TABA YA KUITUTA 44
PINA 33 Munepele Mushimbo Wamina ku Jehova
Zekona Kulutusa Kuitiisa Haluezwa Maswe
“Usike watuhelela bumaswe kukukoma, kono uzwelepili kukoma bumaswe ka bunde.”—MARO. 12:21.
ZEKAITUTIWA
Molukona kuitiiseza haluezwa maswe kuli butata busike bwaba bobutuna.
1-2. Kuezwa maswe kukona kuluama cwañi?
JESU naafile swanisezo ya mbelwa yanaazwezipili kukupa muatuli kuli amutuse kakuli naasika ezwa hande ki mutu yomuñwi. Kusina kukakanya, balutiwa ba Jesu babañata nebautwisisa hande mwanaaikutwela mbelwa yo kakuli ka nako yeo batu-tu feela hañata nebasa eziwangi hande. (Luka 18:1-5) Ni luna lwakona kuutwisisa mwanaaikutwezi mbelwa yo kakuli ka linako zeñwi halueziwangi hande.
2 Mwa lifasi kacenu kunani hahulu saluluti, sobozi, ni kuhatelelwa; kacwalo, halukomoki haluezwa maswe. (Muek. 5:8) Kono lukona kuikutwa hahulu bumaswe haiba luezwa maswe ki muzwale kamba kaizeli. Niti kikuli, mizwale ni likaizeli baluna habalwanisi niti. Ki mukwa feela wa kuli habasika petahala. Kunani lituto zeñata zelukona kuituta ku zanaaezize Jesu hanaaezizwe maswe ki balwanisi babamaswe. Haiba lwakona kubonisa pilu-telele kwa balwanisi baba lueza maswe, uzibe lwakona kubonisa hahulu pilu-telele kwa mizwale ni likaizeli baluna! Jehova uikutwanga cwañi haluezwa maswe ki muzwale kamba kaizeli, kamba mutu usili feela? Kana waisa pilu ku zeezahala ku luna?
3. Kana Jehova waisanga pilu ku luna halunyanda kabakala kuezwa maswe, mi ki kabakalañi?
3 Jehova ubata kuli luezwe hande mi walemuhanga haluezwa maswe. “Jehova ulata katulo yelukile.” (Samu 37:28) Jesu ulutusa kukolwa kuli Jehova ‘ukatahisa kuli luezwe kapili ka kuluka’ ka nako yeswanela. (Luka 18:7, 8) Mi honacwale-cwale fa, ukafelisa manyando aluna kaufela mi haana kulumeleza kuli luezwe maswe nikamuta.—Samu 72:1, 2.
4. Jehova ulutusa cwañi kacenu?
4 Jehova ulutusa kuitiisa haluezwa maswe halunze lulibelela nako yakafelisa manyando kaufela. (2 Pit. 3:13) Ululuta kusaeza nto yemaswe haluezwa maswe. Ka kuitusisa Mwanaa hae, Jehova ulutomezi mutala omunde hahulu olutusa kuziba za kueza haluezwa maswe. Mi ulufile kelezo yende yelukona kusebelisa mwa muinelo wo.
MUTOKOMELE ZEMUEZA HAMUEZWA MASWE
5. Ki kabakalañi haluswanela kutokomela zelueza haluezizwe maswe?
5 Lwakona kuikutwa hahulu butuku kwa pilu ni kulembwala haluezwa maswe. (Muek. 7:7) Batanga ba Jehova babasepahala, babacwale ka Jobo ni Habakuki, ni bona nebaikutwile cwalo. (Jobo 6:2, 3; Hab. 1:1-3) Nihaike kuli hakusika fosahala luli kuikutwa cwalo, luswanela kutokomela zelueza haluezwa maswe ilikuli lusike lwaeza nto yemaswe.
