1-2. Ki limbuyoti mañi zaikolanga mutu hamulaho wa kukolobezwa?

 KWATABISA kukolobezwa ni kuba mwa lubasi lwa Jehova. Batu babanani tohonolo yeo bakona kulumelelana ni manzwi anaabulezi Davida muñoli wa lisamu, hanaaize: “Tabo ki ya mutu yeuketa [wena Jehova] ni kumutisa bukaufi ni wena kuli apile mwa malapa ahao.”—Samu 65:4.

² Haki batu kaufela baalumelezanga Jehova kupila mwa malapa ahae. Sina molunyakisiselize mwa taba yefelile, uketanga kusutelela kwa batu bababonisa kuli babata kuba ni silikani sesitiile ni yena. (Jak. 4:8) Hamuneela bupilo bwamina ku Jehova ni kukolobezwa, mukasutelela hahulu ku yena ka nzila yeipitezi. Mwakona kukolwa kuli hamulaho wa kukolobezwa, ‘uka misululela limbuyoti kufitela kutokwa semutaelezwi.’—Mala. 3:10; Jer. 17:​7, 8.

3. Ki buikalabelo mañi bwa butokwa bobanani bona Bakreste babaineezi ni kukolobezwa? (Muekelesia 5:​4, 5)

³ Kono niti kikuli, kolobezo ki makalelo feela. Hase muingile muhato wo, mukaeza momukonela kaufela kupila ka kulumelelana ni buitamo bone muezize hamuineela, niha mukalikiwa kuli mueze zemaswe kamba kukopana ni miinelo yetaata. (Mubale Muekelesia 5:​4, 5.) Ka kuba mulutiwa wa Jesu, mukalikanyisa mutala wahae ni kumamela litaelo zahae ka busepahali. (Mat. 28:​19, 20; 1 Pit. 2:21) Taba ye ika mitusa kueza cwalo.

‘MUZWELEPILI KULATELELA’ JESU KUSINA TABA NI MILIKO

4. Balutiwa ba Jesu balwalanga ‘kota ya linyando’ ka mukwa ufi? (Luka 9:23)

⁴ Musike mwanahana kuli hase mukolobelizwe, hamuna kukopana ni miinelo yetaata. Mane Jesu naabulezi ka kuutwahala  kuli balutiwa bahae nebaka lwala ‘kota ya linyando.’ Mi nebaka eza cwalo “zazi ni zazi.” (Mubale Luka 9:23.) Kana Jesu naatalusa kuli balateleli bahae nebaka zwelapili kunyanda? Batili. Kono naakoñomeka feela taba ya kuli kwandaa kuikola limbuyoti, balutiwa bahae nebaka kopana ni miinelo yetaata. Yemiñwi ya miinelo yeo, neikaba yetaata hahulu nikufita.—2 Tim. 3:12.

5. Ki limbuyoti mañi zanaasepisize Jesu kwa batu babaezanga buitomboli bobuñwi?

⁵ Mwendi semukopani ni twaniso kuzwelela ku ba mwa lubasi lwamina, kamba mwendi muitombozi lika zeñwi za kwa mubili kuli mubeye za Mubuso mwa sibaka sapili. (Mat. 6:33) Haiba ki cwalo, mwakona kukolwa kuli Jehova waziba lika kaufela zemu muezelize. (Maheb. 6:10) Mwendi muiponezi buniti bwa manzwi anaabulezi Jesu, ali: “Hakuna mutu yasiile ndu kamba banyani kamba bahulwani kamba likaizeli kamba bo mahe kamba bo ndatahe kamba bana kamba masimu kabakala ka ni kabakala taba yende yasike afumana hamwanda mwa nako ye—mandu, banyani, bahulwani, likaizeli, bo ma, bana, ni masimu, ka manyando—mi mwa linako zetaha afumane bupilo bobusa feli.” (Mare. 10:​29, 30) Limbuyoti zemuamuhezi lifitela kwahule lika kaufela zemuitombozi.—Samu 37:4.

