1-2. Ki lika mañi zaswanela kueza mutu pili asika kolobezwa kale?

 MWA lilimo zeketalizoho zefelile, batu babafitelela 1 milioni bakolobelizwe sina Lipaki za Jehova. Ka kuswana ni mulutiwa Timotea wa mwa linako za baapositola, buñata bwa batu bao nebalutilwe niti “kuzwa kwa bumbututu.” (2 Tim. 3:​14, 15) Babañwi nebaitutile ka za Jehova inze bahulile, mi babañwi mane inze basupezi. Lilimonyana kwamulaho, musali yomuñwi yanaaituta Bibele ni Lipaki za Jehova naakolobelizwe inzaa nani lilimo ze 97!

² Haiba mu baituti ba Bibele kamba bashemi bamina ki Lipaki, kana mubata kukolobezwa? Wo ki muhato omunde hahulu! Kono pili musika kolobezwa kale, mukatokwa kuneela bupilo bwamina ku Jehova. Mwa taba ye lukanyakisisa sekutalusa kuineela. Hape taba ye ika mitusa kulemuha kuli hakuna sesiswanela kumipaleliswa kuunga muhato wo, mane ni kukolobezwa, haiba muitukiselize.

BUINEELO KI NTO MAÑI?

3. Mufe mitala ya batu bababulezwi mwa Bibele bane baneezwi ku Jehova.

³ Mwa Bibele, mutu yanaaneezwi ku Jehova, naaketilwe kuli aeze musebezi oipitezi. Maisilaele nebali sicaba sesiineezi ku Jehova. Kono batu babañwi mwa sicaba se nebaneezwi ku Jehova ka nzila yeipitezi. Ka mutala, Aruni naatinanga “sisupo sesikenile sa buineelo,” ili sipi ya gauda ya bupapati yebenya yenebeilwe fapilaa kuwani yahae. Sipi ya gauda yeo neibonisa kuli naaketilwe kuli apete musebezi oipitezi, kuli abe muprisita yapahami wa Isilaele. (Liv. 8:9) Manazareni ni bona nebaineezi  ku Jehova ka nzila yeipitezi. Linzwi la “Munazareni,” ili lelisimuluha fa linzwi la Siheberu la nazirʹ, litalusa “Mutu Yaketilwe” kamba “Yaneezwi.” Manazareni nebatokwa kulatelela litaelo zeipitezi zeneñozwi mwa Mulao wa Mushe.—Num. 6:​2-8.

4. (a) Hamuneela bupilo bwamina ku Jehova, ki lika mañi zekaba za butokwa hahulu mwa bupilo bwamina? (b) ‘Kuitoboha’ kutalusañi? (Mubone ni siswaniso.)

⁴ Hamuneela bupilo bwamina ku Jehova, muiketela kuba mulutiwa wa Jesu Kreste mi kueza tato ya Mulimu iba yona nto ya butokwa hahulu mwa bupilo bwamina. Kueza cwalo kuamañi? Jesu naabulezi kuli: “Haiba mutu ubata kunilatelela, aitobohe.” (Mat. 16:24) Linzwi la Sigerike lelitolokilwe kuli “aitobohe,” hape likona kutolokiwa kuli “asike aipilela.” Ka kuba mutangaa Jehova yaineezi ku yena, mukatokwa kuhana nto kaufela yelwanisana ni tato yahae. (2 Makor. 5:​14, 15) Kueza cwalo kukopanyeleza kuhana “misebezi ya nama,” yecwale ka muzamao wa buhule. (Magal. 5:​19-21; 1 Makor. 6:18) Kana kumamela milao yeo kukatatafaza bupilo bwamina? Hakuna kuba cwalo haiba mwalata Jehova mi mukozwi kuli milao yahae ilelezwi kumitusa. (Samu 119:97; Isa. 48:​17, 18) Muzwale yabizwa Nicholas naatalusize taba ye cwana, naaize: “Mwakona kuunga likuka za Jehova sina lukwakwa lwa tolongo lolu mipaleliswa kueza lika zemubata kamba sina lukwakwa lwa sibaka mokuinzi tau lolu misileleza kwa kozi.”

5. (a) Mukona kuneela cwañi bupilo bwamina ku Jehova? (b) Ki ifi shutano ye mwahalaa buineelo ni kolobezo? (Mubone ni siswaniso.)

