1. Ki maikuto mañi ebakona kuba ni ona batanga ba Jehova babasepahala?

 KWAOMBA-OMBA kuziba kuli Jehova utabiswa ki batu bahae sina sikwata! Bibele ibulela kuli: “Jehova utabela batu bahae.” (Samu 149:4) Kono ka linako zeñwi, babañwi bakona kuzwafa, ili nto yekona kutahisa kuli baipuze kuli: ‘Kana natabisa Jehova?’ Buñata bwa batu bababulezwi mwa Bibele, ili bane basebelelize Jehova ka busepahali, ni bona fokuñwi nebaikutwanga cwalo.—1 Sam. 1:​6-10; Jobo 29:​2, 4; Samu 51:11.

2. Ki bo mañi babatabisa Jehova?

² Bibele ibulela hande ka kuutwahala kuli batu babasika petahala bakona kutabisa Jehova. Ka mukwa ufi? Ka kubonisa tumelo ku Jesu Kreste ni kukolobezwa. (Joa. 3:16) Haiba lueza cwalo, lukabonisa fapilaa nyangela kuli lubakezi libi zaluna ni kuli lusepisize Mulimu kuli lukaeza tato yahae. (Lik. 2:38; 3:19) Jehova watabanga haluunga mihato yeo ilikuli lutiise silikani saluna ni yena. Haiba lueza molukonela kaufela kupila ka kulumelelana ni buitamo bone luezize haluineela ku Mulimu, lukatabisa Jehova mi uka luunga kuba balikani bahae babatuna.—Samu 25:14.

3. Ki lika mañi zeluka nyakisisa cwale?

³ Kono ki kabakalañi batu babañwi fokuñwi habakona kuikutwa kuli habatabisi Mulimu? Jehova ubonisanga cwañi kuli lwamutabisa? Ki lika mañi zekona kutusa Mukreste kukolwa hahulu kuli utabisa Mulimu?

 ZEKONA KUTAHISA KULI BATU BABAÑWI BAIKUTWE KULI HABATABISI JEHOVA

4-5. Nihaikaba kuli fokuñwi luikutwanga kuli haluba butokwa, ki buikolwiso mañi bolukona kuba ni bona?

⁴ Kuzwa feela kwa bwanana, buñata bwaluna lukatalizwe ki maikuto a kuli haluba butokwa. (Samu 88:15) Muzwale yabizwa Adrián, utalusa kuli: “Kamita niikutwanga kuli hani wa butokwa. Nihupula kuli hane nisali mwanana nenilapelanga kuli lubasi lwaka luto pila mwa Paradaisi, nihaike kuli neniikutwanga kuli nenisa swaneli kuto pila mwa Paradaisi.” Muzwale yabizwa Tony, ili yo naasika hulisezwa mwa lubasi lwa Lipaki, utalusa kuli: “Bashemi baka nebasa nibulelelangi kuli neba nilata kamba kuli zene nieza neli batabisa. Taba yeo neitahisanga kuli niikutwe kuli hakuna feela zene nikona kueza kuli nibatabise.”

⁵ Haiba ka linako zeñwi luikutwanga kuli haluba butokwa, luswanela kuhupula kuli Jehova naaluhohezi ku yena. (Joa. 6:44) Walemuhanga tulemeno twaluna totunde tolusa lemuhangi luna, mi waziba lipilu zaluna. (1 Sam. 16:7; 2 Makol. 6:30) Kacwalo, lwakona kumusepa halutaluseza kuli luba butokwa hahulu.—1 Joa. 3:​19, 20.

6. Muapositola Paulusi naaikutwile cwañi ka za libi zanaaezize kwamulaho?

⁶ Pili lusika ituta kale niti, babañwi ku luna neluezanga lika zesa lutahiseza kuli luikutwe mulatu. (1 Pit. 4:3) Nihaiba Bakreste babasepahala, banani bufokoli bobuñwi bobaikataza kufelisa. Kana munyaziwa ki pilu yamina? Haiba ki cwalo, muzibe kuli haki mina munosi, batanga ba Jehova babañwi babasepahala bakile baba ni maikuto acwalo. Ka mutala, muapositola Paulusi naaikutwanga hahulu mulatu hanaahupulanga lika zanaaezize kwamulaho. (Maro. 7:24) Ki niti kuli Paulusi naabakezi libi zahae mi naakolobelizwe. Niteñi, naabulezi kuli naali “yomunyinyani hahulu kwa baapositola,” ni kuli naali “wapili” kwa baeza libi.—1 Makor. 15:9; 1 Tim. 1:15.

