1-2. Ki ifi memo yafa Jehova kwa batanga bahae babasepahala?

 MUUNGA cwañi Jehova? Mwendi mukali, ‘Jehova ki Ndate, Mulimu waka, ni Mulikanaaka.’ Kunani malumbatina kamba manzwi amañwi emukona kuitusisa hamuama ku Jehova. Nihakulicwalo, kana hape muikutwa kuli mubaenyi bahae?

² Mulena Davida naabapanyize silikani sesi mwahalaa Jehova ni batanga bahae babasepahala kwa silikani sesibanga mwahalaa mutu ni baenyi bahae. Naabuzize kuli: “Jehova, ki mañi yakona kuba muenyi mwa tende yahao? Ki mañi yakona kuyaha fa lilundu lahao lelikenile?” (Samu 15:1) Timana ye iluluta kuli lwakona kuba baenyi ba Jehova, ili kutalusa kuba balikani bahae. Kaniti luli, yeo ki memo yende hahulu yezwa ku Jehova!

JEHOVA UBATA KULI LUBE BAENYI BAHAE

3. Ki mañi muenyi wa Jehova wapili, mi Jehova ni muenyi yo nebaikutwile cwañi?

³ Kwa makalelo, Jehova naali anosi. Kono ka nako yeñwi aamuhela Mwanaa hae wa mweli mwa tende yahae ya swanisezo. Jehova naatabile hahulu hanaaamuhezi muenyi wahae wapili. Bibele italusa kuli Jehova ‘naalata hahulu’ mwanaa hae. Mi muenyi wahae wapili ‘naatabile fapilaa Jehova kamita.’—Liprov. 8:30.

4. Ki bo mañi bane bamemilwe kuli babe baenyi mwa tende ya Jehova hasamulaho?

⁴ Hasamulaho, Jehova abupa mangeloi, ili kuamema kuli ni ona abe baenyi mwa tende yahae. Bibele ibiza mangeloi kuli ki “bana ba Mulimu” mi ibonisa kuli atabile kuba ni Jehova. (Jobo 38:7; Dan. 7:10) Ka lilimo zeñata, balikani ba Jehova neli feela libupiwa za moya zenepila ni yena kwa lihalimu. Hasamulaho, abupa batu mi ni bona nebakona kuba baenyi mwa  tende yahae. Hamulaho wa nako, babañwi ba batu bane babile baenyi ba Jehova neli Enoke, Nuwe, Abrahama, ni Jobo. Batanga ba Mulimu bane basepahala bao, bataluswa kuli neli balikani ba Mulimu, kamba kuli nebazamaile ni “Mulimu wa niti.”—Gen. 5:24; 6:9; Jobo 29:4; Isa. 41:8.

5. Luitutañi kwa bupolofita bobu kwa Ezekiele 37:​26, 27?

⁵ Ka lilimo zeñata, Jehova uzwezipili kumema balikani bahae kuli babe baenyi mwa tende yahae. (Mubale Ezekiele 37:​26, 27.) Ka mutala, mwa bupolofita bwa Ezekiele luituta kuli Mulimu ubata luli kuli batanga bahae babasepahala babe ni silikani sesitiile ni yena. Usepisa kueza “ni bona tumelelano ya kozo.” Bupolofita bo buama kwa nako, ili yeo batu babanani sepo ya kuyo pila kwa lihalimu ni batu babanani sepo ya kuto pila fa lifasi bakaba hamoho mwa tende yahae ya swanisezo sina “mutapi ulimuñwi.” (Joa. 10:16) Taba yeo isweli yaezahala!

MULIMU WALUBABALELA KUSINA TABA NI KOLUPILA

6. Mutu ukona kuba cwañi muenyi mwa tende ya Jehova, mi tende yeo ikona kufumaneha kai?

⁶ Mwa linako zene iñolwa Bibele, tende neiitusiswa kwa kupumula ni kusileleza mutu kwa lika zecwale ka silami, moya, ni pula. Mutu hamemiwa mwa tende ya mutu yomuñwi naalibelelanga kuli naakababalelwa hande. Haluneela bupilo bwaluna ku Jehova, luba baenyi mwa tende yahae ya swanisezo. (Samu 61:4) Luikola lico zeñata za kwa moya ni kuba ni silikani sesinde ni batu babañwi bababile baenyi ba Jehova. Tende yahae ya swanisezo haifumanehi feela mwa sibaka silisiñwi. Mwendi nemuile kwa naha isili kuli muyo fumaneha kwa Mukopano omutuna oipitezi mi nemukopani ni batu babañwi babanani tabo kabakala kuba mwa tende ya Mulimu. Tende ya Jehova ifumaneha kai ni kai kaufela kobafumaneha batanga bahae babasepahala.—Sin. 21:3.

7. Ki kabakalañi halukona kubulela kuli batanga ba Jehova babasepahala babashwile basali baenyi mwa tende yahae? (Mubone ni siswaniso.)

