1. Ki lifi zeñwi za limbuyoti zeluikola kabakala kuswalisana ni kopano ya Jehova?

 LUNANI tohonolo yetuna ya kuswalisana ni kopano ya Jehova mwa linako zetaata ze, ona mazazi a mafelelezo. Miinelo mwa lifasi hainze izwelapili kutotobela, Jehova ulufile lubasi lwa kwa moya loluswalisani, bona mizwale ni likaizeli baluna. (Samu 133:1) Ulutusa kuba ni tabo mwa lubasi. (Maef. 5:33–6:1) Mi ulufa kutwisiso ni butali zelutokwa kuli lutiyele lipilaelo ni kuba ni tabo.

2. Ki lika mañi zeluswanela kueza, mi ki kabakalañi?

² Nihakulicwalo, luswanela kueza molukonela kaufela kuli luzwelepili kusebeleza Jehova ka busepahali. Kabakalañi? Kakuli ka linako zeñwi mwendi babañwi baka lufoseza ka kubulela kamba kueza lika zelusa tabeli. Hape mwendi lukaikutwa hahulu kuzwafa kabakala mafosisa aluna, sihulu haiba lukuta-kutela kueza mafosisa aswana. Luswanela kuzwelapili kusebeleza Jehova (1) halufosezwa ki muzwale kamba kaizelaa luna, (2) halufosezwa ki mutu yelunyalani ni yena, ni (3) haluikutwa kuzwafa kabakala mafosisa aluna. Mwa taba ye, lukanyakisisa omuñwi ni omuñwi wa miinelo yeo. Hape lukanyakisisa zelukona kuituta kwa mutala wa batu babasepahala bababulezwi mwa Bibele.

MUZWELEPILI KUSEBELEZA JEHOVA HAMUFOSEZWA KI MUZWALE KAMBA KAIZELI

3. Ki butata mañi bobakopana ni bona batu ba Jehova?

³ Butata bobukona kubateñi. Mizwale ni likaizeli babañwi banani mikwa yekona kulufilikanya. Babañwi mwendi bakona kueza lika zekona kuluzwafisa kamba kusa lubonisa sishemo. Mizwale babaetelela bakona kueza mafosisa. Miinelo ye ikona kutahisa  kuli babañwi bakakanye ka za haiba kopano ye ki ya Mulimu. Kufita kuzwelapili kusebeleza Mulimu “ka kuswalisana” ni mizwale ni likaizeli babona, mwendi bakona kutuhela kuswalisana ni batu baba bafoselize kamba mane kutuhela kufumanehanga kwa mikopano. (Zef. 3:9) Kana kueza cwalo kwaswanela? Halunyakisiseñi zelukona kuituta ku mutu yabulezwi mwa Bibele yanaakopani ni butata bobuswana.

4. Ki butata mañi bwanaakopani ni bona muapositola Paulusi?

⁴ Mutala wa mwa Bibele. Muapositola Paulusi naaziba kuli mizwale ni likaizeli bahae nebasika petahala. Ka mutala, nakonyana kuzwa fa kaliseza kuswalisana ni puteho, babañwi nebasa lumeli kuli naali mulutiwa. (Lik. 9:26) Hasamulaho, babañwi neba musebanga kuli bamusinye libizo. (2 Makor. 10:10) Paulusi naaboni yomuñwi wa mizwale babaetelela haeza katulo yefosahalile yenekona kusitatalisa babañwi. (Magal. 2:​11, 12) Mi Paulusi naazwafisizwe hahulu ki yomuñwi wa balikani bahae babatuna, yena Mareka. (Lik. 15:​37, 38) Paulusi naakona kutuhelela omuñwi wa miinelo yeo kumupaleliswa kuswalisana ni bane bamufoselize. Niteñi, naazwezipili kuba ni mubonelo omunde ka za mizwale ni likaizeli bahae mi naazwezipili kusebeleza Jehova ka busepahali. Ki lika mañi zenetusize Paulusi kuzwelapili kusebeleza Mulimu?

