1-2. Ki ifi nzila yende hahulu yelukona kubala ni kuituta ka yona Bibele? Mufe mutala.

 LUUNGE kuli munahana za kuleka ndu. Ki lika mañi zene mukatabela kubona pili musika anga kale muhato wo? Kana ki siswaniso sesibonisa feela kalulo iliñwi ya ndu yeo? Kusina kukakanya, nemuka tabela kuya luli kwa ndu yeo kuli muyo ibona ni kuipotoloha-potoloha, kukena mwahali kuli mutatube mizuzu yayona, ni kutatuba likalulo kaufela za ndu yeo. Mwendi mane mukatabela kutatuba ni milalo ya ndu yeo kuli muzibe mone iyahezwi. Kaniti luli, mukatabela kubona likalulo kaufela za ndu yeo yemubata kuleka.

² Lwakona kueza nto yeswana halubala ni kuituta Bibele. Caziba yomuñwi wa litaba za Bibele naabapanyize Bibele kwa “muyaho omutuna, ili omutelele ni onani mutomo oile hahulu mwa mubu.” Kacwalo, ki lika mañi zekona kulutusa kuziba hande litaba kaufela ze mwa Bibele? Haiba muibala ka kumata-mata, mukaituta feela “litaba za matatekelo zezwa ku Mulimu.” (Maheb. 5:12) Sina feela hamutokwa kukena mwa ndu kuli muizibe hande, mutokwa kuituta Bibele ka tokomelo kuli muiutwisise hande. Nzila yende hahulu ya kuituta ka yona Bibele, ki kubona moliswalisanela litaba ze mwa likalulo za yona zeshutana-shutana. Muikataze kuutwisisa litaba za niti zemulumela ni libaka hamuli lumela.

3. Muapositola Paulusi naasusuelize Bakreste sina yena kuezañi, mi ki kabakalañi? (Maefese 3:​14-19)

 ³ Kuli luutwisise Linzwi la Mulimu ka kutala, luswanela kuituta litaba zetungile za mwa Bibele. Muapositola Paulusi naasusuelize mizwale ni likaizeli bahae kuituta Linzwi la Mulimu ka tukufalelo ilikuli bakone kuutwisisa “fokukuma bupala ni butelele ni bupahamo ni butungi” bwa niti. Mi kueza cwalo nekuka batusa ‘kutoma mibisi ni kutiya’ mwa tumelo. (Mubale Maefese 3:​14-19.) Ni luna lutokwa kueza nto yeswana. Halunyakisiseñi molukona kuitutela ka tokomelo Linzwi la Mulimu kuli lukone kuliutwisisa hande.

4. Ki lika mañi zelukona kueza kuli lutiise silikani saluna ni Jehova? Mufe mitala.

⁴ Ka kuba Bakreste, halubati kuutwisisa feela lituto za matatekelo za mwa Bibele. Ka kutusiwa ki moya okenile wa Mulimu, lubata kuituta “nihaiba zetungile za Mulimu.” (1 Makor. 2:​9, 10) Mwakona kukala ka kuituta taba yeñwi ka tokomelo ilikuli mube ni silikani sesitiile ni Jehova. Ka mutala, mwakona kubatisisa mo Mulimu naaboniselize lilato lahae kwa batanga bahae ba kwamulaho, ni mo taba yeo iboniseza kuli wamilata ni mina. Hape mwakona kuituta ka za mo Jehova naabatela Maisilaele kumulapelela ni kubona mwabatela kuli lu mulapelele kacenu. Kamba mwakona kuituta ka butungi ka za bupolofita bwanaatalelelize Jesu hanaali fa lifasi.

5. Kana kunani taba yemubata kuituta ka tokomelo ka nako ya tuto yamina ya ka butu?

⁵ Batu babañwi babaitutanga Bibele ka tukufalelo, nebakupilwe kutalusa litaba zetungile zene bakatabela kubatisisa mwa Linzwi la Mulimu. Zeñwi za likalabo zene bafile likolohanyizwe mwa mbokisi yeli, “ Litaba Zekona Kuitutiwa ka Nako ya Tuto ya ka Butu.” Mwakona kuba ni tabo haiba muituta litaba zecwalo ka kuitusisa Watch Tower Publications Index kamba Buka ya Lipatisiso ya Lipaki za Jehova. Kuituta litaba zetungile za mwa Bibele kwakona kutiisa tumelo yamina ni kumitusa kufumana “zibo ya kuziba Mulimu.” (Liprov. 2:​4, 5) Ka nako ya cwale, halunyakisiseñi litaba  zetungile za mwa Bibele zelukona kuituta ka tokomelo.

