1. Ki kabakalañi lizazi la Kupuzo halili la butokwa hahulu mwa silimo? (Luka 22:​19, 20)

 BATU ba Jehova baanga lizazi la Kupuzo ya Lifu la Kreste kuba la butokwa hahulu mwa silimo. Ki yona feela kezahalo inosi, ili yeo Jesu naalaezi balateleli bahae ka kunonga kuli baihupulange. (Mubale Luka 22:​19, 20.) Kunani mabaka amañata halunyolelwanga hahulu kufumaneha kwa Kupuzo. Halunyakisiseñi amañwi aona.

2. Ki afi mabaka amañwi atahisanga kuli lunyolelwe hahulu Kupuzo?

² Kupuzo ilutusanga kunahanisisa ka za butokwa bwa tiululo. Iluhupulisanga linzila zelukona kubonisa ka zona buitumelo kwa sitabelo sa Jesu. (2 Makor. 5:​14, 15) Hape ilufanga kolo ya ‘kususuezana’ ni mizwale ni likaizeli baluna. (Maro. 1:12) Silimo ni silimo, mizwale ni likaizeli babañata babafokozi kwa moya bafumanehanga kwa Kupuzo. Mane babañwi basusuezwanga kukutela ku Jehova kabakala kuboniswa lilato ni kuamuhelwa hande. Mi batu babañata basusuezwanga ki lika zebabonanga ni zebautwanga, mi baikatulelanga kukala kuzamaya mwa nzila yelibisa kwa bupilo. Lika zeo kaufela litahisanga kuli luunge Kupuzo kuba ya butokwa hahulu!

3. Kupuzo iswalisanisanga cwañi mizwale ni likaizeli baluna mwa lifasi kaufela? (Mubone ni siswaniso.)

³ Munahane hape mo Kupuzo itahisezanga kuli luswalisane hahulu ni mizwale ni likaizeli baluna mwa lifasi kaufela. Mwa lifasi kaufela, Lipaki za Jehova bakopananga hamoho mwa  libaka zeshutana kueza Kupuzo, lizazi halilikela. Kaufela luna luteelezanga kwa ngambolo yebonisanga butokwa bwa tiululo. Luopelanga lipina zepeli za milumbeko, kufitisa liswanisezo, ni kubulela ka buikolwiso kuli “ameni” kwa litapelo zeene zefiwanga. Liputeho kaufela liezanga Kupuzo ka nzila yeswana mwahalaa nako yebato ba lihora ze 24. Munahane feela tabo yabanga ni yona Jehova ni Jesu haba lubona inze luswalisana ka nzila yeo!

4. Lukanyakisisañi mwa taba ye?

⁴ Mwa taba ye, lukanyakisisa lipuzo zelatelela ze: Lukona kuitukiseza cwañi Kupuzo mwa lipilu zaluna? Lukona kutusa cwañi babañwi kuli ni bona batusiwe ki Kupuzo? Mi lukona kutusa cwañi babafokozi kwa moya? Likalabo za lipuzo zeo, lika lutusa kuitukiseza kezahalo ya butokwa hahulu ye.

LUKONA KUITUKISEZA CWAÑI KUPUZO MWA LIPILU ZALUNA?

5. (a) Ki kabakalañi haluswanela kunahanisisanga libaka Kupuzo haili ya butokwa? (Samu 49:​7, 8) (b) Muitutileñi mwa vidio yeli, Ki Kabakalañi Jesu Hanaashwile?

⁵ Nzila yeñwi ya butokwa hahulu yelukona kuitukiseza ka yona Kupuzo mwa lipilu zaluna, ki ka kunahanisisa butokwa bwa sitabelo sa tiululo sa Jesu Kreste. Nelusike lwakona kuitukulula kwa sibi ni lifu kaili luna. (Mubale Samu 49:​7, 8; mubone ni vidio yeli, Ki Kabakalañi Jesu Hanaashwile?) a Kacwalo, Jehova ni Mwanaa hae nebaezize buitomboli bobutuna, Jehova naalukisize kuli Jesu afane bupilo bwahae kabakala luna. (Maro. 6:23) Kunahanisisa hahulu ka za buitomboli bwanaaezize Jehova ni Jesu kabakala luna, kulutusa kuitebuha hahulu tiululo. Lukanyakisisa lika lisikai ka za tiululo zanaaitombozi Jehova ni Jesu. Kono halukaleñi ka kunyakisisa zene iama tiululo.