5. Ki lika mañi zenetusize Paulusi kuswalela mizwale ni likaizeli bahae ni kuzwelapili kuswalisana hahulu ni bona? (Makolose 3:​13, 14) (Mubone ni siswaniso.)

⁵ Paulusi naalata mizwale ni likaizeli bahae. Bakeñisa kuli Paulusi naalata babañwi, naaisize pilu kwa tulemeno twabona totunde isiñi kwa mafosisa abona. Lilato lanaanani lona Paulusi hape neli mutusize kusebelisa zanaañozi kwa Makolose 3:​13, 14. (Mubale.) Mulemuhe mo Paulusi naaezelize Mareka. Nihaike kuli Mareka naayubekile Paulusi ka nako ya musipili wahae wa bulumiwa wapili, Paulusi naasika zwelapili kuba ni ndimbelela. Hasamulaho, Paulusi hanaañolezi mizwale ni likaizeli ba mwa puteho ya Kolose liñolo la kubasusueza, naalumbile Mareka kuli naasebelisani hande ni yena mi ‘naamuomba-ombile hahulu.’ (Makolo. 4:​10, 11) Paulusi hanaali mwa tolongo mwa Roma, naakupile ka kunonga kuli Mareka ayo mutusa. (2 Tim. 4:11) Kusina kukakanya, Paulusi naaswalezi mizwale bahae mi naazwezipili kuswalisana hahulu ni bona. Ki lika mañi zelukona kuituta ku Paulusi?

6-7. Ki lika mañi zekona kulutusa kuzwelapili kubonisa lilato kwa mizwale ni likaizeli baluna kusina taba ni bufokoli bwabona? (1 Joani 4:7)

⁶ Zeluituta. Jehova ubata kuli luzwelepili kubonisa lilato kwa mizwale ni likaizeli baluna. (Mubale 1 Joani 4:7.) Haiba mutu apalelwa kubonisa kalemeno kakañwi ka Sikreste,  luswanela kuhupula kuli mwendi uezize cwalo ka kusanahanisisa mi uikataza kusebelisa likuka za mwa Bibele. (Liprov. 12:18) Mulimu walata batanga bahae babasepahala kusina taba ni bufokoli bwabona. Nihaike kuli lwafosanga, hatuhelangi kululata mi haazwelangipili kuba ni ndimbelela. (Samu 103:9) Luitumela hahulu kuli Jehova waluswalelanga mi luswanela kumulikanyisa ka kuswalela babañwi!—Maef. 4:32–5:1.

⁷ Hape muhupule kuli mafelelezo a lifasi le hanzaa atumela, luswanela kuzwelapili kuswalisana hahulu ni mizwale ni likaizeli baluna. Lwakona kulibelela kuli lukanyandiswa hahulu. Mane mwendi lwakona kulengiwa mwa tolongo kabakala tumelo yaluna. Haiba kuba cwalo, lukatokwa kutusiwa hahulu ki mizwale ni likaizeli baluna. (Liprov. 17:17) Halunyakisiseñi zeneezahezi ku muzwale yabizwa Josep, a yali muuna-muhulu kwa Spain. Yena ni mizwale babañwi nebalengilwe mwa tolongo bakeñisa kuli nebahanile kukena busole. Utalusa kuli: “Mwa tolongo, nekuli hahulu bunolo kunyemiswa ki mizwale bakeñisa kuli nelupila hamoho. Nelunani kutuhelelana ni kuswalelana ka pilu kaufela. Kueza cwalo neku lutusize kuzwelapili kuswalisana ni kusilelezana. Nelupika ni batu bane basalapeli Jehova. Nako yeñwi, lizoho laka neliholofezi hahulu, mi nenisa koni kulisebelisa. Kono muzwale yomuñwi naanitapisezanga litino ni kunitusa ka linzila zeñwi. Nenibonisizwe lilato ka nako yene nilitokwa hahulu.” Kaniti luli, kunani mabaka amande haluswanela kutatulula butata mwahalaa luna ka nako ya cwale!