6. Luitutañi kwa mutala wa Abisalomi? (Mubone ni siswaniso.)
6 Lwakona kukenelwa ki muliko wa kuyolisa misuha haluezwa maswe. Kono haiba lueza cwalo, lwakona kutatafaza hahulu muinelo. Halunyakisiseñi mutala wa Abisalomi mwanaa Mulena Davida. Naahalifile hahulu muhulwanaa hae Amunoni hanaasweli likalala kaizelaa hae Tamare. Ka kuya ka Mulao wa Mushe, Amunoni naaswanela kubulaiwa kabakala zanaaezize. (Liv. 20:17) Nihaike kuli Abisalomi naaswanela kuhalifa hahulu, naasina tukelo ya kubulaya Amunoni.—2 Sam. 13:20-23, 28, 29.
Abisalomi naahalifile hahulu mi naasika iswala munyanaa hae Tamare hanaaswelwi likalala (Mubone paragilafu 6)
7. Kusaluka kwanaaboni muñoli yomuñwi wa samu neku muamile cwañi?
7 Haiba kubonahala inge kuli batu babaeza lika zesika luka habafiwi koto, lukona kuikutwa kuli hakutusi sesiñwi kueza zelukile. Halunyakisiseñi zeneezahezi ku muñoli yomuñwi wa samu yanaaboni kuli batu babamaswe nebabonahala kuli nebakondisa kufita babalukile. Naabulezi kuli, “bao ki bona babamaswe, belizamaela hande lika kamita.” (Samu 73:12) Naabilaelizwe hahulu ki kusaluka kwanaabona kuli mane naabatile kutuhela kusebeleza Jehova, naabulezi kuli: “Hane nilikile kuutwisisa taba yeo, nenikatazehile.” (Samu 73:14, 16) Mane naabulezi kuli: “Haili na, mahutu aka naabatile kukeluha; nenibatile kutelela hane nihata.” (Samu 73:2) Nto yeswana neiezahezi ku muzwale yeluka biza Alberto.
8. Kuezwa maswe nekuamile cwañi muzwale yomuñwi?
8 Muzwale Alberto naatamelelizwe kuli naauzwize masheleñi a puteho. Kabakaleo, aamuhiwa buikalabelo bwanaanani bona mi batu babañata mwa puteho bane bazibile zateñi batuhela kumukuteka. Hahupula zeneezahezi kwamulaho, utalusa kuli, “Nenihalifile hahulu, kunyema hahulu, ni kuikutwa kusaezwa hande.” Naatuhelezi maikuto ahae kufokolisa silikani sahae ni Jehova, mi naafokozi ka lilimo zeketalizoho. Zeneezahezi ku muzwale yo libonisa zekona kuezahala ku luna haiba luhalifa hahulu kabakala kusaezwa hande.
MULIKANYISE MWANAAITIISELIZE JESU HANAAEZIZWE MASWE
9. Jesu naaezizwe maswe ka nzila ifi? (Mubone ni siswaniso.)
9 Jesu ulutomezi mutala omunde hahulu wa mwakuitiiseza haluezwa maswe. Halunyakisiseñi mwanaa ezelizwe maswe ki ba mwa lubasi lwahae ni batu babañwi. Ba lubasi lwahae bane basalumeli neba mutamelelize kuli watakana, baeteleli ba bulapeli neba mutamelelize kuli naasebelisana ni madimona, mi masole ba Maroma neba musheunuzi, kumunata, ni kumubulaya hasamulaho. (Mare. 3:21, 22; 14:55; 15:16-20, 35-37) Niteñi, Jesu naatiyezi kusaezwa hande koo mi naasika yolisa misuha. Lukona kuitutañi kwa mutala wahae?
Jesu ulutomezi mutala omunde hahulu wa mwakuezeza haluezwa maswe (Mubone paragilafu 9 ni 10)
10. Jesu naatiyezi cwañi kusaezwa hande? (1 Pitrosi 2:21-23)
10 Mubale 1 Pitrosi 2:21-23. a Jesu ulutomezi mutala omunde hahulu wa moluswanela kuezeza haluezwa maswe. Naaziba nako ya kukuza ni nako ya kubulela. (Mat. 26:62-64) Fokuñwi naakuzanga feela hanaatamelezwanga litaba. (Mat. 11:19) Hanaaketanga kualaba, naasatapaulangi bane bamunyandisa kamba kubabemba. Jesu naabonisanga buiswalo kakuli ‘naaipeile ku yaatula ka kuluka.’ Jesu naaziba kuli nto ya butokwa hahulu ki mubonelo wa Jehova wa lika. Jesu naaziba kuli ka nako yeswanela, Jehova naakafelisa kusaluka kaufela.