⁷ Kucwañi ka za batanga ba Mulimu babasepahala babashwile? Kana kwaswanela kubulela kuli basali baenyi mwa tende ya Jehova? Eni! Ki kabakalañi halukona kubulela cwalo? Kakuli Jehova usa bahupula hande hahulu, mane ku yena kuswana feela inge kuli basapila. Jesu naabulezi kuli: “Haili ka za kuli babashwile bakazuha, nihaiba Mushe naazibahalize cwalo mwa taba ya sicacani sa miutwa, hanaabizize Jehova kuli ki ‘Mulimu wa Abrahama ni Mulimu wa Isaka ni Mulimu wa  Jakobo.’ Haki Mulimu wa babashwile, kono ki wa babapila, kakuli ku yena, kaufelaa bona bapila.”—Luka 20:​37, 38.

LIMBUYOTI ZELUIKOLA NI BUIKALABELO BOLUNANI BONA KABAKALA KUBA BAENYI MWA TENDE YA JEHOVA

8. Ki limbuyoti mañi zebaikola baenyi ba Jehova kabakala kuba mwa tende yahae?

⁸ Sina feela tende ya luli haikona kuba sibaka mwakupumulela ni kusileleza mutu kwa lika zecwale ka lizazi, moya, ni pula, tende ya Jehova ni yona isileleza baenyi bahae kwa lika zekona kusinya silikani sabona ni yena ni kubafa sepo yende ya lika za kwapili. Haiba luzwelapili kuba ni silikani sesitiile ni Jehova, Satani haana kukona kulupaleliswa kufumana bupilo bobusa feli. (Samu 31:23; 1 Joa. 3:8) Mwa lifasi lelinca, Jehova ukazwelapili kusileleza balikani bahae babasepahala kwa lika zekona kusinya silikani sabona ni yena ni kwa lifu.—Sin. 21:4.

9. Ki lika mañi zabata Jehova kuli baenyi bahae baeze?

⁹ Ki tohonolo yetuna luli kuba muenyi mwa tende ya Jehova ni kuzwelapili kuba ni silikani sesitiile ni yena. Ki lika mañi zeluswanela kueza kuli luzwelepili kuba baenyi mwa tende yahae? Haiba mutu yomuñwi amimemela kwa ndu yahae, mwendi mukatabela kuziba zabata kuli mueze. Ka mutala, mwendi ukabata kuli mutubule makatulo amina pili musika kena kale mwa ndu, mi mwendi mukaeza cwalo. Ka mukwa oswana, lubata kuziba zatokwa Jehova kwa batu kaufela bababata kuzwelapili kuba baenyi mwa tende yahae. Lilato laluna ku Jehova lilususueza kueza molukonela kaufela kuli ‘lumutabise ka kutala.’ (Makolo. 1:10) Ki niti kuli Jehova ki mulikanaa luna, kono hape ki Mulimu waluna ni Ndataa luna; kacwalo, luswanela kumukuteka. (Samu 25:14) Haluswaneli kulibala taba yeo, mi luswanela kuzwelapili kumukuteka. Kueza cwalo kuka lutusa kusaeza lika zasatabeli. Kaniti luli, lubata kuzwelapili kuzamaya “ka buikokobezo ni Mulimu” waluna!—Mika 6:8.

JEHOVA NAASEBELISANI NI MAISILAELE KUSINA KETULULO

10-11. Mwanaasebelisanezi Jehova ni Maisilaele mwa lihalaupa la Sinai kubonisa cwañi kuli haana ketululo?

¹⁰ Jehova usebelisananga hande ni balikani bahae kusina ketululo. (Maro. 2:11) Mwanaasebelisanezi Jehova ni Maisilaele mwa lihalaupa la Sinai, kukona kulutusa kulemuha kuli haana ketululo.

¹¹ Jehova hasaalukuluzi batu bahae mwa buhapiwa mwa Egepita, naaketile baprisita kuli basebeleze kwa tabernakele. Mi Malivi bona nebaketilwe kuli batuse ka kueza misebezi yemiñwi yeneeziwa kwa tabernakele. Kana Jehova naababalelanga feela hande batu bane basebeleza kwa tabernakele kamba bane batomanga litende zabona bukaufi ni yona, kufita batu babañwi kaufela? Batili! Jehova haana ketululo.