6. Tiululo ki nto mañi, mi ki kabakalañi Jesu hanaafanile bupilo bwahae sina tiululo?

⁶ Tiululo ki tifo yelifiwa ka mulelo wa kukutisa sinca nto yeñwi. Mutu wapili Adama, naabupilwe inzaa petahalile. Hanaaezize sibi alatehelwa ki tohonolo ya kupila kuya kuile, yena hamohocwalo ni bana bahae kaufela. Jesu naafanile bupilo bwahae bobupetehile sina sitabelo, ilikuli akutise zanaalatehezwi ki zona Adama. Mwahalaa bupilo bwahae kaufela bwa fa lifasi, Jesu “naasika eza sibi, mi bupumi nebusika fumanwa mwa mulomo wahae.” (1 Pit. 2:22) Ka nako ya lifu lahae, Jesu naafanile bupilo bwahae bobupetehile bone bulikanelela luli ni bupilo bwanaalatehezwi ki bona Adama.—1 Makor. 15:45; 1 Tim. 2:6.

7. Ki ifi yemiñwi ya miliko yanaakopani ni yona Jesu hanaali fa lifasi?

⁷ Jesu naazwezipili kusepahala ku Ndatahe wa kwa lihalimu mwa lika kaufela kusina taba ni miliko yemiñata yanaakopani ni yona hanaali fa lifasi. Jesu hanaasali mwanana, naatokwa kuipeya kwatasaa bashemi bahae bane basika petahala, nihaike kuli yena naapetahalile. (Luka 2:51) Hanaali mwa lilimo za kunonoboka, naatokwa kuhanela batu bane bamukukueza kuli asike autwa bashemi bahae kamba kuutwa Jehova. Mi hasaahulile, Jesu naatokwa kuhanyeza Satani Diabulosi yanaa mulika kuli aeze sibi, mi mane Satani naamutaluselize ka kunonga kuli atuhele kusepahala ku Mulimu. (Mat. 4:​1-11) Satani naabata hahulu kuli Jesu aeze sibi ilikuli apalelwe kulifa tiululo.

8. Ki ifi miliko yemiñwi yanaatiyezi Jesu?

⁸ Ka nako ya bukombwa bwahae fa lifasi, Jesu naatiyezi miliko yemiñwi hape. Lila zahae neli munyandisize mi nelibata kumubulaya. (Luka 4:​28, 29; 13:31) Hape naatokwa kutiyela bufokoli bwa balateleli bahae. (Mare. 9:​33, 34) Ka nako yanaazekiswa, naatukufalizwe ni kusheununwa. Hasamulaho, naabulailwe  sina sikebenga mi naautwile butuku bobutuna. (Maheb. 12:​1-3) Naatokwa kutiyela muliko wa mafelelezo wo anosi, asatusiwi ki Jehova. b—Mat. 27:46.

9. Luikutwa cwañi ka za buitomboli bwanaaezize Jesu? (1 Pitrosi 1:8)

⁹ Kusina kukakanya, Jesu naaezize buitomboli bobutuna kuli afane bupilo bwahae sina tiululo. Kunahanisisa ka za buitomboli bobutuna bwanaaezize Jesu kabakala luna kutahisa kuli lumulate hahulu.—Mubale 1 Pitrosi 1:8.

10. Ki buitomboli mañi bwanaaezize Jehova kuli afane Mwanaa hae sina tiululo?

¹⁰ Jehova naaezize buitomboli mañi kuli Jesu afane bupilo bwahae sina tiululo? Jehova ni Jesu baswalisana hahulu sina mwaswalisanela ndate ni mwanaa hae wamushimani. (Liprov. 8:30) Kacwalo, munahane feela mwanaaikutwezi Jehova hanaaboni Jesu inzaa tiyela miliko yemiñata hanaali fa lifasi. Kusina kukakanya, Jehova naautwile hahulu butuku hanaaboni Mwanaa hae inzaa nyandiswa, kuhaniwa, ni kulikiwa.

11. Mufe mutala obonisa mwanaaikutwezi Jehova ka nako yanaabulaiwa Jesu.

¹¹ Mushemi yakile ashwelwa ki mwana wautwisisa hande masitapilu atahiswanga ki muinelo wo. Kusina taba kuli lunani tumelo yetiile mwa sepo ya zuho, luikutwanga hahulu bumaswe mutu yelulata hatimela. Mutala wo ulutusa kuutwisisa mwanaaikutwezi Jehova ka 33 C.E. hanaaboni Mwanaa hae inzaa nyanda ni kushwa. c—Mat. 3:17.

