Kana mubata kutusiwa hahulu ki tuto yamina ya ka butu? Liakalezo zelatelela zakona kumitusa kuisa hahulu pilu kwa litaba zemuituta:

• Mufumane sibaka sesiswanela. Haiba kwakonahala, mubate sibaka mokusina lika zeñata ili mokunani liseli lelilikani. Mwakona kubata tafule fa kubalela, kamba mwakona kuyo ina fande mwa sibaka sesiswanela.

• Mubate sibaka komukona kuba munosi. Jesu naalapelanga “kakusasana luli,” ili “kwa sibaka kokusina batu.” (Mare. 1:35) Haiba kutaata kufumana sibaka komukona kuba munosi, mutaluseze lubasi lwamina kamba batu bomupila ni bona ka za tomahanyo yamina ya kuituta mi mubakupe kuli basike bamifilikanya ka nako yemuituta.

• Muise hahulu pilu ku zemuituta. Mutokolomohe lika zekona kumifilikanya. Haiba muitusisa foni kamba kapangaliko kakañwi hamuituta, muzwise mulumo kamba kusina fa kasupo kakabonahala inge fulai (airplane mode) ilikuli batu basike bamilizeza kamba kumilumela tushango. Mi haiba muhupula kuli kunani nto yeñwi yemuswanela kueza, muiñole kwatuko kuli muieze hasamulaho. Haiba kumibela taata kuisa pilu kwa litaba zemusweli kuituta, mutuhele hanyinyani kuituta kuli muzamaye-zamaye kamba kuikotolola.