo feela, sina mone kubezi ku Anna, lusakona kuba ni kozo. (1 Sam. 1:​16-18) Mi kuba ni kozo, hañata kulutusanga kunahana hande ni kueza likatulo zende.

6. Ki lika mañi zeluswanela kueza kuli lutusiwe ki kozo ya Mulimu? (Mubone ni siswaniso.)

⁶ Zeluswanela kueza. Hamuli mwa butata, mukupe Jehova kuli amituse. Ka mukwa ufi? Muzwelepili kulapela kufitela muba ni kozo ya Mulimu. (Luka 11:9; 1 Mates. 5:17) Muzwale Luis yabulezwi kwamulaho, naatalusize zenetusize yena ni musalaa hae Ana kuitiisa hane  bataluselizwe kuli usiyalezwi ki likweli lisikai feela za kupila. Naabulezi kuli: “Mutu haali mwa muinelo wo, kutaata hahulu kueza likatulo ka za likalafo ni litaba zeñwi. Kono kulapela ku Mulimu kulutusize kuba ni kozo kusina taba ni muinelo otaata hahulu oluli ku ona.” Muzwale Luis ni musalaa hae, nebabulezi kuli nebalapelanga ka taata ku Jehova ni ka kukuta-kutela, mi neba mukupanga kuli abatuse kuba ni kozo ya mwa munahano, kuwa pilu, ni kuba ni butali kuli baeze likatulo zende. Mi nebaikutwile kuli naabatusize. Haiba mukopana ni muinelo otaata, mutundamene kulapela, mi Jehova uka mifa kozo yekasileleza pilu yamina ni munahano wamina.—Maro. 12:12.

JEHOVA UKA MITIISA

7. Lukona kuikutwa cwañi halukopana ni muinelo otaata?

⁷ Butata bolukona kukopana ni bona. Halukopana ni muinelo otaata, lwakona kuikutwa bumaswe, kupalelwa kunahana hande, ni kueza lika ka nzila yeshutana ni mone luliezezanga. Mwahalaa nako yeo, fokuñwi lukaikutwanga hahulu bumaswe. Bo Ana bababulezwi kwamulaho, nebabulezi kuli hamulaho wa lifu la bakubona bo Luis, nebabanga ni maikuto ashutana-shutana. Nebabulezi kuli: “Fokuñwi nenilembwalanga ni kuikutwa mulatu. Hape nenifilikananga hane nihupulanga ka za lifu labona.” Kutuha fo, bo Ana nebaikutwanga bulutu ni kufilikana hane batokwa kueza likatulo ka za lika zene baezanga hande bo Luis. Ka linako zeñwi, nebaikutwanga inge mutu ya mwa liwate hakunani liñungwa. Jehova ukona kulutusa cwañi haluba ni maikuto acwalo?

8. Sina mokuboniselizwe kwa Isaya 33:​6, Jehova ulusepisañi?

⁸ Mwalutuseza Jehova. Usepisa kuli uka lutiisa. (Mubale Isaya 33:6.) Haiba kunani liñungwa mwa liwate, sisepe sakona kukashezwa kafa ni kafa. Kono kuli sisepe sikone kuzamaya hande ni hakunani liñungwa, kunani lika zebato swana ni tulabiso zebeiwanga kwatasaa lisepe zeñata. Lika zeo litusanga hahulu kuli sisepe sisike sakashezwa kafa ni kafa, ili kutahisa kuli baba mwa sisepe basike baikalelwa hahulu. Nihakulicwalo, lika zeo likona feela kutusa sisepe haiba sazamaya. Ka mukwa oswana, Jehova uka lutiisa haiba luzwelapili kusepahala ku yena niha lukopana ni miinelo yetaata.

