KANA kumibelanga taata kuba ni tuto ya ka butu kamita ni kuikola yona? Kaufelaa luna lwaikutwanga cwalo ka linako zeñwi. Kono munahane lika zeñwi zeluezanga kamita, inge cwalo kutapa. Kutapa kutokwa nako ni buikatazo, kono luikutwanga kukatuluha hasamulaho! Ka mukwa oswana, kuituta Bibele kwalukatulusanga mi kuswana sina “kuitapisa ka mezi a linzwi la Mulimu.” (Maef. 5:26) Halunyakisiseñi liakalezo zeñwi zekona kulutusa:

• Mube ni tomahanyo. Kuituta Bibele ka butu ki yeñwi ya “lika za butokwa hahulu nikufita” zasaswaneli kukeshebisa Mukreste. (Mafil. 1:10) Kuli mukumalele kwa tomahanyo yamina, muñole fa pampili lizazi ni nako fomuka itutelanga, mi muibeye fomukona kuibona ka bunolo. Kamba mubeye alamu fa foni yamina kuli imihupulisange.

• Muitute kulikana ni miinelo yamina. Kana mwakona kuisa pilu ku zemuituta haiba muituta ka nako yetelele, kamba mukona feela kueza cwalo hamuituta ka nako yekuswani? Ki mina babaziba hande miinelo yamina. Muitute kulikana ni miinelo yamina. Haiba hamuna takazo ya kuituta fa lizazi lemuketile kuitutanga, mulike nihaiba feela kuituta ka mizuzu yelishumi. Mwakona kuituta zeñata nihaiba feela mwa nako yekuswani. Mi haiba muikozi kuituta mwa nako yekuswani yeo, mukasusuezwa kuzwelapili kuitutanga.—Mafil. 2:13.

• Muketelele cimo zemuka ituta. Haiba muketa za kuituta ka nako yemubata kuituta, hamuna ‘kuitusisa hande nako yamina.’ (Maef. 5:16) Mukaeza hande haiba muba ni mukoloko wa litaba zemutabela kuituta. Nako kaufela hamuba ni puzo, muiñole. Mi hase mufelize kuituta, mwakona kuekeza litaba zeñwi kwa mukoloko wa litaba zemutabela kuituta.

• Mueze licinceho hakutokwahala. Mwakona kueza licinceho kwa tomahanyo yamina, inge cwalo nako yemutanda hamuituta kamba litaba zemuketa kuituta. Nto ya butokwa hahulu haki fomuitutela, nako yemutanda, kamba zemuituta, kono ki kuezanga cwalo kamita.

Kuba ni tomahanyo ya kuitutanga kamita kwalutusa luli. Kulutusa kutiisa hahulu silikani saluna ni Jehova, kueza likatulo zende, ni kuikutwa kukatuluha.—Josh. 1:8.