12. Jehova naabonisize cwañi baenyi bahae, bona Maisilaele, kuli haana ketululo? (Exoda 40:38) (Mubone ni siswaniso.)

¹² Maisilaele kaufela nebakona kuba ni silikani sesinde ni Jehova, kusina taba ni kuli nebasebeleza kwa tabernakele kamba kuli nebatomezi litende zabona bukaufi ni yona kamba kutokwa. Ka mutala, Jehova naaboni teñi kuli sicaba kaufela saiponela lilu leliyemi nonga ni mulilo oyemi nonga zenebanga fahalimwaa tabernakele. (Mubale Exoda 40:38.) Lilu hane linanuhanga ni kuliba kwa sibaka sesiñwi, nihaiba batu bane batomezi litende zabona kwahule ni tabernakele nebakona kulibona mi nebakona kulonga lika zabona, kuyahulula litende zabona, ni kuzamaelela ni  sicaba kaufela. (Num. 9:​15-23) Sicaba kaufela nesikona kuutwa mulumo omutuna wa litolombita zepeli za silivera ili one uli sisupo sa kuli batu kaufela bafunduke. (Num. 10:2) Kwaiponahalela hande kuli kupila feela bukaufi ni tabernakele nesi bupaki bone bubonisa kuli mutu unani silikani sesinde ni Jehova. Kono Maisilaele kaufela nebakona kuba baenyi mwa tende ya Jehova ni kuba ni buikolwiso bwa kuli naaka baetelela ni kubasileleza. Ka mukwa oswana, ni luna kacenu Jehova walulata, kulubabalela, ni kulusileleza, kusina taba ni kolupila.

MWABONISEZA JEHOVA KULI HAANA KETULULO

13. Ki nzila ifi yeñwi yeo Jehova abonisa ka yona kuli haana ketululo?

¹³ Batanga ba Mulimu babañwi kacenu bapila bukaufi ni Ofisi yetuna yezamaisa musebezi waluna mwa lifasi kaufela kamba bukaufi ni ofisi ya mutai. Mane babañwi basebeleza fa libaka zeo. Kabakaleo, mizwale ni likaizeli bao bakona kutusa mwa misebezi yeshutana-shutana yeezwa fa libaka zeo, ni kusebelisana ni mizwale babaetelela. Babañwi basebeza sina baokameli ba mupotoloho kamba ba mwa mufuta omuñwi wa sebelezo yeipitezi ya nako kaufela. Nihaikaba kuli ka nako ya cwale hamuyo mwa sebelezo ya nako kaufela, mukolwe kuli mu baenyi mwa tende ya Jehova, mi Jehova walata baenyi bahae kaufela. Mi ubabalela mañi ni mañi wabona. (1 Pit. 5:7) Batu ba Mulimu kaufela baamuhela lico za kwa moya, mi wabaetelela ni kubasileleza.

14. Ki ufi mutala omuñwi obonisa kuli Jehova haana ketululo kwa baenyi bahae?

¹⁴ Mutala omuñwi obonisa kuli Jehova haana ketululo kwa baenyi bahae kikuli ukonahalisize kuli mañi ni mañi mwa lifasi kaufela abe ni kolo ya kuipalela Bibele. Kwa makalelo, Mañolo A Kenile naañozwi mwa lipuo zetaalu, ili Siheberu, Siarami, ni Sigerike. Kana batu babakona kubala Bibele mwa lipuo zeo banani silikani sesitiile ni Jehova kufita babasa koni kuibala mwa lipuo zeo? Batili!—Mat. 11:25.

15. Ki nto mañi yebonisa kuli Jehova haana ketululo? (Mubone ni siswaniso.)

 ¹⁵ Jehova haasika lumema ka libaka la kuli luitutile hahulu kamba kutokwa, kamba kuli lwaziba lipuo za kwa makalelo zene liitusisizwe kwa kuñola Bibele. Kono uzibahalize butali bwahae kwa batu kaufela ibe kuli baitutile hahulu kamba kutokwa. Linzwi lahae, yona Bibele, litolokilwe mwa lipuo zeñata-ñata, ili kufa batu kaufela kolo ya kutusiwa ki lituto ze mwateñi ni kuziba zekona kubatusa kuba balikani bahae.—2 Tim. 3:​16, 17.

MUZWELEPILI KUBA BAENYI MWA TENDE YA JEHOVA

16. Ka kuya ka Likezo 10:​34, 35, ki lika mañi zeluswanela kueza kuli luzwelepili kuba baenyi mwa tende ya Jehova?

¹⁶ Ki tohonolo yetuna kuba baenyi mwa tende ya Jehova ya swanisezo. Unani hahulu sishemo, lilato, ni kamuhelo, kufita mutu ufi kamba ufi. Hape haana ketululo, mi uamuhela batu kaufela kusina taba ni kobapila, simuluho yabona, kuli baitutile kamba kutokwa, mubala wa litalo labona, puo yabona, lilimo zabona, kamba kuli ki baana kamba basali. Kono ki batu feela babautwa Jehova babakona kuba baenyi mwa tende yahae.—Mubale Likezo 10:​34, 35.

17. Ki kakai koluka fumana litaba zeñwi ka za kuba muenyi mwa tende ya Jehova?

¹⁷ Kwa Samu 15:​1, Davida naabuzize kuli: “Jehova, ki mañi yakona kuba muenyi mwa tende yahao? Ki mañi yakona kuyaha fa lilundu lahao lelikenile?” Muñoli wa lisamu yo naasusumelizwe kualaba lipuzo zeo. Mwa taba yetatama, lukanyakisisa zeñwi za lika zeluswanela kueza kuli lutabise Jehova ni kuzwelapili kuba balikani bahae.