9. Kueza lipatisiso kukona kulutusa cwañi kuba ni mubonelo oswanela? (Mubone ni siswaniso.)

⁹ Zeluswanela kueza. Haiba muikutwa kuziyeleha mwa munahano, mueze momukonela kaufela kuzwelapili kueza lika za kwa moya. Ki niti kuli mwendi hamuna kukona kueza lika zene muezanga kwamulaho, kono muhupule kuli Jehova wautwisisa muinelo omuli ku ona. (Mubapanye Luka 21:​1-4.) Hape mubange ni nako ya kueza tuto ya ka butu ni kunahanisisa zemuituta.  Libaka? Jehova uitusisize kopano yahae kulufa litaba zeñata zetomile fa Mañolo zekona kulutusa kuba ni mubonelo oswanela. Mwakona kuitusisa app ya JW Library^® ni Buka ya Lipatisiso ya Lipaki za Jehova kuli mufumane litaba zemubata. Kaizeli Monika yabulezwi kwamulaho, naatalusize kuli hanaaikutwanga kuziyeleha mwa munahano, naaezanga lipatisiso mwa lihatiso zaluna kuli afumane litaba zekona kumutusa. Ka mutala, naabatanga litaba zebulela za “bunyemi.” Ka linako zeñwi naabatanga litaba zebulela za “kubetekiwa” kamba za “busepahali.” Mi naazwelangapili kubala litaba zeo kufitela aikutwa hande. Naabulezi kuli: “Hanikala kueza lipatisiso, nenibanga ni lipilaelo, kono haninze nizwelapili kubala, neniikutwanga inge kuli Jehova naanikumbata. Hane nibalanga litaba zeo, nenifitile fa kulemuha kuli Jehova naautwisisa mone niikutwela mi naanitusa.” Tuso yeo yezwa ku Jehova hape yakona kumitusa kuzwelapili kuba ni mubonelo oswanela ni kuba ni kozo yetuna.—Samu 119:​143, 144.

JEHOVA UKA MITUSA

10. Lukona kuikutwa cwañi hamulaho wa kuezahalelwa ki nto yemaswe?

¹⁰ Butata bolukona kukopana ni bona. Hamulaho wa kuezahalelwa ki nto yeñwi yemaswe, mwendi ka linako zeñwi lukaikutwanga kukatala kwa mubili ni mwa munahano. Lwakona kuikutwa sina mumati yaholofezi, ili yanaali mumati yomutuna kwamulaho kono cwale saazamaya ka kucuñuta. Mwendi kukona kulubela taata kueza misebezi yene luezanga ka bunolo kwamulaho, kamba mwendi lukona kuba ni takazo yenyinyani ya kueza misebezi yene luikolanga kwamulaho. Ka kuswana ni Elia, kukona kulubela hahulu taata kuzuha. Lukona kuikutwa kuli luswanela feela kuzwelapili kulobala. (1 Mal. 19:​5-7) Jehova usepisa kulutusa cwañi haluikutwa kukatala?

11. Ki ifi nzila yeñwi yalutusanga ka yona Jehova? (Samu 94:18)

¹¹ Mwalutuseza Jehova. Usepisa kuli uka lutusa. (Mubale Samu 94:18.) Sina feela mumati yaholofezi hatokwa kutusiwa kuli azamaye, ni luna mwendi lukatokwa kutusiwa kuli luzwelepili kusebeleza Jehova ka tukufalelo. Haluikutwa cwalo, Jehova ulukolwisa kuli: “Na, Jehova Mulimu wahao, nisweli lizoho lahao la bulyo, ki na yali ku wena: ‘Usike wasaba. Nika kutusa.’” (Isa. 41:13) Mulena Davida ni yena naatusizwe ka nzila yeo. Hanaakopani ni miliko ni lila zahae hane libata kumueza maswe, naabulelezi Jehova kuli: “Lizoho lahao la bulyo ki lona leli nitusa.” (Samu 18:35) Kono Jehova ulutusanga cwañi?

12. Ki bo mañi bakona kuitusisa Jehova kuli alutuse haluikutwa kukatala?

 ¹² Jehova hañata ulutusanga ka kususumeza babañwi kuli balutuse. Ka mutala, nako yeñwi Davida hanaaikutwile kukatala, mulikanaa hae Jonatani naamupotezi mi amutiisa ni kumususueza. (1 Sam. 23:​16, 17) Ka mukwa oswana, Jehova naaketile Elisha kuli atuse Elia. (1 Mal. 19:​16, 21; 2 Mal. 2:2) Kacenu, Jehova ukona kulutusa ka kuitusisa ba mwa lubasi lwaluna, balikani, kamba baana-bahulu. Kono haluutwa butuku kwa pilu, lwakona kukenelwa ki muliko wa kubata kuikambusa ku babañwi. Mwendi lukabata kuina feela lunosi. Hakusika fosahala kuikutwa cwalo. Ki lika mañi zeluswanela kueza kuli lutusiwe ki Jehova?