⁵ Mukona kuneela cwañi bupilo bwamina ku Jehova? Ka kumusepisa mwa tapelo kuli mukalapela feela yena anosi ni kuli kueza tato yahae ikaba yona nto ya butokwa hahulu mwa bupilo bwamina. Hamueza cwalo, musepisa Jehova kuli mukazwelapili kumulata ‘ka pilu yamina kaufela ni ka moyo wamina kaufela  ni ka munahano wamina kaufela ni ka maata amina kaufela.’ (Mare. 12:30) Buineelo bwamina buezezwa kwa mukunda, mwahalaa mina ni Jehova. Kono hamukolobezwa fapilaa nyangela, mubonisa batu kuli muineezi ku Mulimu. Buineelo bwamina ki buitamo bwa butokwa hahulu, mi Jehova ubata kuli mupile ka kulumelelana ni buitamo bo, sina feela momubatela ni mina.—Muek. 5:​4, 5.

KI KABAKALAÑI HAMUSWANELA KUNEELA BUPILO BWAMINA KU JEHOVA?

6. Ki nto mañi yeswanela kususueza mutu kuli aneele bupilo bwahae ku Jehova?

⁶ Libaka la butokwa hahulu hamuswanela kuneela bupilo bwamina ku Jehova ki kuli mwamulata. Lilato lamina halisika itinga feela fa maikuto amina. Kono litomile fa “zibo yenepahezi” ni “kutwisiso ya kwa moya,” ili lika zemuitutile ka za Jehova zetahisize kuli mumulate hahulu. (Makolo. 1:9) Kuituta litaba za mwa mañolo kumitusize kukolwa kuli (1) Jehova ki waluli, (2) Bibele ki linzwi lahae leliñozwi ka kususumezwa ki moya wahae, mi (3) uitusisa kopano yahae kuli apete mulelo wahae.

7. Ki lika mañi zeluswanela kueza pili lusika neela kale bupilo bwaluna ku Mulimu?

⁷ Batu babaneela bupilo bwabona ku Jehova baswanela kuziba lituto za matatekelo zefumaneha mwa Linzwi la Mulimu ni kupila ka kulumelelana ni likuka ze mwateñi. Baezanga mobakonela kaufela kutaluseza babañwi litaba zebaitutile kulikana ni miinelo yabona. (Mat. 28:​19, 20) Lilato labona ku Jehova lifitile fa kuhula hahulu, mi takazo yabona ki kulapela feela yena anosi. Kana ni mina ki mona momuikutwela cwalo? Haiba muba ni lilato lelicwalo, hamuna kuneela bupilo bwamina ni  kukolobezwa ka libaka feela la kuli mutabise babaitutanga ni mina Bibele kamba bashemi bamina; kamba kabakala kuli balikani bamina kaufela baezize cwalo.

8. Kubonisa buitumelo kukona kumitusa cwañi kuikatulela kuneela bupilo bwamina ku Jehova? (Samu 116:​12-14)

⁸ Haiba munahanisisa ka za lika kaufela zamiezelize Jehova, mukaitumela ku yena mi mukabata kuneela bupilo bwamina ku yena. (Mubale Samu 116:​12-14.) Kwaswanela Bibele haibiza Jehova kuli ki mufani wa “mpo yende kaufela ni mpo yepetehile kaufela.” (Jak. 1:17) Mpo yetuna ka kufitisisa kwa limpo zeo kaufela, ki sitabelo sa mwanaa hae, yena Jesu. Munahane feela taba ye! Tiululo ikonahalisize kuli mube ni silikani sesitiile ni Jehova. Mi umifile kolo ya kupila kuya kuile. (1 Joa. 4:​9, 10, 19) Kuneela bupilo bwamina ku Jehova ki yeñwi ya linzila zende hahulu zemukona kubonisa ka zona buitumelo bwamina kwa lilato lelituna ka kufitisisa lamibonisize Jehova kukopanyeleza cwalo ni lika zeñwi zamiezelize. (Deut. 16:17; 2 Makor. 5:15) Taba ya kubonisa buitumelo ikoñomekilwe mwa tuto 46, sisupo 4, mwa buka ya Muikole Bupilo Kuya Kuile! mi mwa tuto yeo kunani vidio ya mizuzu yemilaalu yeli, Mufe Limpo Zamina ku Mulimu.

