1. Batu babañata kacenu baisize hahulu pilu kwañi?

 KANA mulemuhile kuli batu babañata kacenu baisa hahulu pilu ku zabona feela? Ka mutala, babañwi baitusisanga mawebusaiti a kulumelana ka ona litaba, ilikuli batu baise hahulu pilu ku bona ni kwa lika zebapetile mwa bupilo. Nihakulicwalo, kunani batu basikai kacenu babafanga kanya ku Jehova Mulimu. Mwa taba ye, lukanyakisisa sekutalusa kufa Jehova kanya ni zeswanela kulususueza kueza cwalo. Hape lukaituta molukona kufela Mulimu kanya yemuswanela ni mwakakanyiseza libizo lahae kwapili.

KUFA JEHOVA KANYA KUTALUSAÑI?

2. Jehova naabonisize cwañi kanya yahae kwa Lilundu la Sinai? (Mubone ni siswaniso.)

² Kanya ki nto mañi? Mwa Bibele, linzwi la “kanya” likona kuama kwa nto ifi kamba ifi yekona kutahisa kuli mutu yomuñwi abe yaipitezi hahulu. Jehova naabonisize kanya yahae ka nzila yeipitezi nakonyana kuzwa falukululela sicaba sa Isilaele mwa butanga mwa Egepita. Munahane taba ye: Maisilaele babañata-ñata bakopani kwa Lilundu la Sinai kuli bautwe zaka babulelela Mulimu. Lilu lelinsu liapesa lilundu. Ka sipundumukela, kuba ni zikinyeho yetuna ni musi, mubu fobahatile wanyanganya mi kunani mamonyi, mishika ni mulumo wa lunaka otibanya mazebe. (Exo. 19:​16-18; 24:17; Samu 68:8) Munahane feela tabo yetuna yene babile ni yona Maisilaele Jehova  hanaabonisize kanya yahae ka nzila yeipitezi hahulu yeo.

3. Lukona kufa cwañi Jehova kanya?

³ Kono kucwañi ka za batu? Kana luli lwakona kufa Jehova kanya? Eni. Nzila yeñwi yelukona kufa ka yona Jehova kanya ki ka kutaluseza babañwi ka za maata ahae amatuna ni tulemeno twahae totunde. Hape lufa Mulimu kanya halu mufa tumbo kabakala lika zalutusa kupeta. (Isa. 26:12) Mulena Davida naatomile mutala omunde hahulu wa kufa Jehova kanya. Davida hanaalapezi fapilaa Maisilaele bane bakopani, naabulelezi Mulimu kuli: “Butuna ni maata ni bunde ni kanya ni bulena ki zahao, wena Jehova, kakuli lika kaufela mwa mahalimu ni mwa lifasi ki zahao.” Davida hasaafelize kulapela, “puteho kaufela yalumbeka Jehova.”—1 Makol. 29:​11, 20.

4. Jesu naafile cwañi Jehova kanya?

⁴ Jesu hanaali fa lifasi, naakanyisize Ndatahe ka kutaluseza batu kuli naaeza limakazo ka maata anaazwa ku Jehova. (Mare. 5:​18-20) Jesu hape naakanyisize Jehova ka litaba zanaabulezi ka za Ndatahe ni mwanaapilisanezi ni batu. Nako yeñwi, Jesu naaluta mwa sinagoge. Mwahalaa batu bane bateeleza ku yena nekunani musali yanaakatalizwe ki mudimona ka lilimo ze 18. Mudimona wo neutahisize kuli musali yo akotobane hahulu. Jesu naautwisisa kuli musali yo naaziyelehile luli mi naabata kumutusa. Kacwalo, aatumela musali yo mi aambola ni yena ka sishemo, ali: “Musali, ulukuluzwi kwa butuku bwahao.” Kihona amubeya mazoho fahalimu, mi honafo musali yo aotoloha mi “akala kukanyisa Mulimu” kabakala kuli Jehova naamutusize kuba ni buikangulo bobunde hape. (Luka 13:​10-13) Musali yo naaswanela luli kufa Jehova kanya, mi ni luna lunani mabaka aswanela a kukanyisa Jehova.

KI LIKA MAÑI ZELUSUSUEZA KUFA JEHOVA KANYA?

