TABA YA KUITUTA 4
PINA 18 Kuitebuha Tiululo
Luitutañi Kwa Tiululo?
“Lilato la Mulimu nelipatuluzwi cwana.”—1 JOA. 4:9.
ZEKAITUTIWA
Zeluituta kwa tiululo ka za tulemeno totunde twa Jehova Mulimu ni twa Jesu Kreste.
1. Kufumaneha kwa Kupuzo ya lifu la Kreste yeeziwanga silimo ni silimo kulutusa cwañi?
KUSINA kukakanya, mwalumela kuli tiululo ki mpo ya butokwa hahulu! (2 Makor. 9:15) Bakeñisa kuli Jesu naalushwezi, mwakona kuba ni silikani sesitiile ni Jehova Mulimu. Hape mwakona kuba ni sepo ya kupila kuya kuile. Kacwalo, kwaswanela luli kuitebuha tiululo ni kuitumela ku Jehova, yena yanaasusuelizwe ki lilato kuli alufe mpo yeo. (Maro. 5:8) Jesu naatomile Kupuzo ya lifu lahae yeeziwanga silimo ni silimo kuli alutuse kuzwelapili kuitebuha tiululo ni kuli lusike lwalibala zaluezelize Jehova ni Jesu.—Luka 22:19, 20.
2. Lukanyakisisañi mwa taba ye?
2 Silimo se, Kupuzo ikaezwa la Mukibelo, April 12, 2025. Kusina kukakanya, kaufelaa luna lusweli kuitukiseza kuyo fumaneha teñi. Lukatusiwa hahulu haiba ka nako ya Kupuzo lufumana nako ya kunahanisisa a zaluezelize Jehova ni Mwanaa hae. Mwa taba ye, lukanyakisisa zeluituta kwa tiululo ka za Jehova ni Mwanaa hae. Mi mwa taba yetatama, lukatusiwa kuutwisisa molukona kutusezwa ki tiululo yeo ni molukona kuboniseza kuli lwaitebuha yona.
ZELUITUTA KWA TIULULO KA ZA JEHOVA
3. Lifu la mutu alimuñwi likona kuliulula cwañi batu babañata-ñata? (Mubone ni siswaniso.)
3 Tiululo iluluta ka za katulo yelukile ya Jehova. (Deut. 32:4) Ka mukwa ufi? Munahane taba ye: Luhozize sibi sesitahisa lifu, ku Adama yanaasika utwa. (Maro. 5:12) Kuli Jehova alulukulule kwa sibi ni lifu, naalukisize kuli Jesu afane bupilo bwahae sina tiululo. Kono sitabelo sa mutu alimuñwi yapetahalile sikona kuliulula cwañi batu babañata-ñata? Muapositola Paulusi utalusa kuli: “Sina babañata hababile baezalibi kabakala kusautwa kwa mutu alimuñwi [yena Adama], ka mukwa oswana babañata bakaba babalukile kabakala kuutwa kwa mutu alimuñwi hape [yena Jesu].” (Maro. 5:19; 1 Tim. 2:6) Ka mubulelelo omuñwi, kabakala kusautwa kwa mutu alimuñwi yanaapetahalile, nelubile batanga ba sibi ni lifu. Kacwalo, nekutokwahala mutu yomuñwi yapetahalile kuli alulukulule.
Mutu alimuñwi naatahisize kuli lube batanga ba sibi ni lifu. Mi mutu yomuñwi hape utahisize kuli lulukululwe (Mubone paragilafu 3)
4. Ki kabakalañi Jehova hanaasika tuhelela feela kuli bana ba Adama ba lipilu zende bapile kuya kuile?
4 Kana Jesu naaswanela luli kushwa kuli alulukulule? Kana Jehova naasakoni kuatula feela kuli bana ba Adama ba lipilu zende bapile kuya kuile? Ka kuba batu babasika petahala, lukona kunahana kuli yeo neikaba nzila yende ya kutatulula ka yona butata. Kono kueza cwalo nekusike kwalumelelana ni katulo ya Jehova yelukile. Bakeñisa kuli Jehova ulukile, naasike atuhelela feela kusautwa kwa Adama.
5. Ki kabakalañi halukona kukolwa kuli Jehova ukaeza sesilukile kamita?
5 Kono kucwañi kambe Jehova naasika lukisa tiululo kamba kukumalela kwa katulo yahae yelukile ka kulumeleza feela kuli bana ba Adama babasika petahala bapile kuya kuile? Batu nebaka kona kunahana kuli mwendi Mulimu ukapalelwa kubonisa katulo yelukile ni mwa litaba zeñwi. Ka mutala, batu nebaka kakanya ka za haiba Jehova ukataleleza lisepiso zahae kaufela. Haluswaneli kunahana kuli nto yeo yakona kuezahala. Bakeñisa kuli Jehova naaezize sesilukile nihaike kuli naatokwa kufa Mwanaa hae yalatwa sina sitabelo, lunani buikolwiso bwa kuli kamita ukaeza sesilukile.
