Lukona feela kuswalelwa libi zaluna, ka sitabelo sa tiululo sanaafile Jesu ka mali ahae. (Maef. 1:7) Niteñi, Bibele ibulela kuli: “[Mulimu] naabonisa pilu-telele ni kuswalela libi zeezizwe kwamulaho,” fo kikuli, pili Jesu asikafa kale sitabelo sa tiululo. (Maro. 3:25) Jehova naakona kueza cwañi cwalo, ni kuzwelapili kuba Mulimu wa katulo yelukile?

Jehova naasepisize kuli nekukaba ni “mwana” yanaaka pilisa batu bane bakabonisa tumelo ku yena ni mwa lisepiso zahae; mi hanaafile sepiso yeo, nekuswana feela inge kuli sitabelo sa tiululo nesifilwe kale. (Gen. 3:15; 22:18) Mulimu naakozwi ka kutala kuli ka nako yahae yeswanela, Mwanaa hae wa libanda naakaitatela kufana bupilo bwahae sina tiululo. (Magal. 4:4; Maheb. 10:​7-10) Hanaali fa lifasi sina muyemeli wa Mulimu, Jesu naanani maata a kuswalela libi pili sitabelo sa tiululo sisika fiwa kale. Jesu naakona kuswalela libi za batu bane banani tumelo, kakuli naaziba kuli sitabelo sanaakafa nesika kwahela libi zabona.—Mat. 9:​2-6.