TABA YA KUITUTA 5
PINA 108 Lilato la Mulimu Lelisa Feli
Molutusezwa ki Lilato la Jehova
“Kreste Jesu naatile mwa lifasi kuto pilisa baezalibi.”—1 TIM. 1:15.
ZEKAITUTIWA
Molutusezwa ki tiululo ni molukona kuboniseza buitebuho bwaluna ku Jehova.
1. Ki lika mañi zelukona kueza kuli lutabise Jehova?
LUUNGE kuli mufile mutu yemulata mpo yeipitezi, ili yende ni yekona kumutusa. Mukaikutwa hahulu bumaswe haiba mutu yo abeya feela mpo yeo mwa sibulukelo ni kusaisa kwateñi pilu. Kono mukataba haiba mutu yo aitusisa hande mpo yeo ni kubonisa kuli waitebuha yona. Sisupo ki sifi? Jehova ufile Mwanaa hae kabakala luna. Jehova ubanga ni tabo yetuna halubonisa buitebuho kwa mpo ya butokwa hahulu yeo ni kwa lilato lahae, ili lene limususuelize kufa tiululo!—Joa. 3:16; Maro. 5:7, 8.
2. Lukanyakisisañi mwa taba ye?
2 Kono nako hainze iya, lwakona kukala kutuhela kuitebuha hahulu tiululo. Haiba kuba cwalo, kukaswana feela sina kubeya mpo ya Mulimu mwa sibulukelo. Lwatabela mpo yeo, kono haluisi pilu kwateñi. Kuli taba yeo isike yaezahala, luswanela kunahanisisanga kamita ka za lika kaufela zaluezelize Mulimu ni Kreste. Taba ye yakona kulutusa kueza cwalo. Lukanyakisisa molutusezwa ki tiululo ka nako ya cwale ni moika lutuseza kwapili. Hape lukanyakisisa molukona kuboniseza buitebuho kwa lilato la Jehova, sihulu ka nako ye ya Kupuzo.
MOLUTUSEZWA KA NAKO YA CWALE
3. Tiululo ilutusa cwañi ka nako ya cwale?
3 Sitabelo sa tiululo sa Kreste sisweli salutusa. Ka mutala, Jehova waswalelanga libi zaluna kabakala tiululo. Haasika tameha kuluswalela. Kono walata kueza cwalo. Muñoli yomuñwi wa samu yanaanani buitebuho naaopezi kuli: “Kakuli wena Jehova u yomunde mi ulata kuswalela.”—Samu 86:5; 103:3, 10-13.
4. Jehova naafile tiululo kabakala bo mañi? (Luka 5:32; 1 Timotea 1:15)
4 Babañwi bakona kuikutwa kuli habaswaneli kuswalelwa ki Jehova. Kono niti kikuli, kaufelaa luna haluswaneli. Muapositola Paulusi naautwisisa kuli ‘naasaswaneli kubizwa muapositola.’ Nihakulicwalo, naaekelize kubulela kuli: “Ki ka sishemo sa Mulimu hanili senili sona.” (1 Makor. 15:9, 10) Jehova waluswalelanga halubakela libi zaluna. Libaka? Kakuli walulata, isiñi kuli lwaswanela kuswalelwa. Haiba mukatazwa ki maikuto a kuli hamuswaneli kuswalelwa, muhupula kuli Jehova ufile tiululo, isiñi kwa batu babasina sibi, kono kwa baezalibi bababakile.—Mubale Luka 5:32; 1 Timotea 1:15.
5. Kana kunani mutu yaswanela kuikutwa kuli unani tukelo ya kuboniswa sishemo ki Jehova? Mutaluse.
5 Haluswaneli kuikutwa kuli Jehova uswanela kuluswalela ka libaka feela la kuli lumusebelelize ka lilimo zeñata. Nihakulicwalo, Jehova waitebuha lika kaufela zelu muezelize. (Maheb. 6:10) Naalufile Mwanaa hae sina mpo yefiwa feela, isiñi sina tuwelo yelufiwa kabakala sebelezo yaluna ku yena. Kacwalo, kufosahalile kunahana kuli lwaswanela kuswalelwa bakeñisa kuli luezize zeñata mwa sebelezo yaluna ku Jehova, haiba luba ni mubonelo wo, fo lutalusa kuli halutokwi tiululo.—Mubapanye Magalata 2:21.