11. Lukona kuiswala cwañi mwa lipulelo? (Mubone ni maswaniso.)
11 Lukona kulikanyisa Jesu ka kuiswala mwa lipulelo haluezwa maswe. Fokuñwi lwakona kuketa kutuhelela feela mafosisa haiba haki amatuna. Kamba lwakona kuketa kukuza feela kakuli haiba lubulela nto yeñwi, mwendi lwakona kutatafaza muinelo. (Muek. 3:7; Jak. 1:19, 20) Ka linako zeñwi, lutokwa kubulela kuli luyemele mutu yaezwa maswe kamba kuyemela niti. (Lik. 6:1, 2) Haiba luketa kubulela, luswanela kueza cwalo ka kuwa pilu ni ka likute.—1 Pit. 3:15. b
Haluezwa maswe, lwakona kulikanyisa Jesu ka kuketa hande nako ya kubulela ni mwakubulelela (Mubone paragilafu 11 ni 12)
12. Lukona kusiya cwañi lika mwa mazoho a “yaatula ka kuluka”?
12 Hape lukona kulikanyisa Jesu ka kusiya lika mwa mazoho a “yaatula ka kuluka.” Haiba luatuzwi maswe kamba kuezwa maswe ki babañwi, luswanela kukolwa kuli Jehova waziba zeezahezi. Kuba ni buikolwiso bo kulutusa kuitiisa haluezwa maswe kakuli lwaziba kuli kwa mafelelezo, Jehova ukatatulula muinelo. Kusiya lika mwa mazoho a Jehova, kulutusa kusahalifa kamba kusaba ni ndimbelela. Kuzwelapili kuhalifa haluezizwe maswe kukona kutahisa kuli lueze nto yemaswe, kufelelwa ki tabo, ni kufokolisa silikani saluna ni Jehova.—Samu 37:8.
13. Ki lika mañi zekona kulutusa kuzwelapili kuitiisa haluezwa maswe?
13 Niti kikuli, halukoni kulikanyisa mutala wa Jesu ka kutala. Ka linako zeñwi, lukaeza kamba kubulela lika zekatahisa kuli luinyaze hasamulaho. (Jak. 3:2) Mi fokuñwi kuezwa maswe ki babañwi kukona kutahisa kuli luutwe hahulu butuku ni kulembwala mwa bupilo bwaluna kaufela. Haiba mukopana ni muinelo wo, mukolwe kuli Jehova waziba zemukopana ni zona. Mi Jesu waziba momuikutwela kakuli ni yena naaezizwe maswe. (Maheb. 4:15, 16) Kwandaa kulufa Jesu yalutomezi mutala omunde hahulu, Jehova hape ulufile kelezo yende yelutusa kuziba moluswanela kuezeza haluezwa maswe. Halunyakisiseñi litimana zepeli za mwa buka ya Maroma zekona kulutusa.
‘MUTUHELELE MULIMU KULI AKUTISEZE’
14. ‘Kutuhelela Mulimu kuli akutiseze’ kutalusañi? (Maroma 12:19)
14 Mubale Maroma 12:19. Muapositola Paulusi naasusuelize Bakreste kuli, ‘batuhelele Mulimu kuli akutiseze.’ Jehova ki yena yaswanela kukutiseza. Lukona kutuhelela Jehova kuli akutiseze ka kumufa kolo ya kulukisa kusaluka ka nako yahae yeswanela ni ka nzila yatabela. Muzwale yabizwa John, hamulaho wa kuezwa maswe, naabulezi kuli: “Nenitokwa kuikataza kuli nisike nalukisa mafosisa ka nzila yene nitabela. Liñolo la Maroma 12:19 neli nitusize kuba ni pilu-telele ni kusepa Jehova.”