MUZWELEPILI KUSEBELEZA JEHOVA HAMUFOSEZWA KI BAKUMINA

8. Ki butata mañi bobakopana ni bona batu babanyalani?

⁸ Butata bobukona kubateñi. Batu kaufela babanyalani bakopananga ni butata. Bibele ibulela ka kunonga kuli batu babanyalani bakaba ni “manyando mwa nama.” (1 Makor. 7:28) Kabakalañi? Kakuli batu babanyalani habasika petahala, mikwa yabona yashutana, mi lika zebatabela zashutana. Batu babanyalani mwendi bazwa mwa lizo zeshutana kamba bahulisizwe ka linzila zeshutana. Hamulaho wa nako, mwendi bakona kubonisa mikwa yemiñwi yene basika bonisa pili basika nyalana kale. Omuñwi ni omuñwi wa miinelo yeo, ukona kutahisa kuli kube ni butata. Kufita kulemuha kuli yomuñwi ni yomuñwi wakubona kunani zaezize zetahisize butata bo ni kuikataza kubutatulula, bakona kunyaza bakubona. Mwendi mane bakona kunahana kuli butata bwabona bukona feela kutatululwa haiba bakauhana kamba haiba kuba ni teleko. Kana yeo ki nzila yende ya kutatulula ka yona butata mwa linyalo? b Halunyakisiseñi zeluituta ku mutu yabulezwi mwa Bibele yanaazwezipili kusepahala ku Jehova kusina taba kuli muunaa hae naatatafalize hahulu bupilo bwahae.

9. Ki butata mañi bwanaakopani ni bona Abigaili?

⁹ Mutala wa mwa Bibele. Abigaili naanyezwi ku Nabali, ili yo Bibele italusa kuli neli mutu yataata mi naanani mikwa yemaswe. (1 Sam. 25:3) Kubonahala kuli Abigaili neku mubezi hahulu taata kupila ni muuna ya cwalo. Kana Abigaili naabile ni kolo ya kufelisa linyalo lahae? Eni. Naabile ni kolo yeo muta Davida yanaakaba mulena wa Isilaele, naatile kuli ato bulaya Nabali bakeñisa kuli naamutapauzi ni kutapaula baana bahae. (1 Sam. 25:​9-13) Abigaili naakona kubaleha, ilikuli Davida apete mulelo wahae. Niteñi, naatibezi Davida ni kumukolwisa kuli asike abulaya Nabali. (1 Sam. 25:​23-27) Ki lika mañi zenee mususuelize kueza cwalo?

10. Ki lika mañi mwendi zenesusuelize Abigaili kuzwelapili kusebeleza Jehova kusina taba ni kuli naakopana ni butata mwa linyalo?

 ¹⁰ Abigaili naalata Jehova mi naakuteka likuka zahae ka za linyalo. Kusina kukakanya, naaziba zanaabulezi Mulimu ku Adama ni Eva hatoma linyalo lapili. (Gen. 2:24) Abigaili naaziba kuli Jehova naanga linyalo kuba tukiso yekenile. Naabata kutabisa Mulimu, mi takazo yeo nei mususuelize kueza mwanaakonela kaufela kuli apilise ba ndu yahae, kukopanyeleza cwalo ni muunaa hae. Naangile muhato kapili-pili kuli Davida asike abulaya Nabali. Hape naaitatezi kukupa swalelo nihaike kuli haki yena yanaafosize. Kusina kukakanya, Jehova naalata musali yo yanaanani bundume, ili yanaasina buitati. Batu babanyalani bakona kuitutañi kwa mutala wa Abigaili?

11. (a) Jehova ubata kuli batu babanyalani baezeñi? (Maefese 5:33) (b) Muitutileñi ku zene baezize bo Carmen kuli babukeleze linyalo labona? (Mubone ni siswaniso.)