6. Ki kabakalañi Paulusi hanaaikatalize kupeta zeñata mwa sebelezo yahae ku Jehova?
6 Paulusi naaziba kuli naasike akona kushemubiwa ki Jehova ka libaka feela la kuli naapetile zeñata mwa sebelezo yahae ku yena. Kono cwale ki kabakalañi hanaaikatalize kupeta zeñata mwa sebelezo yahae ku Jehova? Naaezize cwalo kuli abonise buitebuho kwa sishemo sa Jehova sesituna. (Maef. 3:7) Sina Paulusi, ni luna luzwelapili kusebeleza Jehova ka tukufalelo kuli lubonise buitebuho kwa sishemo sahae, isiñi kuli luboniswe sishemo.
7. Ki ifi nzila yeñwi yei lutusa ka yona tiululo ka nako ya cwale? (Maroma 5:1; Jakobo 2:23)
7 Nzila yeñwi yei lutusa ka yona tiululo ka nako ya cwale kikuli, lwakona kuba ni silikani sesitiile ni Jehova. a Sina mokutaluselizwe mwa taba yefelile, halupepiwa nelusi balikani ba Mulimu. Kono kabakala tiululo, lwakona kuba mwa “kozo ni Mulimu” ni kuba ni silikani sesitiile ni yena.—Mubale Maroma 5:1; Jakobo 2:23.
8. Ki kabakalañi haluswanela kuitumela ku Jehova kwa tohonolo ya tapelo?
8 Halunyakisiseñi kalulo iliñwi feela yeama silikani saluna ni Jehova, yona tohonolo ya tapelo. Kwandaa kuteeleza kwa litapelo zelapelwanga kwa mikopano yaluna, Jehova hape wateelezanga ni kwa litapelo zalapelanga mañi ni mañi waluna kwa mukunda. Halulapela, lwatuhelanga kubilaela hahulu, kono yeo haki yona feela nzila yei lutusa ka yona tapelo. Yakona kulutusa kutiisa silikani saluna ni Jehova. (Samu 65:2; Jak. 4:8; 1 Joa. 5:14) Jesu hanaali fa lifasi, naalapelanga hañata bakeñisa kuli naaziba kuli Jehova naateelezanga kwa litapelo zahae ni kuli kulapela nekuka mutusa kuzwelapili kuba ni silikani sesitiile ni Ndatahe. (Luka 5:16) Lwaitumela luli bakeñisa kuli kabakala sitabelo sa Jesu, lwakona kuba balikani ba Jehova mane ni kuambola ni yena ka tapelo!
MOLUKA TUSEZWA KWAPILI
9. Tiululo ikatusa cwañi batanga ba Jehova babasepahala kwapili?
9 Tiululo ikatusa cwañi batanga ba Jehova babasepahala kwapili? Bakafiwa bupilo bobusa feli. Batu babañata banahana kuli taba yeo haikonahali bakeñisa kuli lifu selibile teñi ka lilimo zeñata-ñata. Kono mulelo wa Jehova wa kwa makalelo kikuli batu bapile kuya kuile. Kambe Adama naasika eza sibi, kambe hakuna mutu yanahana kuli kupila kuya kuile hakukonahali. Nihaike kuli kukona kuba taata kulumela kuli lwakona kupila kuya kuile, lwaziba kuli kwakonahala kakuli Jehova naalifile teko yetuna hahulu, bona bupilo bwa Mwanaa hae.—Maro. 8:32.
10. Ki lika mañi zebanyolezwi hahulu Bakreste babatozizwe ni ba lingu zeñwi?
10 Nihaike kuli kupila kuya kuile ki mbuyoti yeluka ikola kwapili, Jehova ubata kuli lunyolelwe hahulu mbuyoti yeo ka nako ya cwale. Bakreste babatozizwe banyolezwi hahulu kuyo ikola bupilo kwa lihalimu inze babusa ni Kreste fahalimwaa lifasi. (Sin. 20:6) Ba lingu zeñwi bona banyolezwi hahulu kuto pila mwa Paradaisi fa lifasi, mi ka nako yeo hakuna yakautwa butuku, kunyanda kamba kuikutwa bumaswe. (Sin. 21:3, 4) Kana mu babañwi ba lingu zeñwi mi munani sepo ya kuto pila kuya kuile fa lifasi? Hakutalusi kuli batu babakato pila fa lifasi haki ba butokwa ku babakayo pila kwa lihalimu. Jehova naabupile batu kuli bapile fa lifasi. Kacwalo, kupila kuya kuile fa lifasi kuka lutahiseza tabo yetuna.