5. Ki mabaka mañi atahisa kuli lukuteke Jehova?

⁵ Lufanga Jehova kanya bakeñisa kuli lwamukuteka hahulu. Lunani mabaka amañata atahisa kuli lumukuteke. Jehova ki yamaata kaufela; maata ahae haana maciñekelo. (Samu 96:​4-7) Lika zaezize libonisa hande butali bwahae bobutuna. Ulufile bupilo ni lika kaufela zelutokwa kuli lupile. (Sin. 4:11) Wasepahala. (Sin. 15:4) Hakuna sesipala ku yena, mi watalelezanga lisepiso zahae kamita. (Josh. 23:14) Ki lona libaka mupolofita Jeremia hanaabulezi ka za Jehova kuli: “Mwahalaa bababutali kaufela ba macaba ni mwa mibuso yabona kaufela, hakuna ni yomukana yaswana ni wena”! (Jer. 10:​6, 7) Kaniti luli, lunani mabaka amañata haluswanela kukuteka Ndataa luna wa kwa lihalimu. Kono kwandaa feela kukuteka Jehova, hape lwamulata.

6. Ki kabakalañi halulata Jehova?

⁶ Lufanga Jehova kanya bakeñisa kuli lumulata hahulu. Lwalata Jehova bakeñisa kuli unani tulemeno totunde totuñata. Unani sishemo ni mukekecima. (Samu 103:13; Isa. 49:15) Unani kutwelo-butuku, ili kutalusa kuli haluutwa butuku, ni yena wautwanga butuku. (Zak. 2:8) Ulutusanga kumuziba hande ni kuba balikani bahae. (Samu 25:14; Lik. 17:27) Mi waikokobeza; ‘wainamanga kuli abone lihalimu ni lifasi, ni kuzwisa wa mayemo a kwatasi mwa liluli.’ (Samu 113:​6, 7) Lubata kufa kanya ku Mulimu waluna yomutuna kabakala mabaka ao kaufela.—Samu 86:12.

7. Ki tohonolo mañi yeipitezi yelunani yona?

⁷ Lufanga Jehova kanya bakeñisa kuli lubata kuli babañwi bamuzibe. Batu babañata habazibi niti ka za Jehova. Libaka?  Bakeñisa kuli Satani ufoufalize minahano yabona ka kuhasanya litaba zemaswe hahulu ka za Jehova. (2 Makor. 4:4) Satani ukolwisize batu kulumela kuli Jehova ki Mulimu yasituhu, yasaisi batu pilu ni kuli ki yena yatahisize manyando amañata olubona mwa lifasi. Kono luna lwaziba niti ka za Mulimu waluna! Lunani tohonolo ya kutusa batu kuziba niti ka za Mulimu waluna, mi halueza cwalo, lumufa kanya. (Isa. 43:10) Samu 96 ibulela hahulu za kufa Jehova kanya. Halunze lunyakisisa manzwi afumaneha kwa samu yeo, ili añozwi ka kususumezwa ki moya, munahanisise linzila zemukona kufa ka zona Jehova kanya yemuswanela.

LUKONA KUFA CWAÑI JEHOVA KANYA YEMUSWANELA?

8. Ki ifi nzila yeñwi yelukona kukanyisa ka yona Jehova? (Samu 96:​1-3)

⁸ Mubale Samu 96:​1-3. Lwakona kufa Jehova kanya ka zelubulela ka za hae. Mwa litimana ze, batu ba Jehova bakupiwa kuli ‘baopelele Jehova, balumbeke libizo lahae, bazibahaze taba yende ya kupilisa kwahae ni kuli bazibahaze kanya yahae mwahalaa macaba.’ Zeo kaufela ki linzila zelukona kukanyisa ka zona Ndataa luna wa kwa lihalimu. Majuda babasepahala ni Bakreste ba mwa linako za baapositola nebasa zina-zinangi kutaluseza babañwi ka za lika zende kaufela zanaa baezelize Jehova ni kuyemela libizo lahae. (Dan. 3:​16-18; Lik. 4:29) Lukona kubalikanyisa cwañi?

9-10. Muitutañi ku zeneezahezi ku bo Angelena? (Mubone ni siswaniso.)

⁹ Halunyakisiseñi zeneezahezi ku kaizeli yabizwa Angelena, a ili yapila kwa America. Naayemezi libizo la Jehova ka bundume kwa kampani kwasebeza. Kaizeli Angelena hanaasazo kena musebezi, naamemilwe kwa mukopano ili ko batu kaufela bane basazo kena musebezi kwa kampani yeo nebafilwe kolo ya kutalusa litaba zeñwi ka za simuluho yabona. Bo Angelena nebaitukiselize kuyo bonisa maswaniso abonisa tabo yene banani yona kabakala kuba yomuñwi wa Lipaki za Jehova. Hane batuha bafiwa kolo ya kubulela, yomuñwi wa batu bone babeleka ni bona atalusa kuli naahuliselizwe mwa lubasi lwa Lipaki za Jehova. Mi akala kusheununa zelulumela. Bo Angelena batalusa kuli: “Neniikalezwi hahulu. Kono naipulelisa nali: ‘Kana nikatuhelela mutu yomuñwi kubulela litaba za buhata ka  za Jehova? Kamba kana nika yemela Jehova?’”