KANA MUITUKISELIZE KUNEELA BUPILO BWAMINA KU MULIMU NI KUKOLOBEZWA?

9. Ki kabakalañi mutu hasaswaneli kuikutwa kuli uswanela kuineela ka libaka la kuli babañwi baezize cwalo?

⁹ Mukona kuikutwa kuli hamusika itukiseza kuineela ni kukolobezwa. Mwendi musatokwa kueza licinceho mwa bupilo bwamina kuli mupile ka kulumelelana ni likuka za Jehova, kamba mwendi mutokwa nako kuli mutiise tumelo yamina. (Makolo. 2:​6, 7) Haki baituti ba Bibele kaufela babaezanga zwelopili ka nako yeswana, mi haki banana kaufela babaitukisezanga kuineela ni kukolobezwa ka nako yeswana. Mulemuhe zwelopili yemuezize kulikana ni miinelo yamina, mi musike mwaibapanya ku mutu yomuñwi.—Magal. 6:​4, 5.

10. Ki lika mañi zemukona kueza haiba mulemuha kuli hamusika itukiseza kuineela ni kukolobezwa? (Mubone ni mbokisi yeli, “ Ku Babahulisezwa Mwa Niti.”)

¹⁰ Nihaikaba kuli hamusika itukiseza kuneela bupilo bwamina ku Jehova, muzwelepili kuikataza kupeta sikonkwani seo. Mulapele ku Jehova mi mumukupe kuli afuyaule buikatazo bwamina ilikuli mueze licinceho kaufela zetokwahala. (Mafil. 2:13; 3:16) Mwakona kuba ni buikolwiso bwa kuli ukautwa tapelo yamina mi uka mitusa.—1 Joa. 5:14.

LIBAKA BABAÑWI HABAZINA-ZINANGA KUINEELA NI KUKOLOBEZWA

11. Jehova uka lutusa cwañi kuli luzwelepili kusepahala ku yena?

¹¹ Babañwi bazina-zinanga kuineela ni kukolobezwa niha baitukiselize kueza cwalo. Bakona kuipuza kuli: ‘Kucwañi haiba nieza sibi sesituna hasamulaho ni kuzwisiwa mwa puteho?’ Haiba munani sabo yeo, mukolwe kuli Jehova uka mifa zemutokwa kaufela “kuli muzamaye ka mukwa oswanela [yena] kuli mumutabise ka kutala.” (Makolo. 1:10) Hape uka mifa maata kuli mueze zelukile. Ubonisize kuli wakona kueza cwalo ka kutusa batu babañata kueza zelukile. (1 Makor. 10:13) Leo ki leliñwi la mabaka atahisanga kuli palo ya batu babazwisiwa mwa puteho ya Sikreste ibe yenyinyani hahulu. Jehova watusanga batu bahae kuli bazwelepili kusepahala.

12. Ki lika mañi zekona kulutusa kusaeza sibi sesituna?

¹² Mutu kaufela yasika petahala walikiwanga kuli aeze lika zemaswe. (Jak. 1:14) Nihakulicwalo, muswanela kuketa zemuka eza hamuka likiwa. Niti kikuli ki mina babaswanela  kueza katulo ya momuka pilela. Nihaike kuli batu babañwi banahana kuli halukoni kuhanyeza litakazo zemaswe, mwakona kuituta kueza cwalo. Mwakona kuketa kusaeza lika zemaswe niha mulikiwa. Kacwalo, mulapelange zazi ni zazi. Muzwelepili kuba ni tomahanyo yende ya kuituta Linzwi la Mulimu. Mufumanehange kwa mikopano ya Sikreste. Mutalusezange babañwi litaba zemulumela. Haiba muzwelapili kueza lika zeo, mukaba ni maata aka mikonisa kupila ka kulumelelana ni buitamo bone muezize hane muineezi. Mi kamita muhupulange kuli Jehova uka mitusa kueza cwalo.—Magal. 5:16.