11-12. Ki limbuyoti mañi zeñwi zeluka ikola mwa Paradaisi, ili zeluswanela kunyolelwa hahulu? (Mubone ni maswaniso.)
11 Munahane feela mobuka bela bupilo bwamina mwa Paradaisi fa lifasi. Hamuna kubilaela ka za kukula kamba kushwa. (Isa. 25:8; 33:24) Jehova uka mifa lika zende kaufela zemubata. Ki lika mañi zemutabela kuituta? Kana mutabela kuituta zeñata ka za lifolofolo? Kana mutabela kuituta mwakuitusiseza siliziso sesiñwi? Kana mutabela kuituta kuswanisa? Kusina kukakanya, kukatokwahala batu babaziba kulukisa milalo ya miyaho, bayahi, ni balimi. Mi hape kukatokwahala batu babaka eza misebezi yemiñwi yecwale ka kulukisa lico, kupanga lisebeliso, kucala masimu ni kuababalela. (Isa. 35:1; 65:21) Hamuka pila kuya kuile, mukaba ni nako ya kueza lika zeo kaufela mane ni zeñwi cwalo.
12 Lukaba ni tabo yetuna haluka amuhela batu babashwile babaka zusiwa kwa bafu! (Lik. 24:15) Hape munahane tabo yemukaba ni yona hamuka ituta ka za Jehova ka kunyakisisa lika zeñata zabupile. (Samu 104:24; Isa. 11:9) Mi sa butokwa nikufita kikuli, mukaba ni tabo yetuna kabakala kulapela Jehova kusina nto niyekana yetahisa kuli muikutwe mulatu! Kana mubata kulatehelwa ki tohonolo ya kuto ikola limbuyoti zeo kwapili kabakala “kuikola minyaka ya libi yeina nako yenyinyani”? (Maheb. 11:25) Kutokwa nihanyinyani! Limbuyoti zeo ki zende hahulu kufita buitomboli bufi kamba bufi bolukona kueza ka nako ya cwale. Muhupule kuli, haluna kuzwelapili kulibelela kuto pila mwa Paradaisi fa lifasi kakuli sepo yeo ikatalelezwa. Mi lika zeo kaufela likakonahala kabakala kuli Jehova naalulatile hahulu kuli mane naalufile Mwanaa hae sina tiululo!
Ki limbuyoti mañi zemunyolelwa hahulu kuto ikola mwa Paradaisi? (Mubone paragilafu 11 ni 12)
MUBONISE BUITEBUHO KWA LILATO LA JEHOVA
13. Lukona kubonisa cwañi buitebuho kwa lilato la Jehova? (2 Makorinte 6:1)
13 Lukona kubonisa cwañi buitebuho ku Jehova kabakala kulufa tiululo? Ka kubeya sebelezo yaluna ku yena mwa sibaka sapili. (Mat. 6:33) Esi mane Jesu naashwile “kuli babapila batuhele kupilela bona bañi, kono bapilele yena yanaa bashwezi mi naazusizwe kwa bafu.” (2 Makor. 5:15) Kaniti luli, halubati kuamuhela sishemo sesituna sa Jehova ni kusautwisisa mulelo wasona.—Mubale 2 Makorinte 6:1.
14. Lukona kubonisa cwañi kuli lusepile ketelelo ya Jehova?
14 Hape lwakona kubonisa kuli lwaitebuha lilato la Jehova ka kumusepa ni kulatelela ketelelo yahae. Ka mukwa ufi? Lwakona kueza cwalo halueza likatulo; ka mutala, halueza katulo ka za tuto yepahami kamba mufuta omuñwi wa musebezi, luswanela kunyakisisa zabata Jehova kuli lueze. (1 Makor. 10:31; 2 Makor. 5:7) Halubonisa tumelo yaluna ka likezo, kunani zende zekazwa mwateñi, tumelo yaluna ni silikani saluna ni Jehova likatiya. Mi sepo yaluna ni yona ikatiya.—Maro. 5:3-5; Jak. 2:21, 22.