6. Tiululo ibonisa lilato la Jehova ka linzila lifi? (1 Joani 4:9, 10)
6 Ki niti kuli tiululo ilutusa kuutwisisa kuli Jehova ulukile, kono sihulu ilutusa kuutwisisa butuna bwa lilato lahae. (Joa. 3:16; Mubale 1 Joani 4:9, 10.) Tiululo hailuluti feela kuli Jehova ubata kuli lupile kuya kuile, kono hape iluluta kuli ubata kuli lube kalulo ya lubasi lwahae. Munahane taba ye: Adama hanaaezize sibi, Jehova naamulunduzi mwa lubasi lwahae. Kabakaleo, kaufelaa luna lupepezwi kwandaa lubasi lwa Jehova. Kono kabakala tiululo, Jehova uswalezi libi zaluna mi kwapili ukakutiseza mwa lubasi lwahae batu kaufela bababonisa tumelo ni kuipeya kuutwa. Nihaiba ka nako ya cwale lwakona kuba ni silikani sesitiile ni Jehova ni mizwale ni likaizeli baluna. Jehova walulata luli!—Maro. 5:10, 11.
7. Mwanaanyandezi Jesu kulutusa cwañi kuutwisisa mwalulatela Jehova?
7 Haiba lunyakisisa zanaaitombozi Jehova, lukautwisisa hande mwalulatela. Satani upiha kuli hakuna mutu yakona kuzwelapili kusepahala ku Mulimu haiba akopana ni miinelo yetaata. Kuli abonise kuli taba yeo ki ya buhata, Jehova naatuhelezi Jesu kunyanda pili asika shwa kale. (Jobo 2:1-5; 1 Pit. 2:21) Jehova naaiponela Jesu inzaa sheununwa ki babahulu ba bulapeli bane bamulwanisa, kushapakiwa ki masole, ni kukokotelwa fa kota ya linyando. Mi Jehova naaiponezi Mwanaa hae yalatwa haashwa lifu leli butuku. (Mat. 27:28-31, 39) Jehova naanani maata a kutuhelisa muinelo wo ka nako ifi kamba ifi. Ka mutala, bwalwanisi hane babulezi kuli: “Cwalehe Mulimu amulamulele haiba wamubata,” Jehova naakona kumulamulela. (Mat. 27:42, 43) Kono Jehova hanaaka eza cwalo, tiululo neisike yalifiwa mi nelusike lwaba ni sepo niyekana. Kacwalo, Jehova naatuhelezi Mwanaa hae kuitiisa hanaanyanda kufitela ashwa.
8. Ki lika mañi zelukolwisa kuli Jehova naautwile butuku hanaaboni Mwanaa hae inzaa nyanda? Mutaluse. (Mubone ni siswaniso.)
8 Haluswaneli kunahana kuli Jehova haana maikuto kabakala kuli ki Mulimu yamaata kaufela! Lubupilwe ka siswaniso sa Jehova; kacwalo, kwaswanela kulumela kuli unani maikuto kakuli ni luna lubupilwe ni maikuto. Bibele italusa kuli waikutwanga “butuku kwa pilu” ni kuli ‘waswabanga.’ (Samu 78:40, 41) Hape munahane zeneezahezi ku Abrahama ni Isaka. Jehova naabulelezi Abrahama kuli afe mwanaa hae sina sitabelo. (Gen. 22:9-12; Maheb. 11:17-19) Munahane feela maikuto ashutana-shutana anaabile ni ona Abrahama hanaaitukiseza kubulaya mwanaa hae Isaka ka tipa. Jehova ulukela kuba yanaautwile hahulu butuku hanaaboni Mwanaa hae inzaa bulaiwa ka nzila yesituhu ki batu babasa sabi Mulimu!—Mubone vidio ye fa jw.org yeli, Mulikanyise Tumelo Yabona—Abrahama, Kalulo 2.
Jehova naautwile hahulu butuku hanaaboni Mwanaa hae inzaa nyanda (Mubone paragilafu 8)
9. Liñolo la Maroma 8:32, 38, 39 limitusa cwañi kuutwisisa lilato lelituna lanani lona Jehova ku mina ni kwa mizwale ni likaizeli bamina?