13. Ki mutala mañi omunde walutomezi Josefa?

¹³ Kuka mibela hahulu bunolo kupila ka kulumelelana ni buitamo bwamina haiba muikatulela cimo zemuka eza pili musika likiwa kale. Bibele ilutaluseza za batu babañata bane baezize cwalo, kusina taba kuli ni bona neli batu babasika petahala. Ka mutala, musalaa Potifaro naakuta-kutezi kukupa Josefa kuli afose ni yena. Kono Josefa naaziba hande zanaaswanela kueza mwa muinelo wo. Bibele ilutaluseza kuli Josefa “ahana” mi ali: “Nikona kueza cwañi bumaswe bobutuna cwalo, nifoseze Mulimu?” (Gen. 39:​8-10) Kwaiponahalela hande kuli Josefa naikatulezi cimo za kueza pili asika likiwa kale ki musali yo. Kueza cwalo nekutahisize kuli kumubele hahulu bunolo kueza zelukile hanaalikilwe.

14. Lukona kuitwaeza cwañi kuhana kueza lika zemaswe?

¹⁴ Ki lika mañi zekona kumitusa kuikatulela kuzwelapili kusepahala ku Mulimu hamulikiwa, sina Josefa? Mwakona kuitukiseza cwale zemuka eza hamuka likiwa. Muitwaeze kuhananga kapili lika zatoile Jehova, mi muhane nihaiba kunahana ka za lika zeo. (Samu 97:10; 119:165) Haiba mueza cwalo, hamuna kueza sibi hamuka likiwa. Mukabe muzibile hande za kueza mwa muinelo wo.

15. Mutu ukona kubonisa cwañi kuli ‘utukufalezwi kubata’ Jehova? (Maheberu 11:6)

¹⁵ Mwendi mwaziba kuli mufumani niti mi mubata kusebeleza Jehova ka pilu yamina kaufela, kono mwendi kunani lika zeñwi zemipaleliswa kuineela ni kukolobezwa. Mutala wa Mulena Davida wakona kumitusa. Mwakona kukupa Jehova kuli: “Unisefe, wena Mulimu, mi uzibe pilu yaka. Unitatube, mi uzibe mihupulo yaka yeenibilaeza. Ubone haiba nji kunani nzila yemaswe ku na, mi unietelele  mwa nzila ya kuya kuile.” (Samu 139:​23, 24) Jehova wafuyaulanga batu “babatukufalezwi kumubata.” Haiba muzwelapili kuikataza kupeta sikonkwani sa kuineela ni kukolobezwa, mukabonisa Mulimu kuli mutukufalezwi kumubata.—Mubale Maheberu 11:6.

MUZWELEPILI KUSUTELELA KU JEHOVA

16-17. Jehova uhohanga cwañi batu babahulisezwa mwa niti? (Joani 6:44)

¹⁶ Jesu naabulezi kuli Jehova ki yena yahohanga balutiwa bahae. (Mubale Joani 6:44.) Taba yeo ki yende hahulu mi yamiama. Jehova ulemuhanga lika zende ku mutu ni mutu yahohelanga ku yena. Uunga mutu yo kuba ‘wahae tota,’ kamba “liluwo la butokwa.” (Deut. 7:6; litaluso ze kwatasi) Ni mina ki mona mwamiingela Jehova cwalo.

¹⁷ Kono mwendi musali banana mi muhulisezwa mwa niti. Mukona kuikutwa kuli musebeleza Jehova ka libaka feela la kuli bashemi bamina baeza cwalo. Nihakulicwalo, Bibele ibulela kuli: “Musutelele ku Mulimu, mi ukasutelela ku mina.” (Jak. 4:8; 1 Makol. 28:9) Haiba musutelela ku Jehova, ni yena ukasutelela ku mina. Jehova haamiingi feela kuba yomuñwi wa batu baba mwa sikwata sa batu bahae. Uhohanga mañi ni mañi, kukopanyeleza cwalo ni babahulisezwa mwa niti. Sina molubonezi kwa Jakobo 4:​8, haiba mutu yo aanga muhato wa kusutelela ku Jehova, Jehova ni yena ukasutelela ku yena.—Mubapanye 2 Matesalonika 2:13.

18. Lukanyakisisañi mwa taba yetatama? (Samu 40:8)

¹⁸ Haiba muneela bupilo bwamina ku Jehova ni kukolobezwa, mubonisa kuli mulikanyisa Jesu. Naaifanile ku Ndatahe ka kuitatela kuli aeze lika kaufela zanaakupilwe kueza. (Mubale Samu 40:8; Maheb. 10:7) Mwa taba yetatama, lukanyakisisa zekona kumitusa kuzwelapili kusebeleza Jehova ka busepahali hamulaho wa kukolobezwa.