15. Lukona kubonisa cwañi buitebuho ka nako ya Kupuzo?
15 Kunani nzila yeñwi hape yelukona kubonisa ka yona kuli lwaitebuha lilato la Jehova. Ki ka kuitusisa nako ya Kupuzo ye kubonisa Jehova kuli luitumezi hahulu kabakala kulufa tiululo. Kwandaa kuitukiseza kuyo fumaneha kwa Kupuzo, lwakona kumema babañwi kuli ni bona bayo fumaneha teñi. (1 Tim. 2:4) Mutaluseze batu bomumema zekaezahala kwa Kupuzo. Muka batusa haiba mubabuhisa vidio ye fa jw.org yeli, Ki Kabakalañi Jesu Hanaashwile? ni yeli, Muhupule Lifu la Jesu. Baana-bahulu baswanela kuikataza kumema babafokozi. Munahane feela tabo yetuna yekaba teñi kwa lihalimu ni fa lifasi haiba zeñwi za lingu za Jehova zelatehile likutela mwa mutapi wahae! (Luka 15:4-7) Kwa Kupuzo, lueze molukonela kaufela kulumelisa mañi ni mañi kono sihulu babaka fumaneha lwapili ni batu ili bao sekufitile nako yetelele kuzwa fobafumanehela kwa Kupuzo. Lubata kuli baikutwe kuamuhelwa!—Maro. 12:13.
16. Ki kabakalañi haluswanela kuekeza kwa sebelezo yaluna ka nako ya Kupuzo?
16 Kana mwakona kuekeza kwa sebelezo yamina ka nako ya Kupuzo? Yeo ki nzila yende ya kubonisa ka yona buitebuho kwa lika kaufela zaluezelize Mulimu ni Kreste. Halupeta zeñata mwa bukombwa, lukabona mwalutuseza Jehova mi luka musepa hahulu. (1 Makor. 3:9) Hape muswanela Kubala Mañolo A Kupuzo afumaneha mwa bukanyana ya Kutatuba Mañolo ka Zazi ni Zazi ni mwa buka ya mukopano. Mane mwakona kuketa kuitusisa litimana za mwa Bibele zeo hamueza tuto ya ka butu.
17. Ki lika mañi zetabisanga Jehova? (Mubone ni mbokisi yeli, “ Molukona Kuboniseza Buitebuho Kwa Lilato la Jehova.”)
17 Ki niti kuli miinelo yamina yakona kumipaleliswa kusebelisa liakalezo kaufela zebulezwi mwa taba ye. Kono muhupule kuli Jehova habapanyangi zemueza ku zebaeza babañwi; yena ubona ze mwa pilu yamina. Ubanga ni tabo halemuha kuli mwaitebuha hahulu tiululo, yona mpo ya butokwa hahulu.—1 Sam. 16:7; Mare. 12:41-44.
18. Ki kabakala halubonisa buitebuho ku Jehova Mulimu ni ku Jesu Kreste?
18 Tiululo ki yona feela yekonahalisa kuli libi zaluna liswalelwe, lube ni silikani sesinde ni Jehova, ni kuli lube ni sepo ya kupila kuya kuile. Haike kamita lubonise buitebuho kwa lilato la Jehova, lona lene limususuelize kulufa limbuyoti ze kaufela. (1 Joa. 4:19) Mi haike lubonise buitebuho ni ku Jesu, yena yanaa lulatile hahulu kuli mane naafanile bupilo bwahae kabakala luna!—Joa. 15:13.
PINA 154 Lilato Lelisa Palelwi
a Jehova naaswalezi batanga bahae bane bapilile mane pili Kreste asikafa kale tiululo. Jehova naakona kueza cwalo kakuli naanani buikolwiso bwa kuli Mwanaa hae ukasepahala kuisa lifu. Kacwalo, ku Jehova, nekuswana feela inge kuli tiululo neifilwe pili Jesu asika shwa kale.—Maro. 3:25.