7. Ki lika mañi zeluswanela kuhupula ka za libi zene luezize kwamulaho?

⁷ Ndataa luna ya kwa lihalimu usepisa kuli uka luswalela haiba lubakile. (Samu 86:5) Kacwalo, haiba lubakezi libi zaluna habuniti, lwakona kukolwa kuli Jehova uluswalezi.—Makolo. 2:13.

8-9. Lukona kufelisa cwañi maikuto a kuli zelueza ki zenyinyani hahulu kuli mane halikoni kutabisa Jehova?

⁸ Kaufelaa luna lubata kusebeleza Jehova ka molukonela kaufela. Nihakulicwalo, babañwi bakona kuikutwa kuli zebapeta ki zenyinyani hahulu kuli mane halikoni kutabisa Mulimu. Kaizeli yabizwa Amanda utalusa kuli: “Hañata niikutwanga kuli zenieza mwa sebelezo yaka ku Jehova halisika likana ni kuli nitokwa kueza zeñata. Kacwalo, hañata nilikanga kueza lika zeñata hahulu kufita zenikona kueza. Hanipalelwa kueza cwalo, niikutwanga hahulu maswabi mi ninahananga kuli Jehova ni yena uikutwa cwalo.”

⁹ Lukona kufelisa cwañi maikuto a kuli zelueza ki zenyinyani hahulu kuli mane halikoni kutabisa Jehova? Luswanela kuhupula kuli Jehova unani kutwisiso. Habatangi kuli lueze lika zelusa koni kueza. Waitebuhanga lika kaufela zelu muezeza ibile feela lueza cwalo ka molukonela kaufela. Hape munahanisise mutala wa batu bababulezwi mwa Bibele bane basebelelize Jehova ka pilu yabona kaufela. Munahanisise mutala wa Paulusi. Naasebelize ka taata ka lilimo zeñata, kuzamaya misipili yemitelele, ni kutoma liputeho zeñata. Kana naatuhezi kutabisa Mulimu miinelo yahae hane imupalelisizwe kupeta zeñata mwa bukombwa? Batili. Naazwezipili kueza zanaakona mi Jehova naamufuyauzi. (Lik. 28:​30, 31) Ka mukwa oswana, zeluezeza  Jehova zakona kucinca ka linako zeñwi. Kono sa butokwa nikufita ki libaka halu musebeleza. Cwale halunyakisiseñi linzila zeñwi zabonisanga ka zona Jehova kuli lwamutabisa.

JEHOVA UBONISANGA CWAÑI KULI LWAMUTABISA?

10. Lukona kuutwa cwañi Jehova halutaluseza kuli lwamutabisa?

¹⁰ Ka kuitusisa Bibele. Jehova ubatanga linzila za kubonisa ka zona batu bahae kuli wabalata mi bamutabisa. Mañolo abulela za likezahalo zepeli ili fo Jehova naabulelezi Jesu kuli naali Mwanaa hae yalatwa ni yamutabisa. (Mat. 3:17; 17:5) Kana nemuka tabela kuutwa Jehova hamibulelela kuli mwamutabisa? Jehova habulelangi ku luna kuzwelela kwa lihalimu, kono uezanga cwalo ka kuitusisa Linzwi lahae. Halubala manzwi a Jesu a mwa Libuka za Evangeli, kuswana feela inge kuli luutwa Jehova halutaluseza kuli lwamutabisa. (Mubale Joani 16:27.) Jesu naalikanyisize Ndatahe ka kutala. Kacwalo, halubala manzwi anaabulezi Jesu kwa balutiwa bahae babasepahala bane basika petahala kuli neba mutabisa, kuswana feela inge kuli Jehova ulubulelela manzwi aswana ao.—Joa. 15:​9, 15.

11. Ki kabakalañi halukona kubulela kuli halukopana ni miinelo yetaata hakutalusi kuli halutabisi Jehova? (Jakobo 1:12)

¹¹ Ka likezo zahae. Jehova ubata luli kulutusa, inge cwalo kulutusa kufumana lika za kwa mubili. Fokuñwi Jehova ukona kulutuhelela kukopana ni miinelo yetaata, sina feela mone kubezi ku muuna yasepahala Jobo. (Jobo 1:​8-11) Halukopana ni miinelo yetaata, hakutalusi kuli halutabisi Mulimu. Kono ilufa kolo ya kubonisa kuli lulata hahulu Mulimu ni kuli lumusepile hahulu. (Mubale Jakobo 1:12.) Mi halukopana ni miinelo yetaata, lukalemuha mwalulatela hahulu ni mwalutuseza kuitiisa.