6. Ki kabakalañi hamuka tokwa kuzwelapili kuhanyeza “takazo ya nama” hase mukolobelizwe?

⁶ Hamulaho wa kukolobezwa, mukatokwa kuzwelapili kuhanyeza “takazo ya nama.” (1 Joa. 2:16) Libaka kikuli, niha semukolobelizwe, mukazwelapili kuba mutu yasika petahala. Mwendi fokuñwi mukaikutwa sina mwanaaikutwezi muapositola Paulusi. Naañozi kuli: “Nitabela luli mulao wa Mulimu kulikana ni mutu yenili yena mwahali, kono mwa mubili waka nibona mulao usili olwanisana ni mulao wa munahano waka mi uniisa mwa butanga bwa mulao wa sibi o mwa mubili waka.” (Maro. 7:​22, 23) Mukona kuzwafiswa ki taba ya kuli mutokwa kuhanyeza litakazo zemaswe. Nihakulicwalo, kunahanisisa zene musepisize Jehova hane muneezi bupilo bwamina ku yena, kuka mitusa kuba ni maata aka mikonisa kuhanyeza miliko. Niti kikuli, buitamo bone muezize hamuineela ku Mulimu, buka mitusa hamuka kopana ni miliko. Ka mukwa ufi?

7. Kuineela ku Jehova kuka mitusa cwañi kuzwelapili kusepahala ku yena?

⁷ Hamuineela ku Jehova, mwaitoboha. Taba yeo italusa kuli muhana kueza lika ka kuya ka litakazo zamina kamba kuba ni likonkwani zesatabisi Jehova. (Mat. 16:24) Kacwalo hamulikiwa, hamuna kutokwa kutanda nako yeñata kunahana zemuswanela kueza. Mukabe muikatulezi kale zemuka eza, ili kuzwelapili kusepahala ku Jehova. Mukaikatulela kuzwelapili kutabisa Jehova. Haiba mueza cwalo, mukalikanyisa Jobo. Nihaike kuli naakopani ni miinelo yetaata hahulu, naabulezi ka buikolwiso kuli: “Hanina kutuhela kusepahala!”—Jobo 27:5.

8. Kunahanisisa za tapelo yamina ya buineelo kukona kumitusa cwañi kuhanyeza miliko?

⁸ Haiba munahanisisa za tapelo yamina ya buineelo, mukaba ni maata aka mitusa kuhanyeza muliko ufi kamba ufi. Ka mutala, kana mukaeza linyawe ni mutu ya mwa linyalo? Batili! Musepisize kale Jehova kuli hamuna kueza nto yecwalo. Kacwalo, hamuna kuba ni litakazo zemaswe zemuka tokwa kufelisa. Mukakeluha “mwa nzila ya babamaswe.”—Liprov. 4:​14, 15.

9. Kunahanisisa za tapelo yamina ya buineelo hape kukona kumitusa cwañi kuzwelapili kubeya lika za kwa moya mwa sibaka sapili?

⁹ Kucwañi haiba mufumana musebezi okona kumipaleliswa kufumanehanga kamita kwa  mikopano ya Sikreste? Mukaziba za kueza. Pili musika fiwa kale musebezi wo, nemuikatulezi cimo kuli hamuna kuamuhela musebezi okona kumipaleliswa kufumanehanga kwa mikopano. Kacwalo, hamuna kutokwa kunahana kuli mwakona kueza katulo yemaswe ni kuzwelapili kukondisa mwa sebelezo yamina ku Jehova. Kunahanisisa mutala wa Jesu, ili yo naaikatulezi kuzwelapili kutabisa Ndatahe, kuka mitusa kueza katulo kapili-pili ni kuhana kueza nto kaufela yemuziba kuli haitabisi Mulimu, yena yemuineezi ku yena.—Mat. 4:10; Joa. 8:29.

10. Jehova uka mitusa cwañi ‘kuzwelapili kulatelela’ Jesu hase mukolobelizwe?

¹⁰ Niti kikuli, hamukopana ni miinelo yetaata kamba hamulikiwa, muba ni kolo ya kubonisa kuli muikatulezi ‘kuzwelapili kulatelela’ Jesu. Haiba mueza cwalo, mwakona kukolwa kuli Jehova uka mitusa. Bibele ibulela kuli: “Mulimu wasepahala, mi hana kumituhelela kuli mulikwe ki muliko omusa koni kutiyela, kono hamutahelwa ki muliko uka mifa ni nzila ya kuzwa ku ona ilikuli mukone kuutiyela.”—1 Makor. 10:13.