13. Ki lika mañi zeluswanela kueza kuli lutusiwe ki Jehova? (Mubone ni siswaniso.)

¹³ Zeluswanela kueza. Mueze momukonela kaufela kuli musike mwaikambusa ku babañwi. Haiba luikambusa ku babañwi, haluna kuba ni mubonelo oswanela, mi lwakona kukala kuisa hahulu pilu kwa lika zelubata ni kwa butata bolukopana ni bona. Kuba ni mubonelo wo kwakona kuama likatulo zelueza. (Liprov. 18:1) Kono niti ki kuli, kaufelaa luna fokuñwi lutokwanga kuba lunosi, sihulu halukopana ni muinelo otaata hahulu. Niteñi, haiba luikambusa ku babañwi ka nako yetelele, lwakona kupalelwa kuamuhela tuso yalufa Jehova. Kacwalo, hamukopana ni muinelo otaata, muamuhele tuso yezwa ku ba mwa lubasi lwamina, kwa balikani, ni kwa baana-bahulu nihakuli taata kueza cwalo. Muunge batu bao sina nzila yamitusa ka yona Jehova.—Liprov. 17:17; Isa. 32:​1, 2.

JEHOVA UKA MIOMBA-OMBA

14. Ki miinelo mañi yekona kulutahiseza sabo?

¹⁴ Butata bolukona kukopana ni bona. Lwakona kukopana ni miinelo yesabisa. Mwa Bibele, batanga ba Mulimu babasepahala babulela ka za linako fone baziyelehelanga ni kungangamiswa ki lila zabona kamba miinelo yemiñwi. (Samu 18:4; 55:​1, 5) Ka kuswana, lukona kukopana ni twaniso kwa sikolo, kwa mubeleko, kuzwelela kwa lubasi lwaluna, kamba kwa muuso. Lukona kuikalelwa kuli lukashwa kabakala kukula butuku bobuñwi. Ka nako yeo, lukona kuikutwa kuli hakuna zelukona kueza, sina feela mwaikutwelanga mwanana. Jehova ulutusanga cwañi haluikutwa cwalo?

15. Ka kuya ka Samu 94:​19, ki lika mañi zalusepisa Jehova?

¹⁵ Mwalutuseza Jehova. Waluomba-ombanga ni kulukatulusa. (Mubale Samu 94:19.) Samu ye, ikona kuluhupulisa ka za musizana yasabile,  ili yapalelwa kulobala bakeñisa mushika omutuna. Lwakona kubona bo ndatahe inze baya ku yena, ku munanula, ni kumuswala mwa mazoho abona kufitela aya mwa buloko. Nihaike kuli kusanani mishika, kuba mwa mazoho a bo ndatahe kwamuomba-omba mi uikutwa kusilelezwa. Halukopana ni miinelo yetaata yelutahiseza sabo, mwendi lukatokwa kuli Ndataa luna wa kwa lihalimu aluswale mwa mazoho ahae ka swanisezo kufitela sabo yaluna ifela. Ki lika mañi zeluswanela kueza kuli Jehova aluomba-ombe?

16. Ki lika mañi zeluswanela kueza kuli luomba-ombiwe ki Jehova? (Mubone ni siswaniso.)

¹⁶ Zeluswanela kueza. Mutandange nako ni Jehova kamita, ka kulapela ku yena ni ka kubala Linzwi lahae. (Samu 77:​1, 12-14) Haiba mueza cwalo, nto yapili yemuka eza hamukopana ni butata ki kukupa Ndataa mina wa kwa lihalimu kuli amituse. Mutaluseze Jehova lika zemitahiseza sabo ni zemibilaeza. Kihona mukateeleza ku yena ka kubala Linzwi lahae ni kubona mwamiomba-ombela. (Samu 119:28) Mwendi mukalemuha kuli litaba zeñwi za mwa Bibele zakona kumiomba-omba sihulu hamusabile. Ka mutala, mwendi mwakona kuomba-ombiwa ki litaba ze mwa buka ya Jobo, ya Lisamu, ni ya Liproverbia, hamohocwalo ni manzwi a Jesu a kwa Mateu kauhanyo 6. Hamulapela ku Jehova ni kubala Linzwi lahae, mukaikutwa kuomba-ombiwa ki yena.

17. Ki buikolwiso mañi bolukona kuba ni bona?

¹⁷ Lwakona kuba ni buikolwiso bwa kuli Jehova uka lutusa halukopana ni miinelo yetaata. Jehova ukazwelapili kuba ni luna. (Samu 23:4; 94:14) Jehova usepisa kuli uka lusileleza, kulutiisa, kulutusa, ni kuluomba-omba. Isaya 26:3 ibulela cwana ka za Jehova, ili: “Ukasileleza babaitinga ku wena ka kutala; uka bafa kozo yesafeli, kakuli ki wena yebasepile.” Kacwalo, musepe Jehova mi mueze momukonela kaufela kuli mufumane tuso yahae. Haiba mueza cwalo, mukakutelwa ki maata niha mukopana ni miinelo yetaata.