¹¹ Zeluituta. Jehova ubata kuli batu babanyalani bakuteke tukiso ya linyalo nihaikaba kuli banyalani ni mutu yali taata kupila ni yena. Mulimu ubanga ni tabo habona batu babanyalani inze baikataza kutatulula butata bobakopana ni bona ni kubonisana likute ni lilato lelisina buitati. (Mubale Maefese 5:33.) Halunyakisiseñi mutala wa kaizeli yabizwa Carmen. Ibato ba lilimo ze 6 kuzwa fa kenela mwa linyalo, Kaizeli Carmen akala kuituta Bibele ni Lipaki za Jehova mi hasamulaho akolobezwa. Kaizeli Carmen utalusa kuli: “Katulo yene niezize neisika tabisa bo muunaaka. Nebakalile kuutwela Jehova lifufa. Neba nitapaulanga ni kunibemba kuli nebaka niyubeka.” Kusina taba ni zeo, Kaizeli Carmen naazwezipili kuba mwa linyalo leo. Naaikatalize ka lilimo ze 50 kubonisa muunaa hae lilato ni likute. Utalusa kuli: “Hamulaho wa nako, neniitutile kuba hahulu ni temuho ni kuambolanga ni bo muunaaka ka maseme. Bakeñisa kuli neniziba kuli Jehova uunga linyalo kuba lelikenile, neniezize mone nikonela kaufela kubukeleza linyalo laluna. Mi bakeñisa kuli nalata Jehova, nenisika bata linzila za kufelisa ka zona linyalo laluna.” c Haiba mukopana ni butata mwa linyalo lamina, mukolwe kuli Jehova uka mitusa kuzwelapili kuba mwa linyalo leo.

MUZWELEPILI KUSEBELEZA JEHOVA NIHA MUIKUTWA KUZWAFA KABAKALA MAFOSISA EMUEZIZE

12. Ki butata mañi bolukona kukopana ni bona haiba luezize sibi sesituna?

¹² Butata bobukona kubateñi. Lwakona kuikutwa hahulu kuzwafa haiba luezize sibi sesituna. Bibele ibonisa kuli libi zaluna likona kutahisa kuli ‘lulobehe pilu ni kuswaba.’ (Samu 34:18) Muzwale yabizwa Robert, naaikatalize ka lilimo  zeñata kukwanisa zetokwahala kuli abe sikombwa sa puteho. Kono naaezize sibi sesituna mi naalemuhile kuli naafoselize hahulu Jehova. Utalusa kuli: “Lizwalo laka neli nisisitile hahulu. Hasamulaho, neniikutwile hahulu bumaswe. Nenililile mi nalapela ku Jehova. Nihupula kuli neninahanile kuli Mulimu naasike ateeleza ku na nikamuta. Neniikutwile cwalo kabakala sibi sene niezize.” Haiba lueza sibi sesituna, lwakona kulobeha hahulu pilu ni kukala kunahana kuli Jehova uluyubekile ni kuli hakuna feela tuso ya kumusebeleza. (Samu 38:4) Haiba mukile mwaikutwa cwalo, munyakisise mutala wa mutu yasepahala yabulezwi mwa Bibele yanaazwezipili kusebeleza Jehova kusina taba kuli naaezize sibi sesituna.

13. Ki sifi sibi sesituna sanaaezize muapositola Pitrosi, mi ki lika mañi zenetahisize kuli aeze sibi seo?

¹³ Mutala wa mwa Bibele. Fa busihu bone butatamiwa ki lizazi lanaabulailwe Jesu, muapositola Pitrosi naaezize mafosisa amañata anaatahisize kuli aeze sibi sesituna. Sapili, Pitrosi naaisepile hahulu, mi naaitumbile ka kubulela kuli naakazwelapili kusepahala baapositola babañwi niha nebaka yubeka Jesu. (Mare. 14:​27-29) Sabubeli, hane bali mwa simu ya Getsemani, Pitrosi naapalezwi kuzwelapili kutona. (Mare. 14:​32, 37-41) Kutuha fo, Pitrosi naayubekile Jesu hanaatilo tamiwa ki sikwata sa batu bane balwezi lilwaniso. (Mare. 14:50) Kwa mafelelezo, Pitrosi naalatuzi Jesu halaalu, mane naatiiselize taba ya buhata yeo ka kukonka. (Mare. 14:​66-71) Ki lika mañi zanaaezize Pitrosi hanaalemuhile kuli naaezize sibi sesituna? Naaswabile hahulu mi alila hahulu, mwendi naaikutwile hahulu mulatu. (Mare. 14:72) Munahane feela mwanaatomohezi pilu Pitrosi, mulikanaa hae Jesu hanaabulailwe lihoranyana kuzwa fo. Kusina kukakanya, muinelo wo neuzwafisize hahulu Pitrosi!