9 Tiululo iluluta kuli hakuna mutu yalulata hahulu sina mwalulatela Jehova, mane nihaiba bahabo luna bolulata kamba balikani baluna babatuna. (Mubale Maroma 8:32, 38, 39.) Kusina kukakanya, Jehova ululata hahulu kufita mane ni moluitatela. Kana mubata kupila kuya kuile? Jehova yena ubata hahulu kuli mupile kuya kuile. Kana mubata kuli libi zamina liswalelwe? Jehova yena ubata hahulu kuswalela libi zamina. Saabata feela kikuli, muamuhele mpo yahae yebonisa sishemo ka kubonisa tumelo ni kuipeya kuutwa. Kaniti luli, tiululo ki mpo ya butokwa hahulu yebonisa kuli Jehova ululata hahulu! Mi mwa lifasi lelinca, mane lukaituta lika zeñata hahulu ka za lilato la Jehova.—Muek. 3:11.
ZELUITUTA KWA TIULULO KA ZA JESU
10. (a) Ki lika mañi sihulu zenetahisize kuli Jesu autwe hahulu bumaswe ka za lifu lahae? (b) Jesu naabonisize cwañi kuli zanaabulezi Satani ka za libizo la Jehova ki za buhata? (Mubone ni mbokisi yeli, “ Jesu Naayemezi Libizo la Jehova ka Busepahali Bwahae.”)
10 Jesu uiyakatwa hahulu libizo la Ndatahe. (Joa. 14:31) Jesu naautwile hahulu bumaswe kakuli naaziba kuli kufiwa mulatu wa kunyefula Mulimu ni kumukwenuhela nekuka tahisa nyazo fahalimwaa libizo la Ndatahe. Ki lona libaka hanaalapezi kuli: “Ndate, haiba kwakonahala, komoki ye ifitele kwahule ni na.” (Mat. 26:39) Kono bakeñisa kuli Jesu naazwezipili kusepahala ku Jehova kuisa lifu, naabonisize ka kutala kuli litaba zanaabulezi Satani ka za Ndatahe ki za buhata.
11. Jesu naabonisize cwañi kuli naalata hahulu batu? (Joani 13:1)
11 Tiululo hape iluluta kuli Jesu uiyakatwa hahulu batu, sihulu balutiwa bahae. (Liprov. 8:31; mubale Joani 13:1.) Ka mutala, Jesu naaziba kuli mwa bukombwa bwahae bwa fa lifasi, naakakopana ni miinelo yemiñwi yetaata hahulu, sihulu kushwa lifu leli butuku. Niteñi, Jesu naapetile buikalabelo bwahae fa lifasi, isiñi ka libaka feela la kuli Jehova naabata kuli aeze cwalo, kono neli ka libaka la kuli naalata batu. Jesu naabonisize kuli naalata hahulu batu ka kukutaza ku bona, kubaluta, ni kubatusa. Mane nihaiba fa lizazi lanaabulailwe, Jesu naabile ni nako ya kutapisa mahutu a baapositola bahae, kubaluta, kubasusueza ni kubaomba-omba. (Joa. 13:12-15) Mi hanaali fa kota ya linyando, naabile ni nako ya kutusa sikebenga sene situha sishwa kuba ni sepo, mi naalukisize kuli mahe akone kubabalelwa. (Luka 23:42, 43; Joa. 19:26, 27) Kacwalo, Jesu naabonisize lilato lahae lelituna mwa bupilo bwahae kaufela, isiñi feela ka lifu lahae.
12. Jesu uzwelapili kueza buitomboli kabakala luna ka mukwa ufi?
12 Nihaike kuli Jesu naashwile “feela hañwi,” usaeza buitomboli kabakala luna. (Maro. 6:10) Ka mukwa ufi? Uzwelapili kusebeza kuli alufe lika zende zeñata zekonahaliswa ki tiululo. Halunyakisiseñi lika zasweli kueza. Usebeza sina Mulenaa luna, Muprisita Yapahami, ni toho ya puteho. (1 Makor. 15:25; Maef. 5:23; Maheb. 2:17) Ki yena yaetelela musebezi wa kukubukanya babatozizwe ni buñata bobutuna bwa batu, ili musebezi okafezwa kueziwa pili ñalelwa yetuna isika fela kale. b (Mat. 25:32; Mare. 13:27) Hape ubona teñi kuli batanga bahae babasepahala bafepiwa hande kwa moya mwa mazazi a mafelelezo a. (Mat. 24:45) Mi mwahalaa nako kaufela ya Puso Yahae ya Lilimo ze Sikiti, ukazwelapili kueza lika zelutusa. Kaniti luli, Jehova naalufile Mwanaa hae kuli alutuse!