6. (a) Mufe mutala obonisa libaka mulelo wa Jehova haukondanga kamita. (b) Ki kabakalañi halukona kubulela kuli mulelo wa Jehova ka za batu ni lifasi ki wa “kamita”? (Maefese 3:11)

⁶ Ka mutala, halunyakisiseñi zeibulela Bibele ka za mulelo wa Mulimu. Jehova haaswani ni batu babaketanga nzila iliñwi feela kuli ibalibise kwa sibaka sebabata kuya ku sona. Kono bakona kupalelwa kuyo fita kwa sibaka seo haiba batibelwa ki nto yeñwi mwa nzila. Ka kushutana, mulelo wa Jehova ona uswana ni sibaka seo luli. Uezize kale katulo ya sibaka kwaya, kono wakona kuitusisa linzila zeshutana-shutana kuli ayo fita kwateñi. Kwatabisa kuziba kuli Jehova uzwezipili kupatulula “mulelo wahae wa kamita” mwa Bibele hanyinyani-hanyinyani. (Maef. 3:11) Jehova wakona kuketa kuitusisa nzila ifi kamba ifi kuli apete mulelo wahae, kakuli “utahisize kuli lika kaufela liezwe ka kuya ka mulelo wahae.” (Liprov. 16:4) Mi zezwa mwa lika zaeza likaina kuya kuile. Mulelo wa Jehova ki ufi, mi ki licinceho mañi zaezize kuli apete mulelo wo?

7. Batu bapili hane bakwenuhezi Jehova, ki licinceho mañi zanaaezize kuli mulelo wahae utalelezwe? (Mateu 25:34)

⁷ Mulimu naataluselize batu bapili mulelo wahae ka za bona. Naabataluselize kuli, “mupepe mi muate, mutaze lifasi mi mubuse fahalimwaa lona, mi mube ni maata fahalimwaa . . . libupiwa zepila kaufela” fa lifasi. (Gen. 1:28) Bo Adama ni Eva hane bakwenuhezi Mulimu ni kutahiseza batu sibi, mulelo wa Jehova neusika cinca. Naacincize feela mwanaaka petela mulelo wo. Honafo feela, alukisa kutoma Mubuso kwa lihalimu one ukapeta mulelo wahae wa kwa makalelo ka za batu ni lifasi. (Mubale Mateu 25:34.) Ka nako yahae yeswanela, Jehova ka lilato naalumile Mwanaa hae wa mweli kuli atahe fa lifasi kuto luta batu za Mubuso wo ni kufa bupilo bwahae kuli aluliulule kwa sibi ni lifu. Hasamulaho, Jesu naazusizwe kwa bafu ni kukutela kwa lihalimu kuli ayo busa sina Mulena wa Mubuso wa Mulimu. Kono kunani lika zeñata zelukona kunahanisisa ka za mulelo wa Mulimu.

8. (a) Ki taba mañi yetuna yebulezwi mwa Bibele kaufela? (b) Sina mokutaluselizwe kwa Maefese 1:​8-11, ki ufi mulelo omutuna wa Jehova? (Mubone siswaniso sesi fa kava.)

⁸ Taba yetuna yebulezwi mwa Bibele kaufela ki ya kuli libizo la Jehova lika keniswa ka kutala haakapeta Mulelo wahae ka za lifasi ka kuitusisa Mubuso wahae obusiwa ki Kreste. Mulelo wa Jehova haukoni kucinciwa. Usepisize kuli ukaeza lika kaufela sina mwalibulelezi. (Isa. 46:​10, 11; Maheb. 6:​17, 18) Hamulaho wa nako, lifasi likaba paradaisi mokuka pila batu babapetahalile, ili babalukile babasimuluha ku Adama ni Eva, mi ‘bakaikola bupilo kuya kuile.’ (Samu 22:26) Kono zeo haki zona feela zaakapeta Jehova. Mulelo wahae omutuna ki kuswalisanisa libupiwa zahae kaufela zebutali, kwa lihalimu ni fa lifasi. Mi libupiwa kaufela zebutali likayemela ka kutala bubusi bwa Jehova. (Mubale Maefese 1:​8-11.) Kana hamukomokiswi ki nzila yende yeo Jehova apeta ka yona mulelo wahae?