12. Luitutañi ku zeneezahezi ku Muzwale Dmitrii?

¹² Halunyakisiseñi zeneezahezi ku muzwale yabizwa Dmitrii, yapila kwa Asia. Naazwisizwe musebezi, mi naapalezwi kufumana usili ka likweli zeñata. Kacwalo, aikatulela kueza zeñata mwa bukombwa, ili kubonisa kuli naasepile Jehova. Kwafita likweli zeñata kono naasika fumana musebezi. Mi naakulile butuku bobutuna kuli mane naasakoni kuzuha fa bulobalo. Hape naakalile kuikutwa kuli naasi ndate lubasi yomunde ni kuli naasatabisi Jehova. Zazi leliñwi manzibwana mwanaa hae wamusizana añola fa pepa manzwi a kwa Isaya  30:​15, ali: “Mukaba ni maata ka kuikuzeza ni ka kuba ni sepo.” Aitiseza bo ndatahe ni kubabulelela kuli: “Tate, nako kaufela hamuikutwa kuzwafa, muhupulange liñolo le.” Muzwale Dmitrii alemuha kuli ka tuso ya Jehova, lubasi lwahae nelunani lico zelikani, liapalo, ni ndu mwakuina. Utalusa kuli: “Zene nitokwa feela kueza ki kusaikalelwa ni kuzwelapili kusepa Mulimu waka.” Haiba mukopana ni muinelo otaata, mukolwe kuli Jehova wamiisa pilu mi uka mitusa kuitiisa.

13. Ki bo mañi bakona kuitusisa Jehova kulutusa kulemuha kuli lwamutabisa, mi ukona kueza cwañi cwalo?

¹³ Ka kuitusisa mizwale ni likaizeli baluna. Jehova uitusisanga mizwale ni likaizeli baluna kulutusa kulemuha kuli lwamutabisa. Ka mutala, ukona kuitusisa batu babañwi kuli balususueza ka nako yeswanela. Kaizeli yapila kwa Asia, naaiponezi buniti bwa taba yeo ka nako yanaalembwalile hahulu. Naazwisizwe musebezi, mi hape akula butuku bobutuna. Mi muunaa hae naaezize sibi sesituna sene sitahisize kuli azwisiwe fa buuna-buhulu. Utalusa kuli: “Nenipalelwa kuutwisisa libaka lika zeo hane liezahala. Neninahana kuli neniezize nto yeñwi yemaswe ni kuli nesisa tabisi Jehova.” Kaizelaa luna yo naakupile Jehova kuli amutuse kukolwa kuli naamutabisa. Jehova naaezize cwañi cwalo? Utalusa kuli: “Baana-bahulu ba puteho nebaikambotile ni na ni kunikolwisa kuli Jehova naasa nilata.” Hasamulaho, hape akupa Jehova kuli amutuse. Utalusa kuli: “Zazi leliswana leo, naamuhela liñolo lene lizwa kwa sikwata sa mizwale ni likaizeli ba mwa puteho. Hane ninze nibala manzwi abona aomba-omba, neniikutwile kuli Jehova naautwile tapelo yaka.” Kaniti luli, Jehova hañata ulutusanga kulemuha kuli lwamutabisa ka kuitusisa batu babañwi kuli balususueze.—Samu 10:17.

14. Ki ifi nzila yeñwi yaitusisanga Jehova kulutusa kulemuha kuli lwamutabisa?

 ¹⁴ Jehova hape ulutusanga kulemuha kuli lwamutabisa ka kuitusisa mizwale ni likaizeli baluna kuli balufe kelezo ka nako yeluitokwa. Ka mutala, mwa linako za baapositola, Jehova naaitusisize muapositola Paulusi kuñolela mizwale ni likaizeli bahae mañolo a 14. Mwa mañolo ao, Paulusi naaelelize mizwale ni likaizeli bahae ka lilato, kono naaezize cwalo ka kunonga. Ki kabakalañi Jehova hanaasusumelize Paulusi kuñola kelezo yeo? Jehova ki Ndate yomunde mi ukalimelanga bana bahae ‘balata.’ (Liprov. 3:​11, 12) Kacwalo, haiba lufiwa kelezo yetomile fa Bibele, luswanela kuunga kelezo yeo sina bupaki bobubonisa kuli lutabisa Mulimu mi usa lulata. (Maheb. 12:6) Ki lika mañi zeñwi zebonisa kuli lutabisa Jehova?