MUZWELEPILI KUITUTA
13. Kunahanisisa kukona kumitusa cwañi kuituta zeñata ka za lilato lanani lona ku luna Mulimu ni Kreste?
13 Mwakona kuituta zeñata ka za lilato lanani lona ku luna Jehova Mulimu ni Kreste Jesu haiba muzwelapili kunahanisisa ka za lilato leo. Ka nako ya Kupuzo ya silimo se, mwakona kubala ka tokomelo buka iliñwi kamba kufitelela kwa Libuka za Evangeli. Musike mwabala litaba zeñata hahulu ka nako yeswana. Kono mubale ka kuiketa mi mulemuhe mabaka amañwi haluswanela kulata Jehova ni Jesu. Mi mueze momukonela kaufela kutaluseza babañwi zemuituta.
14. Ka kuya ka Samu 119:97 ni litaluso ze kwatasi, kueza lipatisiso kukona kulutusa cwañi kuituta lika zenca ka za tiululo hamohocwalo ni ka za lituto zeñwi? (Mubone ni siswaniso.)
14 Haiba semubile mwa niti ka lilimo zeñata, mwakona kukakanya ka za haiba kunani lika zenca zemukona kuituta kwa litaba zezibahala hahulu zecwale ka katulo yelukile ya Mulimu, lilato lahae ni tiululo. Niti kikuli, lukazwelapili kuituta lika zenca kwa litaba zeo ni zeñwi. Kacwalo, ki lika mañi zemukona kueza? Mubale ni kuituta litaba zeñata ze mwa lihatiso zaluna. Haiba mufumana taba yemusa utwisisi hande, mueze lipatisiso. Mi mwahalaa lizazi, munahanisise lika zenca zemuitutile ka za Jehova, Mwanaa hae ni ka za lilato labona ku mina.—Mubale Samu 119:97 ni litaluso ze kwatasi.
Nihaike kuli selubile mwa niti ka lilimo zeñata, lwakona kuzwelapili kuitebuha tiululo (Mubone paragilafu 14)
15. Ki kabakalañi haluswanela kuzwelapili kuituta lika zenca mwa Bibele?
15 Musike mwazwafa haiba musafumani lika zenca kamba zetabisa nako kaufela hamubala kamba kueza lipatisiso. Ka mubulelelo omuñwi, muswana sina mutu yabata gauda. Hañata, mutu yabata gauda utandanga lihora zeñata kamba mane mazazi kuli aifumane. Kono uzwelangapili kubata ka pilu-telele kakuli waziba kuli gauda yakafumana, nihaike kuli ki yenyinyani hahulu, ki ya butokwa hahulu ku yena. Kono nto yenca kaufela yeluituta mwa Bibele ki ya butokwa hahulu kufita gauda! (Samu 119:127; Liprov. 8:10) Kacwalo, mube ni pilu-telele mi mukumalele kwa tomahanyo yamina ya kubala Bibele.—Samu 1:2.
16. Lukona kulikanyisa cwañi Jehova ni Jesu?
16 Hamunze muituta, mubate linzila za kusebelisa ka zona zemuituta. Ka mutala, mulikanyise katulo yelukile ya Jehova ka kusaketulula babañwi. Mi mulikanyise lilato la Jesu ku Ndatahe ni kwa batu babañwi ka kuitatela kunyanda kabakala libizo la Jehova ni kueza zeñata kuli mutuse Bakreste babañwi. Hape mulikanyise Jesu ka kukutaza ku babañwi kuli ni bona babe ni kolo ya kuamuhela mpo ya Jehova ya butokwa hahulu.
17. Lukanyakisisañi mwa taba yetatama?
17 Haiba luzwelapili kuituta ka za tiululo, lukalata hahulu Jehova ni Mwanaa hae. Mi ni bona baka lulata hahulu. (Joa. 14:21; Jak. 4:8) Kacwalo, haike luitusise lika kaufela zalufile Jehova kuli luzwelepili kuituta ka za tiululo. Mwa taba yetatama, lukanyakisisa linzila zeñwi molukona kutusezwa ki tiululo ni molukona kuboniseza kuli lwaitebuha lilato la Jehova.
PINA 107 Mulimu Ulutomezi Mutala wa Lilato
a TALUSO YA MANZWI: “Kunahanisisa” kutalusa kuisa hahulu muhupulo kwa taba yeñwi ni kuinyakisisa ka butungi.
b Kukubukanya “lika ze kwa mahalimu” kwanaabulezi Paulusi kwa Maefese 1:10, kwashutana ni kukubukanya “baketiwa” kwanaabulezi Jesu kwa Mateu 24:31 ni kwa Mareka 13:27. Paulusi uama kwa nako yeo Jehova aketa bana bahae ba kwa moya ka kubatoza ka moya okenile. Jesu yena uama kwa nako yeo Bakreste babatozizwe babasali fa lifasi bakaangelwa kwa lihalimu ka nako ya ñalelwa yetuna.