¹⁰ Muuna yo hasaafelize kubulela, bo Angelena balapela ka bukuswani mwa pilu. Kihona bataluseza muuna yo ka sishemo kuli: “Simuluho yaka yaswana ni yamina. Ni na nenihuliselizwe mwa lubasi lwa Lipaki za Jehova mi nizwezipili kuba Paki.” Nihaike kuli bo Angelena nebali mwa muinelo otaata hahulu, nebazwezipili kubonisa ka kuwa pilu maswaniso abona ni balikani babona inze basebeleza Jehova ka tabo, mi nebatalusize ka likute litaba zebalumela. (1 Pit. 3:15) Ki lika mañi zenezwile mwateñi? Bo Angelena hase bafelize kubulela, muuna yo naasaaombalile. Muuna yo mane naatalusize linako zende zanaabile ni zona hanaaswalisana ni Lipaki za Jehova inzaa sali mwanana. Bo Angelena batalusa kuli: “Jehova waswanela kuyemelwa. Ki tohonolo kuyemela libizo lahae.” Ni luna lunani tohonolo ya kulumbeka Jehova ni kumukanyisa nihaikaba kuli batu babañwi haba mukuteki.

11. Kuzwa feela kwamulaho, balapeli ba Jehova ba niti basebelisize cwañi sikuka sesi kwa Samu 96:8?

¹¹ Mubale Samu 96:8. Lwakona kufa Jehova kanya ka kuitusisa maluwo aluna. Kuzwa feela kwamulaho, balapeli ba Jehova ba niti bakutekile Jehova ka nzila yeo. (Liprov. 3:9) Ka mutala, Maisilaele nebafile masheleñi ni maluwo abona kuli batuse mwa musebezi wa kuyaha Tempele ni kuibabalela. (2 Mal. 12:​4, 5; 1 Makol. 29:​3-9) Balutiwa ba Jesu babañwi ‘nebaitusisize maluwo abona’ kuli batuse Jesu ni baapositola bahae kufumana zene batokwa. (Luka 8:​1-3) Bakreste ba mwa linako za baapositola ni bona nebatusize mizwale ni likaizeli babona bane bali mwa butokwi. (Lik. 11:​27-29) Kacenu, ni luna lwakona kufa Jehova kanya ka linubu zaluna za kuitatela.

12. Linubu zaluna likona kukanyisa cwañi Jehova? (Mubone ni siswaniso.)

¹² Halunyakisiseñi mutala ulimuñwi feela obonisa mo linubu zaluna likanyisezanga Jehova. Mwa 2020, nekubile ni linanga mwa Zimbabwe. Bupilo bwa batu babañata, kukopanyeleza cwalo ni bwa kaizeli yabizwa Prisca, nebuli mwa lubeta kabakala kutokwa lico. Nihaike kuli nekunani linanga, bo Prisca nebazwezipili kukutazanga la Bulaalu ni la Bufaifi sunda ni sunda, mane nihaiba ka nako ya kulima. Bane bapila mabapa ni bona neba basheununanga kabakala kuya mwa bukombwa mwa sibaka sa kuya kwa kulima, mi neba  babulelelanga kuli, “Mukashwa tala mina.” Bo Prisca nebaalabanga ka buikolwiso kuli, “Jehova hayubekangi batanga bahae.” Kusika fita nako kuzwa fo, bo Prisca batusiwa ki kopano yaluna. Nebakonile kutusiwa kabakala linubu zaluna. Batu bane bapila mabapa ni bo Prisca nebatabisizwe ki taba yeo, mi bababulelela kuli, “Mulimu wamina haasika miyubeka; kacwalo, ni luna lubata kuituta zeñata ka za hae.” Ba 7 kwa batu bane bapila mabapa ni bona bakala kufumanehanga kwa mikopano ya puteho.