9. Kubala Bibele kukona kulutusa cwañi kuziba zekaezahala kwapili?

⁹ Halunyakisiseñi bupolofita bwanaabulezi Jehova mwa simu ya Edeni, bobuñozwi kwa Genese 3:15. b Bupolofita bo nebubulezi za lika zeneka ezahala hamulaho wa lilimo zeñata  ili zeneka peta mulelo wahae. Ka mutala, Mulimu naabulelezi Abrahama kuli hamulaho wa lilimo zeñata, yomuñwi wa bana bahae naakaba Kreste. (Gen. 22:​15-18) Mi ka silimo sa 33 C.E., Jesu naalumilwe kwa lisito, sina mone kupolofitezwi. (Lik. 3:​13-15) Nto ya mafelelezo mwa bupolofita bo, ili kupyatiwa kwa toho ya Satani, ikaezahala hamulaho wa lilimo zefitelela 1,000. (Sin. 20:​7-10) Mi Bibele ipatulula litaba zeñata ka za zekaezahala sitoyo sesi mwahalaa lifasi la Satani ni kopano ya Jehova hasika fita fa masetela.

10. (a) Ki likezahalo mañi zetuha liezahala? (b) Lukona kuitukiseza cwañi mwa munahana ni mwa pilu? (Mubone litaluso ze kwatasi.)

¹⁰ Munahane ka za likezahalo zeipitezi zepolofitilwe mwa Bibele. Sapili, macaba akahuweleza kuli: “Kozo ni buiketo!” (1 Mates. 5:​2, 3) Mi ñalelwa yetuna ikakalisa “ka sipundumukela” macaba haakalwanisa bulapeli bwa buhata. (Sin. 17:16) Hamulaho wa fo, mwendi kukaba ni sisupo sesiipitezi sesibonisa “Mwanaa mutu hataha fa malu a lihalimu ka maata ni ka kanya yetuna.” (Mat. 24:30) Jesu ukaatula batu kaufela, ni kubaketahanya sina mulisana mwaketelanga lingu mwahalaa lipuli. (Mat. 25:​31-33, 46) Kono Satani ukazwelapili kulwanisa Jehova. Kabakala sitoyo sahae, ukatahisa kuli linaha zekaswalisana hamoho, zona zeibiza Bibele kuli Gogo wa kwa naha ya Magogo, lilwanise balapeli ba Jehova ba niti. (Ezek. 38:​2, 10, 11) Nakonyana kuzwa foika kalela ñalelwa yetuna, Bakreste babatozizwe babakaba fa lifasi ka nako yeo, bakaangelwa kwa lihalimu kuli bayo swalisana ni Kreste ni mpi yahae ya kwa lihalimu kulwana mwa ndwa ya Armagedoni, mi ndwa yeo ikaba ona mafelelezo a ñalelwa yetuna. c (Mat. 24:31; Sin. 16:​14, 16) Mi Puso ya Kreste ya Lilimo ze 1,000 fahalimwaa lifasi ikakalisa.—Sin. 20:6.

11. Sepo ya kupila kuya kuile ikona kuama cwañi bupilo bwamina? (Mubone ni siswaniso.)

¹¹ Cwale munahane zekaezahala hamulaho wa lilimo ze 1,000. Bibele ibulela kuli Mubupi waluna “mane ubeile ni nako ya kamita mwa lipilu [zaluna].” (Muek. 3:11) Munahane taba  yeo moika amela silikani samina ni Jehova. Buka ya Mu Sutelele ku Jehova, fa likepe 319, ilutaluseza taba yetabisa ye, yeli: “Hase lupilile ka lilimo ze mianda-nda, likiti-kiti, niheba ze bolule-lule, kamba zefitelela bolule-lule lukaziba zeñata hahulu ka za Jehova Mulimu kufita zeluziba cwale. Kono lukaikutwa kuli kusanani lika zeñata zekomokisa za kuituta. . . . Bupilo bobusa feli bukatabisa kufita molunahanela—mi kusutelela hahulu ku Jehova kukaba kalulo yateñi kamita yetusa hahulu.” Kono ka nako ya cwale, ki lika mañi zeñwi zelukona kubatisisa halunze luzwelapili kuituta Linzwi la Mulimu?