ZEMUSWANELA KUEZA KULI MUZWELEPILI KULATELELA JESU

11. Ki ifi yeñwi ya linzila zende zekona kumitusa kuzwelapili kulatelela Jesu? (Mubone ni siswaniso.)

¹¹ Jesu naasebelelize Jehova ka pilu yahae kaufela, mi naazwezipili kutiisa silikani sahae ni Jehova ka tapelo. (Luka 6:12) Mane kuba ni mukwa wa kuezanga lika zekona kumitusa kusutelela hahulu ku Jehova, ki yeñwi ya linzila zende hahulu zekona kumitusa kuzwelapili kulatelela Jesu hase mukolobelizwe. Bibele ibulela kuli: “Ibe kuli luezize zwelopili yekuma kai, haluzweleñipili kuzamaya ka mukwa oswanela mwa nzila yeswana ye.” (Mafil. 3:16) Hañata mukautwanga zebonwi za  mizwale ni likaizeli babapetile zeñata mwa sebelezo yabona ku Jehova. Mwendi nebakeni Sikolo sa Bakutazi ba Mubuso kamba kututela kwa sibaka kokutokwahala hahulu bakutazi ba Mubuso. Haiba miinelo yamina yamikonisa, mukaeza hande kuitomela sikonkwani seo. Batu ba Jehova banyolelwa kueza zeñata mwa sebelezo yabona ku yena. (Lik. 16:9) Kono kucwañi haiba hamukoni kueza cwalo ka nako ya cwale? Musike mwaikutwa kuli babapetile sikonkwani seo ki ba butokwa hahulu kumifita. Nto ya butokwa mwa siyano yeluli ku yona ka kuba Bakreste, ki kuzwelapili kuitiisa. (Mat. 10:22) Muhupule kuli mutabisa Jehova hamu musebeleza ka momukonela kaufela kulikana ni buikoneli bwamina ni miinelo yamina. Yeo ki nzila ya butokwa hahulu yekona kumitusa kuzwelapili kulatelela Jesu hase mukolobelizwe.—Samu 26:1.

12-13. Ki lika mañi zemukona kueza haiba mufelelwa ki tukufalelo yamina? (1 Makorinte 9:​16, 17) (Mubone ni mbokisi yeli, “ Muzwelepili Kuba Mwa Siyano.”)

¹² Ki lika mañi zemuswanela kueza haiba muikutwa kuli hamusa lapelanga kuzwelela kwatasaa pilu kamba hamusa ikola bukombwa sina kwamulaho? Kucwañi haiba hamusa ikolanga kubala Bibele sina kwamulaho? Haiba muikutwa cwalo hamulaho wa kukolobezwa, musike mwanahana kuli Jehova utuhezi kumifa moya wahae. Ka kuba batu babasika petahala, maikuto amina akona kucinca-cinca. Haiba mufelelwa ki tukufalelo yamina, munahanisise mutala wa muapositola Paulusi. Nihaike kuli naaikatazanga kulikanyisa Jesu, naaziba kuli ka linako zeñwi naasike abanga ni takazo yetuna ya kueza lika zanaatokwa kueza. (Mubale 1 Makorinte 9:​16, 17.) Naabulezi kuli: “Haiba nieza cwalo ka kuikapeleza, ni fona fo, nisanani bukombwa bonifilwe.” Ka mubulelelo omuñwi, Paulusi naaikatulezi kupeta bukombwa bwahae,  kusina taba ni mwanaaka ikutwela ka nako yeo.

¹³ Ka mukwa oswana, musike mwaeza likatulo ka kuya ka momuikutwela ka nako yeo. Muikatulele kueza zelukile nihaikaba kuli hamutabeli luli kueza cwalo. Haiba muzwelapili kueza zelukile, hamulaho wa nako maikuto amina akona kucinca. Kufitela nako yeo ifita, kuba ni tomahanyo yende ya kuezanga lika za kwa moya kuka mitusa kuzwelapili kulatelela Jesu hamulaho wa kukolobezwa. Kuzwelapili kueza lika zeo, hape kukasusueza mizwale ni likaizeli bamina.—1 Mates. 5:11.