12. Ki lika mañi zelukona kueza pili lizazi la Kupuzo lisika fita kale?

¹² Kuzwa cwale kuisa fa lizazi la Kupuzo, mukaeza hande haiba muituta zeñata ka za tiululo hamueza tuto ya ka butu kamba hamulapela sina lubasi. Mwakona kuitusisa Buka ya Lipatisiso ya Lipaki za Jehova, kamba lihatiso zeñwi za kuituta ka zona Bibele kuli muzibe zeñata ka za tiululo. d Hape mubone teñi kuli mwaitusisa tomahanyo ya kubala Mañolo A Kupuzo yefumaneha mwa Buka ya Mukopano wa Bupilo Bwaluna Bwa Sikreste ni Bukombwa. Mi fa lizazi la Kupuzo, muhupule kubuha tukiso yeipitezi ya kunyakisisa Liñolo la Zazi. Haiba luitukiseza Kupuzo mwa lipilu zaluna, lukatusa babañwi kuli ni bona batusiwe ki Kupuzo.—Ezira 7:10.

 MUTUSE BABAÑWI KULI NI BONA BATUSIWE KI KUPUZO

13. Ki ifi nto yapili yelukona kueza kuli lutuse babañwi kuli ni bona batusiwe ki Kupuzo?

¹³ Lukona kutusa cwañi babañwi kuli ni bona batusiwe ki Kupuzo? Nto yapili yelukona kueza ki kubamema. Kwandaa kumema feela batu bolufumananga haluli mwa bukombwa, lwakona kulukisa mukoloko wa batu babañwi bolukona kumema. Batu bao bakona kuba bahabo luna, bolubeleka ni bona, bolukena ni bona sikolo, ni batu babañwi boluziba. Nihaikaba kuli lunani feela tupampili tusikai twa kumemela batu kwa Kupuzo, lwakona kumema babañwi ka kubalumela linki. Haiba lueza cwalo, mwendi batu babañata bakona kuikatulela kufumaneha kwa Kupuzo.—Muek. 11:6.

14. Mufe mutala obonisa butokwa bwa kufa mutu pampili ya kumumemela kwa Kupuzo kamba kumulumela linki?

¹⁴ Batu bakona kufumaneha kwa Kupuzo haiba lubafa pampili ya kubamemela kwa Kupuzo kamba kubalumela linki. Zazi leliñwi, kaizeli yanyezwi ku muuna yasi Paki, naakomokile hahulu muunaa hae hanaa mutaluselize kuli ukaya ni yena kwa Kupuzo. Ki kabakalañi hanaa komokisizwe ki taba yeo? Kakuli ka lilimo zeñata, kaizeli yo naasusuezanga muunaa hae kuli afumanehe kwa Kupuzo, kono naasafumanehangi. Ki lika mañi zenetahisize kuli aikatulele kufumaneha kwa Kupuzo? Muuna yo naabulezi kuli, “nenifilwe memo,” mi naatalusize kuli naafilwe memo yeo ki muuna-muhulu yomuñwi mwa silalanda yanaazibana ni yena. Muuna yo naafumanehile kwa Kupuzo silimo seo, mi naazwezipili kufumanehanga kwa Kupuzo.

15. Ki lika mañi zeluswanela kuhupula halumemela batu kwa Kupuzo?

¹⁵ Muhupule kuli batu belumema bakona kuba ni lipuzo, sihulu haiba ki lwapili kufumaneha kwa mikopano yaluna. Lukaeza hande haiba lunahanisisa ka za lipuzo zebakona kulubuza ni kuitukiseza kulialaba. (Makolo. 4:6) Ka mutala, babañwi bakona kuipuza kuli: ‘Ki lika mañi zekaezahala kwa Kupuzo?’ ‘Ikaanga nako yekuma kai?’ ‘Niswanela kuapala cwañi?’ ‘Kana nikatokwa kulifa kuli nifumanehe kwateñi?’ ‘Kana kukaba ni likoleko?’ Halumemela  mutu kwa kupuzo, lwakona kumubuza kuli, “Kana munani lipuzo?” kihona lukaalaba lipuzo zahae. Hape lwakona kuitusisa vidio yeli, Muhupule Lifu la Jesu ni yeli, Kiñi ze Ezahalanga Kwa Ndu ya Mubuso? kuli lutuse mutu yo kuutwisisa moiezezwanga mikopano yaluna. Mi mwa tuto 28 ya buka ya Muikole Bupilo Kuya Kuile! kunani lisupo zeñata zende zelukona kuitusisa.