13. Lukona kukanyisa cwañi Jehova ka muzamao waluna? (Samu 96:9)

¹³ Mubale Samu 96:9. Lwakona kukanyisa Jehova ka muzamao waluna. Baprisita bane basebeleza kwa tempele ya Jehova nebatokwa kuba babakenile kwa mubili. (Exo. 40:​30-32) Kono nto ya butokwa hahulu yefita bukeni bwa kwa mubili, ki kuba ni muzamao okenile. (Samu 24:​3, 4; 1 Pit. 1:​15, 16) Bibele ibulela kuli luswanela kutubula “butu bwakale” ni kuapala “butu bobunca,” ili kutalusa kuli luswanela kuambuka kunahana ni kueza lika ka nzila yesatabisi Jehova, ni kuituta kunahana ni kueza lika ka nzila yebonisa kuli lulikanyisa Jehova ni tulemeno twahae totunde. (Makolo. 3:​9, 10) Ka tuso ya Jehova, nihaiba batu babaikenyize hahulu mwa muzamao wa buhule ni ba mifilifili, bakona kucinca ni kuapala butu bobunca.

14. Muitutañi ku zeneezahezi ku bo Jack? (Mubone ni siswaniso.)

¹⁴ Halunyakisiseñi zeneezahezi ku muuna yabizwa Jack yanaali wa mifilifili ni yasabisa, ili yanaafilwe lilumbatina la Mudimona. Bo Jack nebaatulezwi lifu kabakala bukebenga bwabona. Kono bo Jack hane balibelela kubulaiwa, balumela kuituta Bibele ni muzwale yanaakutalezanga mwa tolongo mone bapikela. Kusina taba ni mupilelo wabona wa kwamulaho, bo Jack nebatubuzi butu bwabona bwa kale, mi hamulaho wa nako bakwanisa zetokwahala mi bakolobezwa. Bo Jack nebacincize hahulu kuli mane fa lizazi labona la kubulaiwa, babañwi ba balibeleli ba tolongo nebalotisize miyoko hane babalaeza. Mulibeleli yomuñwi wa tolongo naabulezi kuli: “Bo Jack nebabanga babañwi ba mapantiti babamaswe hahulu mwa sibaka se. Kono cwale seli babañwi ba mapantiti babande hahulu.” Sunda yenetatami kuzwa fobabulaelwa bo Jack, mizwale bane bakutezi kwa tolongo kuyo zamaisa mukopano wa ka sunda  nebakopani ni lipantiti yanaafumanehile kwa mukopano lwapili. Ki lika mañi zenee mususuelize kufumaneha kwa mukopano? Naatabisizwe hahulu ki licinceho zene baezize bo Jack mi naabata kuziba zanaatokwa kueza kuli asebeleze Jehova. Kwaiponahalela hande kuli muzamao waluna wakona kukanyisa Ndataa luna wa kwa lihalimu!—1 Pit. 2:12.

JEHOVA UKAKANYISA CWAÑI LIBIZO LAHAE KWAPILI?

15. Jehova ukakanyisa cwañi libizo lahae ka kutala kwapili? (Samu 96:​10-13)

¹⁵ Mubale Samu 96:​10-13. Litimana za mafelelezo za Samu 96 litalusa Jehova kuli ki Muatuli yalukile ni Mulena. Jehova ukakanyisa cwañi libizo lahae kwapili? Ukaeza cwalo ka likatulo zahae. Honacwale-cwale fa, ukayundisa Babilona Yomutuna kabakala nyazo yatahisize fahalimwaa libizo lahae lelikenile. (Sin. 17:​5, 16; 19:​1, 2) Batu babañwi babaka iponela kuyundiswa kwa Babilona Yomutuna bakakona kuswalisana ni luna mwa bulapeli bwa niti. Mi fa Armagedoni, Jehova ukayundisa lifasi la Satani, ili kuyundisa batu kaufela baba mulwanisa ni babanyefula libizo lahae, kono ukapilisa batu kaufela baba mulata ni baba muutwa, ili babatabela kumufa kanya. (Mare. 8:38; 2 Mates. 1:​6-10) Hamulaho wa tiko ya mafelelezo yekaba teñi kwa mafelelezo a Puso ya Kreste ya Lilimo ze 1,000, Jehova ukakenisa libizo lahae ka kutala. (Sin. 20:​7-10) Ka nako yeo, “lifasi likatala zibo ya kanya ya Jehova sina mezi mwakwahelezi liwate.”—Hab. 2:14.

16. Muikatulezi kuezañi? (Mubone ni siswaniso.)

¹⁶ Munahane feela tabo yelukaba ni yona muta libupiwa ze butali kaufela likafa Jehova kanya yeswanela libizo lahae! Kono kufitela nako yeo ifita, lwakona kueza molukonela kaufela kukanyisa Mulimu waluna folubela ni kolo kaufela. Kuli taba yeo ikoñomekiwe, ba Sitopa Sesietelela baketile Samu 96:8 kuli ibe lona liñolo laluna la silimo sa 2025, ili: “Mufe Jehova kanya yeswanela libizo lahae.”