“MUZWELEPILI KUITEKULA . . . MUZWELEPILI KUBONISA SEMULI SONA LULI”

14. Ki lika mañi zemuswanela kutatubanga kamita, mi ki kabakalañi? (2 Makorinte 13:5)

¹⁴ Hase mukolobelizwe, hape mukatuseha haiba muzwelapili kuitekulanga. (Mubale 2 Makorinte 13:5.) Kamita mutatubange mupilelo wamina ni mikwa yamina kuli mubone haiba mwalapelanga zazi ni zazi, kubala ni kuituta Bibele, kufumaneha kwa mikopano, ni kufumaneha mwa bukombwa. Mubate linzila zeka mitusa kuikola ni kutusiwa hahulu ki lika zeo. Muipuze lipuzo zecwale ka ze: ‘Kana nakona kutaluseza babañwi lituto za mwa Bibele za matatekelo? Kana kunani lika zeñwi zenikona kueza kuli niikolange hahulu bukombwa? Kana nilapelanga ka kunonga mi kana litapelo zaka libonisa kuli niitingile hahulu ku Jehova? Kana nafumanehanga kamita kwa mikopano ya Sikreste? Ki lika mañi zekona kunitusa kuteelezanga ka tokomelo kwa mikopano ni kuabana ku yona ka kutala?’

15-16. Muitutañi ku zeneezahezi ku muzwale yomuñwi ka za kuhanyeza miliko?

¹⁵ Hape mukaeza hande haiba muitekula habuniti kuli muzibe bufokoli bomunani bona. Muzwale yabizwa Robert utalusa zanaaipumani ku zona ili zelutusa kuutwisisa hande sisupo seo, uli: “Hane ninani lilimo zebato ba 20, neninani musebezi waswalelele. Zazi leliñwi hamulaho wa kukotoka kwa musebezi, musali yene nibeleka ni yena animemela kwa ndu yahae. Naabulezi kuli nelukaba feela bababeli mi neluka ikola. Kwa makalelo, nenifile mabaka asautwahali, kono hasamulaho namubulelela ka kunonga kuli hanina kuya mi namutaluseza libaka.” Bo Robert nebasika komiwa ki muliko wo, mi nebaezize hande. Kono hamulaho wa nako, banahanisisa zene baezize hane balikilwe, mi balemuha kuli nebakona kueza hande nikufita mwa muinelo wo. Batalusa kuli: “Nenisika hanyeza muliko wo ka kutiya ni kapili-pili sina mwanaaezelize Josefa hanaalikilwe ki musalaa Potifaro.  (Gen. 39:​7-9) Mane nenikomokile hahulu kuli neku nibezi taata kuhanyeza muliko wo. Zeneezahezi neli nitusize kulemuha kuli nenitokwa kutiisa silikani saka ni Jehova.”

¹⁶ Mukatuseha haiba muitekula sina mone baezelize bo Robert. Nihaikaba kuli mukonile kuhanyeza muliko, muipuze kuli: ‘Neku niingezi nako yekuma kai kuli nihane?’ Musike mwaikutwa mulatu haiba mulemuha kuli mutokwa kueza licinceho. Mutabe kabakala kuli cwale semuziba bufokoli bwamina. Mulapele ku Jehova ka za bufokoli bo, mi mueze lika zeka mitusa kuba ni takazo yetuna ya kupila ka likuka za Jehova za muzamao.—Samu 139:​23, 24.

17. Zeneezahezi ku bo Robert neli amile cwañi libizo la Jehova?

¹⁷ Kunani nto yeñwi yeluituta ku zeneezahezi ku bo Robert. Bazwelepili kubulela kuli: “Hamulaho wa kuhana memo ya musali yene nisebeza ni yena, naabulezi kuli: ‘Mupasize tatubo!’ Namubuza zanaatalusa. Anitaluseza kuli mulikanaa hae wamuuna yanaabanga Paki, naamubulelezi kuli Lipaki kaufela babasali babanca baezanga lika zemaswe kwa mukunda hababa ni kolo. Naabulelezi mulikanaa hae yo kuli naaka nilika kuli abone haiba taba yeo ki ya niti. Nenitabile hahulu kulemuha kuli nenikutekehisize libizo la Jehova.”

18. Ki lika mañi zemu ikatulezi kueza hamulaho wa kukolobezwa? (Mubone ni mbokisi yeli, “ Litaba Zemuka Ikola.”)

¹⁸ Hamuneela bupilo bwamina ku Jehova ni kukolobezwa, mubonisa kuli mubata kukenisa libizo lahae kusina taba ni zemuka kopana ni zona. Mi mukolwe kuli Jehova waziba miinelo yetaata yemukopana ni yona ni miliko yemusweli kuhanyeza. Ukafuyaula buikatazo bomueza kuli muzwelepili kusepahala. Mukolwe kuli ukaitusisa moya wahae okenile kumifa maata aka mikonisa kueza cwalo. (Luka 11:​11-13) Ka tuso ya Jehova, mukakona kuzwelapili kulatelela Jesu hamulaho wa kukolobezwa.