14. Ki lika mañi zenetusize Pitrosi kuzwelapili kusebeleza Jehova? (Mubone siswaniso.)

¹⁴ Kunani mabaka amañata anaatusize Pitrosi kuzwelapili kusebeleza Jehova. Naasika ikauhanya ku babañwi, kono naaile kwa mizwale bahae mi neba muomba-ombile. (Luka 24:33) Kuzwa fo, Jesu hasaazusizwe kwa bafu, naabonahezi ku Pitrosi, mi kubonahala kuli naabata kumususueza. (Luka 24:34; 1 Makor. 15:5) Hasamulaho, Jesu naasika kalimela Pitrosi kabakala mafosisa ahae, kono naataluselize mulikanaa hae yo kuli naakafiwa buikalabelo bobutuna. (Joa. 21:​15-17) Pitrosi naaziba kuli naaezize sibi sesituna, kono naazwezipili kuikataza kueza zelukile. Kabakalañi? Kakuli naakozwi kuli Jesu, yena Mulenaa hae, naasa mulata. Mi Pitrosi naazwezipili kutusiwa ki mizwale bahae. Ki lika mañi zelukona kuituta kwa mutala wa Pitrosi?

15. Jehova ubata kuli lube ni buikolwiso mañi? (Samu 86:5; Maroma 8:​38, 39) (Mubone ni siswaniso.)

 ¹⁵ Zeluituta. Jehova ubata kuli lukolwe kuli walulata mi walata kuswalela. (Mubale Samu 86:5; Maroma 8:​38, 39.) Luikutwanga mulatu haluezize sibi. Hakusika fosahala kuikutwa cwalo mi kwaswanela. Nihakulicwalo, haluswaneli kunahana kuli Jehova hasa lulata kamba kuli hakoni kuluswalela. Kono luswanela kukupa tuso kapili-pili. Muzwale Robert yabulezwi kwamulaho, utalusa kuli: “Neniezize sibi bakeñisa kuli neniitingile fa maata aka kuli nihanyeze muliko.” Naalemuhile kuli naatokwa kutaluseza baana-bahulu. Utalusa kuli: “Hane niingile muhato wa kutaluseza baana-bahulu, neba nitusize kuikutwa kuli Jehova naanilata. Mi neniikutwile kuli baana-bahulu ni bona neba nilata. Neba nitusize kukolwa kuli Jehova naasika niyubeka.” Ni luna lwakona kukolwa kuli Jehova ululata hahulu ni kuli uka luswalela haiba lubakela libi zaluna, kukupa tuso yelutokwa, ni kueza molukonela kaufela kusakutela mafosisa aswana. (1 Joa. 1:​8, 9) Buikolwiso bobucwalo bwakona kulutusa kuzwelapili kusebeleza Jehova niha luezize mafosisa.

16. Ki kabakalañi hamuikatulezi kuzwelapili kusebeleza Jehova?

¹⁶ Jehova uitebuha hahulu buikatazo bolueza kuli lumusebeleze mwa linako zetaata ze, ona mazazi a mafelelezo. Ka tuso ya Jehova, lwakona kuzwelapili kumusebeleza kusina taba ni lika zekona kuluzwafisa. Lwakona kuzwelapili kulata mizwale ni likaizeli baluna ni kubaswalela haba lufoseza. Lwakona kubonisa kuli lulata hahulu Mulimu ni kuli lwakuteka tukiso ya linyalo ka kueza molukonela kaufela kutatulula butata bobukona kubateñi mwa linyalo laluna. Mi haiba lueza sibi, lwakona kukupa Jehova kuli alutuse, kukolwa kuli walulata ni kuli walata kuswalela, ni kuzwelapili kumusebeleza. Lwakona kukolwa kuli lukafuyaulwa hahulu haiba ‘lusakatali kueza zende.’—Magal. 6:9.