16. Ki lipuzo mañi zeñwi zebakona kuba ni zona batu babafumanehile kwa Kupuzo?

¹⁶ Hamulaho wa kufumaneha kwa Kupuzo, batu babafumanehile lwapili kwa Kupuzo bakona kuba ni lipuzo zeñwi. Bakona kuipuza libaka hane kusina mutu yanaacile sinkwa ni kunwa waine, kamba libaka batu basikai feela hane baezize cwalo. Hape mwendi bakona kuipuza kuli luezanga hakai Kupuzo. Mi mwendi bakabata kuziba haiba mikopano kaufela ya Lipaki za Jehova ieziwanga ka nzila yeswana. Nihaike kuli lipuzo zeo zaalabiwanga mwa ngambolo ya Kupuzo, babafumanehile lwapili kwa Kupuzo mwendi bakatokwa kutalusezwa litaba ka butungi. Taba ye fa jw.org yenani toho ya taba yeli, “Ki Kabakalañi Lipaki za Jehova Habaezanga Mulalelo wa Mulena ka Kushutana ni Mobuezezanga Bulapeli Bobuñwi?” yakona kulutusa kualaba zeñwi za lipuzo zabona. Pili lizazi la Kupuzo lisika fita kale, ka nako ya Kupuzo, ni hamulaho wa Kupuzo, luswanela kueza molukonela kaufela kutusa batu “ba lipilu zende” kuli nibona batusiwe ki Kupuzo.—Lik. 13:48.

MUTUSE BABAFOKOZI KWA MOYA

17. Baana-bahulu bakona kutusa cwañi babafokozi kwa moya? (Ezekiele 34:​12, 16)

¹⁷ Ka nako ya Kupuzo, baana-bahulu bakona kutusa cwañi babafokozi kwa moya? Mubabonise kuli mwabaisa pilu. (Mubale Ezekiele 34:​12, 16.) Pili lizazi la Kupuzo lisika fita kale, muikataze kuambola ni batu babañata babafokozi kwa moya. Mubataluseze kuli mwabaisa pilu ni kuli mubata kubatusa ka momukonela kaufela. Mubamemele kwa Kupuzo. Haiba bafumaneha kwa Kupuzo, mubaamuhele ka lilato. Mi hamulaho wa Kupuzo, muzwelepili kuambolanga ni bona, ni kubatusa  kwa moya kuli bakutele ku Jehova.—1 Pit. 2:25.

18. Ki lika mañi zelukona kueza kaufelaa luna kuli lutuse babafokozi kwa moya? (Maroma 12:10)

¹⁸ Mizwale ni likaizeli kaufela mwa puteho bakona kutusa babafokozi kwa moya babafumanehile kwa Kupuzo. Ka mukwa ufi? Ka kubabonisa lilato, sishemo, ni likute. (Mubale Maroma 12:10.) Muhupule kuli balatiwa baluna bao mwendi neku babezi taata kufumaneha kwa mikopano hape. Mwendi nebaikalezwi kuli habana kuamuhelwa hande. e Kacwalo, musike mwababuza lipuzo zeka bautwisa maswabi kamba kubulela lika zeka bautwisa butuku kwa pilu. (1 Mates. 5:11) Mizwale ni likaizeli bao ki Bakreste sina luna. Lutabile kulapela Mulimu ka kuswalisana ni bona hape!—Samu 119:176; Lik. 20:35.

19. Kuhupula lifu la Jesu kukona kulutusa cwañi?

¹⁹ Lwaitumela kuli Jesu naalulaezi kuhupulanga lifu lahae silimo ni silimo, mi lwautwisisa libaka Kupuzo haili ya butokwa. Haiba lufumaneha kwa Kupuzo, lukatuseha ni kutusa babañwi ka linzila zeñata. (Isa. 48:​17, 18) Lukalata hahulu Jehova ni Jesu. Lukabonisa kuli lwaitebuha hahulu zeba luezelize. Lukatiisa silikani saluna ni mizwale ni likaizeli baluna. Mi mwendi lukatusa babañwi kuziba zebaswanela kueza kuli ni bona baikole limbuyoti zetahiswa ki tiululo. Lizazi la Kupuzo ki la butokwa hahulu mwa silimo; kacwalo, haike lueze molukonela kaufela kuitukiseza Kupuzo ya silimo se!