12. Lukona kuutwisisa cwañi ze mwa mahalimu? Mufe mutala.

¹² Bibele ilutaluseza litaba lisikai ka za mokuutwahalela kuba fapilaa Jehova “mwa libaka za kwahalimu.” (Isa. 33:5) Bibele ilutaluseza litaba zekomokisa ka za Jehova ni kalulo ya kwa lihalimu ya kopano yahae. (Isa. 6:​1-4; Dan. 7:​9, 10; Sin. 4:​1-6) Ka mutala, lwakona kubala ka za lika zekomokisa zanaaboni Ezekiele ka nako yeo ‘mahalimu naakwaluluhile mi akala kubona lipono zezwa ku Mulimu.’—Ezek. 1:1.

13. Sina mokutaluselizwe kwa Maheberu 4:​14-16, muikutwa cwañi ka za musebezi wasweli kueza Jesu kwa lihalimu?

¹³ Hape munahane musebezi waeza Jesu kwa lihalimu ka kuba Mulenaa luna ni Muprisita Yapahami yanani mukekecima. Ka yena lwakona kuatumela “kwa lubona lwa sishemo sa Mulimu” ka tapelo ni kukupa kuboniswa sishemo ni kutusiwa “ka nako yeswanela.” (Mubale Maheberu 4:​14-16.) Lizazi haliswaneli kulikela lusika nahanisisa zaluezelize Jehova ni Jesu ni zebasweli kuluezeza kuzwelela kwa mahalimu. Lilato leba lubonisa liswanela kulususueza kuba ni tukufalelo  mwa sebelezo yaluna ku Mulimu.—2 Makor. 5:​14, 15.

14. Ki ifi yeñwi ya linzila zende hahulu zelukona kubonisa ka zona buitebuho bwaluna ku Jehova ni Jesu? (Mubone ni maswaniso.)

¹⁴ Yeñwi ya linzila zende hahulu zelukona kubonisa ka zona buitebuho bwaluna ku Mulimu ni Mwanaa hae, ki ka kuikataza kutusa babañwi kuli babe Lipaki za Jehova ni kuli babe balutiwa ba Jesu. (Mat. 28:​19, 20) Zeo ki zona zanaaezize muapositola Paulusi kabakala buitebuho bwahae ku Mulimu ni Kreste. Naaziba kuli tato ya Jehova kikuli “batu ba mufuta kaufela bapiliswe mi babe ni zibo yenepahezi ya kuziba niti.” (1 Tim. 2:​3, 4) Naasebelize ka taata mwa bukombwa kuli atuse batu babañata, ilikuli akone “kupilisa babañwi ka mokukonahalela kaufela.”—1 Makor. 9:​22, 23.

15. Ka kuya ka Samu 1:​2, ki lika mañi zeka lutusa kuba ni tabo?

¹⁵ Muñoli yomuñwi wa lisamu naatalusize mutu yanani tabo, ili ya kondisa, kuli ki mutu ‘yatabela mulao wa Jehova mi waunahanisisa, musihali ni busihu.’ (Samu 1:​1-3) Mutoloki yomuñwi wa Bibele yabizwa Joseph Rotherham, naabulezi cwana ka za liñolo le mwa buka yahae yebizwa Studies in the Psalms kuli, mutu uswanela “kutabela hahulu ketelelo ya Mulimu kuli mane wakona kuibata, kuituta ka za yona, ni kutanda nako yeñata inzaa nahanisisa za ketelelo yeo.” Hape naaekelize kuli: “Haiba lizazi lilikela mutu asika bala Bibele, uzibe hasika itusisa hande lizazi leo.” Mwakona kutabela kuituta Bibele haiba muikataza kulemuha litaba kaufela za butokwa ze mwateñi ni moliswalisanela. Kaniti luli, kwatabisa kuituta Linzwi la Mulimu ka tokomelo!

16. Lukanyakisisañi mwa taba yetatama?

¹⁶ Litaba za niti zaluluta Jehova mwa Linzwi lahae ki zende mi lwakona kuliutwisisa. Mwa taba yetatama, lukanyakisisa yeñwi ya litaba za niti zetungile, ili tempele ya Jehova yetuna ya kwa moya, yanaatalusize Paulusi mwa liñolo lahae kwa Bakreste ba Maheberu. Haike kuituta taba yeo kumituse kuba ni tabo.