15. Ki kabakalañi hakuli kwa butokwa kulibelela ku Jehova kuli atatulule butata?
15 Kulibelela kuli Jehova atatulule butata kwakona kulutusa. Haiba lueza cwalo, haluna kuimezwa ni kuhalifa kabakala kulika kutatulula butata kaili luna. Jehova ubata kulutusa. Kuswana feela inge kuli ubulela kuli, ‘Haiba hamusika ezwa hande, musiye taba yeo mwa mazoho aka mi nikaitatulula.’ Haiba lulumela sepiso ya Jehova ya kuli “ki na yakakutiseza,” haluna kuzwelapili kuhalifa, mi lukakolwa kuli ukatatulula butata ka nzila yende hahulu. Zeo ki zona zenetusize Muzwale John yabulezwi kwamulaho. Naabulezi kuli, “Haiba nilibelela feela ku Jehova, ukatatulula butata ka nzila yende hahulu yefita mone nika butatululela.”
‘MUZWELEPILI KUKOMA BUMASWE KA BUNDE’
16-17. Tapelo ikona kulutusa cwañi “[kuzwelepili] kukoma bumaswe ka bunde”? (Maroma 12:21)
16 Mubale Maroma 12:21. Paulusi hape naasusuelize Bakreste kuli ‘bazwelepili kukoma bumaswe ka bunde.’ Mwa Ngambolo ya fa Lilundu, Jesu naabulezi kuli: “Muzwelepili kulata lila zamina ni kulapelela baba minyandisa.” (Mat. 5:44) Naaezize cwalo luli. Mwendi selunahanisisize ka za manyando anaatiyezi Jesu hanaakokotezwi fa kota ki masole ba Maroma. Kusina kukakanya, naatiyezi butuku bobutuna, kushubulwa, ni kuezwa maswe.
17 Jesu naazwezipili kuba ni lilato ni kusepahala ku Jehova kusina taba ni kunyandiswa hahulu. Mwa sibaka sa kukupa kuli masole bao bafiwe koto, naalapezi kuli: “Ndate, ubaswalele, kakuli habazibi sebaeza.” (Luka 23:34) Haiba lulapelela baba lueza maswe, haluna kuba ni ndimbelela kamba kuhalifa hahulu mi mane lwakona kucinca mubonelo waluna ka za bona.
18. Tapelo neitusize cwañi bo Alberto ni bo John kuitiisa hane baezizwe maswe?
18 Tapelo neitusize mizwale bababeli bababulezwi kwa makalelo a taba ye kuitiisa hane baezizwe maswe. Muzwale Alberto utalusa kuli: “Nenilapelezi mizwale bane basika nieza hande. Nenikuta-kutezi kukupa Jehova kuli anituse kusazwelapili kuhalifa kabakala zeneezahezi ku na.” Kwatabisa kuziba kuli bo Alberto sebasebeleza Jehova ka busepahali hape. Bo John batalusa kuli: “Nenikuta-kutezi kulapelela muzwale yanaa niezize maswe. Kueza cwalo neku nitusize kuba ni mubonelo oswanela ka zahae ni kusa muatula. Mi kulapela hape neku nitusize kuba ni kozo ya mwa munahano.”
19. Ki lika mañi zeluswanela kueza halunze lulibelela kufela kwa lifasi le? (1 Pitrosi 3:8, 9)
19 Pili lifasi le lisika fela kale, lwakona kuezwa maswe. Kusina taba ni zekona kuezahala ku luna, luzwelepili kukupa Jehova kuli alutuse. Hape luswanela kulikanyisa Jesu ka mwanaaezelize hanaaezizwe maswe ni kuzwelapili kusebelisa likuka za mwa Bibele. Haiba lueza cwalo, lwakona kukolwa kuli Jehova uka lufuyaula.—Mubale 1 Pitrosi 3:8, 9.
PINA 38 Uka Mitiisa
a Kwa 1 Pitrosi kauhanyo 2 ni 3, Pitrosi naatalusize zenetahisize kuli Bakreste babañata mwa linako za baapositola baezwe maswe ki malenaa bona kamba baana babona bane basi balumeli.—1 Pit. 2:18-20; 3:1-6, 8, 9.
b Mubone vidio ye fa jw.org yeli, Mo Lilato Litahiseza Kozo ya Luli.