LINZILA ZEÑWI ZABONISANGA KA ZONA JEHOVA KULI LWAMUTABISA

15. Jehova ufanga bo mañi moya wahae okenile, mi taba yeo ilutusa kuba ni buikolwiso mañi?

¹⁵ Jehova ufanga moya wahae okenile kwa batu baba mutabisa. (Mat. 12:18) Lwakona kuipuza kuli: ‘Kana nabonisanga totuñwi twa tulemeno totuli kalulo ya muselo wa moya wa Mulimu mwa bupilo bwaka?’ Kana mubonisanga hahulu babañwi pilu-telele kufita mone muezezanga pili musika ziba kale Jehova? Kaniti luli, haiba muituta kubonisa hahulu tulemeno totuli muselo wa moya wa Mulimu, mukakolwa hahulu kuli mutabisa Jehova!—Mubone mbokisi yeli, “ Muselo wa Moya wa Mulimu ki . . . ”

16. Ki bo mañi baitusisanga Jehova kwa kukutaza taba yende, mi taba yeo itahisa kuli muikutwe cwañi? (1 Matesalonika 2:4)

¹⁶ Jehova ufile batu baba mutabisa musebezi wa kukutaza taba yende. (Mubale 1 Matesalonika 2:4.) Mulemuhe mo kukutaza taba yende ku babañwi nekutuselize kaizeli yabizwa Jocelyn. Zazi leliñwi kakusasana, kaizeli Jocelyn hazuha, naaikutwa hahulu kulembwala. Utalusa kuli: “Nenisina maata mi neniikutwa kuli hani wa butokwa. Kono nenili paina, mi leo ki lizazi lene niyanga mwa bukombwa. Kacwalo, nalapela ku Mulimu mi naya mwa bukombwa.” Zazi leo kakusasana, bo Jocelyn bakopana ni bo Mary bane banani pilu yende mi balumela kuitutanga ni bona Bibele. Likwelinyana kuzwa fo, bo Mary bataluseza bo Jocelyn kuli lizazi lapili hane babapotezi,  nebasweli kulapela ku Mulimu kuli abatuse. Bo Jocelyn habanahana za kezahalo yeo, batalusa kuli: “Neniikutwile inge kuli Jehova naanibulelela kuli, ‘wanitabisa.’” Niti kikuli, haki batu kaufela babaka amuhela lushango lolukutaza ku bona. Kono lwakona kukolwa kuli lutabisa Jehova, halueza molukonela kaufela kukutaza taba yende ku babañwi.

17. Muitutañi ku zanaabulezi Kaizeli Vicky ka za tiululo? (Samu 5:12)

¹⁷ Tiululo itusa hahulu batu babatabisa Jehova. (1 Tim. 2:​5, 6) Kono kucwañi haiba lusaikutwa kuli halutabisi Jehova nihaike kuli lunani tumelo mwa tiululo mi lukolobelizwe? Muhupule kuli kamita halukoni kusepa pilu yaluna, kono lwakona kusepa Jehova. Uunga batu babanani tumelo mwa tiululo kuli balukile mwa meeto ahae, mi usepisa kuli uka bafuyaula. (Mubale Samu 5:12; Maro. 3:26) Kunahanisisa za mpo ya tiululo nekutusize kaizeli yabizwa Vicky. Zazi leliñwi hamulaho wa kunahanisisa hahulu ka za tiululo, naabulezi kuli: “Jehova uzwezipili kunibonisa pilu-telele. . . . Kono nekuswana inge kuli neni mubulelela kuli: ‘Lilato lahao ki lelituna, feela haukoni kunilata. Sitabelo sa Mwanaa hao hasikoni kukwahela libi zaka.’” Kunahanisisa za mpo ya tiululo neku mutusize kuikutwa kuli Jehova naamulata. Ni luna haiba lunahanisisa ka za mpo ya tiululo, lukaikutwa kuli Jehova walulata ni kuli lwamutabisa.

18. Ki buikolwiso mañi bolukona kuba ni bona haiba luzwelapili kulata Ndataa luna ya kwa lihalimu?

¹⁸ Nihaike kuli lukona kuikataza kusebelisa liakalezo zebulezwi fahalimu, fokuñwi lukona kuikutwa kuzwafa ni kunahana kuli halutabisi Jehova. Haiba kuba cwalo, muhupule kuli Jehova utabiswa ki batu “babazwelapili kumulata.” (Jak. 1:12) Kacwalo, muzwelepili kutiisa silikani samina ni Jehova, ni kulemuha linzila zabonisa ka zona kuli mwamutabisa. Kamita muhupulange kuli Jehova “haayo kwahule ni mañi ni mañi waluna.”—Lik. 17:27.